Gaur, ekintza baten bitartez, LABeko kideok Donostiako Antigua auzoan Iberdrolak duen bezeroen arretarako bulego bat okupatu eta bertako argindarra herritarren esku jarri dugu. Oligopolio elektrikoak langileon pobretze energetikoan duen erantzukizuna salatu eta datozen egunotan deitutako mobilizazioetan parte hartzeko deia egin nahi izan dugu horrela.
Sistema kapitalista krisian dago, eta, gainera, planetaren muga biofisikoekin topo egiten ari da. Sindemiak azkarturiko krisi honetan elite ekonomikoek aberasten jarraitu nahi dute, eta, horretarako, langileok are eta pobreago eta prekarioago behar gaituzte. Argindarraren prezioaren igoera adibiderik agerikoena bihurtu zaigu. Iberdrola bezalako enpresen irabaziak gorantza doaz, pobrezia energetikoa hedatzen duten bitartean.
Energia, bermatu beharreko eskubidea da, eta bizitzeko energia modu jasangarrian eskuratzeko aukerak bermatua beharko luke. Horretarako, oligopolio energetikoari boterea mugatu behar zaio eta sektore energetikoaren jabetza eta kontrol publikoan oinarrituko den sistema energetiko propioa eraiki, ezinbestekoa den trantsizio energetikorako tresna izan behar duena, gainera; beharrezkoa ez den energia kontsumoa murriztu eta energia berriztagarri deszentralizatuak garatuz. Norabide horretan, elektriketatik desentxufatu eta eta energia burujabetzan oinarritutako proiektuak indartzeko apustua egiten dugu.
Gaurko ekimena FSMko (Federación Sindical Mundial) gainontzeko sindikatuekin egindako elkarlanaren emaitza da. Halaber, LAB sindikatutik kalean mobilizazio soziala indartzekoa ezinbestekotasuna azpimarratu nahi dugu. Horregatik, dei egiten dugu datozen egunetarako deituta dauden ekimen eta mobilizazioetan parte hartzera:
-Urriaren 8an, 22:00etatik 22:30era, Estaturik gabeko nazioetako alderdi soberanistek deitutako itzalaldia eta kazerolada.
-Hainbat eragile sozialek deitutako hiriburuetako mobilizazioak:
Urriaren 7an, 19.00etan Bilbon, “No al tarifazo de la luz. Energia eskubidea da. Publifikazioa orain” leloarekin.
Urriaren 8an, 18.00etan, Iruñean, “Argi dugu. Vuestros beneficios, nuestra oscuridad” leloarekin.
Urriaren 15ean, 19:00etan, Gasteizen, “Gure pobrezia eta naturaren explioa zuen aberastasuna” leloarekin.
Amaitzeko, langileon lan- eta bizi- baldintzen aurkako egiturazko eraso honen aurrean, eta datozen hilabeteetan hartuko diren erabakiak baldintzatzeko, mobilizazio orokorragoak sustatzeko garaia dela uste dugu. Denok batera mahai gainean kolpe bat jotzeko garaia da: orain Greba Orokorra!