Aste honetan hasi da berriro 13/13 sumarioaren baitan 7 euskal herritarren aurkako epaiketa Madrilen, Espainiako Auzitegi Nazionalean. Auzipetuei gure babes eta elkartasun guztia helarazi nahi diegu, eta bereziki gogoratu nahi dugu Juan Mari Jauregi LABeko kidea eta auzipetua, duela sei egun hildakoa. Izan ere, Jauregirengan eragin zuzena izan zuten 2010ean izandako atxiloketa eta jasandako tortura latzak. Sindikatuaren aldetik, gure doluminak adierazi nahi dizkiegu bere senide eta lagunei.

Datorren igandean, irailaren 12an, Donostian deitu den mobilizazioarekin bat egiten du LABek eta parte hartzeko deia egiten diegu euskal herritarrei. 13:30ean abiatuko da manifestazioa Donostiako Bulebarretik. Sindikatuko ordezkaritza zabala izango da mobilizazioan.

Euskal presoei laguntza juridiko eta soziala emateagatik fiskaltzak 77 urterainoko espetxe zigorra eskatzen du auzipetuentzat. 13/13auziazhitzegiterakoaninkomunikazio-aldikotorturasalaketak,etengabekoirregulartasunak… datozkigu gogora. Horregatik, orain baino lehen esana dugu epaiketara iritsi gabe, auzia artxibatua izan behar zuela. Auziaren beraren eta akusazioen larritasuna salatzearekin batera, eskakizun horretan berresten gara.

Lekuz kanpoko epaiketa baten aurrean gaude. Ez lehen ez orain martxan jarri behar ez lukeen epaiketa. Espainiako Estatuak gatazka politikoari irtenbide demokratiko bat eman gabe jarraitzen du. Salbuespenezko espetxe politika oraindik ez da amaitu, ezta salbuespenezko prozedura judizial eta polizialak ere. Larria bada iraganera begira jartzen gaituzten sumarioak oraindik itxita ez izatea, azken polizia operazioekin lotuta sor litezkeen berriengatik ere gure kezka adierazi nahi dugu. Errepresio bidearen amaiera eskatzen dugu.

Elkarbizitza demokratikoa eraikitzeko euskal herritar guztien eskubideak bermatzea ezinbestekoa da, guztienak, eta gisa honetako erasoek ahalegin hori zangotrabatu besterik ez dute egiten.

Auzipetuek adierazi bezala, zauriak ongi ixteko gatazkaren ondorioei heldu behar zaie, askatasunari, demokraziari, euskal jendarteari aukera berriak eman. LABetik ere horretan gaude. Salatzen, aldarrikatzen eta mobilizatzen jarraitzeko arrazoiak baditugu, beraz.