2025-12-29
Blog Page 980

Ez dugu langile borrokaren kriminalizazioa onartuko

admin
-
0
Ez dugu langile borrokaren kriminalizazioa onartuko


ALEXIS, DAVID eta IÑAKI LIBRE!
 Elkarrizketa: Iñaki Montes eta Alexis Rodríguez

Gaur, azaroak 24, hasi da JEZ enpresako Iñaki Montes eta beste pertsona batzuen aurkako epaiketa. Troikak 2014ko martxoaren 3an Bilbora egin zuen bisitaren harira egin zen protestetan atxilotu zuten Montes, eta hainbat urtetako kartzela-zigorra eskatzen dute. LABen iritziz epaiketa hau guztiz bidegabea da, eta Montesi bere elkartasuna adierazi eta honelako epaiketak salatu ditu elkarretaratze baten bidez.

Iñaki Montesi “lotsagarria” iruditzen zaio, “laguntza eta eskubideak murrizten dituzten horiek bankuei milaka miloi oparitzea". Gainera, "badakigu esleipenengatik komisioak kobratu dituzten horiek kartzelarik zapalduko ez dutela". Eta aldi berean ohartarazi du, “injustizia hori salatzeagatik kalera irten ziren pertsonak epaituak eta zigotuak” izango direla.

Montesen egoera ez da isolatua. Hain zuzen ere Troikaren aurkako mobilizazioan parte hartzea leporatzen dioten moduan, astelehenean, hilak 29, Alexis Rodríguez y David Gonzálezek epailearen aurrean aurkeztu beharko dute, TMA enpresan, enpleaguaren defentsan borrokatzeagatik. Epaitu guztiek argi dute botere politiko eta ekonomikoek langileak isilarazi nahi dituztela errepresioaren bidez eta honen aurrean langileok indarrak batu eta mobilizatzen jarraitu behar dugula.

MANIFESTAZIOA
Igande honetan, azaroak 27, manifestazioa izango da Markina-Xemeinen, Alexis eta David libre uzteko eta jazarpen sindikalaren aurka. Eguerdiko 13:00etan hasiko da Arkupetik.

 

 

 

Osakidetzan aplikatu diren murrizketetan atzera egiteko eskatu dugu

admin
-
0
Osakidetzan aplikatu diren murrizketetan atzera egiteko eskatu dugu


Gaur, hilak 24, Osakidetzako sindikatuok (SATSE, ELA, LAB, SME, CCOO, UGT eta ESK), Gasteizko Santiago Ospitalaren aurrean mobilizatu gara murrizketak salatu eta enpleguaren defentsa egiteko. Azken urteetan langileon lan baldintzen prekarizazioa ekarri duten murrizketak aplikatu dituzte Gobernu ezberdinek. Horregatik, osatzen ari den gobernu berriari Osakidetzako langileon aldarrikapenei erantzun bat emateko eskatu diegu.

Langileen eskaerek pairatzen duten prekarietatea gainditzea dute helburu. Alde batetik enplegua sortzea ezinbesteko ikusten dute. Ezin da ahaztu Osakidetzako plantillaren heren bat behin-behinekoa dela eta gaur egun lanean den langile kopurua ez dela inondik inora nahikoa kalitatezko zerbitzua eskaini ahal izateko. Beraz Osakidetzari zein gobernu berriari Europatik etorritako sententziak gauzatzeko exijitzen diogu, beharrezko diren lanpostu finkoak sortuz Osakidetzan.

Osasun publikoaren defentsan, langileek galdutako eskubideen berreskurapenean eta baldintzetan beharrezkoak diren hobekuntzetan urratsak emateko ordua dela deritzogu eta hala eskatzen diogu Gobernu berriari. Horrekin batera azken urteetan ezeztatua egon den negoziazio kolektiborako eskubidea aldarrikatzen dugu.

 

 

 

Amatasun eta aitatasun prestazioak IRPF zergan aitortzetik libre uzteko deia egin dugu

admin
-
0

Madrilgo Justizia Epaitegi Goreneko epai batek ebatzi berri du amatasun zein aitatasunagatik jasotako prestazioek IRPFan aitortuak izatetik libre egon behar dutela, Ogasunari kontzeptu horregatik jasotako dirua langileari itzultzera behartuz. Modu honetan, epaitegiak orain arte Ogasunak ezarritako irizpideen kontra egin du, eta, epaiak jurisprudentzia ezarri ez badu ere, Madrilgo erkidegoan behintzat 2012tik hona ogasunak kontzeptu honengatik jasotako dirua erreklamatzeko aukerari ateak zabaldu dizkio.

Euskal Autonomi Erkidegoan, hiru foru aldundiek 2012. urtetik aurrera Gizarte Segurantzak ordaindutako amatasun eta aitatasun prestazioak IRPFan deklaratu beharrekoak bezala ezarri zituzten, urte horretara arte Araban prestazio hauek IRPFen aitortu behar izatetik libre baitzeuden.

LABetik aldundiei dei egiten diegu Madrilgo Epaitegiko epaiak ezarritako irizpideak bere egin eta Gizarte Segurantzak ordaindutako amatasun zein aitatasun prestazioak IRPFetik libre utz ditzaten, erkidego autonomoek zein udal instituzioek kontzeptu hauengatik ematen dituzten prestazioekin egiten duten bezala.

Era berean, 2012.urtetik Gizarte Segurantzak ordaindutako amatasun edo aitatasun prestazioak jaso dituztenei kendutako dirua itzultzeko bitartekoak martxan jar ditzatela eskatzen diegu aldundiei. Norabide berean, 2012. urtetik hona amatasun edo aitatasun bajan egon direnei dagokien Ogasun Bulegoan erreklamazioa egitea gomendatzen diegu, presio neurri honek ere aldundiek hartu beharreko erabakian eragin dezaketelakoan.

Lan hitzarmen duin bat eskatu dute garbitzaileek

admin
-
0
Lan hitzarmen duin bat eskatu dute garbitzaileek

Borrokan daude Euskal Herriko Unibertsitatean eta Hezkuntza Saileko zentroetan azpikontratatutako garbitasuneko langileak. Bada, Gasteizko errektoreordetzaren aurrean elkartu dira gaur, lan hitzarmen duin baten alde protesta egiteko.

Errektoretzarako hauteskundeak dituzte gaur Euskal Herriko Unibertsitatean (EHU), eta, egun hori baliatuta, garbitzaileek protesta egitea erabaki dute Gasteizko errektoreordetzan bertan, LAB, ELA, UGT, ESK eta CCOO sindikatuek deituta. Hain zuzen ere, azpikontratatutako garbitasun arloko langileei 2014ko abenduan amaitu zitzaien hitzarmena eta, bilera ugari egin ondoren, negoziaketa erabat blokeatuta dago. Langileek lan duina eta eros-ahalmena berreskuratzea aldarrikatu dute.
 

 

 

Enplegu publiko duin eta egonkorra aldarrikatu dute Gasteizko Legebiltzarraren aurrean

admin
-
0
Enplegu publiko duin eta egonkorra aldarrikatu dute Gasteizko Legebiltzarraren aurrean

Iñigo Urkullu lehendakari aukeratu dute gaur Gasteizen. Minutu gutxi geroago, Legebiltzarraren kanpoaldean, LABek elkarretaratze bat egin du zerbitzu publikoetan egindako murrizketak salatu eta berriak egin ez ditzaten eskatzeko.

EAJ eta PSE-EE alderdiei egin die sindikatuak, gobernu akordioa sinatu duten alderdiei: “Ez dugu ahaztu behar bi hauek azken urte luzeetan zerbitzu publikoetan eta langile publikoen lan baldintzetan murrizketa handienak gauzatu dituzten alderdi nagusiak direla”. LABek nabarmendu du EAJk PPko Gobernuak Madriletik inposatutako murrizketa guztiak bere egin dituela: “Egoera honek, langile publikoen lan baldintzetan ez ezik, herritarrek jasotzen dituzten zerbitzuen kalitatean ere eragin zuzena izan du”.

Eusko Jaurlaritzako langileen artean, behin-behinekotasun tasa %35 gorakoa da. Erretiroa edo baja hartzen duten langileak hainbat kasutan ez dira ordezkatzen, eta lan pilaketak nabarmen hazi egin dira. "Bereziki kezkagarriak dira eremu batzuetan pairatzen dituzten egoerak. Lanbiden, esaterako, funtzionario eta bitartekoentzako Akordio Arautzailea eta lan kontratadunen Lan Hitzarmena erabat zaharkituta daude”, jakinarazi du sindikatuak.

Aurreikuspenak hobeak ez direla ohartarazi du LABek: “Gauza jakina da Europako Batasunak Espainiako Gobernu berriari murrizketa berriak agindu dizkiola. Horiek Estatuko aurrekontuetan izango duten eragina gutxi barru ikusiko dugu; edozein kasutan ere, Madril eta Gasteizko gobernuen arteko mimetismoa ikusita, Madrilek inposatuko dituen murrizketa berriak Gasteizko Gobernuak bere egingo dituela ziurtzat eman daiteke”, azpimarratu du sindikatuak, eta aurrekontu autonomikoan etor daitezkeen murrizketak ere ikusteko daudela adierazi du.

Hau guztiagatik, mobilizatzera deitu ditu zerbitzu publikoetako langileak, murrizketen kontra borroka dezaten.

 

 

 

Biolentzia matxistaren aurka, urrats feminista

admin
-
0
Biolentzia matxistaren aurka, urrats feminista

Biolentzia matxistak gure biziak baldintzatzen ditu. Beldurraren bitartez emakumeon eskubideak zapaldu eta bigarren mailako hiritarrak bilakatzea du helburu. Biolentziaren espresio gorena fisikoa bada ere, milaka espresio eta aurpegi ditu biolentzia matxistak. Etxean, kalean, lanean, eskolan, jaietan… matxismoaren adierazpenak pairatzen ditugu, egungo jendartean oso errotuak daudelako eta onartu egiten direlako. Honen ondorioz, egoera hauek “normaltasunez” bizitzera behartzen gaituzte, arazo indibidual gisara salduz.

Biolentzia matxista ez da modu isolatuan edo arlo pribatuan gertatzen den egoera bat, baizik eta egungo eredua kapitalista heteropatriarkala sostengatzeko ezinbesteko bitartekoa. Emakumeok menpeko behar gaituzte ereduak aurrera egin dezan.

Hortaz, biolentzia matxistari aurre egin nahi badiogu, ezinbestekoa da Euskal Herriko egungo sistema aldatu eta eredu berria eraikitzea.

Agerikoa da, arlo ezberdinetatik orain arte harturiko neurriak ez direla nahikoa izan. Ez dute inongo momentutan eredua bera zalantzan ipini eta hortaz, adabakiak besterik ez dira izan. Egoera benetan konpondu nahi badugu, muineko arazoa, hau da, kapitalismo heteropatriarkala da aldatu beharrekoa. Hau gainditu ezean, nekez lortuko dugu libre izatea.

Eta bide honetan, inoiz baino ozenago aldarrikatu nahi dugu irtenbidea soilik FEMINISMOAN SAKONTZETIK etorriko dela. Estrategia feminista indartsu baten bitartez soilik lortuko dugu, egiten ditugun borrokak jendartearen erdia baino gehiagok pairatzen ditugun zapalkuntzei aurre egitea.

Hau guztiagatik, LABen, gure borroka feminista indartuko dugu, feminismoa delako berme bakarra egingo ditugun aldaketak sexuaren araberako bereizkeriak gainditu eta aukera eta eskubide berdintasunean oinarritutako Euskal Herri berri bat eraikitzeko garaian.

Bide honetan, ezinbestekoa da Euskal Herriko mugimendu feminista indartsua. Horregatik, datorren azaroaren 25ean Mugimendu feministak antolatzen dituen mobilizazioetan parte hartzearen garrantzia azpimarratu nahi dugu. Denon ardura da indarkeria matxistari aurre egitea.

BIOLENTZIA MATXISTAREN AURKA FEMINISMO GEHIAGO!

 

A25. Mugimendu feministaren deialdiak

BAIONA 18:30 • Herriko etxetik

BILBO 20:00 • Arriaga Plazatik

DONOSTIA 19:00 • Bulebarretik 

IRUÑEA 20:00 • Gaztelu Plazatik 

GASTEIZ 19:00 • Andra Mari Zuriatik
 

Errektoretzarako hauteskundeetan proiektu ezberdinen konfrontazioa eta adierazpen askatasuna nagusitu behar dira

admin
-
0


Europako Esparruan dauden Unibertsitate Sistemek hainbat aldaketa bizi izan dituzte azken urteotan eta aldaketa horiek, batez ere, neoliberalismoa eta estatuen interesetan oinarrituak dira. Aldaketa horiek eragina zuzena izan dute Euskal Herriko Unibertsitateetan, bai Unibertsitate Publikoetan zein pribatuetan, izan ere, kasu askotan ez dira lehenetsi herri bezala ditugun erronkak. Azaroak 7 martxan jarri zen hauteskunde kanpaina momentu aparta da errealitate honi buelta emateko proposamenak, aldarrikapenak, neurriak eta bideak eztabaidaren erdian jartzeko.

Aurreko UPV/EHUko errektorearen hauteskundetan bezala, LABi une egokia iruditzen zaio partekatzeko gure kritikak sistemari, oraingo talde errektoralari edota aurkezten den hautagaiari gure kexkak eta lehentasunak helerazteko erantzunaren zain.

Azaroaren 24a, hitza hartzeko eguna izango da, bozkaren bidez batzuk, mobilizatuz besteak. Bermatu ditzagun bozkatu nahi dutenen eskubidea, ez bokatzea erabaki dutenen eskubidea eta erabakia errespetatu behar den bezala. LABetik dei egiten diegu Unibertsitateko eragile guztiei Errektorearen hauteskundeak behar den giroan egin daitezela. Halaber, hauteskunde kanpainan guztion hitza -oztoporik gabe- errespetatua izatearen alde eta kanpaina behar den giroan bermatzearen alde dagoela zabaldu nahi du LABek.

LABek bere konpromezu irmoa agertu nahi du Adierazpen Askastasunaren alde UPV/EHUko campusetan. Unibertsitate guneak aske eta kritikoa izan behar du, ideiak konfrontatzeko eta aukera ezberdinen arteko lehia ideologiko eta politikoa egiteko gunea dira. Unibertsitateko agintariak horren kontra agertu direnean publikoki salatu dugu.

LABetik beti aldarrikatu dugu Ikasle mugimendu sendo eta eraikitzailea edukitzea berma bat dela hezkuntza eredu propio eta berri baterako bidea egin nahi badugu. Eta bat gatoz beste gauza batean, mobilizazioa da ikasleek duten tresna nagusia beren aldarrikapenak mahai gaineratzeko eta borrokatzeko gaurko eredu honetan.

Arazoak modu zuzen eta egokian bideratzeko erreferentzia bat izan behar dira unibertsitateak, gatazkak bideratzeko bide errepresiboak alboratuz interes ezberdin eta kontrajarrien talka beste ereduekin bideratzeko gai izan behar gera. Errektore talde berriaren erronka bat izango da, zalantzarik gabe. Baita ikasle, irakasle eta AZP langileena ere komunitate osoaren erantzukizuna den neurrian.

UPV/EHUn asko dugu egiteko herri ikuspegia nagusituko duen unibertsitate ereduaren alde, behar beharrezkoa izango da eragileon arteko elkarlana eta elkar ulertzea. Hor dago, gure ustez, Euskal Herriko Unibertsitatea eraikitzeko bide emankorrena.
 

 

 

Mercedeseko aurreakordioaren inguruko bozka iruzur hutsa da

admin
-
0

Gaur gauean hasiko da Mercedes Benzeko zuzendaritzak eta gutxiengoa diren UGT, PYM eta Ekintza sindikatuek erdietsitako aurreakordioaren inguruko bozketa. Kontsulta hau enpresak gidatutako prozesuan beste pausu bat da, eta aurrekoak bezala inolako gardentasunik gabe egin da. LABen iritziz bozketa hau antzerki hutsa da langileen babesaren irudia emateko eta horregatik ere, LABek ez bozkatzeko aukera berresten du.

Bozka hau irizur hutsa da. Enpresak deitzen du bozketara, berak egiten du deialdi ofiziala, berak esaten du nork bozka dezakeen, noiz bozkatzen den eta nola bozkatzen den. Eta aldi berean ebentualak presionatzen ari dira bozketan parte hartzeko eta hori erabat onartezina iruditzen zaigu. Ezin da kontsulta hau onartu ebentualek, zuzenean edo zeharka, parte hartu ezean kaleratu egingo dituztela dakitenean edo ez dietela kontratu mugagabea egingo. Mehatxatuta bozkatzea ez da demokratikoa. Beraz, beraien burua bozkatzera behartuta sentitzen dutenek beraien kontrako jarrera adieraztera deitzen ditugu, ezezkoa edo bozka baliogabe edo zuriaren bidez.

Argi dugu enpresak erabakia hartuta duela, emaitza edozein izanda ere, aurreakordioa hitzarmen bihurtu dutela, eragin osokoa edo eragin mugatukoa. Azken aukera hau ezarriz gero, azken lau hitzarmenetatik eragin mugatuko hirugarrena izango zen, eta ez dugu uste hori kasualitatea denik.

Edonola ere, bozketa hau antzerki hutsa da langileen babesaren irudia emateko eta horregatik ere, LABek ez bozkatzeko aukera berresten du. Beraien iruzurrezko kontsultaren gainetik, LABek dei egiten du langileon indarrak biltzera eta prekarietatea borrokatzera.

 

 

 

Errauste plantaren aurkako manifestazioarekin egin dugu bat

admin
-
0

LABek bat egin du GuraSOS taldeak azaroaren 26rako deitutako manifestazioarekin. Hain zuzen ere, Zubietan eraiki nahi duten errauste plantaren aurkako protesta larunbatean izango da, 17:00etan, eta Donostiako Arabako Parkea eta Alderdi Eder lotuko ditu. Sindikatuaren iritziz, azpiegitura txikitzailea litzateke errauste planta, eta osasunarentzat kalte nabarmenak ekarriko lituzke.

LAB behin baino gehiagotan agertu da Zubietan eraiki asmo duten errauste plantaren aurka. Azpiegitura txikitzaile eta inposatutzat jo du sindikatuak, eta, hori dela eta, horren aurka deitutako manifestazioan parte hartzeko deia luzatu du langileen artean, “osasunaren alde eta inposaketaren aurka”.

Hondakinen kudeaketa zure aukera da. Gipuzkoa + eman bidea osasunari eta adostasunari leloa izango du manifestazioak.
 

 

 
1...979980981...1,583Page 980 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus