Langile askok egin dute bat EAEko sektore publikoan gaur deitutako grebarekin, lehen orduko datuek baieztatu dutenez. Komunikabideetan eta garraio publikoan, esaterako, greba ia erabatekoa izaten ari da lehen orduetan; horren erakusle, irrati eta telebista publikoan gutxieneko zerbitzuak ezarri izana.
Hezkuntzan ere askok egin dute bat deialdiarekin, eremu ez unibertsitarioan zein unibertsitarioan. Grebarako eskubidea dueenen artean jarraipen handia izaten ari dela diote lehen zantzuek. Udal eta foru erakundeetan ere gaurko egunaren aurretik genituen datuak berresten ari dira, eta, beraz, jarraipen oso zabala izaten ari dela baieztatu daiteke.
Osakidetzan, aldiz, gutxieneko zerbitzuek erabat baldintzatuko dute grebaren jarraipena. Izan ere, milaka langileri ukatu zaio greba egiteko eskubidea, eta eremu askotan gutxieneko zerbitzuak %100ekoak dira. Gaueko txandan, adibidez, ia langile bakar batek ere ez du greba egiteko aukerarik izan.
Administrazio orokorrean eta justizian jarraipena zabala izaten ari den arren, aldakorra da herrialdearen eta esparruaren arabera. Datuek erakusten dute Espainiako Estatuko administrazio esparruan jarraipena apalagoa izaten ari dela EAEkoan baino.
Grebalariak kalean daude goizean goizetik, eta zutabeak egin dituzte Bilbon, Donostian eta Gasteizen, hirigune horietako sarrera-irteera nagusietan. 11:30ean, berriz, manifestazioak egingo dituzte; Bilbon, Eusko Jaurlaritzatik; Donostian, Bulebarretik; eta Gasteizen, Eusko Legebiltzarretik.
