Korrikaren 20. ekitaldia aurkeztu zuten atzo, osteguna, Bilbon. LABeko ordezkariak bertan izan ginen, ELA eta STEILAS sindikatuko kideekin batera. Euskalgintzako, alderdi politikoetako eta beste hainbat arlotako ordezkariak ere bildu ziren ekitaldian. Datorren ostegunean ekingo dio ibilbideari Korrikak, Otxandiotik
Martxoaren 30etik apirilaren 9a bitartean ibiliko da Korrika Euskal Herrian zehar, "BatZuk" leloarekin. Otxandion hasi eta Iruñean bukatuko da.
Nahiz eta 2008 eta 2016 urteetan Hego Euskal Herriko ekonomiak aberastasun maila bera izan duen, aberastasun horren banaketan ezberdintasun nabarmenak daude:
SORTUTAKO ABERASTASUNETIK ZENBAT BIDERATZEN DA SOLDATETARA? (BPGren ehunekoa)
Iturria: LABek egina, Estatistikako Institutu Nazionaleko datuetan oinarrituta
Eusko Jaurlaritzak egoera hori zuzenduko ez duten aurrekontuak egitea erabaki du. Zergatik?
LABen hitzaldi zikloa Bilbora iritsi da ostegunean, Ainhoa Etxaideren solasaldiarekin. Burujabetza, aliantzak, langileen borroka, feminismoa… gai asko izan ditu hizpide sindikatuko idazkari nagusiak, Hika Ateneoan egindako ekitaldian. Elkarrizketa Ekhiñe Atorrasagsti eta Maite Asensio kazetariek gidatu dute, eta gogoeta mamitsuak utzi ditu. Biltzar Nagusiaren atarian gauden honetan, Etxaidek nabarmendu du LABen erronka nagusienetako bat burujabetza prozesuari bultzada ematea dela.
“LABek etorkizuna du, gure ibilbidea egiteko gaitasuna dugu elkarlanen beharrik gabe, baina benetan burujabetza prozesu bat abian jarri nahi badugu, patronalari gure etorkizuna erabakitzeko eskubidea kendu nahi badiogu, herri berri bat eraikitzeko benetako eragilea izan nahi badugu, elkarlana beharrezkoa dugu. Aliantzarik gabe ez da egoera iraultzeko aukerarik egongo”.
Ainhoa Etxaideren hitzak dira hauek, aliantzei buruzko galderari erantzuteko unean esandakoak. Hain zuzen ere, burujabetza prozesua azkartzea da LABen erronketako bat, bizi eta lan baldintzak hobetzeko bidean, eta ELArekin eta helburu hori duten eragileen arteko elkarlana abian dela nabarmendu du; joan den ostiralean Gasteizen egindako ekitaldia adibide, Euskal Herriko Eskubide Sozialen Karta ardatz.
Estatus politikoaren eztabaida irekita dagoela berretsi du LABeko idazkari nagusiak: “Estatus politiko berri batera goazela begibistakoa da, hori ezin da ekidin. Momentu historiko honetan, subiranistek zer egingo duten da gakoa. Estatus politiko berri bat definituko da datozen hilabeteetan. EAJk zer egin nahi duen ikusten ari gara: eztabaida guztia Legebiltzarrera mugatzen ari da, bere neurrira egiteko, Euskal Herriaren neurrira egin beharrean. Guk gure helburuak finkatu ditugu: Estatu bat nahi dugu, ahalik eta gaitasun gehien emango digun estatus politiko bat. Horretara goaz. Nola lortuko dugu hori? Estatus hori EAJrekin adostuz? Ez. Horrek esan nahi du herri honetan ezin dela herri akordiorik egin? Lortu daiteke, baina behartu egiten badiegu”, azaldu du.
Confebaskek klase proiektu bat inposatu duela salatu du, herri proiektu bat edukitzea inoiz baino garrantzitsuagoa denean. “Confebaski herri proiektu indartsu batekin egin behar zaio aurre, eta herri proiektu hori ezin da oinarritu Confebaskek berak defendatzen dituen interesetan. Eta EAJk interes horiek berak defendatzen ditu”, zehaztu du.
Hainbat gai jorratu ditu Etxaidek, idazkari nagusi gisa ia hamarkada bat bete duenean. Urte horietan krisi ekonomikoak eta erreformek gogorki kolpatu dute euskal langileria, eta euskal sindikalgintzaren aurkako enbata ere ez da nolanahikoa izan. Etxaideren gidaritzapean, ekaitz horri aurre egin dio LABek, eta ez hori bakarrik, garai berri bat irekitzeko oinarriak ezarri ditu, datorrena gure garaia, langileon garaia, izan dadin. Etxaidek lekukoa pasako du 9. Biltzar Nagusian, etxeko lanak eginda. Bilboko solasaldiak agur kutsua izan du horrexegatik. Facebook-en ikus daiteke elkarrizketa bere osotasunean.
Chrysallis erakundeak ume transexualek bizi duten errealitatea jendarteak ikustarazteko egindako kanpaina eta gero, Hazteoir Madrilgo eskuin muturreko erakunde ultrakatolikoak, gorrotoa bultzatzen duen kanpaina jarri zuen martxan. Ekimen honen gorroto mezua autobus laranja batean ibili da Estatuko hainbat lekutatik, eta Euskal Herrira ere heldu da. Iruñeako kaleetan egon zen eta eragile sozial eta sindikalek modu irmoan erantzun genuen; hurrengo egunean, Gasteizen egongo zela zabaldu arren, ez zen Arabako hiriburutik agertu. Hurrengo asteetan Euskal Herrian agertu daiteke berriro, eta beraz, prest egon behar gara erantzuteko.
Autobusak testu hau darama: “mutilek zakila daukate”, “neskek alua daukate” “ez zaitzatela engainatu”, “gizon jaiotzen bazara, gizona zara” edo “emakumea bazara, izaten jarraituko duzu”. Oso ondo zaindu dute beraien mezua teknikoki salagarria izan ez dadin, baina aurrekariak dituzte, gure ikastetxeetara aniztasun sexualaren aurkako mezu guztiz argiak zeuzkan gidak bidali zituzten, zabaldu zitezen.
Erakunde honek egungo sistema ez aldatzea babesten du, aldaketari dio beldurra, eta horren aurrean, gure lana, diskurtso hori desmontatzea izan behar da. Oinarrizko eskubidea da generoa askatasunez aukeratzea, eta edozein adinetan horrela izan dadin bermatu behar dugu, bai ikastetxeetan, baita nagusiagoetan ere, lantokietan.
Apirilaren 1erako deitutako manifestaziora joateko deia luzatu du gaur Euskal Herriko Eskubide Sozialen Kartak, propaganda eguna antolatu baitu mobilizazio hori iragartzeko. Bilbon izango da hitzordua, 17:30ean, Jesusen Bihotzetik abiatuta. Deialdiak hainbat eragileren babesa jaso du, LABenarena barne.
Euskal Herriko Eskubide Sozialen Karta osatzen dugun eragile eta sindikatuok ekitaldi bat egin genuen ostiralean Gasteizen, Mendizorrotza pilotalekuan, Eusko Jaurlaritzaren aurrekontu neoliberalak salatzeko. Hurrengio hitzordua apirilaren 1a izango da. Egun horretan, Bilboko kaleak hartzera deitu dugu, eskubide sozialen defentsan eta babes sozialerako euskal sistema duin bat aldarrikatzeko.
Orain arte Kutxabankek gehien jota lau bat urtez kontratatzen zuen pertsona bera jarraikako behin- behineko kontratuekin, antzinatasunagatiko diskriminazio-salaketak saihesteko. Hemendik aurrera, bi urtera inguratzen direnean emango die ostikada seguruenik. Ala inork uste al du Zuzendaritza honek mailaz igoko dituela behin-behinekoak izanik? Emaitza: langile gazteenen prekarizazioa, zerbitzuaren kalitate txarragoa eta laneko estres handiagoa.
Egoera honetan, eskarmentu handiagoko langileak ere ez dira onik aterako, desberdintasunek jomuga erraz bihurtzen dituztelako. Auzoko etxea sutan dago jada, eta haizea gogor dabil.
Kutxabankeko Zuzendaritzak irudimen gabezia larria erakusten du. Iragan hurbileko akatsei -batez ere CajaSurren zorigaiztoko erosketari- buelta emateko gai ez eta bankuaren aktibo guztiak likidatzen ari da, baita langileria ere.
Horretarako, CCOOen eta Pixkanaka-Kaskariren estatu-mailako gehiengoaz baliatzen ari da, gainbehera doazen bi sindikatu leial. 2017 eta 2018rako “trantsiziozko hitzarmen” bat saldu digute. Adierazgarria da 2018 bukaeran Kutxabankeko hauteskunde sindikalak ere izango direla. Hitzarmena garaiz salatuz gero, Kutxabankek bi sindikatu hauen ordezkaritza ziurtatuko du hurrengo hitzarmenari begira, hauteskundeetan gehiengoa galtzen badute ere. Hau guztia premia ekonomikoaren baitan (2020an bukatzen da Kutxabanken jabetza mantentzeko funtsak hornitzeko epea) eta konpondu gabeko arazo askorekin: batez ere, hiru euskal kutxen presazko bankarizazioak ekarri zituen desberdintasunak eta lekualdaketa behartuak.
Hau da, hitzarmen honekin langileak suzirian sartu gaituzte eta piroteknikaria kontratatu dute. Baina txistearen erantzuna agindu dugu. Nork irabazi du? Espainiako banka handiak, pozez zoratzen baitago euskal finantzetan geratuko den zuloarekin.
Lehen Arreta oinarrizkoa dela defendatzen dugu LABetik. Osakidetza utzikeriagatik hiltzen uzten ari dela ohartarazi dugu behin baino gehiagotan, eta, egoera larri hori irudikatzeko, ekintza sinboliko bat egin genuen Barakaldon, joan den otsailean, Errontegiko osasun etxean. Hain zuzen ere, osasun zentroak bost urte baino ez ditu, baina, dagoeneko, azpiegitura arazoak ere baditu: teilatua erortzear dago, ur berorik ez dago, aldaketa geletan ez dago komunik, garajea ezin da erabili, hainbat zonaldetan kiratsa jasanezina da… Hori nahikoa ez balitz, osasun zentroak ez du bizigarritasun baimenik. Osasun etxearen erraietan izan gara, bertako egoera azaleratzeko.
Ekintza sinboliko bat egin genuen otsailaren bukaeran; Lehen Arretaren hileta irudikatu genuen, hain zuzen ere. Osakidetzaren utzikeria salatu genuen, baita LABen irakurketa plazaratu ere.
Lehenik eta behin, elkartasuna eta besarkada bat bi langileen senitarteko, gertuko eta lankideei momentu latz hauetan. Honekin batera, azpimarratu behar dugu dagoeneko 19 dira gutxienez aurten Euskal Herrian lanean hildako langileak, beraz, instituzioek lan istripuen arazoari behingoz behar bezala heltzeko garaia dela.
Michelingo kasuan istripua ez-traumatikoa izan da, baina argi esan behar dugu hauek ez direla kasualitatez gertatzen, askotan lan baldintzekin, lanean ematen diren erritmoekin, txandakako ordutegiekin eta abarrekin lotuta egoten direlako.
Aldi berean, salatu nahi dugu bihotzekoa izan zuen momentuan, goizaldeko laurak inguru, ez zegoela medikurik enpresan. Hortaz, gogorarazi nahi dugu Lan Ikuskaritzak 2012ko ebazpen batean jakinarazi ziola Michelini mediku bat egunero eta egun osoz egotearen beharra, argi azalduta, bestela ez zela osasun arreta bermatzen. Bost urte geroago hori ere bete ez duela ikusita, LABek Michelini dei egiten dio horixe betetzeko eta mediku bat enpresan momentu oro egotea, baita desfribilatzaileak jartzeko ere.
Garraiolariaren kasuan, agerian gelditzen da garraioa urtero istripu ugari eta osasun galera izaten dituen sektorea dela. LABek behin eta berriz aldarrikatu eta salatu du sektore honetan lan baldintzak, jardunaldi luzeak, itxoite denborak eta merkantzia, langileen osasunaren gainetik jartzen direla. Horregatik diogu sektore honetako lan baldintzak aldatu, kontrolatu eta zuzendu behar direla, administrazio eta enpresen aldetik.
Horregatik, baldintza egokietan dauden lanpostu duinen alde eta osasuna kentzen edo kaltetzen ez duten lanpostuen alde borrokatzen jarraituko dugu, eta prebentzioa eta langileen osasuna lehentasuna izango dituen enplegu politika baten alde.
Modu berean, dei egiten dugu salaketa eta antolatuko diren ekimen guztietan parte hartzera.
