Jaurlaritzak EAEko Lanbide Heziketako bikaintasuna harrotasunez erakusten badu ere, sektoreko arazoak konpontzeko inolako urratsik ematen ez duela salatu du gaur LAB sindikatuak, Kursaalean Lanbide Heziketako Nazioarteko Kongresuaren inaugurazio-ekitaldian. Besteak beste, irakasle teknikoen egoera salatu dugu: 260 langileren etorkizuna kolokan egon liteke lehenbailehen irtenbidea eskaini ezean.
Gaur eta bihar, “Lanbide heziketa gizatasunaren, teknologiaren eta adimenaren aroaren aurrean” izenburuko biltzarrean, EAEko Lanbide Heziketaren goi-maila eta kalitatea goraipatuko den bitartean, EAEko Hezkuntza Sailak ahaztu egiten du bikaintasun horren atzean pertsonak daudela, horien artean, irtenbidea behar duten irakasle teknikoak.
Irakasle teknikoen arazoari irtenbidea emateko asmoz, uztailaren 28an batu ginen langileen Blanca Guerrero kudeaketa zuzendari eta Nikolas Sagarzazu Lanbide Heziketako plangintza eta antolakuntza arduradunekin. Orduan, irtenbide proposamen bat jaso genuen 16 espezialitate ez-singularretako ordezko irakasle teknikoentzat (2019an itxialdietan egon ziren irakasle teknikoen kolektiboko kideak), baita, langile guztiontzako soluzio egokiak erdiesteko asmoz irailean egitekoa zen bilera baterako proposamena.
Bilera horren deialdia heltzen ez zela eta irakasle teknikoen arazoaren urgentzia ikusita, gaia lantzeko saiakera gehiago egin ditu LABek, baina ez dugu erantzunik jaso. Horretaz gainera, ez dugu berririk jaso formakuntza pedagogikoari buruz (CAP delakoa) eta ez da LEParen inguruko proposamenik jarri mahai gainean.
LABetik argi dugu gatazkaren konponbidea ezin dela gehiago atzeratu. Izan ere, Jokin Bildarratz Hezkuntza Sailburuak erakutsitako asmoen artean, 2023rako Lanbide Heziketarako LEP deialdia badago, oraindik zalantza batzuk erantzuteke daude: LOMLOEk ezarritako marko berrian, zer gertatzen da LEPa gainditzen ez duten irakasleekin? Zerrendetatik kanpo geratuko lirateke? LABetik langile guztien alde egingo dugu berriz ere, eta deialdietan guztiak aurkeztu ahal izatea gutxieneko baldintza gisa borrokatuko dugu.
Testuinguru honetan, Lanbide Heziketako Nazioarteko Kongresuaren aurrean “Bikaintasunik ez langilerik gabe! Irakasle teknikoak borrokan” lemapean kontzentrazioa egin dugu, oso argi baitugu Hezkuntza Sailak ezin duela heziketaren bikaintasunaz aritu 260 langileren etorkizuna jokoan jartzen duen bitartean. Mezu argia adierazten jarraituko dugu bai Lakuan, bai eskoletan, eta baita edozein kongresutan ere. Langile guztiak gara beharrezkoak!