CEN patronalak CCOO eta UGTrekin akordio interprofesionala negoziatzeari uko egin ondoren, eta Parlamentuak lege-proposamena hartu ez ondoren, Nafarroako Gobernuari bide politikoa berreskuratzea eskatuko diogu bi sindikatuok.
LAB eta ELA sindikatuok bilera eskatu diogu Maria Txibite Nafarroako lehendakariari, Nafarroan 1.500 euroko gutxieneko soldata (LGS) propioa lortzeko beharrezko ekimen politiko eta instituzionalak abian jar ditzan eskatzeko.
Bi sindikatuon ustez, Nafarroako langileek eta jendarteak urte osoan egindako mobilizazioen eta martxoaren 17ko greba orokorraren ondoren, ezin da aldarrikapen hau bazterrean utzi. Are gutxiago, CEN patronalak, CCOO eta UGTrekin batera, akordio interprofesional baten negoziazioa baztertu duenean. Horren bidez, sindikatuek eta patronalak Nafarroako gutxieneko soldataren inguruko akordio propio bat bilatzea proposatu zuten, baina CENek ez du bide hori negoziatzeko borondaterik erakutsi.
Nafarroako Parlamentuko mahaiak herri ekimen legegilea atzera bota ondoren, Nafarroako Parlamentuak EH Bilduk eta Geroa Baik aurkeztutako eta helburu bera zuen lege-proposamena aintzat ez hartzea erabaki zuen. Ekimenaren helburua Langileen Estatutuaren 27. artikulua aldatzea zen, autonomia erkidegoek beren errealitate sozial eta ekonomikoari egokitutako gutxieneko soldata ezarri ahal izan zezaten. Horrela, Nafarroak bere LGS propioa ezartzeko behar duen eskumena lortzeko bidea irekiko litzateke.
LAB eta ELAren iritziz, Maria Txibiteri ekimen politikoa hartzea dagokio. Nafarroako Gobernuak ezin du alde batera utzi 1.500 euroko LGS propioaren aldeko aldarrikapena, eta lehendakariak PSNren jarrera aldarazi eta CEN patronala interpelatu behar du, negoziazio kolektiboaren bidez akordioetara bultzatuz.
1.500 euroko gutxieneko soldata propioak babes sozial eta sindikala du
Ez da berria 1.500 euroko gutxieneko soldata propioaren aldarrikapena. LAB, ELA, Steilas, Hiru eta Etxaldek dinamika sozial eta sindikala garatu dugu hilabeteotan, eta aldarrikapena CEN patronalari helarazi zioten eta Nafarroako Parlamentura eraman zuten.
Martxoaren 17ko greba orokorrak ere aldarrikapen horren inguruan mobilizatzeko gaitasuna erakutsi zuen. Horregatik, sindikatuok uste dugu Nafarroako Gobernuak orain lidergo politikoa hartu eta beharrezko urratsak eman behar dituela.
LABek eta ELAk Txibiteri eskatuko diogu bileran Nafarroak bere gutxieneko soldata erabakitzeko gaitasuna izan dezan beharrezko ekimenak abian jartzeko. Helburua argia da: Nafarroan 1.500 euroko LGS propioa ezartzeko bidea irekitzea. Nafarroak bere LGS propioa izan arte lanean jarraituko dute sindikatuek.