2025-12-30
Blog Page 969

Euskal Herriak merezi duen bakea eraikitzeko unea dela berretsi du Etxaidek

admin
-
0
Euskal Herriak merezi duen bakea eraikitzeko unea dela berretsi du Etxaidek

Bake prozesuaren aldeko elkarretaratzeak egin ditugu Hego Euskal Herriko lau hiriburuetan, hainbat eragilek deituta. Bakea eraikitzeko jendartearen babesa dagoela aldarrikatu dute bildutakoek.

Pasa den astelehenean, Baionan, eragile sozial, sindikal, alderdi politiko eta hautetsiek Luhusoko gertakarien harira egin zuten deiari jarraikiz, zenbait eragilek elkarretaratzeak egin ditugu gaur, abenduak 23, Hego Euskal Herriko hiriburuetan. Bertan, LABeko idazkari nagusi Ainhoa Etxaidek adierazi du gaurko mobilizazioen helburua “Luhuson gertatutako atxiloketen aurrean Ipar Euskal Herriak emandako erantzunari jarraipena ematea” dela.

“Ipar Euskal Herriak zabaldutako bide hori Euskal Herri osora zabaltzea” beharrezko ikusten du Etxaidek. Ipar Euskal Herrian bezala, Hego Euskal Herrian ere hautetsiak eta ordezkari politikoak armagabetzea modu zuzenean gauzatu dadin inplikatzeko unea dela esan du. LABen iritziz, prozesu hau aurrera ateratzeko mobilizazio sozialean dago gakoa, hots, konpromiso indibidualak kolektibo bihurtuz, hautetsiak inplikatuz, Estatua mugitzea lortuko da.

“Estatuak oztopoak jartzeari utzi eta herri honek merezi duen bakea eraikitzeko aukera” zabaltzeko eskatu du Etxaidek.

Estatu espainol eta frantsesek ezarri nahi duten irabazle-galtzaile eskema gainditu dugu. Herria da garailea, eta Euskal Herria eraiki behar dugu orain. Horretarako badago sindikatuon konpromisoa eta jendartearen babesa.

 

 

 

Hirugarren sektorea arriskuan dagoela ohartarazi dugu Bilbon

admin
-
0
Hirugarren sektorea arriskuan dagoela ohartarazi dugu Bilbon


Bizkaiko hirugarren sektorearen etorkizunari buruzko zalantza ugari daude, udal-eskuduntzei buruzkoak batez ere. Ezagutzera eman dutena kezka sortu du sektorean, eta, azalpenak eman ditzaten eskatzeko, LABek elkarretaratzea egin du Bizkaiko Foru Aldundiaren egoitzaren aurrean, ESK eta CCOO sindikatuekin batera.

Gizarte Zerbitzuen Euskal Sistemaren aldaketa prozesu baten erdi-erdian aurkitzen gara, maparen eta karteraren hedapenarekin, Gizarte Zerbitzuen Legeak jasotzen duen bezala; prozesu honek 2016ko abenduaren 31rako amaituta egon beharko luke.

Arlo honi dagokionez, instituzioen atzerapenak eta Bizkaiko Foru Aldundiaren utzikeriak prozesuaren ezaugarriak izan dira eta dira, nahasmen egoera sortu delarik, jendarte zerbitzuen bi foru-arlotako banaketarekin nahasmena areagotuz; alde batetik jendarte zerbitzuak, eta bestaldetik, jendarte-inklusioa. Egoera, oro har, ez bada batere erakargarria, alarma gorria piztu du jendarte-inklusioan.

Gizarte Zerbitzuen Legearen hedapen hau 2010etik jasaten ari garen murrizketen testuinguruan ematen ari da. Egun, Bizkaiko hirugarren sektorearen etorkizunari buruzko zalantza ugari daude, batez ere udal-eskuduntzei buruzkoak; ezagutzera ematen ari den gutxi horrek oso kezkatzen gaitu. Zer gertatuko da mapa horretan sartzen ez diren zerbitzuekin? Zein alternatiba dago lanpos­tua galtzeko arriskuan den jende horrentzat? Zein baldintzetan burutuko da inklusio soziala­ren lana?

Testuinguru honetan, ESK, LAB eta CCOO sindikatuek elkarretaratzea egin zuten atzo, Bizkaiko Foru Aldundiaren egoitzaren aurrean.
 

 

 

Sahararen aurkako errepresioa salatuko dugu abenduaren 26an Bilbon

admin
-
0
Sahararen aurkako errepresioa salatuko dugu abenduaren 26an Bilbon


Duela 6 urte, 2010eko Azaroaren 8an, Marokoko indar okupatzaileek Gdeim Izik kanpamendua suntsitu zuten modu bortitzean. Horren harira Marokoko erreinuak 25 pertsona atxilotu zituen modu arbitrarioan eta handik 2 urtera zigor gogorretara kondenatu zituen. Mobilizazioari esker epaiketa militar hura bertan behera geratzea lortu zen, baina kartzelan jarraitzen dute. Guzti hau salatu eta abenduaren 26ko epaiketa berria bertan gera dadin eskatuz mobilizazioa egingo dugu 11:30tan Marokok bilbon duen kontsulatuaren aurrean.

2010ean Marokoko indar okupatzaileek Gdeim Izik kanpamendua suntsitu zuten Saharar herritar zibilak erasotuz, kanpamendua inbadituz, jaimak errez, eta helikopteroetatik gas negar-eragile eta ur beroa botaz. Ondoren 25 pertsona atxilotu zituen, 20.000 pertsonek baino gehiagok Marokoren giza eskubideen aurkako eraso berria salatuz eginiko mobilizazioan parte hartu izana egotzita. Preso politikoak askatzeko eginiko presio eta mobilizazioen ondoren, epaiketa militarra bertan behera gelditu zen, baino kartzelan jarraitzen dute, eta berriro ere epaituak izanen dira, oraingoan epaitegi zibil batean.

Honen aurrean Euskal Herritik gogor eta ozen exijitzen dugu Sahararen okupazioa eta horren ondorioz Saharar herriak pairatzen duen errepresioa bertan behera gelditu dadila, eta aldi berean behingoagatik adostutako erreferenduma egin dadila eskatzen dugu, Saharar herriak bere etorkizuna libre eta demokratikoki erabaki ahal izan dezan.

Hau guztiagatik, hurrengo Abenduaren 26an goizeko 11:30etan Bilbon Marokok duen kontsulatuaren aurrean mobilizatuko gara ELA, ESK, STEILAS, Sahara herriarekiko Euskal Herriko eragileak eta Euskal Herriko Saharar etorkinen erakundeekin batera. Euskal jendartea mobilizazioan parte hartzera deitzen dugu.

 

 

 

Hainbat herritan zabaldu dugu euskal preso politikoen aldeko aldarria

admin
-
0
Hainbat herritan zabaldu dugu euskal preso politikoen aldeko aldarria


Gasteiz, Laudio, Bergara, Algorta…euskal preso politikoen aldeko aldarria hainbat herritan zabaldu du LABek egunotan. Mobilizazio gehiago aurreikusita daude urtea amaitu arte eta ondorengorako, preso eta iheslarien etxeratzea lehentasuna baita sindikatuarentzat.

LAB euskal preso politikoen alde irten da kalera. Preso ohiek ‘Kalera Kalera’ ekimena abian jarri dute, eta sindikatuak babesa eskaini die. Dinamika horretatik harago, LABek mobilizazioak egin ditu egunotan hainbat herritan, abenduan zehar egin bezala. Urrutira joan gabe, Gasteiz, Laudio, Algorta eta Bergaran deitu zituzten protestak atzo. 

Hain zuzen ere, Bergaran, Debaldea eskualdeko delegatuek bilera izan zuten, lan munduan euskal preso eta iheslarien etxeratzearen alde Donostiako Ibaeta Fakultatean aurkeztutako Ireki ekimenaren berri emateko, eta, bide batez, sindikatuko ordezkariek aipatutako dinamika horrek Euskal Herri osoan 150.000 sinadura lortzearen erronka betetze aldera zein ekarpen eta nola egin dezaketen aztertzeko. Hala, LABek ordezkaritza duen enpresa handietan, Irekiren ekimenei babesa eta sostengua ematea izango du helburu sindikatuak, lantoki txikiagotan ere sinadura bilketak sustatzearekin batera. Herri ezberdinetan sortu litezkeen taldeetan parte hartzea ere ez zuten baztertu bileran. 

LABen iritziz, Euskal Herriko gatazkaren konponbidean, preso eta iheslarien etxeratzea lehentasuna duen gai bat da, eta bere esku dagoen guztia egingo du eremu horretan, lantokietan zein kalean.

Hauek dira egunotarako aurreikusitako mobilizazio batzuk:

Abenduak 28. Goierri
Ordiziako merkatuan, mobilizazioa

Abenduak 30. Hego Uribe Arratia
Basaurin, 12:00etan, elkarretaratzea Benta Plazan

Abenduak 30. Oarso Bidasoa
Azken ostirala indartuko dugu deialdi zabalagoa eginez.

Abenduak 30. Donostia
Azken ostirala indartuko dugu deialdi zabalago bat eginez. Urdaneta kaleko Korreos-en izango da elkarretaratzea, eta, ondoren, Donostiako presoei eskutitzak bidaliko dizkiegu.

Urtarrilak 13. Iruñerria
Iruñean, 12:00etan, giza-katea Gaztelu Plazan

 

 

 

Ugaoko ikastetxeak sukaldea bertan izatea eskatuko dugu

admin
-
0

LABek ekingo dion kanpainaren bidez, sukaldeak bertan eustea eskatuko dugu, eta tokian tokiko sukaldeak berriro ezar daitezela, desagerrarazi zituzten lekuetan.

Ugaoko ikastetxean eraikuntza berria egiten ari dira. Aipatu eraikuntza DBH eta batxilergoko klaseak emateko erabiliko da. Ikasle horietaz, gaur egun arte, lehen hezkuntzako eraikuntzan dagoen sukaldea arduratzen zen.

Jakin dugunez, eraikuntza berrian “officea” jarri gura da eta “catering” eredua ezarri gura da; sukalde nagusi batean prestatu nahi da janaria, ostean, ikastetxera eroateko.

Ezaguna da LABek jangeletako eredu berriari buruzko proposamena landu duela. Aipatu proposamenean 2000. urteko jantokietako aginduaz aritzen gara, indargabetutzat jotzen duguna. Agindu honen aipua egiten dugu, Hezkuntza Sail horrek erabili duen baliabidea delako catering eredu kaltegarria elikatzeko. Horretarako, Sailaren iritziz “cateringak” bermatzen duen osasun araudiari heltzen dio.

LABek zalantzak ditu argudio honekin. Uste osoa dugu Sailaren helburu nagusia sukalde guztiak kanpora eroatea dela, “catering” enpresei ateak zabalduz. Honez gain, esan behar da, enpresa hauen etika zalantzagarria dela, Lehiaren Euskal Agentziak lehia desleiala egin zelako jarri zuen salaketan agerian geratu zenez.

Enpresa-etika zalantzagarri horren itzala, eguneko lanak betetzen dituzten hezitzaileei ezarritako lan baldintzetan ere nabaritzen da, lanaldi prekarioekin eta salgai hutsen moduan erabiltzen dituztelako. Unean uneko enpresak izan ditzakeen premien arabera deitzen dituzte lanera. Hori eginez, lizitazioak egin ostean, gure zergen bidez osatzen eta ordaintzen den aurrekontuetatik ateratzen den dirua aurreztu gura dute. Ez dezagun ahantz jardunbide horiek ez dietela, inondik inora, eragiten familiek ordaindu beharreko kuotei.

Zehaztearren, bi bider ordaintzen da, alde batetik, lizitazioekin (izan gogoan, 35 milioi euro esleitzen direla honetara) eta bestetik, familiek, batez beste, 80 bat euroko kuotekin, behar den langile kupoa bete zein ez.

Askotan aipatzen dute sukaldea edukitzea garestiagoa dela. Sail beraren agiriekin froga dezakegu ez dela horrela. “Officea” edota bertan sukaldea jartzeak antzeko prezioa du, hala ere, bien arteko aldea nabaria da. Batean, goizean bertan prestatutako janaria banatzen den bitartean, bestean egun batzuk lehenago prestatua izan daiteke.

Modu berean, LABek eskatzen du bertako elikadurak eta elikadura agro-ekologikoak sartu ahal izatea. Gure ustez, elikagaien kalitatea handiagoa izango da horrela, jakina, baina eskari hori, gure lehen sektorea (sektore aberatsa eta gure erakundeek gutxietsia) lagundu guran ere egiten dugu.
 

 

 

Gipuzkoako grafikagintzako hitzarmena sinatu da

admin
-
0

LABek, sektoreko delegatuen batzarraren erabateko adostasunarekin, Gipuzkoako Grafikagintzako hitzarmena sinatu du. UGTk ere sinatu du. Hitzarmenaren sinadurarekin langileen eros-ahalmena bermatzeaz gain, sektoreko lan baldintza guztiak, baita soldata eta lanaldia ere, 2021era arte bermatu ditugu, lan erreformari aurre eginez.

ADEGI lan erreformaren jarraitzailerik sutsuena izanik, atzera egin behar izan du eta 3 urteko ultraktibitatea onartu (lan erreformaren urtebetekoa gehi beste bi urte). Honek duen garrantziaz ohartarazi nahi dugu, gainerako sektoreetarako aurrekaria izan daitekeelako. Lorpen hau, zalantzarik gabe, langileen borrokaren emaitza izan da.

Azkenik, arrazoi ezberdinak direla medio, ELA eta CCOOek ez sinatzea erabaki dute. Sindikatu hauen erabakia guztiz errespetagarria bada ere, bere erabakia hartzeko erabilitako argudioak ez horrenbeste.

CCOOk nahiz ELAk arrazoi juridikoak aipatu dituzte, ea ultraktibitatearen akordio berri honek dagoena kaltetuko ote duen. Ez zaigu serioa iruditzen, euren plataforman zein negoziazio mahaian LABek dioen gauza bera adierazi baitute. Plataformak eta aktak publikoak dira. Koherentzia garrantzitsua da.
 

 

 

Indauxeko langileek greba egin dute

admin
-
0
Indauxeko langileek greba egin dute


Hitzarmena negoziatzen ari dira, eta zuzendaritzak egindako proposamena "itxia" eta "kaltegarria" dela salatu dute. Mobilizazioekin jarraitzea erabaki dute langileek; beste batzar bat egingo dute bihar, urtarrilerako deituko dituzten protestak adosteko. Bi urte daramate dagoeneko hitzarmena negoziatzen.

Getariako Indaux enpresako langileek, lan taldearen %90 baino gehiagoko babesarekin, greba eguna egin dute gaur lan hitzarmen duin baten alde. Hitzarmena negoziatzen ari dira, baina, langileen batzordearen hitzetan, enpresaren proposamena "itxia" eta "kaltegarria" da. Beste gauza batzuen artean, langile berriak 6 urteetan Indauxeko tauletatik behera egotea, erreforma laboralen aurkako klausulak ez onartzea edo soldata igoera KPI-ri lotu gabekoa izatea eta %0,25-0,55 artean finkatzea proposatzen du enpresak. 

Hala, LAB, ELA eta INDEP osatutako langileen batzordeak, langileen ia guztien berrespenarekin, ez ditu baldintza horiek onartu: "Eskatzen duguna da lankide guztiek soldata bera eduki dezatela, lan beraren truke; soldata igoerek KPI erreferentzia mantenduz gaur egungo igoera mailan behar dutela (Gipuzkoan, batez bestekoa, %0,90 da); langile berriek Indauxeko tauletatik jasotzea soldata; taulak eguneratzea soldata igoerekin; eta behin behineko langileak finko gelditu daitezela".

Goizeko batzarraren ostean, langileek erabaki dute mobilizazioekin jarraitzea, eta, horretarako, bihar, abenduak 23, beste batzar bat egingo dute. Urtarrilean zein mobilizazio egin erabakiko dute, bozketaren bitartez. 

 

 

 

Eskoletako jantoki publikoetako negoziazio mahaia osatu da

admin
-
0

LABek sustatuta eskoletako jantokien negoziazio mahaia osatu berri da. Hala, kolektibo honi zuzendutako hirugarren hitzarmena lortzeko epea zabalik dago. Negoziazio honekin lan baldintzak parekatzea dugu helburu, Eusko Jaurlaritzako gure lankideekiko. Egonkortasuna, lanpostuaren iraupena eta kolektiboaren formakuntza ere ditugu xedeen artean.

LABek argi utzi nahi du negoziazio honek ez duela aurrekoaren bide bera jarraitu behar. Negoziazio horrek hiru ikasturte iraun zuen, eta 36 greba egin ziren guztira. Prozesu hartan, Eusko Jaurlaritzaren esleipenen bitartez zerbitzua eskuratu zuten enpresek familiak, haurrak eta langileak bahitu zituzten nolabait, enpresa horien interes ekonomikoek oztopatu baitzuten negoziazioa.

Enpresei ez ezik, Hezkuntza Sailari ere paper garrantzitsua ematen diogu negoziazioan. Aurreko mahaietan ez zen egon, eta bere hutsunea nabarmena izan zen.

Hitzarmen honen negoziazioan, hiru aldeak mahai berean egotea eskatzen dugu: Eusko Jaurlaritza, enpresak eta langileak. Eta ez da kapritxo hutsa. Enpresei dagokien kudeaketari buruzko gaiak hizpide izango ditugu negoziazioan, baina ezin dugu ahaztu, hitzarmenetik harago, langileok ere 2000ko Arautegiaren legegintzaldiaren baitan ari garela lanean, eta arautegi hori Hezkuntza Sailak egin zuela, eta orduz geroztik ez
duela gaurkotu.

Arautegi horrek eskola komunitateko hainbat eragilek eta LABek arbuiatu dute behin eta berriz, gure eskoletako jantokietan ezarri eta inposatutako ereduari erantzuten ez diolako.

LABek agortutzat ematen du egungo eredua. Jantoki publiko eta osasuntsuen alde egiten dugu, eta ikastetxe bakoitzaren Eskola Proiektuan integratu daitezela eskatu. Jangeletako hezitzaileek lan baldintza berak izan behar dituzte, azpikontratak desagertu behar dira, eta formakuntza eta euskalduntze egitasmo integral bat gauzatu behar da, guztiok eskola komunitatearen parte izan gaitezen.

Hezkuntza eredu publiko, osasuntsu, justu eta burujabe baten alde egiten dugu.

 

 

 

Armagabetzean “tresna independenteak” beharrezkoak direla berretsi dugu

admin
-
0
Armagabetzean “tresna independenteak” beharrezkoak direla berretsi dugu


Pasa den ostiralean Luhuson egindako atxiloketen inguruan egiten duten irakurketa eta armagabetze prozessuaren inguruko jarrera azaltzeko medioen aurrean izan dira Euskal Herriko alderdi politiko, sindikatu eta eragile sozial ezberdinetako ordezkariak (PNV, EH Bildu, Podemos Nafarroa, Geroa Bai, Podemos Donostia, ELA, LAB, STEILAS, Etxalde, Antikapitalistak). Erakunde hauek, bakearekin duten konpromisoa adierazi dute berriro publikoki.

Alderdi politiko, sindikatu eta eragileen irakurketa:

Prentsa agerraldi honetan bildu garen alderdi eta sindikatuok balorazioa egin dugu joan den ostiralean izan zen Luhusoko operazioaren ondoren sortu den egoerari buruz, eta honako gogoeta eta eskariak plazaratu nahi ditugu:

  1. Gure poza agertu nahi dugu aske utzi dituztelako atxilotu zituzten pertsonak: Txetx Etcheverry, Michel Berhocoirigoin, Béatrice Molle-Haran, Michel Bergougnan eta Stéphane Etchegaray. Halaber, oso positiboa deritzogu ehundaka hautetsi eta kargu instituzionalek adierazi duten konpromisoari, baita izan den mobilizazio sozialari ere; hori izan da zati handi batean gertatu denaren arrazoia.
  2. Joera politiko guztietako Iparraldeko hautetsi asko eta askok egin duten bezalaxe, espainiar eta frantses gobernuei eskatzen diegu beren ardura aintzat har dezatela eta lagun dezatela armagabetze ordenatu, kontrolatu, seguru eta gardena izan dadin, antzeko kasuetan aplikatu ohi diren nazioarteko estandarren arabera.
  3. Uste dugu eginkizun honetan beharrezkoak direla egiaztatzeko tresna independenteak, esaterako Nazioarteko Egiaztatze Batzordea, zeinak gure erakunde, alderdi eta euskal jendarteko antolakunde errepresentatiboek aitorpena duen.
  4. Halaber, nahiko genuke Eusko Jaurlaritza eta Nafarroako Gobernua, segurtasun arloan dituzten eskumenak medio, lagungarri izatea armagabetze hori arrakastaz gara dadin. Gasteizko eta Iruñeko parlamentuek, baita Iparraldean eratuko den Lurralde-Elkargoak, prozesu horren jarraipena egiteko aukera izan behar dute.

Ziur gaude armagabetze hau arrakastaz burutzeko berebiziko bultzada izan daitekeela erakunde errepresentatiboen, egiaztatze instantzien eta jendarte zibileko antolakundeen arteko artikulazio egokia. Horregatik, gaur eta hemen gure erakunde politiko eta sindikalek bakearekin duten konpromisoa adierazten dugu.
 

 

 
1...968969970...1,583Page 969 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus