-Euskal Herrian gatazkaren konponbide prozesuan aurrera egiteko urrats oso garrantzitsua da iragarpena. Konponbide integrala lortu eta gure herria bake bidean jartzeko ezinbesteko pausoa. Txalogarria da helburu horrekin gizarte zibilak bere gain hartu duen erantzukizuna eta protagonismoa. Prozesuari bultzada emateko euskal herritarron konpromisoa eta indarra ezinbestekoak ari dira izaten, erabakigarria den moduan, prozesu era ordenatuan eta bermeekin egiteko nazioarteko egiaztatzaileen lana eta inplikazioa.
-ETA erakundeak, oztopoak oztopo, aldebakarreko armagabetze prozesua aurrera eramateko harturiko erabakiarekin aurrera darrai.Orain baino lehen egindako armagabetze saiakerak burura eramatea lortu ez bada, hori espainiar zein frantziar estatuek erakutsi duten jarrera itxi eta oztopatzaileari zor zaie. Gobernu biei eskatzen diegu errespeta dezatela herri honek konponbidean aurrera egiteko duen borondatea eta erabakia.
-Dei egiten diegu, halaber, Jaurlaritzari, nafar Gobernuari, Hego Euskal Herriko Legebiltzar biei eta Ipar Euskal Herriko Lurralde-Elkargoko ordezkariei, konponbidea, bakea eta elkarbizitza lortzeko dagozkien ardura politiko-instituzionalak beren gain hartuz, armagabetzea laguntzeko eragile aktibo izan daitezen. -Euskal gatazkaren afera ez da armagabetze prozesuarekin amaitzen, nahiz hau urrats oso garrantzitsua izan bidean aurrera egiteko. Hurrengo geltokia, gatazkaren ondorioen koponbidea izango da. Urrats asko ditugu egiteko bake, elkarbizitza eta normalizazio bidean, eta urrats horietariko asko premiazkoak, ehunka euskal preso politikoen egoera kasu. Euskal erakundeen, alderdi politikoen, sindikatuen, eta batez ere gizarte zibilaren aldetik adostasunak eta kopromisoak beharrezkoak dira. LAB sindikatutik bidean aurrera egitea posible izan dadin lanean jarraituko dugu.
Euskal Herria, 2017ko martxoaren 17an