LABek jakin ahal izan du CCOO eta UGTk Espainiako Metalgintzako Hitzarmena sinatu dutela. LABetik akordio hori gaitzetsi nahi dugu, eta eskatzen dugu hitzarmen hori Hego Euskal Herrian ez aplikatzea. Lan erreforma indarrean egotearen ondorio nagusienetariko bat estatuko hitzarmenek lehentasuna izatea da, Espainiako patronala den Confemetalek, CCOO eta UGTk pozik baliatu duten bezala.
Ez sinistekoa da LABentzat Estatuko Metaleko negoziaketa horretan, bilera bakarrean erdietsi izana akordioa, eta, sinatu dutela jakinarazi duten arren, sinatutako testua publiko ez egin izana. Zer ezkutatu nahi dute? Hau da, zer inposatuko diete metalgintzako langileei? Gardentasun ezan eta menpekotasunean oinarritzen den sindikalismoaren beste adibide bat da sinadura hau.
Edukiak publiko egiten dituztenean baloratuko dugu xehetasun gehiagorekin, baina onartezina deritzogu Estatu mailako akordio horrek, CCOOk eta UGTk azaldu duten bezala, hitzarmenaren atal batzuk beretzat gordetzea, hau da, herrialdeko eremutan eduki hori negoziatzea debekatzen dute. Lan harremanak eta negoziazio kolektiboa bertan erabakitzea aldarrikatzen dugu, horretarako eskubidea dugulako, eta estatuko hitzarmenek prekarizazioa dakartelako.
Hemen lan egin, hemen erabaki! Egin dezagun Euskal Herrian Madrilen egin ezin dena.