LAB SINDIKATUA

2017/03/25 :: 6:37

Azken Eguneraketa:2017/03/24 :: 17:30

HIZKUNTZA
Hemen zaude:

Alternatiba gorpuzten jarraitzeko deia egin du Ainhoa Etxaidek, Eskubide Sozialen Kartaren eskutik

E-posta Inprimatu PDF fitxategia
Partekatu albistea

b_345_238_16777215_0___materiala_argazkiak_euskalHerria_EskubideSozialenKarta_17_03_17Gasteiz_AinhoaEtxaide.png

Euskal Herriko Eskubide Sozialen Karta osatzen dugun eragile eta sindikatuok ekitaldi bat egin dugu gaur Gasteizen, Mendizorrotza pilotalekuan, Eusko Jaurlaritzaren aurrekontu neoliberalak salatzeko. LABeko idazkari nagusi Ainhoa Etxaidek hitza hartu du, eta bestelako aurrekontuak egiteko aukera eta bidea badaudela nabarmendu du, gehiengo sozial eta sindikal bat dagoelako horren alde: "Alternatiba saretzen eta gorpuzten jarrai dezagun, Eskubide Sozialen Kartaren eskutik. Politikak aldatzeko borroka indartu dezagun, programa soziala herriz herri sozializatuz eta bertan jasotzen diren neurrien aldeko dinamikak piztuz". Apirilaren 1erako deitutako manifestaziora joateko deia luzatu du (Bilbo, 17:30ean, Jesusen Bihotzetik abiatuta), gure aldarrikapenekin plazak betetzen jarraitzeko, "Euskal Herriko politika sozialak erabakitzeko benetako parlamentua herria izatea lortu arte".

Etxaidek gogoratu du aurrekontuak ez direla ariketa tekniko bat, gobernuak hartzen duen erabaki nagusia baizik, bere proiektua zein den erakusten duelako. "2014ean, 100tik gora eragileek burujabetza ariketa bat egin eta zer nolako Euskal Herria nahi dugun marraztu genuen; proposamen kolektibo eta adostu bat gaurko errealitateari buelta emateko eta bestelako etorkizun bat eraikitzeko. Jaurlaritzak bi aukera zituen eta berea egin du: Confebasken interesen eta proiektuaren araberako aurrekontuak osatu ditu, Herriaren behar eta eskakizunak jasotzen dituen proiektu sozialaren araberako aurrekontuak egin beharrean", azaldu du.

Aurrekontu hauekin arazo sozialak okertuko direla ohartarazi du: "Hazkunde ekonomikoa ez da herrira iristen, prekarietatean eta politika neoliberaletan oinarritu delako. Aurrekontu hauek bide horretan kokatzen dira, bide horretan urrats berriak emateko prestatu dituzte".

Urrats nagusia babes neurriak murriztea izan dela salatu du; Diru-sarrerak Bermatzeko Errenta, adibide argiena. "Okerren daudenak zigortuko dituzte. Merkatuari jaten emateko aurrekontuak dira, herritarrak babesteko eta Euskal Herriarentzat egokia den garapen eredu bat ezartzeko aurrekontuak izan beharrean. Merkatuari jaten ematen bazaio, merkatuaren jabeak loditzen dira, hots, patronala, pribatizatutako eta zerbitzuen jabeak, jendartea eredua argaltzen jarraitzen duen bitartean", erantsi du Etxaidek.

b_345_259_16777215_0___materiala_argazkiak_euskalHerria_EskubideSozialenKarta_17_03_17Gasteiz_Mendizorrotza.png

Ekitaldiaren ostean, bertaratutakoek manifestazioa egin dute Gasteizko Legebiltzarreraino, “Aldaketa sozialerako, aurrekontu sozial, parte hartzaile eta burujabeen alde” leloarekin. Hain zuzen ere, Legebiltzarrean bertan erregistratu zituzten, joan den asteazkenean, Euskal Herriko Eskubide Sozialen Kartaren aldarrikapenak.

b_345_160_16777215_0___materiala_argazkiak_euskalHerria_EskubideSozialenKarta_17_03_17Gasteiz_Manifestazioa.png