2024-02-28
HomeUncategorizedSenideek bat egin dute hezkuntza publikoko langileen aldarrikapenekin

Senideek bat egin dute hezkuntza publikoko langileen aldarrikapenekin

LAB, ELA eta Steilas sindikatuak kalera irten gara berriro, EAEko unibertsitatez kanpoko hezkuntza publikoko eta Haurreskolak Partzuergoko langileak egiten ari garen mobilizazioak direla eta. Gaurkoan, ikasleen senideek egin dute bat gure aldarrikapenekin, eta Gasteiz, Bilbo eta Donostiako hiriburuetako kaleak hartu ditugu eurekin batera. Izan ere, haien seme eta alabei ere zuzenean eragiten die aspaldian pairatzen ditugun murrizketa neurriek eta lege inposizioek.

LABeko idazkari nagusi Ainhoa Etxaidek hartu du hitza Bilbon, Jesusen Bihotzetik abiatutako manifestazioa hasi aurretik. Etxaidek benetako negoziazio mahai bat behingoz ireki dezatela aldarrikatu du, "kalitatea okertzen ari delako eta hezkuntza sistema atzera egiten ari delako, eta herri honetan aukera badago kalitatezko sistema bat eraikitzeko". LABeko idazkari nagusiak adierazi du ez gaudela hitz egiten ari lan gatazka huts batetaz, "herri honen etorkizunerako ezinbestekoa den hezkuntza sistema publikoari buruz baizik. Ez gaude irakasle batzuen soldataz hitz egiten ari, irakasle, hezitzaile, jangelako langile, garbitzaile, sukaldarien baldintzetaz baizik. Lan baldintzetaz, eta baita hauek sistemaren kalitatearekin duten loturaz ere".

Hezkuntzan behingoz inbertitu dezatela berretsi du, "Jaurlaritzak langileen bizkar gainean berari dagokiona uzteaz gain, uko egiten diolako baliabide gehiago ezartzeari". Azkenik, mobilizazioetan parte hartzeko deia luzatu du, "asko dagoelako jokoan eta ziur gaudelako, herritarren babesarekin, Jaurlaritzak behar diren inbertsioak egingo dituela azkenean".

Asteartean beste greba egun bat gauzatuko dugu, aste honetan eta martxoaren 22an egindakoen ondoren.
 

 

 

AZKEN ALBISTEAK | ĂšLTIMAS NOTICIAS

Eraso judizialen aurrean, euskaraz lan egin eta bizitzeko eskubidearen aldeko mobilizazioetan parte hartzera dei egiten dugu

Botere judizialak euskararen aurka egiten dituen erasoek ez dute etenik. Azken egunotan, Bizkaiko Foru Aldundiaren enplegu publikorako hautaketa-prozeduren aurkako bi epairen berri izan dugu. Deialdi horiei lotutako hizkuntza-eskakizunen betekizuna da zalantzan jartzen dena. Diskriminatzailetzat jotzen da euskara eskatzea, enplegu publikoak baldintza berdinetan eskuratzeko oinarrizko eskubidea urratzen duela argudiatuta. Sententzia zentzugabekeria juridiko izugarria da, inolako oinarri juridikorik gabe euskararen normalizazioaren aurka egitea du helburu bakarra.

Amazonen ereduak dakarrena salatu dugu BECen, greba egunen bezperan

Paketatze, banaketa eta garraio ereduak dituzte hizpide gaur eta bihar bitartean BECen, Barakaldon. Robotizazio, digitalizazio eta automatizazioak sortzen duen lan-eredua definitzen ari dira eta badugu eredu horretan adierazlea den ezaguna: Amazon multinazionala. Lan eredu berriak indarrez inposatu eta edozein hobekuntza negoziatzera uko egiten dion enpresa.

Osakidetzako zuzendaritzak ez du bermatzen EAGak irekita izatea oinarrizko plantillarekin

Atzo sindikatuetako ordezkariak, langileak eta herritarrak bildu ginen, EAGetan bizi dugun egoera salatzeko.