LABek mailaz igo du eta “Zerbitzua euskaraz” ziurtagiria jaso du, Bai Euskarari Ziurtagiriaren Elkartearen eskutik. Kongresualdi honetarako ezarri genuen helburua maila hau eskuratzea izan zen, eta bide horretan egin dugu lan azken bost urteetan. Hala, gure zerbitzu osoa euskaraz eskaini ahal izateko tresnak sortu ditugu, bitartekoak partekatu ditugu lankideekin eta eremu berrietan hausnarketak egin eta irizpide berriak adostu ditugu.
Bai Euskarari Ziurtagiriaren Elkarteko zuzendari Rober Gutierrezek eman dio ziurtagiria LABeko idazkari nagusi Ainhoa Etxaideri. Sindikatuko Euskara arduradun Edurne Larrañagak lagundu die agerraldian. Euskara normalizatzeko bidean lan mundua euskalduntzea ezinbestekoa dela nabarmendu dute hiruek, eta Bai Euskarari Ziurtagiria tresna lagungarria dela funtzionamendua euskalduntzeko: auto-diagnosia egiteko aplikazioa, erakundearen hizkuntza egoeraren jarraipena, urratsak emateko akonpainamendu zein aholkularitza…
Etxaidek adierazi du Hizkuntza Politikan LABek adostutako irizpideak betetzeko tresnak sortu ditugula, eta lanean jarraituko dugula sindikatuaren erabateko euskalduntzea lortu arte. Hainbat eskualde edo sektoretan lana euskaraz egiten dugula azaldu du, eta sindikatu osoan lana euskaraz egiteko eskubidea modu sistematizatu zein kohesionatuan bermatu bitarteko urratsak ematen jarraituko dugula berretsi du.
Euskarak ere Euskal Estatua behar du, lan mundua euskalduntzeko tresnak langileon eskura izan ditzagun eta hizkuntza politika eraginkorrak susta daitezen. Bai Euskarari ziurtagiria horren erakusle bat da. Izan ere, edozein estatuk du erakunde bat bere hizkuntza ofizialean jarduten duen ziurtatzeko baliabide propioak.