2025-07-08
HomeEkintza Soziala'Su txikien itsasoa', trantsizio ekosoziala elkarlanean jorratzeko

‘Su txikien itsasoa’, trantsizio ekosoziala elkarlanean jorratzeko

Trantsizio ekosozialaren bidean, irailaren 30ean Ozaetako GaraiON Sorgingunean egingo diren topaketak aurkeztu ditu Euskal Herriko Eskubide Sozialen Kartak, beste hainbat eragilerekin batera.

Su txikien Itsasoa deituriko ekimena aurkezteko elkartu gara gaur hainbat eragile. Euskal Herriko Eskubide Sozialen Karta elkarlan eta konfluentzia espazio gisa jaio zen eta egun ditugun erronkei erantzuteko ere, eragile ezberdinen arteko aliantzen garrantziaz sinetsita gaude. Horregatik jarri dugu martxan Su Txikien Itsasoa ekimena, trantsizio ekosoziala elkarrekin pentsatzeko.

Asko gara Euskal Herrian borrokan gabiltzanak, krisi ekologikoari, pobretzeari, eskubide sozialen galerari… aurre egiteko, eta feminismotik, ekologismotik, langileen eskubideak eta bizi baldintzak erdigunean jarriz, gerraren aurka eginez, bizitza bizigarrien alde eta abar luze bat, denon artean eraikitako eta denontzako trantsizio ekosozial justu bat eraikitzeko. Ekimen honen helburua guztion arteko harremanak estutzea, sinergiak sortzea eta partekatzen ditugun zoru komun eta erronken inguruan aritzea da

Su Txikien Itsasoa ekimenak Euskal Herriko eragile sozial eta sindikalen zein herri mugimenduen arteko topaketa-jardunaldi bat antolatzea proposatzen du. Zertarako? Trantsizio ekosozial justurako ardatz nagusiak eta funtsezko aldarrikapenak zeintzuk diren eztabaidatu eta zoru komuna adosteko, eta horren alde modu ahalik eta koordiantuenean eta jarraituenean egiteko agenda sozial partekatuaz aritzeko. Behar-beharrezkoa deritzogu gure arteko zoru komuna eraikitzeari, eta ekimen honek ekarpena egin nahi dio helburu horri.

Jardunaldi-topaketa irailaren 30ean egingo dugu Ozaetako GaraiON Sorgingunean, beraz data gorde, izena eman eta bertaratzera gonbidatu nahi ditugu eragile sozial, sindikal eta herri mugimendu ezberdinak eta hauen parte diren kideak.

Gainera, eztabaida prozesuan eraikitze aldera “hitz egin eta entzun” logikan oinarrituta egiten ari garen prozesuan parte hartzeko gonbita ere luzatu nahi dugu. Honen helburua eztabaidaren oinarria ahalik eta eragile gehienen artean eraikitzea da, bakoitzak ditugun egitasmo, kezka eta lan ildoetatik. Horrela, irailaren 30ean jakintza eta esperientzia horiek konpartitu, eta trantsizio ekosoziala eraikitzeko funtsezko bezala jotzen ditugun ardatzak sakondu nahi ditugu.

Hori da gaur Euskal Herriko Eskubide Sozialen Kartatik aurkeztu eta zabaldu dugun egitasmoa, Euskal Herriko eragile sozial, herri mugimendu, sindikatu edota militante sozialei irekia. Berriro diogu, sinetsita gaude su txikien itsasoa piztu behar dugula, trantsizio ekosoziala elkarrekin pentsatu, eta horren eraikuntzan elkarrekin ekiteko. Irailaren 30ean ikusiko dugu elkar!

AZKEN ALBISTEAK | ÚLTIMAS NOTICIAS

CAFeko hainbat enpresa batzordek Israelekin harreman komertzialak amaitzeko eskatu diote zuzendaritzari

CAF Beasain, CAF Irun, CAF Power & Automation, Trenasa, CAF signalling Amorebieta, CAF TE Tailerrak eta Rail Line y Geminys enpresetako batzordeekherri palestinarrarekiko elkartasuna berretsi dute, eta nazioarteko legeria errespetatzeko, giza eskubideak ez urratzeko eta Israelekin harreman komertzialak eteteko eskatu diote zuzendaritzari. LABek guztiz babesten du enpresa batzorde hauen iniziatiba.

Banketxeei eta eraikuntza enpresei diru publikoz laguntzea etxebizitza politika okerra dela salatu du LABek

Gaur, EAJren iniziatibaz, etxebizitzak erosteko abalen lerroa onartzekoa da Eusko Jaurlaritza. LABek dekretua bertan behera uzteko alegazioak egin dizkio, 2015eko Etxebizitza Legea urratzen duela...

Loiuko FCC Aqualiako langileek aurreakordio historikoa lortu dute 30 eguneko grebaren ostean

Uztailaren 4an, 30 eguneko greba mugagabearen ostean, FCC Aqualia enpresarekin aurreakordio bat lortu zuten Loiuko ur-zerbitzuko langileek. Aurreakordio horren bidez, urteetako desorekak amaitu eta...