Informazioaren ekoizpen egokia lortzeko proposamenean profesionaltasuna, talde-lana eta esku-sartzerik eza jasotzen du EITBKo LABek gaur parlamentuan EHBilduk gonbidatuta azaldu duen txostenean. Diagnostikoan azpimarratutako arazoak agenda propioaren falta; erredaktoreen espezializazio falta, beldurra eta prekaritatea; eta gestoreen kudeaketa sistema adiskidezkeriakoa eta bertikala izan dira. Hauek zentsurara eta autozentsurara eramaten dute, bai eta espezializaziorako eta lanbide karrerarako aukerak ukatzera ere. Txosten osoa ikusgai atxikitako dokumentuan.
Parlamentuko talde politikoak bat etorri dira LABek egindako diagnostikoarekin orokorrean, EAJ ezik. EAJ ez da bat etorri agerraldia egiteko EH Bilduk egin duen justifikazioarekin, EITBn zentsura edo kontrola dagoela alegia, eta bere iritziz albistegiak bat datoz EITBren helburuekin. Erredakzio estatutuari aipua eginez, kazetarien lana bermatuta dagoela azaldu du. Halere, argigarriena izan dena PNVren biluzketa ideologikoa izan da, «kazetariek beldurrik izatekotan kontratazioari beldurra izango dela» onartu duenean.
LABeko ordezkariek ondo argitu dute:
• Beldurra eta kontrola hain zuzen, komunikabide gehienetan bezala, kontratazio prekarioan datzala. Kontratu prekario batekin nekez egin diozu aurre zentsurari eta autozentsurari. Langile batek 17 urtetan 1.400 kontratu edukita, kalera joateko beldur izatea lojiko izan daiteke.
• Erredakzio estatutua eta kontseilua ez zirela EAJrekin inoiz adosterik izan, baizik eta hain zuzen alderdi hau boterean egon ez zenean.
• Gestore sistema bidegabeaz gain, legez kanpokoa dela epaitegiek onartu duten bezala. Ardura postuak etxeko langileekin bete behar dira kanpotik inor ekarri gabe, agintzera zein aginduak betetzera.
