2026-02-06
Blog Page 971

Enpresak bere betebeharrak ez betetzea salatu dute Kaipeko langileek

admin
-
0
Enpresak bere betebeharrak ez betetzea salatu dute Kaipeko langileek

Pasaiako Zaharren Udal Egoitzak azpikontratatutako enpresako langileek, LAB sindikatuko ordezkariarekin batera, azken urteetan pairatzen ari diren egoera salatu dute: soldatak sistematikoki atzerapenarekin jasotzea; 2012ko ordainsariko zorrak oraindik jaso gabe izatea; GEROA BGAEri egiten zaion ekarpena ez ordaintzea; eta 2015etik zorrak oraindik ordaindu gabe izatea.

Hau da gaur igorri duten oharra, Langileen Asanblada eta LABen izenean:

Pasaiako Zaharren Udal Egoitzak azpikontratatutako Kaipe enpresako langileek, LAB sindikatuko ordezkariarekin batera, azken urteetan enpresa honetan pairatzen dugun egoera salatu nahi dugu:

1. Soldatak sistematikoki atzerapenarekin jasotzea
2. 2012ko pagako zorrak oraindik jaso gabe izatea
3. GEROA BGAEri egiten zaion ekarpena ez ordaintzea
4. 2015etik zorrak oraindik ordaindu gabe izatea

Honetaz guztiaz gain, 2016ko abenduko nomina ez zaigu ordaindu, Erakundeak ordaindutakoa gastatu baitu enpresak.
Egoera hau jasateaz kokoteraino gaude. Gure lana betetzea exigitzen zaigu eta hala egiten dugu, baina ez dugu zertan momentu oro erreklamazioak eta salaketa judizialak jartzen ibili.

Kaipek ez digu zor diguna ordaintzen, eta Pasaiako Zaharren Egoitzak, arduradun zuzen gisa, ez du egoera konpontzen. Langileekiko dituen betebeharrak betetzen ez dituen enpresa bati azpikontratatzen jarraitzen du.

Egoera honen aurrean mobilizazioei ekitea erabaki dugu. Lehen elkarretaratzea atzo, hilak 11, egin genuen eta egoera aldatzen ez den bitartean mobilizatzen jarraituko dugu.

 

 

 

Martxoaz geroztik ez dutela soldatarik jaso salatu dute Unipapel enpresako langileek

admin
-
0
Martxoaz geroztik ez dutela soldatarik jaso salatu dute Unipapel enpresako langileek

LAB eta ELAko enpresa batzordeko kideek Adunako lantegiko langileen egoera salatu dute, jada 12 direlako zor zaizkien nominak, aparteko ordainsariak barne. 2016ko uztailaren 11az geroztik, langile guztiak etendura EEE batean daude, %100ekoa, eta duela egun batzuk jakin dute Espainiako Auzitegi Nazionalak EEEa atzera bota duela, iruzurra dela argudiatuz. Hau guztigatik, elkarretaratze bat egin dute gaur, lantegiaren kanpoaldean, konponbide duin bat eskatzeko.

Hau da Unipapeleko enpresa batzordeak argitaratutako oharra:

ELA eta LABeko komiteko kideok, enpresa konkurtso egoeran sartu eta 6 hilabetera bizi dugun egoera salatzen dugu.

Unipapeleko langile guztiak, 2016ko uztailaren 11az geroztik, etendura EEE batean gaude, 100%ekoa, eta duela egun batzuk jakin dugu Espainiako Auzitegi Nazionalak Enplegua Erregulatzeko Espedientea (EEE) atzera bota duela, iruzurra dela argudiatuz. Beraz, EEEa baliogabetua egonda, jada 12 dira enpresako langileei zor zaizkien nominak, martxotik gaur arte, aparteko ordainsariak barne.

Honen erantzule zuzena Springwater putre funtsa da, hauek dira langileok bizi dugun egoera gogorraren erantzule zuzenak. Izan ere, bertako administratzaile nagusi den Martin Grushkak, ADVEOren laguntza zuzenarekin, Unipapel egoera kritikora eraman eta likideziarik gabe utzi baitu, nominak ordaindu gabe uzteraino.

Gaur egun, langileok zain gaude ea administratzaile konkurtsalak egoera bere gain hartzen duen. Bi sindikatuok harriduraz ikusten dugu Martin Grushkak Unipapelen zein beste enpresa batzutan (Pullmantur, Miró, Peggy Sue, Imtech…) egindakoa. Izan ere, bere helburua, enpresak hustu eta langileak inongo babesik gabe uztea baita.

Aldi berean, administrazioek izandako jarrera ere salatu nahi dugu, berriro ere ez baitute inongo interesik azaldu enpresaren etorkizuna bermatuko lukeen irtenbide bat bilatzen, langileon etorkizuna bermatuko lukeen irtenbide bat bilatzen.

Amaitzeko, ardura duten alde guztiei egoerarekin erantzule izan eta lehenbailehen langileentzat irtenbide duin bat izango duen soluzio bat bila dezatela exijitzen diegu, eta bila dezatela azkar!

 

 

 

Portugaleteko erailketa matxista salatuz kalera irtengo gara

admin
-
0
Portugaleteko erailketa matxista salatuz kalera irtengo gara

Indarkeria matxistak biktima berri bat egin du. Gertakari hauen aurrean ezingara ixilik geratu, salaketa kalera atera behar dugu. Horregatik, Portugaleteko erailketa matxista salatzeko emakumeen mundu martxak antolatutako mobilizazioaetan parte hartzeko deia luzatzen du LABek. Emakumeonganako indarkeriak ez du etenik eta beraz, egoeraren larritasunaren aurrean erantzun irmoa ematen jarraitu behar dugu.


 

 

 

Herri maputxearen aurkako azken erasoa salatu dugu

admin
-
0

Argentinako Gendarmeriak hiru ekintzaile maputxe atxilotu ditu, enpresa transnazional baten lurrak okupatzeagatik. LABetik indarrak batzeko deia egiten dugu, esplotatu eta esplotatzailerik gabeko mundu jasangarri baten alde. Pertsonek eta amalurraren defentsak interesa ekonomikoen gainetik egon behar dute.

Argentinako Nazio Gendarmeriak Chubut probintziako 40. errepideko mugimendua eten zuen herenegun, orain bi urtetatik hona aktibista maputxeek enpresa transnazional baten lurrak okupatuta dituzten tokian. 30 gendarmek osatutako operatiboa pasa den urtetik zonaldea zaintzen duten gainontzeko indarrei gehitu zitzaien, erasoa egiteko.

Polizia operazio honetan hiru aktibista maputxe atxilotu zituzten desjabetze honen kontrako protestan. Eragile ezberdinen arabera, operazio hau printzipioz tren turistiko baten igarobidea bermatzeko egiten zen, baino jakin badakigu gutxienez hiru atxilotu daudela, bortizki kolpatuak, beharko luketen asistentzia medikurik gabe zaurituak, eta operazioa orain bi urtetatik hona maputxeen esku dauden lur hauek errekuperatzeko aprobetxatzen ari direla. Eta nola ez jokaldi honetan irabazle dena enpresa transnazional bat da, Patagonian ia milioi bat hektarea dituena.

Iritsi zaigun informazioaren arabera, erresistentzia maputxearen kontrako errepresioa oso bortitza izan da; kolpeekin, dronekin, gas jaurtiketekin eta haur eta emakumeen kontrako tiroekin. Eta hau guztia legitimoki bereak diren lurrak defendatzen dituen herri maputxea kanporatzeko eta enpresa transnazional baten interesak defendatzeko, Patagoniako lur hauetatik tren turistiko bat igarotzea nahi baitu.

Hau da, inolaz ere justifika ezin daitekeen proportzioz kanpoko eraso bati buruz hitz egiten ari gara, beraien lurra eta askatasuna defendatu besterik egiten ez duen herri baten kontra. Lur bat transnazionalek beraien interes korporatiboentzako erreklamatzen dutena, pentsatuz lur horietan dagoen guztia beraien jabetza dela; pertsonak barne, noski. Gogoratu behar da, 2000. urtean, Argentinak OIT-ko 169. hitzarmena onartu zuela, non herri indigenen interes kolektiboak errespetatzeko konpromisoa hartzen zuen.
Gutxi ez balitz, Gobernuak eta kasu honetan Argentinakoa transnazionalen interesen aurrean makurtuta daude erabat. Bada garaia enpresa transnazional hauek daukaten inpunitate guzti honekin eta diseinatuta dagoen arkitektura juridiko eta politiko honekin bukatzeko.

LABetik herri maputxearen kontrako eraso bortitz hau salatu nahi dugu. Batu ditzagun indarrak esplotatu eta esplotatzaile gabeko mundu jasangarri baten alde, non pertsonak eta ama lurraren defentsa interes ekonomikoen gainetik egongo diren.
 

 

 

Emakume pentsionistek zigor bikoitz onartezina jasaten dute

admin
-
0

Larria da pentsionisten kolektiboak bizi duen egoera. EAJ, PSE eta PPk lepoa ematen jarraitzen dute eta 1.080 eurotako gutxienezko pentsio duina izateko aukera ukatzen diete. Horixe da Gasteizko parlamentuan aurkeztutako 71.724 sinadurek iaz eskatu zutena, hain zuzen ere. Orain, Diru Sarrerak Bermatzeko Errentarekin (DSBE) zigortu nahi dituzte berriro, legez dagokien igoera ekidin nahian. Igoerak, Lanbidearteko Gutxieneko Soldatak izandakoaren bestekoa izan beharko luke.

EAJ eta PSEren Eusko Jaurlaritzak euskal jendarteko pertsona babesgabeenak zigortu nahi ditu berriro, emakumeak, eta are gehiago pentsionistak badira. Guztiz onartezina da.

Gogoratu behar dugu, EAEn euren miseriazko pentsioengatik DSBE eskatu behar duten 15.817 pentsionistetatik %67,88a (10.737) emakumeak direla. Hauek oso pentsio baxuak jasotzen dituzte eta DBSEa eskatu beharrean aurkitzen gara. Guzti hori estatistika hauetan sartzen diren emakumeen kolektibo handia kontatu barik, urte luzetan familien zaintzan lanean ibili arren kotizatu ez zutenak eta pentsiorik izateko aukera izan ez dutenak. Gogoratu behar da DSBE jasotzen duten 63.797 pertsonetatik, gehiengoa (35.951) emakumezkoa direla.

Eusko Jaurlaritza eta honi babesa ematen dioten alderdiek oso ondo dakite, DSBE Lanbidearteko Gutxieneko Soldata beste ez igotzeko euren proposamena (biak neurri berean igo behar direla dago zehaztuta legean), zigor gehiagarria dela pertsonarik zaurgarrienentzat, baina axola ez diela ematen du. Ez dugu ahaztu nahi aurretik DSBEak egin zen murrizketa, Patxi Lopez EAEko lehendakari izan zenean egin zuen %7ko. Hau beharrizanik larrienak dituzten pertsonak jasaten ari diren murrizketei gehitzen zaie. Hauen erantzule diren gobernu eta alderdiek interes gehiago duten aberatsak eta proiektu handiak babesten, hilabete amaierara iritsi ahal izateko zailtasunak dituzten eta duintasunez bizi nahi dute pertsonak baino.

Emakumeok, are gehiago pentsionistak eta pobreak bagara, ez diegu axola eta euren itxurakeriazko diskurtsoen gainetik, egunerokotasunean konprobatzen dugu errealitatea bestekoa dela. Euren ekintzek kontrakoa adierazten dute eta guk, ez diegu axola.

LABen Pentsionisten Arlotik dei egiten diogu jendarteari, bereziki emakumeei, Eusko Jaurlaritzaren eraso berri hau eragozteko mobilizatzera. Patxi Lopezen garaiko murrizketa indargabetzea eskatzen dugu eta DSBE %8 igotzea Lanbidearteko Gutxieneko Soldata beste. Ez dugu onartuko politika neoliberal eta antisozialek beharrizan larrienak dituztenak zigortzen jarrai dezaten, bereziki emakumeak. Mobilizazio kolektiboa, eskubideak aldarrikatzera kalera ateratzea, horixe da bide bakarra hau lortzeko.
 

 

 

Jaso Industrialeko enpresa batzordeak langileen segurtasuna bermatzeko behar diren neurri guztiak hartuko ditu

admin
-
0

Itsasondoko Jaso Industrial enpresako langileak Enpresa Hitzarmenik gabe daude 2015eko amaiera geroztik. Abenduaren 1ean hasi ziren Greba Mugagabe Partzialean, eta, gaur, 21.en greba eguna izan da. Goizean, laugarren manifestazioa egin dute Ordiziako azokan. Enpresa hitzarmenaren inguruan, enpresa-batzordea, berriro, zuzendaritzarengana gerturatu da egoerari irtenbide bat emate aldera. Bilera horretan, zuzendaritza ez da sartzen langileek egiten dituzten eskaeretan (gaixotasun bajak hobetzea eta nominaren homogeneizazioa) eta beraiek eskaini beharreko guztia, greba hasi aurretik eskaini zutela adierazi dute. Jasoko enpresa batzordearen iritziz, zuzendaritzaren jarrera ulergaitza eta onartezina da.

Hau da Jaso Industrialeko enpresa-batzordeak dioena, aipatutakoaz gain:

Hitzarmenaren negoziaketaren bilera honetan, beste gai garrantzitsu bat ere landu zela aipatu behar dugu. Enpresak premia handia du Iranerako bi garabi handi ateratzeko eta hauetako bat, Itsasondon Greba Mugagabe Partzialean gaudela eta ez duela denborarik ematen biak amaitzeko ikusirik, Palentzian duen beste enpresa batean egiten saiatu dela. Abokatuekin egon ondoren, esan genien hori kanpo eskirolajea dela eta langileen oinarrizko eskubideak hausten dituela, ezin baitute gure grebarako eskubidea oztopatu, ondorioz, garabi hori Itsasondon egiten ez bada, epaitegietan eta ikuskaritzan salaketak sartuko genituela. Hau ikusirik, nagusiak bere hitza eman zigun, garabi hau gelditu egiten dela. Ondorioz, enpresa batzordeak ez dugu salaketarik sartuko gai honetan.

Bestalde, aurreko astean, lantegi barruan ibiltzen dugun kamioi zaharrarekin istripu larri bat pairatzeko zorian izan zen langile bat eta enpresa batzordeak zuzendaritzari urgentziaz kamioia prezintatzeko eta segurtasun mahaia konbokatzeko eskatu zion. Zuzendaritzak, kostata baina azkenean, kamioia erabileratik kanpo uztea onartu zuen baina mobilizazioekin amaitu bitartean, segurtasun mahaia konbokatuko ez zutela esan ziguten. Adierazi behar dugu Jaso Itsasondon langileok segurtasuna bermatua izango dugula eta horretarako, aste honetan ikuskaritzara joko dugula. Hemendik aurrera eta enpresak bere jarrera aldatu bitartean, ikuskariek gure enpresan segurtasuna bermatuko dute.

Hau ez da inondik inora enpresa barruan nahi genukeen funtzionamendua, gure helburua errespetuzko giro batean eta segurtasun mahai eraginkor batekin lan egitea da. Baina hau betetzen ez den bitartean, langileen segurtasuna bermatzeko behar diren neurri guztiak hartuko ditugu.
 

 

 

Antolakuntza eta borrokari esker, 58 kontratu finko gehiago egin dira Nemaken

admin
-
0

Nemak-ek, Etxebarriako aluminiozko fundizioa, aste honetan bertan 58 langile finko egin behar izan ditu enpresako itunak hala behartuta. Enpresako itun honek iaz enpresak beste 46 kontratu finko egitera behartu zuen, guztira, 104 langile. Azken 5 urteetan ia 200 langile mugagabe bihurtu dira, langileen %35a. LABentzat oso albiste ona da eta erakusten du, antolakuntza eta borrokari esker, prekarietateari aurre egin ahal zaiola kalitatezko enplegua sortuz.


 

 

 

Sareren manifestazioan parte hartzeko deia egin dugu

admin
-
0
Sareren manifestazioan parte hartzeko deia egin dugu


Larunbaterako, urtarrilaren 14rako, Sarek manifestaziora deitu du Bilbon, “Salatzen dut. Euskal presoak Euskal Herrira. Giza eskubideak, konponbidea eta bakea” lemapean. Manifestazioa 17:30ean abiatuko da La Casillatik. LABek protestan parte hartuko du, Ainhoa Etxaide idazkari nagusia buru duen ordezkaritza batekin, eta bertan parte hartzera deitu ditu euskal langileak.

Euskal gatazkaren ondorio eta konponbidearen parte diren presoei ezartzen zaizkien salbuespenezko egoera eta neurriekin amaitzea exijitzen du LABek. Giza eskubideen ikuspegitik ere konpondu beharreko kontua da presoena; gaixorik daudenen egoera, batez ere.

Euskal presoen eskubideen aitortza euskal jendartearen gehiengoaren nahia da; presoen afera konpontzea ezinbesteko urratsa da Euskal Herrian bake eta konponbide prozesuan aurrera egiteko. Eta egoera honekin amaitzeko, euskal presoak etxera ekar ditzagun, mobilizazioa ezinbestekoa dugu. Mobilizazioa da elkartasunetik konpromisoetara pasatzeko modurik eraginkorrena.

Horren erakusgarri, urtarrilaren 13rako giza-kate batera deitu du LABek Iruñean, “Euskal presoak kalera ekarri behar ditugu” lemapean. 11etatik aurrera izango da, Sarasate Pasialekuan.
 

 

 

24 urteko gazte bat hil da Bizkaian, lan istripu baten eraginez

admin
-
0

Atzo, A.R.J. 24 urteko langilea laneko istripuz hil zen. Istripua pasa den abenduaren 30ean izan zen, eta ordutik hona oso larria egon da. Gorlizeko Pizzeria Mec Mec enpresako langilea zen, eta abenduaren 30ean, istripua pairatu zuen azken banaketan. Gehiengo sindikalak elkarretaratze bat egingo du ostiralean, Sopelan, enpresaren egoitza nagusiaren aurrean.

LABetik gure babes eta elkartasunik zintzoena erakutsi nahi diegu hildakoaren senitarteko, auzokide eta gertukoei, eta langile-klaseari orokorrean.

Istripu gehienen atzean lan baldintzen prekarietatea dago: formakuntza falta, lan erritmo bortitzak, azpikontratak, lan gainkargak,… Istripuak saihesteko neurri egokiak behar dira, legeak azpimarratzen duen bezala. Baina legea ez da oraindik goitik behera betetzen, horregatik betearaztea da exijitu behar duguna, enpresek eta erakundeek ez baitute horretarako borondaterik erakusten.

Langileok ezin dugu onartu urtero istripu kopurua igotzea. Krisiaren aitzakiarekin prekaritatea areagotu egin da eta neurri zuzentzaileak hartzea alde batera utzi dute, eta hortik dator istripuen gorakada. Hau dela eta, enpresei eta administrazioei lan baldintza egoki eta seguruetan lan egiteko eskubidea exijitu behar diegu.

Beti bezala, lan ikuskaritzari eta Osalani ikerketa egitea exijitzen diegu. Haien ustez, ez daukate konpetentziarik ikerketa egiteko, errepidean gertatu delako, baina, gure ustez, benetako ikerketa egin dezan eta faktore guztiak jakin ditzagun haien ardura hartu behar dute, eta argitu egin behar dute zer gertatu den eta zer egin behar den berriro antzeko istripu bat gerta ez dadin. 

Mobilizazioa ezinbestekoa da eta istripuak gertatzen direnean ELA, LAB, ESK, STEILAS, EHNE eta HIRU bertan egongo gara salaketa egiten eta hildako langilearen familia eta lagunei babesa ematen (gaur, Donostian, urrutira joan gabe), enpresa eta erakundeei hobekuntzak exijitzen diegun bitartean. Horretarako hurrengo ostiralean, hilak 13, eguerdiko 12:30ean, Sopelako Pizzeria Mec Mec aurrean (enpresaren egoitza nagusia), elkarretaratzera deituko dugu.
 

 

 
1...970971972...1,590Page 971 of 1,590

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus