Mercedesen politika salatzeko egindako elkarretaratze bat.

Azken asteetan automozio sektorean lan etenaldiak ugaritzen ari dira. Euskal Herriko industriaren sektore garrantzitsuena da automobilgintza, eta bertako bi enpresa nagusiei eragiteaz gain (Mercedes eta Volkswagen), ehunka hornitzaileri eta azpikontratari eragiten die egoerak. EEE eskaerak ugaritzen ari dira. Geldialdi horien arrazoia Asian ekoizten diren txip falta da.

LABek salatu nahi du, beste behin ere, enpresek hartutako erabakien ondorioak langileak jasaten ari direla. Eta gainera, hori horrela izan ohi da soilik enpresa jardueran arazoak daudenean. Enpresek irabazi handiak metatzen dituztenean, automozio enpresa handiek urte luzez egin duten moduan, langileen egoerarengan ez da hobekuntzarik egon. Kontrara, lan erritmoen handitzea, azpikontratazioaren ugaritzea eta enpresa hornitzaileen prekarizazioa areagotu da. Orain, egun batzuetarako ekoizpena geldituko denean, langileek egoeraren ondorioak pairatu behar dituzte. Irabazietanez,bainagaleretanpartehartzenuztenzaielangileei.

Txip gabezia ez da soilik Asiako pandemiaren ondorio. Automozio enpresek ekoizpena mundu osoan zehar zabaldu dute, nahiz eta horrek ingurumenari egindako kaltea biderkatzen duen, irabaziak handitzeko helburuarekin. Erabaki horren ondorioak jasaten ari dira egun. Ekoizpen prozesuen birlokalizazioaren eztabaida abiatu beharreko zerbait da. Gainera, txipak egon badaude, nahiz eta automobilgintza sektorera ez diren ari bideratzen momentu honetan. Erabaki politiko-ekonomikoen ondorioa da beste sektore batzuetarako erabiltzea momentu honetan. Horregatik, uste dugu erabaki horren atzean, edo ondorioz, mundu guztian murrizketa eta lan baldintzak okertzeko saiakera egin nahi dutela.

LABek ez du onartuko egoera baliatuta enpresa nagusi, hornitzaile edo azpikontratetan murrizketarik ezartzea edo enplegua desagertzea. Unean uneko egoerei unean uneko akordioekin erantzun behar zaie, ez inposaketekin. Langileei dei egiten diegu lan baldintzen eta enpleguaren alde lan zentroetan antolatzeko.