Gaur, abenduaren 28an, LAB, UGT, CCOO eta ESK sindikatuek akordio bat lortu dute Garbialdi enpresarekin. Akordio honek 2010. urtetik langileek jasandako soldata izozketari eta horren harira piztutako gatazkari amaiera ipiniko lioke. Behin betiko sinadura langileek baimendu beharko dute hurrengo egunetan ospatuko den asanblada batean.
Akordioak Udalhitzeko 6. mailarekiko ekiparazioa onartu egiten du 2018-2021 urte bitartean. Enpresak urtarrilaren 1ean %2,4ko igoera aplikatu behar izango du langileen soldatetan eta 2018rako akordatu den %1,2ko soldata igoeragatik sortu diren atzerapenak ordaindu. 2020. urteko soldata igoera %1,8koa izango da eta 2021ekoa, %2,34koa.
Gainera, nominaren kontzeptu guztien gainean aplikatuko diren igoera hauez gain, langileek urtean 225 euroko osagarri berri bat jasoko dute 2020. urtetik aurrera.
Eskubide sozialei dagokienez, enpresak urtero asumitzen duen errebisio ginekologikoa asumitzen jarraituko du, eta, horrez gain, langileek urtean zehar zubi batetaz disfrutatuko dute opor egunetatik deskontatu barik.
Langileen aldarrikapen nagusia Udalhitzeko 6. mailako soldata ekiparazioa zen, hau da, udaletxeetako garbiketa langile propioek irabazten duten beste irabaztea, eta horrek %6,54ko soldata igoera suposatzen zuen. Hainbat hilabeteetan zehar enpresak %0,3ko igoera baino ez zuen eskaintzen. Estrategia argia zuen: langileak nekarazi, negoziazioa luzatu eta finean, hitzarmen honen desagerpena eragin.
Baina, duela urtebete baino gehiago, langileek kalera irtetzea eta mobilizazioak piztea erabaki zuten. Urte honetan 50 protesta baino gehiago antolatu dituzte, baita 6 egunetako greba ere. Asteartero, bilkura ospatzen zela aprobetxatuz, bere lanabesak altxatu dituzte Foru Jauregiaren aurrean.
Bizkaiko Foru Aldundiko garbitzaileek, hainbat urtetan zehar, sektorearentzat erreferentziazkoa den hitzarmen bat izan dute; euren antolakuntza eta borroka nekaezinari esker erreferentzialtasuna berreskuratzea, hitzarmena berritzea eta euren soldata-baldintzak hobetzea lortu dute.
LABen iritziz, gatazka honek ondorio argi bat uzten digu: borroka egiteak balio duela. Hori dela eta, langile guztiak goraipatu nahi ditugu, dena kontran zegoela ematen zuenean borrokari eutsi egin diotelako, aurrera egitea aukera bakarra dela erakutsiz.