Euskal gehiengo sindikalak elkarretaratzeak egin ditu Arabako, Bizkaiko eta Gipuzkoako hiriburuetan, Sare antolakundearekin batera. Etzidamu, hilak 23, LABek beste mobilizazio bat gauzatuko du Iruñean. Berandu baino lehen euskal preso guztiak etxera ekartzea lortuko dugu presio sozialari esker.
Sarek Izan Bidea dinamika abiatu zuenetik hamaika izan dira sindikalgintzatik aurrera eraman ditugun mobilizazioak. Dinamika hura lantegietaraino eraman genuen, eta gaur salbuespen legediak dakartzan urraketak salatu eta egungo espetxe politika aldatzearen beharra aldarrikatu dugu.
LABeko koordinatzaile orokorrak, Garbiñe Aranburuk, Donostiako hitzorduan parte hartu du, eta bertan nabarmendu nahi izan du azkenaldian presoen eskubideen alorrean eman diren aurrerapausoak adostasun instituzional, politiko, sindikal eta sozialek nahiz mobilizazioen bidez eginiko presio sozialak ekarri dituztela. Horiei esker, presoen Euskal Herriratzea lortu da, baita lehen graduarekin amaitzea ere.
Oraindik, dena den, salbuespenezko neurriekin behingoz amaitu behar dela aldarrikatu dugu gaurko elkarretaratzeetan. “Ziur gaude bai presoak beraiek egiten ari diren bideari esker eta bai presio sozialari eta mobilizazioari esker berandu baino lehen guztiak etxera ekartzea lortuko dugula”, baieztatu du Garbiñe Aranburuk.
