2024-05-23
HomeEkintza SindikalaLABek berriz eskatu du Volvo eta Sunsundeguiren arteko akordioan hobekuntzak sartzea langileen...

LABek berriz eskatu du Volvo eta Sunsundeguiren arteko akordioan hobekuntzak sartzea langileen lan baldintzetan

Gaur Sunsundeguira joan da, Altsasun autobusak egiten dituen enpresara, Volvoko lehendakariordea, bi enpresek maiatzean lortu zuten akordioaren barruan, modelo berrien fabrikazioaren berri emateko. Iragarkiak duen garrantziaren erakusgarri, Nafarroako Gobernuko lehendakaria eta bi kontseilari ere joan dira Altsasura. LAB sindikatuak aukera hau baliatu nahi du berriz ere enpresa modernizatzeko plan bat eskatzeko, langileen lan baldintzak nabarmen hobetuko dituena.

LABek kezkaturik ikusten du Altsasuko lantegiaren egoera; izan ere, lan karga handitu arren, Sunsundeguik ez ditu oraindik bere antolakuntza arazoak konpondu, eta aparteko orduetara jotzen du produktua aurrera ateratzeko. Gainera, lan-karga handitzearekin batera, langile gehiago behar izan dira, eta horiei formakuntza eman behar zaie, bai bete beharreko eginkizunetan, bai laneko segurtasun eta osasun gaietan. Ildo horretan, sindikatu honek hilabeteak daramatza hainbat segurtasun eta osasun alderditarako irtenbideak eskatzen, oraindik konpondu ez direnak. Gogoratu behar da aurten bi lan istripu larri izan direla enpresan.

2022an Enpresa Batzordeak (LAB barne) eta Sunsundeguik akordioa lortu zuten, lantegiaren egonkortasuna eta produktibitatea bermatzeko. Baina, gaur egun, ez dira lortu akordio hartan adierazitako helburuak eta, beraz, plantilla ez da akordioan bildutako hobekuntza ekonomikoak jasotzen ari, hala nola produktibitate-plusa kobratzea. Enpresak langileei bakarrik egotzi die egoera horren errua, eta LABek zera erantzun nahi dio:

  • Lantegia produktiboagoa izatea eta ezarritako helburuak betetzea enpresaren ardura baino ez da eta, beraz, behar diren inbertsioak egin behar ditu dauden arazoak antolatu eta konpontzeko. LABendako beharrezkoa da plantaren modernizazioa eta langileen segurtasuna eta osasuna bermatuko dituzten lan modu berriak. Inbertsioak, neurriak eta exekuzio egutegia bilduko dituen plana behar da.
  • 2009ko krisialditik, langileek bere gain hartu dutela lantegiaren bideragarritasunaren zama, oraindik ahaztu ez diren murrizketa eta kaleratzeen bidez. Volvo eta Sunsundeguiren arteko akordioa, Gobernuarekiko lankidetza barne, positiboa da Sunsundeguiren etorkizunerako, inguruko enplegurako eta Nafarroa osorako. Baina akordio horrek kontuan hartu behar du langileen lan eta ekonomia baldintzen hobekuntza, orain arte hitzartutakoaren gainetik. Izan ere, gogoratu behar da 2022ko akordioak larrialdi egoera bati erantzuten ziola, Volvoren akordioarekin eta lan kargaren handitzearekin hobetu beharko litzatekeena.

AZKEN ALBISTEAK | ÚLTIMAS NOTICIAS

Euskal hitzarmenen lehentasuna bermatuta, esparru propioaren eraikuntzan urrats gehiago eskatu ditugu

Aurreko erredakzioa hobetzeko LABetik egin genituen eskarietako batzuk aintzat hartu dira; ondorioz, Euskal Herriko langileek bertako hitzarmenen lehentasuna bermatu ahal izango dute.

Osakidetzako zuzendaritzak eta Osasun Sailak ikuztegiak publifikatzeari ekin behar diote, LABek lortutako EAEko Justizia Auzitegi Nagusiaren epaiaren ondoren

Eskaera formal bat aurkeztu dugu Osasun Sailean, Osakidetzan ikuztegi lanak publifikatzeko behar diren elkarrizketei ekiteko asmoz.

Gasteizko Francisco Vitoria institutuan lan-osasun arloko prebentzioa bermatzeko exijitu dugu

Ikastetxeko langileek eta sindikatuok elkarretaratzea egin dugu Gasteizko Hezkuntza Ordezkaritzaren aurrean. Hezkuntza Sailak eta ikastetxeko zuzendaritzak uko egin diote arrisku psikosozialen ebaluazioa egiteari.