Tuterako Ospitaleko langileek berriz ere erakutsi dute ez daudela ados, txanda berean lan berdina egin arren, soldata bera kobratzen ez duten profesionalen artean gertatzen ari diren bidegabekeriekin. Kontu hori sisteman errotuak dauden ekitate gabeko beste egoera askoren izebergaren punta besterik ez da, non kasu askotan bereizketak egiten baitira profesionalen artean, are kategoria bereko langileen artean ere.
Langileek, besteak beste, jaiegun berezien kontzeptuaren ordainketari buruz egiten duten aldarrikapena ez da berria, ez eta Tuterako Ospitaleko erreibindikazio berezi bat ere, Osasunbidea osoan gertatzen baitira horrelako bidegabekeriak. Jaiegun bereziak (Eguberriak, sanferminak, herrietako jaiegunak…) guardiako langileek bakarrik kobratzea –eta ez gainerako langileek– langileen zenbait ordezkarik negoziatutako prebenda bat da, legez ezarritako negoziazio-mahaietatik erabat kanpo adostu zutena.
Baina horrelako ordainketa-sistema diskrezionalak ez dira kolektibo batenak soilik; izan ere, askotan gertatzen da kategoria bereko bi lankidek soldata desberdinak izatea, baita ordutegi desberdinak ere, nahiz eta biek eginkizun berberak izan eta kategoria bereko lanpostuetan aritu.
LAB sindikatutik horrelako praktikak salatzen ditugu, eta, horien artean, bereziki, produktibitateen ordainketa. Izan ere, sistema hori ez da ez eraginkorra, ez bidezkoa, ez ekitatiboa.
Hemendik gure babes osoa “lan berdina, soldata berdina” aldarrikatzen duten langileei.