2026-02-06
Blog Page 969

Enplegu egonkorra eta murrizketa guztiak atzera bueltatzea borrokatuko dugu Funtzio Publikoaren Mahai Orokorrean

admin
-
0

Bihar osteguna Eusko Jaurlaritzak Mahai Orokorraren bilera deitu du, eta balizko negoziaziorako ordainsariak eta 2012ko apartekoa, baja arrunten osagarriak, eta lanaldia besterik ez ditu sartu gai zerrendan. LABen aldetik ondo ikusten ditugu gai hauek planteatu izana, betiere alde bakarrez egindako murrizketa horiek guztiak erabat itzultzeko asmoa baldin badu Jaurlaritzak. Jaurlaritzak alde bakarrez kendutakoa itzultzea ez du negoziatuko LABek, akaso itzulketa oso hori egiteko modua. Hala ere, negoziaziorako borondate adierazpen bezala hartuko genuke kendutako guztia itzultzen badute eta aurretik sinatutako akordioak ere betetzen badituzte, ez baitago batere konfiantza girorik.

LABen iritziz, bilerarako gai zerrendan puntu garrantzitsuena falta da, enpleguarena hain zuzen ere, eta gaia negoziazio mahaian defendatzeko konpromisoa hartzen dugu. Ez Erkorekak Parlamentuan modu koiunturalean mugatu bezala, erretiroei, baizik eta bere osotasunean Sektore Publikoak behar bezala funtzionatzeko behar diren kopuruak adostuz: Aurreikusitako erretiro kopuru handiaz gain, ordezkapenak, ratioak, behin-behineko tasak, azpikontratazioak eta abar.

Eta Erkorekak enpleguari heltzeaz «ez dugu denbora galtzerik» zintzoki esan balu ados egongo ginateke, baina hitz hutsalak eta tranpatiak dira gure ustez. Hain zuzen, denbora da galdu nahi duena: lehenago Enplegu eta Sektore Publikoaren legeak onartu, eta ondoren negoziazio mahaira eraman, erabat baldintzatuta eta sindikatuok eskuak loturik.

Enplegu publikoaren arazoari lehenbailehen heldu behar zaio, lehen bilera honetatik. Benetako aldebiko negoziazio bat egiteko, eta bermeekin. Euskal Herriak behar dituen kalitateko zerbitzu publikoak hornitzeko lanpostu kopuruaz eta definizioaz ari gara.

Hain zuzen ere, astelehenean Josu Erkorekak Gasteizko Parlamentuan egindako egitasmoen aurkezpenean, besteak beste, sektore publikoari eta zehatzago langileoi eragiten digun hainbat kontu aipatu zituen. Euskal Enplegu Publikoaren beste Lege Proiektu bat eta Sektore Publikoaren Antolakuntza kasu, zeinen bitartez langileon eskubideak eta antolakuntza arautuko diren. Ildo hortatik zera baieztatu zuen: “2030ean Euskadiko Administrazio Orokorreko plantillaren % 68 erretiratuko da. Ez dugu denbora galtzerik”.

Lotsagarria da, urtero LAB eta beste sindikatuek Funtzio Publikoaren Mahai Orokorrean zein sektorialetan aldarrikatzen ari garela enpleguaren arazoari errotik heltzeko, koiunturak zein kanpoko faktoreak kontutan edukita baina muga izan gabe. Erkorekak, Jaurlaritzak, enpleguaren arazoa soilik erretiroan ikusten du, ratioak, ordezkapenak, behin-behineko tasak, azpikontratazioak eta abar kontutan eduki gabe.

Iraingarria ere «ez dugula denbora galtzerik» batekin apaintzea bere agerraldia. LABen iritziz denbora asko galdu dugu dagoeneko, eta Eusko Jaurlaritzak denbora galtzen jarraitzen du. Izan ere datorren osteguna urtarrilaren 19ko Mahai Orokorraren bileraren gai zerrendan ez baitago enpleguaren gaian sartuta, sindikatuok berriro eskatu izan diogun bezala.

Osteguneko bilerara eramango du LABek gaia, aspalditik negoziazioaren erdigunean dagoelako. Funtzio Publikoaren mahai Orokorraren bileraren aurretik, elkarretaratzea egingo dugu enplegu egonkorra eta murrizketa guztiak atzera bueltatzea eskatzeko.

 

 

 

Barakaldon hezkuntza eskaintzari eta lanpostuei eustea exijitzen dugu

admin
-
0

Kristau Eskola barruan dauden Hijas de la Caridadeko Monjek, 2001etik La Milagrosa ikastetxearen bidez egiten zuen hezkuntza jarduna alde batera uztea erabaki dute. Erabaki horren ondorioz 40 langile langabeziara joan daitezke, 350 familia hautatutako ikastetxerik gabe eta Barakaldoko herriaren hezkuntza beharrak hasetu gabe geratuko dira. Honen aurrean erabaki ausartak hartzea beharrezko ikusten du LABek.

Hau guztia ez zen gertatuko Miranda Fundazioak azken erabaki hauek hartu ez balitu. Barakaldoko herriari egin beharreko eskaintza soziala egin beharrean, herritarren bizkar negozioa egitera dedikatu nahi dutela dirudi. Miranda Fundazioko kideek, irabazi asmorik gabeko eta izaera soziala duen Fundazioa, beste proiektu bat daukate La Milagrosa dagoen eraikinerako eta alokairua igotzea erabaki zuten, %150ean! Modu honetan, Barakaldoko herriaren hezkuntza eskaintza txikitzen da edozein hezkuntza proiektu garatzea ia ezinezko bihurtzen baita.

Barakaldoko Udalak eta Alkate andreak —Miranda Fundazioko 1. Presidenteordea— erantzukizun zuzena du afera honetan dauka; 39 langile langabeziara joan daitezke eta hezkuntza eskaintza bat ezabatuko du herritik, 350 ikasle postu hain zuzen ere. Badauka Barakaldok horrenbeste ikasle postuak jasotzeko aukera? Zeren zain dago Amaia del Campo ordezkaritza daukan sindikatuarekin biltzeko?

LAB Sindikatuak gogor salatu nahi du Hezkuntza Departamentuaren jarrera. Dirudienez ez dio axola EAEn hezkuntza eskaintza bat galdu eta langabezia beste 39 langilerekin handitzea. LABek, berria jakin eta berehala, Hezkuntza Sailburuari urjentziazko bilera bat eskatu zion. Oraindik data finkatu gabe egon arren sindikatuari jakinarazi zaio bilera batean gaia lantzeko aukera izango dela. LABen iritziz premiazkoa da gaiari eustea eta erabaki ausartak hartzea eta hala adieraziko dugu batzar horretan. Hala ere LAB ez da geldirik egongo eta bestelako bideak ere jorratuko ditu.

LABek, Hijas de la Caridadeko Monjei, Miranda Fundazioari, Amaia del Campo eta Cristina Uriarteri bil daitezela exijitzen diegu, eta edozein formula izanda ere, ausardiaz joka dezatela hezkuntza eskaintza eta 39 lanpostu gal ez daitezen.

Horretaz gain, LABek bat egiten du langileek eta familiek antolatutako mobilizazioekin. Izatez, Barakaldo herriak duen hezkuntza plaza kopuruari eutsi nahi diogu. Orain arte egindako lana ez da alperrik galduko. Bide horretan, Barakaldoko herriari, Hezkuntza komunitate osoari eta sindikatuei mobilizazioetan parte hartzeko deia luzatzen diegu.
 

 

 

Negoziazio kolektiboa desblokeatzeko lanean jarraituko dugu, Akordio Interprofesionalaren mahaian egiturazko akordio bat lortu eta gero

admin
-
0

Adostasuna lortu dugu Akordio Interprofesionalaren mahaian. Bilera gaur arratsaldean izan da, eta sindikatuek adierazpenak egin dituzte bukatu bezain pronto. LABeko ordezkari Xabier Ugartemendiak adierazi du “egiturazko akordio bat” dela sinatutakoa, eta nabarmendu du ezin izan dutela negoziazio kolektiboaren blokeo egoera gainditzeko neurriak adostu, “Confebaskek nahi izan ez duelako”. LABek blokeoa gainditzeko lanean jarraituko duela berretsi du.

Akordio Interprofesionalaren mahaia gaur bildu da berriro, eta egiturazko akordio bat sinatu dugu sindikatuok eta patronalak. LABeko Exekutiboko kide Xabier Ugartemendiaren arabera, “akordioarekin lortu dugu bertako sektore mailako hitzarmenak lehentasuna izatea, hau da, estatuko negoziazio eremutik, patronala, CCOO eta UGTren eskutik jasaten dituzten erasoetatik, babestuak geratzea”.

Modu baikorrean baloratu du babes hori lortu izana, eta akordioa sinatzeko arrazoia horixe izan dela azaldu du. “Baina, akordio honek indarrean dauden hitzarmenak baino ez ditu babestuko, eta, horrexegatik, LABek ere negoziazio kolektiboaren blokeo egoera konpontzea planteatu du. Akordio honen negoziazioan argi geratu da nork blokeatzen duen negoziazio kolektiboa eta nork ez duen blokeoari irtenbiderik eman nahi: Confebaskek eta bere barruan dauden Adegik, Cebekek eta Seak”, jakinarazi du Ugartemendiak.

Hala, ez dituzte desblokeorako neurriak adostu, baina LABek helburu hori lortzeko lanean jarraituko duela berretsi du. “Argi dugu langileak pairatzen ari diren egoerarekin amaitzeko prekarietateari aurre egingo dien edukiak dituzten hitzarmenak behar ditugula, eta hitzarmen horiek lortzeko indar korrelazioa aldatu behar dugu”, zehaztu du sindikatuko ordezkariak.

LABek Birpentsatzen prozesua abiatu zuen joan den ikasturtean, ekintza sindikalean eraginkorragoak izateko, eta langile multzo bakoitzari borrokatzeko eskaintza bat egin ahal izateko. Gure helburua langileak aktibatzea da, beraiek pairatzen ari diren egoerari aurre egiteko eta prekarietatetik irtetzeko. Aktibazo horrek ekarriko du patronala eta administrazioa duten posizioetatik mugitzeko borroka eta konfrontazioa. Hori da bidea egoera aldatzeko eta eduki txukunak dituzten hitzarmenak lortzeko. LABek bide horretan lanean jarraitzeko konpromisoa hartu du, eta hainbat dinamika jarriko ditu abian hori lortzeko.
 

 

 

Mobilizazioak egingo ditugu larunbatean, inposatu nahi dizkiguten merkatu hitzarmenak salatzeko

admin
-
0
Mobilizazioak egingo ditugu larunbatean, inposatu nahi dizkiguten merkatu hitzarmenak salatzeko


TTIP, CETA eta TiSAren aurkako kanpaina osatzen dugun erakundeok mobilizazio eguna antolatu dugu datorren urtarrilaren 21erako, Itunarekiko gure gaitzespena agerian uzteko. Mobilizazioak egingo ditugu Iruñean, Bilbon eta Gasteizen. Europa mailako deialdiarekin bat eginez, inposatu nahi dizkiguten merkatu hitzarmen hauetatik geure buruak aterkiekin babestuko ditugu.

TTIP, CETA eta TiSAren aurkako aterkien elkarretaratzeak egingo ditugu datorren larunbatean, itunen aurkako plataformak eta Euskal Herriko Eskubide Sozialen Kartak deituta: Iruñean, 12:00etan, Carlos III pasealekuan; Bilbon, 12:00etan, Arenaleko zubian; Gasteizen, 12:00etan, Ama Zurian. Hauxe da mobilizazioen atarian kaleratutako adierazpena:

Europar Batasuna eta Kanadaren arteko merkataritza eta ekonomia ituna (CETA) baieztapenerako azken fasean dago. Europar Kontseiluan blokeatuta gelditzekotan egon zen, Valoniako Parlamentuak ez baitzuen bere oniritzia eman nahi, baina, azkenean, nazioarteko presioek, belgikarrak baiezkorantz eraman zituen.

Europar Parlamentuko lan komisioak ezetz esan zion itunari abenduaren 8an eta beste hainbat komisiok berdina egitea espero dugu.

Prozeduraren hurrengo pausoan, Europar Parlamentuak akordioa bere osotasunean bozkatuko du osoko bilkuran otsaileko lehenengo egunetan. Bozketaren emaitza baiezkoa balitz, itunaren atal asko behin behinean aplikatzen hasiko lirateke, eskualdetako eta nazio-parlamentuetan bozkatzen den bitartean (38 guztira. Baten batek onartuko ez balu, akordioa bertan behera geratuko litzateke).

Europar Batasuneko nahiz Kanadako gizarte zibileko hainbat aldetako kideak CETAren aurkako iritzia azaldu dute, ingurugiroaren eta pertsonen oinarrizko eskubideen babesaren aldeko bermerik eskaintzen ez duelakoan. 3,5 milioi pertsonek CETA eta TTIParen (itun bikia) aurkako eskaera sinatu dute jada Europar Batasunean.

CETAri hainbat eranskin eta “adierazpen interpretatibo” gehitu dizkiote, gerora, itunaren aldeko babesa gehitzeko asmotan, baina, testu hauek guztiek, ez dute akordioa gehiegi aldatzen, epaitegi paraleloak, lanpostuen galera, ingurugiroaren babes eza, etab. bezalako hainbat arazo aurkezten dituelarik oraindik, besteak beste.

Honegatik guztiagatik, TTIP, CETA eta TiSAren aurkako kanpaina osatzen dugun erakundeok mobilizazio eguna antolatu dugu datorren urtarrilaren 21erako. Itunarekiko gure gaitzespena agerian utzi nahi dugu baita erabakitzeko gaitasuna eta bozka daukaten europar, kanadiar nahiz nazio, probintzia eta eskualdeetako parlamentuei ordezkatzen dituzten herritarren eskubide eta interesen alde jokatzeko eskaera luzatu ere, itun honek suposatzen duen mehatxua kontutan hartu eta CETAren baieztapenaren aurka bozkatzeko eskatuz. TTIP eta CETAren aurkako jarrera hartzeko eskatu nahi diogu Gasteizko Parlamentuari, lehenago Nafarroako Parlamentuak egin zuen moduan. Merkataritza interesek ezin dute demokraziaren eta pertsona eta planetaren interesen gainetik egon. Horregatik guztiagatik, TTIP eta CETAri ezezkoa ematen diegu, herriek erabaki behar dutelako!
 

 

 

Patxiren etxebizitzaren aurrean agerraldia egingo dugu bihar Donostian

admin
-
0

Geratu behar dugun beste etxe desjabetze bat da. Onartezina da Patxi, bere 84 urteekin, enpresa prestamista batek, XXI. mendeko lukurreroak, etxetik botatzea eta kalean utzi nahi izatea. Momentuz, azken berrien arabera, epaileak atzeratu du etxegabetzea, maiatzaren 15era arte. Biharko zegoen iragarrita.

Etxe desjabetze gehiagorik ez, pertsona guztiok izan behar dugu etxebizitza duina izateko eskubidea, instituzioek bermatu egin behar dute eskubide hori Patxi bezala, prestamista lukurreroen, banku espekulatzaileen edo egoera hauei irtenbidea eskaini beharrean beste alde batera begiratzen duten instituzioen biktima direnen kasuan.

Atzo astelehena lehen pausua eman genuen Patxi eta beste jendarte eragile, sindikatu eta alderdi politiko ugarirekin egoera salatuz. Orain pauso bat harago joatea dagokigu, bihar bere etxetik bidaltzeko asmoa baitzuten. Azken berrien arabera, berriz, epaileak maiatzaren 15era atzeratu du etxegabetzea.

Berriro ere, erakutsi behar dugu desjabetze mehatxu guztien aurreko elkartasuna eta salaketa dela egoera honekin amaitzeko bide bakarra. Herritarrei dei egiten diegu desjabetze hau saihesteko bihar, 11:00etan, egingo den agerraldira eta, era berean, instituzioei publikoei benetako konpromisoa har dezaten, Donostia eta Euskal Herria desjabetzerik gabeko lurraldeak izan daitezen beharrezko konponbideak bilatzeko.
 

 

 

Indarkeria matxistaren aurrean kalera ateratzeko deia egin dugu

admin
-
0

Indarkeria matxista kasu larrien aurrean, LABek indarkeria sexista egungo sistema heteropatriarkarraren izozmendiaren muturra dela adierazi nahi dugu, erro sakon eta zabalak dituen matxismoaren adierazpiderik bortitzena, baina ez bakarra. Horrela, Emakumeen Mundu Martxatik deitu diren deialdi desberdinetan parte hartzeko deia egin nahi diegu langile eta herritarrei.

Indarkeria matxista kasu larrien berri izan dugu azken egunotan. Atzo, gizon batek emakume bat hil zuen Burlatan eta gorpua ibaira bota ondoren, bere burua entregatu zuen poliziaren aurrean. Beste alde batetik, Sara Majarenas preso politikoaren bikotekide ohia bere alaba hiltzen saiatu zen. Honetaz gain, bi gizon atxilotu zituzten igandean, bikotekideak jotzea leporatuta, Gasteiz eta Durangon.

Emakumeen kontrako indarkeria matxistaren azken biktimak izan dira. LAB sindikatutik indarkeria sexista egungo sistema heteropatriarkarraren izozmendiaren muturra dela adierazi nahi dugu, erro sakon eta zabalak dituen matxismoaren adierazpiderik bortitzena, baina ez bakarra.

Hala ere, ez gara istripuez edo saihestu ezin diren dramaz ari, arazo sozial eta politiko batez baino, alternatibak dituena. Egungo ereduak bultzatzen dituen botere harremanak iraulita zein harreman parekide eta justuagoetan oinarrituko den jendarte bat eraikita egingo diogu aurre indarkeriari modurik eraginkorrenean.

Honekin lotuta, ezinbestekoa da erasoak ozen salatu eta jendarte mobilizazioa hauspotzea. Horrela, Emakumeen Mundu Martxatik deitu diren deialdi desberdinetan parte hartzeko deia egin nahi die LAB sindikatuak langile eta herritarrei. Mobilizazioak “Eraso sexistarik ez” lemapean egingo dira.
 

 

 

Lan arloan erabateko ahalmena eskuratzeko urratsak emateko eskatu diogu Nafarroako Gobernuari

admin
-
0

LABek lan osasuneko ekintza planari babesa eman dio, baina aipatutako planean dauden ekimenen jarraipen estua egitekoa konpromisoa hartu du, bere eraginkortasuna aztertu eta, beharrezkoa izanez gero, beharrezkoak liratekeen aldaketak planteatzeko. Era berean, Nafarroako Gobernuari eta berau sostengatzen duten alderdiei honako hau eskatu die: lan arloan eta lan osasunaren prebentzioan erabateko ahalmena eskuratzeko urratsak eman ditzatela, eta Lan Ikuskaritza propioa lortzeko helburua bere egin dezatela.

Nafarroako Gobernuko Lan Osasuneko Zerbitzuak ekintza-planaren (2016-2019) zirriborroa bidali eta ekarpenak eskatu zien sindikatu ezberdinei. Ekarpenak egiteko epea laburregia bazen ere, plan horren inguruko kontsentsua eraikitzeko aipatutako Zerbitzuak erakutsitako borondatea aintzat hartzen dugu. LABen jarrera bi ardatzetan labur biltzen da.

Alde batetik, LABen ustez oso zaila da nafar langileok ditugun osasun arazo larriei aurre egitea, arriskuen prebentzioari nahiz lan baldintzei dagokionean legeak sortzeko ahalmenik gabe, ezta legedi horren betetzeaz arduratuko litzatekeen Lan Ikuskaritza propiorik gabe. Ildo honetan, Nafarroak lan eremuaz nahiz prebentzioaz arautzeko ahalmena eskuratzea funtsezkoa da, baita Lan Ikuskaritza propioa izatea ere.

Beste alde batetik, LABen ustez premiazkoa da Nafarroan neurriak hartzea, lan erreformaren ondoriozko lan baldintzen prekarizazioak langileen osasunean eragindako ondorioei aurre egiteko.

Aipatutako mugak kontutan hartuta, baina era berean ekintza-planean aurreko Gobernuen planekiko alderatuta ekimen berritzaileak daudela aitortuta, LABek hainbat proposamen egin ditu ekintza-planari begira eta horietako gehienak onartuak izan dira, tartean honako hauek:

-Lan osasunaren ikerketa nahiz arriskuen prebentzioa egitean, genero aldagaia txertatzea.
 -Lan osasunean jasandako kalteak aztertzean, ebentualitatea eta azpikontratazioa bezalako prekarietate aldagaiak kontutan hartzea.
 -Gaur egun ezkutuan mantentzen diren kalteak aitortzeari begirako ekintzak martxan jartzea.
 -Nafarroako eraikin eta instalazioetan legokeen amiantoaren mapa egitea.
 -Egungo prebentzio legedia betetzen dela bermatzeko, enpresei begirako behatze eta kontrol tresnak indartzea.
 -Mutuen jarduera ikuskatzea, nola prebentzioan hala lan osasunaren kudeaketan dauden praktika desegokiak antzemateko asmoz. 
 -Nafarroan indarrean dagoen sistema prebentibo merkantilizatua eraldatzea.

Honela bada, LABek Lan Osasuneko ekintza-planari babes kritikoa eskaintzen dio eta aipatutako planean dauden ekimenen jarraipen estua egiteko konpromisoa hartzen du, bere eraginkortasuna aztertu eta beharrezkoa izanez gero beharrezkoak liratekeen aldaketak planteatzeko.

Era berean, Nafarroako Gobernuari nahiz berau sostengatzen duten lau alderdiei zera eskatzen diegu: lan arloan eta lan osasunaren prebentzioan erabateko ahalmena nahiz Lan Ikuskaritza propioa eskuratzeko urratsak ematea.

 

 

 

Osakidetzak itxi egin du Lezako Ospitaleko garbitegia

admin
-
0

Arabar Errioxako ESIko Zuzendaritzak urtarrilaren 13an, bat batean, iragarri zuen itxi egingo duela Lezako Garbitegia. Bertan Osakidetzako 4 langilek egiten dute lan. Horren ordez zerbitzua miseriazko soldatak ordaintzen dituen enpresa bati eskainiko dio. Arropa garbitzeko zerbitzua INDESA enpresari emango zaio. Honek Arabako Diputazioaren parte hartzea dauka eta ez-gaitasunen bat daukaten langileak kontratatzen ditu.

LABek gogorki salatu nahi du EAJren azken jokaldi hau, aurreko akordio guztiak apurtzen dituena, Mahai Orokorrean Zearreta jaunaren gezurrak agerian uzten dituena, Osakidetzako behe-kategorien desagerpenari segida ematen diona, eta zerbitzu publikoa eskeintzen diona lan-baldintzak kaskarrak eta miseriazko soldatak dauzkan enpresa bati, “insertzio laboralaren” aitzakiapean.

Lehenik eta behin, pribatizazio hau Mahai Orokorreko Akordioaren eta hainbat Dekreturen kontrakoa da, hala nola EAJk berak onarturiko Legebiltzarreko Akordioak. Argi dago diruaren txintxina tartean delarik, EAJren hitzak –eta sinadurak- ez duela deus balio.

Honetaz gain, arropa garbitzeko zerbitzu honetako lan-baldintzak erabat kaskartzen dira. Izan ere, INDESA, Arabako Aldundia akziodun nagusia izanik baina kapital eta kudeaketa pribatuarekin, behin eta berriro izan da salatua inposatzen dituen lan baldintza onartezinengatik. Inolako lotsarik gabe, ez-gaitasuna daukaten langileak lan-esku merke bezala erabiltzen ditu eta enpresako kargu batzuk urteko 68.000 euro irabazten duten bitartean, bataz besteko langileak ez dira heltzen hilean 1.000 eurotara (operarioen soldata batzuk 717 eurokoak dira).

Pribatizazio honen aurrean, LABk astelehen honetan bertan informazioa emateko asanblada egin du. Berriz ere, kalitatezko osasun sistema publikoa defendatzeko tenorea dugu.

 

 

 

Gorabideko langileek galdutako erosahalmena berreskuratzea exigitu dute

admin
-
0
Gorabideko langileek galdutako erosahalmena berreskuratzea exigitu dute


Gorabideko elkarteak Bizkaian desgaitasun intelektuala dutenei laguntzen egiten du lan. Bertako langileek asanbalda egin zuten abenduaren 1ean eta bertan, enpresak egindako azken proposamena aztertu zuten. Honek ez du azken 5 urteotako eros-ahalmenaren galera konpentsatzen, eta ez du langileek proposatutako inolako hobekuntza sozialak onartzen. Horregatik eta egoera aldatuko duen neurriak aldarrikatuz kalera irten dira langileak.


 

 

 
1...968969970...1,590Page 969 of 1,590

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus