2025-12-31
Blog Page 956

24 orduko lan uztea egingo dute EuskoTrenen, martxoaren 1ean

admin
-
0

EuskoTreneko batzorde iraunkorrak 24 orduko lan uzte bat iragarri du martxoaren 1erako. Egun horretan, greba eskubidea defendatu zutenen aurkako epaiketa egingo dute.

EuskoTreneko batzorde iraunkorrak ohar hau kaleratu du:

Urtarrilaren 24an Batzorde Iraunkorra bilduta, bai Batzorde Iraunkorrari zein EuskoTrenen ordezkaritza duten sindikatuei eta burutzera iritsi ez zen grebaren Greba Batzordea osatzen zutenei egindako eraso antisindikalari aurre egiteko ekintza sorta adostu zen.

Batzorde honek ez du greba eskubidearen aurkako inolako erasorik onartuko. Greba langileon funtsezko eskubidea da. Ezin dugu epaitegietara eramanda berau manipula dezaten onartu. EuskoTrenen Zuzendaritzak abiatutako ekimenak langileon eskubideak zapaltzea du helburu, gizarte demokratikoan onartezina dena.

Lehen ekintza gisa Zuzendaritzari harreman-etete idatzia bidaltzea adostu zen. Etzuen zentzurik bileretara ezer gertatuko ezpalitz bezala joateak, eta horrelako egoeran negoziazio gaitasuna ezbaian jarria dago. Ezin da horrelako harritzarra gainean dugula negoziatu. Halaber, honako proposamenak ere berretsiak izan ziren:

– Martxoaren 1ean burutuko den epaiketa egunean 24 orduko lan uztea eta enkartelada epaitegi atarian.

– Enkartelada batekin batera federazioen prentsaurrekoa, pairatutako erasoa salatzeko (data zehazteke).

Epaiketa dataren aurretik enkartelada gehiago egiteko datak adostea zintzilik geratuko litzateke.
 

 

 

Zazpi neurri aurkeztu ditugu eztabaida sozialaren iruzurrari aurre egiteko

admin
-
0
Zazpi neurri aurkeztu ditugu eztabaida sozialaren iruzurrari aurre egiteko


Azken egunotan UGT-k, CCOO-k eta CEN-k, haien egiturak ordaintzeko, diru publikoa erabili izanaz argitaratu den informazioak denok ezagutzen genuen sekretua baieztatu du: UPN-k legez kontra finantzatu zituen aipatu eragileak, erregimenarekiko atxikimendua lortze aldera. Horixe da gaur LAB sindikatuak adierazi duena, Nafar Lansareko egoitzaren parean.

Nafar Lansaren LABeko ordezkaria den Imanol Karrerak eta Nafarroako bozeramaile Igor Arroyok honako zazpi proposamen zehatz hauek erregistratu dituzte.

Nafarroako Enplegu Zerbitzuari dagokionez:

-Eskatzen dugu Nafarroako Enplegu Zerbitzuak edo bertzela, Nafarroako gobernu berak ekin diezaiola UGT-k, CCOO-k eta CEN-k funtsa publikoak erabili izanaren harira, administrazio espedienteari. Uste dugu Nafarroako Gobernuak ez dezakeela aurreko egoera gainditutzat eman, eta ardurak eskatu behar dituela, bidegabe edo zilegitasunik gabe erabili dirua itzultzea barne hartuz.

-LABek eskatuta, UGT-rekin eta CCOO-rekin lotu hitzarmen arauemaileak deuseztatu badira ere, Gobernuak, batez ere, eusten dio laneko prestakuntza eta orientabideko zerbitzuak azpikontratatzeari, norgehiagoka bidez. Horrela, UGT-k eta CCOO-k jarduera horien alderdi bat kudeatzeko aukera izan dezakete. LABen iritzian, administrazio espedientea ebatziko ez den bitartean, Nafarroako Gobernuak bertan behera utzi behar die UGT-ri, CCOO-ri eta CEN-ri programa publikoen esleipen berri oro.

-Berresten gara eraginkortasun, efizientzia eta gardentasun bermerik onena lanbide prestakuntza eta orientabideko sare publikoa garatzean datzala, azpikontratazioen politikarekin amaituz. Nafarroako Gobernuak onartu zuen, LABek eskatuta, Nafarroako Enplegu Zerbitzuaren estatutu berrituetan sare publikoaren funtsezko ardatz eratzailearen izaera, baina bi aurrekontu-ekitaldietan, %23tik %27ra bakarrik handitu da. Aurtengo urtea erabakigarria izanen da 2018. urteko aurrekontuetan aurrera egin nahi bada. Xede horretan, proposatzen dugu berariazko Batzordea sortzea, horretan ardura izan dezaketen eragile guztiez osatua. Sare publikoa aipatu ildoan garatuko ez balitz, LABek utziko luke Nafarroako Enplegu Zerbitzua.

Nafarroako Parlamentuari dagokionez:

-Gobernua sustengatzen duten taldeei eskatzen diegu Ikerketa-batzordea sor dezatela Parlamentuan. LABen ustez, Gobernuak hasi beharko lukeen administrazio espedientearen ekimen osagarria dugu. Ikerketa-batzorde horren xedea balizko “Eztabaida Sozialaren” estalduran Nafarroan garatu zen eredu klientelarraren ardura politikoak ebaztea litzateke.

-Honez gain, Gobernua sostengatzen duten taldeei eskatzen diegu Nafarroako Eztabaida Sozialaren Kontseiluaren sorrera agintzen zuen 22/2014 legea indargabetzeari ekin diezaiotela, klientelismoan eta funtsa publikoen erabilpen bidegabean oinarritu eztabaida sozialaren eredua instituzionalizatzea dakarrelako.

Garapen Ekonomikoaren Sailari dagokionez:

-Nafarroako Gobernuari egin eskaeran berresten gara, lanerako sarbidean ematen den bazterkeria oro gainditzeaz ardura dadin, batez ere, UGT-ri eta CCOO-ri afiliatuak dauden gizonak nagusiki kontratatzen diren industriako enpresetan. VW-eri dagokionez, asmo-aitorpena lotu bada ere, enpresak oraindik ez du bermerik eskaintzen aukera berdintasuna berma dadin. Gure ustez, Ekonomia Garapen Sailaren sustapena oinarrizkoa gertatuko da alderdi hau egokiro ebatz dadin.

-Funtsezkoa deritzagu UGT-ren eta CCOO-ren gainfinantziazioak hauteskunde sindikalen emaitzetan izan duen eraginari buruzko azterketa egiteari. Prestakuntza eta enpresa askorako sarbidea kontrolatzean, nahiz proselitismoa egiteko baliabide publiko ugari haien esku izatean, UGT-ren eta CCOO-ren ordezkaritza sindikala puztu da toleski.
 

 

 

PRECOra joko du Jasoko enpresa batzordeak, egoera desblokeatzeko asmoz

admin
-
0
PRECOra joko du Jasoko enpresa batzordeak, egoera desblokeatzeko asmoz


Itsasondoko Jaso Industrial enpresako langileek gaur 2 hilabete bete dituzte Greba Mugagabe Partzialean. Greban, 36 egun eman dituzte eta, gaurkoan, zazpigarren manifestazioa egin dute Ordiziako azokan. Aipatu behar da 2015 amaieratik ez dutela hitzarmenik eta negoziaketa hasi zutenetik 15 hilabete pasa direla eta oraindik ez dutela akordiorik.

Hauxe da Jasoko enpresa batzordeak gaur argitaratu duen oharra:

Lehenengo eta behin, argi eta garbi utzi nahi dugu, Jaso dugun gatazkan arazoa ez dela ekonomikoa, baldintza sozialena baizik. Jasoko langileon artean ezberdintasun sozial handiak daude eta gure helburua, hitzarmenez hitzarmen, ezberdintasun hauek murrizten joatea da eta urte batzuetan, Jaso enpresa justu eta demokratiko bat izatea da.

Hitzarmenean momentu honetan, bi puntuk dute negoziaketa blokeatua, nominaren homogeneizazioak eta gaixotasun bajek. Enpresaren jarrera immobilista eta zentzugabea ikusirik, aurreko astean mugimendu garrantzitsu bat egitea erabaki genuen, bi puntuetako bat hurrengo hitzarmenerako utzi eta oraingoan bakarrarekin gelditzea, hau da, egoera blokeatzen duten bi puntuetako bat alboratzea eta bestea lortzea. Esan dugun moduan, gure helburua, pixkanaka eskubide sozialak lortzen joatea da eta enpresan dagoen diskriminazioarekin amaitzea.

Enpresak hurrengo egunean erantzun zigun eta erantzuna lotsagarria izan zen. Lotsagarria izan zen, zeren ez du ezer mugitu bere planteamendutik, ez gaixotasun bajetan ezta nominaren homogeneizazioan ere. Eta hau gutxi balitz, hau bezain larria eta kezkagarria, nagusiak hasieratik bere hitza emana zuen hitzarmenak lan erreformarekiko blindajea izango zuela, eta azken proposamenean, bere hitza jan eta puntua baztertu du. Benetan lotsagarria eta kezkagarria da jarrera hau hitzarmenerako eta gure enpresaren etorkizunerako.

Jaso iragan eta etorkizun handiko enpresa da, mundu mailan proiekzio handikoa, lan konpromiso handiak ditu orain eta etorkizunean aurrera eramateko eta historikoki izan dituen bezalaxe, langile konprometituak. Arazoa da, 15 hilabete hauetan, nagusiari era eta modu guztietako proposamenak egin zaizkiola bi aldeentzako hitzarmen onuragarri bat sinatzeko eta behin eta berriz, egiten diogun proposamen bakoitza atzera botatzen digu, eta egoera blokeatua mantentzen du. Zuzendaritza batek bere langileekiko izan behar lukeen begirunerik ez diogu inondik inora ikusten. Eta ematen zuenean egoerak ezingo zuela okerrera gehiago egin, negoziaketa guztian onartua izan duen Lan- erreformari blindajea ipintzea kendu egin digu. Lotsagarria da, nagusi batek bere hitza eman, konpromiso garrantzitsu bat hartu eta hori haustea.

Nagusiaren eta zuzendaritzaren jarrera immobilista eta onartezina ikusirik, Itsasondo barruan saiakera guztiak egin ondoren eta egoera desblokeatzea ezinezkoa dela jabeturik, PRECOra deia luzatu dugu bitartekaritza lanak egiteko. Jasotik kanpokoa eta gatazka hauetan aditua den erakunde honek, proposamen bat egin eta egoera desblokeatzea da helburua.

Bilera, ostiral honetan, Donostiako Javier Barkaiztegi kaleko 19 zenbakian izango da goizeko 10etan eta espero dugu zuzendaritzak arduraz jokatuko dutela eta bertan izango direla, behingoz egoera sostengaezin hau desblokeatzeko eta gure enpresa oraindik eta arrisku handiagoan ez jartzeko.

 

 

Andrés Bódaloren askatasuna eskatu dugu, hirugarren gradua ukatu ostean

admin
-
0
Andrés Bódaloren askatasuna eskatu dugu, hirugarren gradua ukatu ostean


LAB sindikatutik, Andrés Bódaloren familia eta lagunei eta Sindicato Andaluz de Trabajadores (SAT) osatzen duten guztiei gure elkartasun guztia eta besarkada iraultzaile bat bidali nahi diegu, eta, aldi berean, Bódalo pairatzen ari den egoera ere salatu nahi dugu. Hirugarren gradua ukatu berri diote, eta Jaengo espetxean preso jarraitu beharko du.

Andrés Bódalo 2016eko martxotik dago espetxean; bere delitu bakarra, beste askok bezala, bere herriarentzako askatasuna eta justiziarekin eta esplotatu eta esplotatzaile gabeko mundu batekin amets egitea da.

Ordutik Jaengo kartzelan dago preso, ezarri zioten hiru urtetako espetxe zigor bidegabea betetzen; sistema errepresiboak azken egunera arte betetzea nahi duen zigorra, hain zuzen ere.

Andrés Bódaloren atxiloketa eta espetxeratzea Espainiar Estatuak inposaturiko eta gobernu autonomiko ezberdinek txintik ere egin gabe aplikatzen duten errepresio olatu baten testuinguruan kokatu behar da. Errepresio honek helburu garbi bat dauka; beldurra eraginez, egoera injustuen aurka borrokatzen dauden mugimenduak indargabetzea, hain zuzen ere.

Kalera ateratzea beste irtenbiderik ez daukagu. Kalea, bertatik bota nahi gaituzten herri mugimenduaren espazio naturala da Bódaloren askatasuna eta herri langilearen askatasuna exijitzen dugun guztiok aktibatu behar duguna.

Hor bertan egin behar dugu borroka eta bertan irabazi behar dugu borroka hau, orain arte ikusi izan dugun bezala. Kalea irabaziz bakarrik lortuko dugu Andrés espetxetik ateratzea eta injustizia honekin bukatzea, ahal bezain azkar beti egon behar izan zuen tokira itzul dadin; bere jendearen artean, borrokaren lehen lerroan eta injustizien aurka borrokatzen.

Azaldutako guztiarengatik, LABek Euskal Herritik Andaluziako herria Andrés Bódaloren askatasun exijitzeko kaleak betetzera animatzen dugu. Hain justu, otsailaren 19an mobilizazioak egingo dituzte Jaenen. Egoera injustu honekin bukatzeko modu bakarra izango da.
 

 

 

Ainhoa Etxaide: “Ez da egia AHTa atzera bueltarik ez duen proiektua denik; ez dago egina”

admin
-
0
Ainhoa Etxaide: “Ez da egia AHTa atzera bueltarik ez duen proiektua denik; ez dago egina”


LABek eta ELAk inoiz egin ez den azterketa bat eskatu diote EKOPOL ikerketa taldeari, AHT proiektua zertan den eta egitasmoaren bilkaeran Euskal Herriak zenbat galdu duen ikusteko. Bada, ikerketa hori osatu dute dagoeneko, eta txostena gaur aurkeztu dute Bilbon, Roberto Bermejo, David Hoyos eta Gorka Bueno unibertsitate irakasleen eskutik. LABeko idazkari nagusiak azaldu du ikerketa enkargatzeko arrazoia: “Gure helburua eztabaida eta mobilizazio soziala surpertzen laguntzea da”.

“AHTa gelditu egin behar da, alternatibak badaudelako, askoz ere emankorragoak, herritarren arazok konpontzeko balio dutenak; askoz ere merkeagoak, jada dagoena aprobetxatzeko aukera ematen dutelako; eta askoz ere zuzenagoak, ingurumena zainduz egin daitezkeelako”. LABeko idazkari nagusi Ainhoa Etxaidek AHTaren proiektuaren zentzugabekeria salatu du, proiektuaren inguruko ikerketa akademikoaren aurkezpenean.

Hain zuzen ere, proiektuak interes ekonomiko pribatuei erantzuten diela berretsi du, “eta horretarako, noski, guk ez dugu alternatibarik proposatzen. Guk diru publikoa jendartearen mesedetan eta jendartearen bizi baldintzak hobetzeko erabiltzea exijitzen dugu”.

Eztabaida itzali xamarra dagoela onartu du, eta horrek gobernuen alde jokatzen duela ohartarazi. LABek borroka honetan 30 urte eman dituela azpimarratu du, eta ikerketa eztabaida eta mobilizazio soziala berpizteko helburuarekin enkargatu zutela adierazi du, ELArekin batera.

Ikerketa eskatzerakoan “diskurtso ofiziala” desmontatzea bilatu dute bi sindikatuek, Etxaideren hitzetan. “Ez da egia AHTa atzera bueltarik ez duen proiektua denik; ez dago egina, sekulako arazoak daude proiektu hau burutzeko eta denborak erakutsi du erabaki zentzuzkoena proiektu bertan behera uztea dela. Gure iritzia edo susmoa zena datuetan oinarritutako baieztapen bat izan zitekeen ikusi nahi genuen. Eta hala da, ikerketak arrazoia ematen digu”, azaldu du.

Hortaz, txostena argitaratuta, borroka honetarako tresna berri bat dugula azpimarratu du. “Gaur plazaratzen dugu ikerketa, gaurtik aurrera tresna berria dugu eragileekin mobilizazioa nola berpiztu eztabaidatzeko. Dokumentua egin duten unibertsitako kideei eskertu nahi diegu ekarpena. Egindako ikerketan sartutako denbora, ahaleginak. Tresna bat gehiago dugu kontrako jarrera zabaltzen jarraitzeko. Instituzioetatik ezarri nahi den ixiltasunaren aurrean, zenbat eta ahots gehiago egon, orduan eta aukera gehiago herritarrengana gure mezua iristeko”, erantsi du.

Hasierako argudio berak

LAB hasiera-hasierako argudioak defendatzen ditu, proiektua ez delako beharrezkoa, ez dituelako arazoak konpontzen. Joan etorri gehienak eskualde barruan egiten dira, ondoren herrialdean zehar eta gutxi batzuk hiriburuen artean. Ez da beharrezkoa.

Joan etorri gehienak langileek eta ikasleek egiten dituzte, ez dago benetako zerbitzu publikorik dagoen beharra bideratzeko. AHTra doan dirua ez da benetakoak eta egunerokoak diren arazoak konpontzeko. Ez du ezer konpontzen.

Izugarrizko kalte ekonomiko, sozial eta ingurumenezkoak izango ditu eta onura sozialik batere. Irabazi piloa enpresa gutxi batzuentzat, hori da justifikazio bakarra. Proiektuaren defendatzaileak eta exekuzioa egiten ari direnek ez dute bideragarritasun planik aurkeztu. 30 urte pasa dira proiektua inposatu zaigunetik.

Proiektuaren finantziazioaz dakiguna da diru publiko itzela erabiliko dela interes pribatuak bilatzen dituen proiektuan, diru publiko itzela desbideratuko dela enpresa pribatu batzuetara jendartearen bizi baldintzak hobetzera bideratu beharrean.

Proiektuaren finantziazioaz dakiguna da gastua igotzen ari dela (9.000 milloi gehiago) baina ez dakigu zenbaterainokoa izango den kostua. Ez dago benetako ikerketarik azken kostuaren inguruan.

Ez dakigu zein zerbitzu eskainiko dituen. Baina badakigu ez ditugula behar eta dena dela geuk ordainduko ditugula, administrazioak ez du esaten ze kudeaketa gastu ordainduko dituen.

Hirugarren argudioa da, LABen ustez, pisuzkoena. AHTa gelditu egin behar da badaudelako alternatibak, askoz ere emankorragoak, herritarren arazoak konpontzeko balio duten neurrian; askoz ere merkeagoak, jada dagoena aprobetxatzeko aukera ematen dutelako; etta askoz ere zuzenagoak, ingurumena zainduz egin daitezkeelako.

30 urte hauetan proposatu eta eskatu dugu trenbide sare egoki bat egitea. Eskatu dugu errepideak, portuak eta trenbideak bere osotasunean hartuko dituen eta elkarlotuko dituen eredura jotzea. Eta entzungor egin digute. Proiektuaren funtsean dagoen auziagatik: kontua ez da nola konpontzen ditugun mugikortasun arazoak, proiektuak interes ekonomiko pribatuei erantzuten die eta horretan, noski, sindikatuak ez du alternatibarik proposatzen. LABek diru publikoa jendartearen mesedetan eta jendartearen bizi baldintzak hobetzeko erabiltzea exigitzen dugu.
 

 

Bertan behera geratu da Larrialdiak-EULEN LOGS Aldi Baterako Enpresa Elkarteko greba deialdia, enpresarekin akordioa lortu ondoren

admin
-
0

Larrialdiak-EULEN RTSU Euskadi 2014 Aldi Baterako Enpresa Elkartearen Bizkaiko enpresa batzordeak jakinarazten du zerbitzuaren emakidadunarekin akordio batera heldu dela. Bertan, greba deialdia motibatu duten inposatutako neurrien inplantazioari uko egiten du enpresak. Hortaz, hurrengo asteetarako programatuta ziren protestak alde batera utziko ditugu, baita greba deialdia ere.

Eskerrak eman nahi dizkiegu beren eskubudeengaitik borrokatu duten langile guztiei eta gizarteari orokorrean, gatazka honen aurrean interes handi bat duela erakutsi duelako eta elkartasun- adierazpen ugari jaso ditugulako.

Halabaina, helburu hauek lortzeak ez du esan nahi borroka etsiko dugunik. Oraindik lana daukagu pairatzen ari garen egoera prekarioarekin amaitzeko.
 

 

 

Greba mugagabean dira Itziargo Correan

admin
-
0

Nicolas Correa enpresak (Correa Anayak) Itziarko lantokiko lan-baldintzen funtsezko aldaketa bat aurrera eramatea erabaki du, langile guztiak Burgoseko lantokira bidaltzeko asmoarekin. Erabaki honek Itziarko langile guztiei eragiten die, 58 langileri hain zuzen. Erabaki hau oztopatu nahian langilean greba mugagabean dira.

Kontsulta-aldia urtarrilaren 23an hasi zen eta 15 egunetan garatuko da. Azken erabakia otsailaren 7an hartuko dute. Aurreko astean hainbat bilera egin dituzte langileen ordezkariek Gipuzkoako Foru Aldundiarekin eta Eusko Jaurlaritzarekin, aurrerapen eta konpromiso gutxi lortuz.

Atzo, urtarrilak 31, egin zuen enpresarekin hirugarren bilera komiteak. Oraingoan ere kontsulta-aldia geratzeko eskatu zuen komiteak, egoera aztertu eta Itziarko lantegirako bidegarritasun plan bat egiteko aukera zabaltzeko. Enpresaren erantzuna, berriro ere ezezkoa izan zen, erabakia irmoa zela eta ez dagoela atzera bueltarik.

Langileak greba mugagabean daude urtarrilaren 23tik, eta horrela jarraituko dute enpresak erabaki hau atzera bota arte. Gure ustez, horren atzean erabaki politiko bat dago, Burgoseko Administrazioko Kontseiluan hartutako erabaki politikoa, hain zuzen. Eta horren ondorioz, lantoki bat itxi, 58 lanpostu suntsitu eta ekoizte-prozesua Euskal Herritik aterako da.
 

 

 

Nemak, Domiberia, Indaux eta Maderas Mejoradas Industrial: borrokak merezi du

admin
-
0
Nemak, Domiberia, Indaux eta Maderas Mejoradas Industrial: borrokak merezi du


Lau adibide izan ditugu urtarrilean, borrokak merezi duela harro esateko. Hain zuzen ere, Nemak, Domiberia, Indaux eta Maderas Mejoradas Industrial enpresetako langileek akordioak izenpetu dituzte zuzendaritzarekin, enpleguaren defentsan, negoziazio gogorren ostean.

Nemak Etxebarrian dago, Bizkaian, Lea-Artibai eskualdean. Aluminiozko fundizio honetan 58 langile finko egin behar izan ditu enpresak, lan itunak behartuta. Itunak beste 46 kontratu finko ekarri zituen iaz. 104 langile, orotara, bi urteko epean. Azken bost urteetan, berriz, ia 200 langile mugagabe bihurtu dituzte; hots, lan taldearen %35. Hau guztia, oso albiste ona. Izan ere, Nemakeko adibideak erakutsi du, antolakuntza eta borrokari esker, prekarietateari aurre egin ahal zaiola, kalitatezko enplegua sortzeko bidean.

Ugaon dago Domiberia, Bizkaian ere, Arratia-Nerbioi eskualdean. Metalezko edukiontziak egiten dituzte bertan, eta, lantegi honetan ere, kontratazio politikan eragin du LABek: Aldi Baterako Laneko Enpresako hamahiru langileri gutxienez kontratu mugagabea egitea lortu dugu.

Honetaz gain, borrokak zorioneko berri gehiago ekarri ditu Ugaoko lantegira. Hain justu, enpresako lan hitzarmena sinatu berri dute, langileen batzarraren gehiengo zabalarekin. Urtebeteko negoziazioak emaitzak ekarri ditu, hitzarmenak hobekuntza nabarmenak jaso baititu: lanaldia egun batez jaitsiko da, eta, aldi berean, malgutasuna jaitsi eta honen prezioa igo dira; erreformaren aurrean babestea lortu dugu, ultraktibitate klausula eta deskuelgearen kontrako klausula txertatuz eta derrigorrezko arbitraia ekidituz; eta KPIaren erreferentzia berreskuratu da, eta hemendik aurrera igoerak erreferentzia honetatik gorakoak izango dira. Era berean, igoera ekonomikoa eman da gaueko plusean, elbarritasun plusean, eskola laguntzan… Hau guztiaz gain, oporretako eta martxoko ordainsarien kopuruak igo dira.

Domiberian gauzatutako borrokaren oinarria sindikatuen batasuna izan da, horrek ahalbidetu baitu hitzarmen duin bat izenpetzea.

Aia eta Getarian dago Indaux, Gipuzkoan, Urola-Kosta eskualdean. Altzarien burdineria ekoizten dute lantegian, eta bertako langileek hitzarmena sinatu berri dute zuzendaritzarekin. Bistan da akordio hau ere borrokaren ondorioz iritsi dela. Izan ere, bi urteko negoziazioen ondoren, bi greba egunen ostean eta hainbat mobilizazioen eraginez sinatu dute. Gainera, gehiengo zabal batek babestu du, eta LABek hasieratik jarritako helburuak bete direla esan daiteke.

Besteak beste, kontratazio berriekiko diskriminazioa eta hauen eskala bikoitzekin amaitzea lortu dugu: aurreko hitzarmenetik kategoria baxuago berri bat zegoen kontratazio berrientzat, %30 gutxiago kobratzeko. Hitzarmen honetan kategoria hau desagertarazi dugu. Honetaz gain, aparteko orduek enplegua ez desagerrarazteko bidea ezarri dugu, kobratzea debekatuz; lan erreformaren kontrako klausula jaso dugu, lan baldintzak aplikatzea bermatuz; KPIari lotutako soldatak eta igoerak bermatzea ahalbidetu dugu, eta enpresa barneko tauletan ere aplika daitezen lortu; azkenik, enpresa euskalduntzeko Euskara Plana garatzeko konpromisoa adostu dugu.

Indauxen erdietsitako akordioa ere ez litzateke posible izango langilegoaren parte hartze eta kohesiorik gabe. LABen iritziz, horixe behar du izan jorratu beharreko bidea langile guztien eskubideak babesteko.

Maderas Mejoradas Industrial, lehen Prodema izenarekin ezagutua, Legorretan dago. Egurrezko xafla eta taulak egiten ditu enpresak, eta bertako langileak bi hilabete egon dira lan uzteak egiten hitzarmen duin bat lortzeko. Bada, asteotako borrokak emaitza ekarri du, aurreakordioa sinatu baitute zuzendaritzarekin. Beste lorpen askoren artean, azpimarratu behar da bi urteko hitzarmena dela adostutakoa, ultraktibitate mugagabearekin. 2016 eta 2017rako, urte bakoitzerako %1,9ko soldata igoera zehaztu dute; lizentzietan hobekuntza batzuk izango dira; gertakari arruntak gizarte segurantzarekin kudeatzeko konpromisoa hartu dute; eta hurrengo hitzarmenean lanaldia aztertzeko konpromisoa jaso dute.

Honela gauzak, urte berriak lau adibide esanguratsu hauek ekarri dizkigu. Hortaz, jarrai dezagun borrokan!
 

 

 

Murrizketen aurkako giza-kate bat egingo dugu ostiralean, Eskubide Sozialen Kartak deituta

admin
-
0
Murrizketen aurkako giza-kate bat egingo dugu ostiralean, Eskubide Sozialen Kartak deituta


Euskal Herriko Eskubide Sozialen Kartaren izenean, sindikatu eta eragile sozialetako hainbat ordezkarik agerraldia egin dute gaur, babes sozialerako euskal sistema duin bat aldarrikatzeko eta Eusko Jaurlaritzak legea betetzen ez duela salatzeko. Hain zuzen ere, Gasteizko Gobernuaren murrizketa politika salatu dute eta, bide batez, ostiralerako deitutako giza-katean parte hartzeko deia luzatu dute. "Murrizketa politika hauen aurrean, larritasun sozial eta pobretze orokortua gainditzeko, mobilizazioen garrantzia berresten dugu", nabarmendu dute. Giza katea ostiralean izango da, 10:30ean, Lanbidek Bilbon dituen bulego nagusietatik abiatuta (Bizkaia plazatik, hain justu). Eusko Jaurlaritzaren ordezkaritzan amaituko.

Hauxe da Euskal Herriko Eskubide Sozialen Kartaren izenean argitaratutako adierazpena, ostiraleko protestaren harira:

BABES SOZIALERAKO EUSKAL SISTEMA DUIN ETA KALITATEZKOA

EUSKO JAURLARITZAK EZ DU LEGEA BETETZEN!

RGI-aren murrizketen kontra!

Euskal Herriko Eskubide Sozialen Karta osatzen dugun sindikatu eta eragile sozialek bizitzaren sostengua erdigunean kokatzen duten jendarte eredu bat defendatzen dugu.

Horregatik, Eusko Jaurlaritza aplikatzen dabilen politika antisozialek biztanleriaren pobretze orokorra bultzatzen dutela salatzen dugu. Aberastasunaren banaketa gero eta injustuagoa da. Langabezia, prekarietatea, pobrezia eta desoreka sozial eta ekonomikoak areagotzen dituzte, aurrera daramatzan politika publikoek ez dutelako egoerari buelta ematea helburu, pertsonen beharrizanei lehentasuna emanez.

Lanbidek kudeatzen dituen prestazio desberdinak Lanbidearteko Gutxieneko Soldatari lotuta daude: beraz, azken honen edozein igoera, zuzenean aplikatu behar zaie, “Gizarteratzea eta Diru Sarrerak bermatzeko abenduaren 23ko 18/2008 Legearen” arabera.

Ondorioz, aurten Lanbidearteko Gutxieneko Soldata %8 igo dela kontuan hartuta, berehalakoan aplikatu beharko litzaieke igoera hori bai Diru Sarrerak bermatzeko Errentari, bai Lanbidek kudeatutako gainerako prestazioei.

Pentsiodunentzako laguntza Osagarria, Laneko Diru-Sarrerak osatzeko Errenta, Diru-Sarrerak Bermatzeko errenta eta Etxebizitzarako Laguntza Osagarria jasotzeko eguna zen urtarrilaren 30ean, ordea, ez zen hori pasa. Laguntza sozial hauen hartzaile diren 64.000 familiak Enplegu eta Politika Sozialen Aholkulari den Beatriz Artozabalen Lanbidearteko Gutxieneko Soldataren %8ko igoera dagozkien prestazioei ez aplikatzeko erabakia pairatu dute. Nahiz eta legez den igoera hori egin beharrekoa.

Bestalde, familia horiek beraiek, azken 5 urteetan zehar, jasotzea zegokienaren %7ko murrizketa jasan izan dute. 5 urte beranduago, pentsio miserableek, etxe kaleratzeek, pobreziak eta enpleguaren behin-behinekotasunak bereziki kaltetutako kolektiboak kondenatzen dituzten murrizketak mantentzen dira.

Beraz, aipatutako %8ko igoera Enplegurako Pizgarriei, Diru-Sarrerak Bematzeko Errentari, Pentsioen Osagarriari edo Alokairuaren Laguntzei aplikatzeko Jaurlaritzaren ezezkoaren aurrean eta jaso beharreko kopuruen azken urteetako %7ko murrizketaren aurrean…

-Alde batetik, URTARRILEKO diru-sarreran, Lanbidek kudeatutako prestazioetan Lanbidearteko Gutxieneko Soldataren %8ko igoera aplikatzeko EXIJITZEN DUGU.

-Bestetik, hurrengo aurrekontuetan, pobretutako eta prekarizatutako jendartearen zati handi batek ezinbestekoa duten Diru-Sarrerak bermatzeko Errenta eta gainerako prestazioetan %7ko MURRIZKETA EZ MANTENTZEA EXIJITZEN DUGU.

Bestalde, murrizketa sozial hauek justifikatzeko Diru-Sarerrak bermatzeko Errenta igota, lan merkaturako sarrera sustatzearen kontrakoa egiten egongo ginatekeela baliatuta diskurtsoa guztiz faltsua dela mahaigaineratu nahi dugu. Lanbideren datuen arabera, bizikidetza unitateen %20ak (12.504) anpostu prekarioa du, eta euren diru-sarrerak osagarritzen dituzten lagun- tzaren bidez; prestazioen %25 (15.817-), pobrezia pentsioak ordaintzera bideratuta daude; eta beste %20, egungo prekarietate egoeraren ondoriozko langabezia prestazio eskasak osagarritzeko dira.

Gertatzen ari dena salatzea ez da nahikoa. Egoera errotik aldatu behar dugu, bestelako lehentasun batzuk izango dituen Euskal Herriko eredu sozio-produktibo bat eraikitzen. Oinarrizko beharrizanak asetzea oinarri izango duena; ondarearen, enpleguaren eta lanen birbanaketa; sektore publikoaren lidergotza; interes kolektiboaren babesa indibidualismoaren sustapenaren kontra; politika ekonomikoaren eraginkortasun sozial eta ekologikoa; gizon eta emakumeen arteko parekidetasuna…

Murrizketa politika hauen aurrean, larritasun sozial eta pobretze orokortua gainditzeko, mobilizazioen garrantzian berresten gara. Agerraldi honen bidez, datorren otsailaren 3an, 10:30ean, Lanbidek Bilbon, Bizkaia plazan hain zuzen, dituen Bulego Zentraletatik Eusko Jaurlaritzaren Delegaritzara arte egingo dugun Giza-Kartearen deialdia egiten dugu.

 

 

 
1...955956957...1,583Page 956 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus