Pasaiako Portuan gehiengoa duen LAB sindikatua harrituta dago arrain lonja berriko azken eskandaluaren aurrean, Donostiako epaitegi baten aginpean Guardia Zibila miaketa egitera sartzeaz, hedabide ezberdinetan irakurritakoarekin, informazio zehatzik ematen gabe eta EAJ eta PPren arteko talka elektoralista zikinarekin. Azken hauek dira portuko langileek jasaten dituzten murrizketa zein prekarietate egoeraren erantzule nagusiak, Madriletik aginduta, baina egungo lehendakari den Ricardo Peñak ezarritako neurriekin (EAJk berak zuzenean izendatua).

Zentzugabekeriaz beteriko egoera honen aurrean, gaur ospatu den kontseilura proposamen hauek eraman ditugu:

1.- Ikerketa judizialak aurrera egiten badu, Administrazio Kontseilua bera akusazio partikular moduan aurkeztea proposatuko dugu. Eskandalu honetan galtzaile nagusiak portuko langileak eta zergadunak orokorrean garela uste dugu. Krisiaren aitzakipean ezartzen dizkiguten murrizketa eta austeritate planekin, 2014ean amaituta beharko lukeen eta egun geldi dagoen 15 milioi eurotako obra publiko baten aurrekontuan egondako desfasearen aurrean, beste alde batera begiratzen dute betikoek. Azkenean lehendakariak berak zuloa 26 milioira igoko dela aitortu du, likidazio datarik gabe gainera. Eskandalu hutsa iruditzen zaigu diru publikoarekin horrela jokatzea. Berriro ere batzuen inkonpetentzia (lapurreta ez denean), betiko berdinek ordaindu behar izango dugu. Eta sindikatu hau ez dago horretarako prest.

2.- Gertatutakoa argitzeko eskatuko dugu. Edonor erortzen dela ere, ikerketa muturreino eraman dezatela. Ez dugu onartuko diru publikoarekin horrela jokatzea, eta eskularru zuridun lapurren ustelkeria kasu berri baten aurrean gauden jakin nahi dugu. Guzti hau euren burua eredugarritzat aurkezten duten horien eskutik dator, EAJ eta Ricardo Peña buru. Honengatik, eta prozesuan azaldu duten jarreragatik, portuko langileak murrizketa eta lan prekarietate egoeran daudelarik, eskandaluaren inguruan dauden zuzendaritzako kide guztien kargu-uztea eskatuko dugu. Aski da! Euren erantzukizunak onartzeko garaia iritsi da.

3.- Azkenik, status quoan horretan dauden alderdiei (kontseiluko kide direnak) langileei iruzur egiteari uztea eskatuko diegu, arduren aurrean ez dezatela kea saldu, beti bezala negligentzia, irregulartasun eta balizko delituak azeratu eta faltsuan ixtea denean, gainera judizialki onartzera behartuta daudenean. Eta gainera, beraien txantxuilo eta praktika okerren esku-hartzaile egiten gaituzte langile zein hiritarroi.
 

Eskandalu honen aurrean gure ahots kritiko zein koherentea entzun dadin, Pasaiako Portuko ateetan elkartu gara gaur “Langile zein portuaren defentsan, prekarietatea eta iruzurrik ez! PNV-PP-PSOE arduradunak” lelopean.

Aurretik esana dugu, baina ez gara errepikatzeaz aspertuko. LABetik muturreraino iker dadin exijitzen dugu, behar den neurri eta gardentasunarekin, balizko okerreko praktika hauen erantzuleek har ditzatela zuzenean erantzukizunak; baina batez ere, aldatu daitezela lan egiteko ohiturak, arlo soziala kontuan har dezatela, lan prekarietatearekin amaitu dezagun, lanpostu finkoak sortu daitezen, lan hitzarmenak eguneratu ditzaten eta soldatak duindu. 

LAB sindikatua Pasaiako Portua puntako portu konpetitibo eta produktibo batean bilakatu dadin lan egiteko prest dago. Inguruko bizilagunek herri eta portuaren arteko bizikidetzaren alde lan egin dezaten. Baina egungo zuzendaritza horretarako prest al dago?