2026-01-15
Blog Page 869

Eusko Jaurlaritzaren aldetik negoziazioari ez eta murrizketei bai

admin
-
0
Eusko Jaurlaritzaren aldetik negoziazioari ez eta murrizketei bai


Gaur berriro ere bere menpean dauden langileen lan baldintzak negoziatzeko borondate falta argia adierazi du Eusko Jaurlaritzak. Izan ere, ez du elementu berririk planteatu nahi izan Mahai Orokorraren bileran. LABek planteatutako enpleguaren arazoa konpontzeko, eta lan baldintzak eta eros-ahalmena berreskuratzeko planen inguruan ez du ezer entzun nahi izan administrazioak. Entzungorrarena ere egin du gaixotasunen jarraipena mutualitateen ordez osasun zerbitzu publikoak egitearen proposamenaren aurrean. Bileraren aurretik, elkarretaratze bat egin dugu Gasteizen, ELArekin batera, “Zerbitzu publikoak garatu. Lan baldintzak hobetu. Enplegua egonkortu” leloarekin, Eusko Jaurlaritzaren egoitzaren aurrean.

Aste honetan, Jaurlaritzak ia 1.000 milioi gehiagoren diru-bilketa egongo dela jendaurrean ozenki iragarri duenean, ez du zerbitzu publikoak hobetzeko proposamen berri bat ere egin. Urkulluk dagoeneko erabaki baitu bankuekin duen zorra kitatzeko erabiliko duela, ez ordea bere langileekin duen zorra arintzeko. Aste honetan ere Madrilek aurrekontuak luzatuko dituela jakin da, eta horrek Jaurlaritzaren proposamenetan izango duen eraginaz aipamenik ez. PNVk eta PPk politika ekonomiko bera dutelako, eta estrategia bera dutelako, eta langileok erosahalmena are gehiago galduko dugu. Ez dira muga legalak Jaurlaritzak dituenak, baizik eta borondate mugak.

Gaur alferrik galdutako negoziaziorako aukera Eusko Jaurlaritzak propagandarako erabiliko duela argi dugu. Bilera antzuen dinamika bat negoziatzeko borondate bezala erabiliko du, propaganda hutsa alegia. Bitartean murrizketak egiten jarraituko du.
 

 

 

Gutxienez, 45 langile hil dira urte hasieratik Euskal Herrian istripuen ondorioz

admin
-
0
Gutxienez, 45 langile hil dira urte hasieratik Euskal Herrian istripuen ondorioz

Atzo, urriaren 18an, Lemoako 57 urteko langile autonomoak bizitza galdu zuen Zeberion, etxeko obra batean, elektrikari lanak egiten ari zenean.

Hildako langilea LABeko afiliatua da. Lehenik eta behin, gure doluminak eta elkartasuna adierazi nahi diogu hildako langilearen senide eta gertukoei momentu gogor hauetan. Aldi berean familiari eskaini nahi diogu sindikatuko bitarteko, laguntza eta babes osoa, istripua argitu dadin.

Heriotza honekin gutxienez 45 langile dira lan istripuz edo istripuen ondorioz Euskal Herrian urte hasieratik bizitza galdu dutenak.

Istripu honen eta gainontzeko istripu guztien atzean prekarietatea dago, lan bizi baldintza kaskarrak daude . Azkenik, LAB sindikatutik deia egiten dugu datozen egunetan artikula litekeen erantzunean parte hartzera.
 

 

 

La Naval salbatzeko eratuko den mahaian azpikontratak ordezkatuak egotea eskatzen dugu

admin
-
0
La Naval salbatzeko eratuko den mahaian azpikontratak ordezkatuak egotea eskatzen dugu

La Navalen etorkizunaz eta haren iraunkortasuna bermatuko duen industria-planaz hitz egiteko, agerraldi bat egin dugu gaur Bilbon, azpikontratetako ordezkariekin batera. LAB ere bat dator La Navalen konponbideari ekingo dion mahaia eratzearekin, erakunde publikoek parte hartuz. Ontziola azpikontratazio handienetakoa ematen den sektorea da. Sestaoko ontziolan 215 bat langile kontratatzen ditu La Navalek zuzenean, eta azken urteotan, azpikontratatuak 1.800 bat izan dira, hau da, langile-kopuru osoaren %90a. Datu hau kontutan hartuz, ezinbestekoa deritzogu talde hau aintzakotzat hartzeari, La Navalen etorkizunari eta egon daitezkeen irtenbideei ekiteko. Horregatik eskatzen dugu azpikontraten ordezkaritza egon dadila ontziola salbatzeko eratuko litzatekeen mahaian.

La Navalen pribatizazioak berekin ekarri zuen lan eredua azpikontrataziorik basatienean oinarritzen zen, eta hortaz, lan baldintzak kaskartzean (erreferentzia moduan hartu beharreko gutxiengo hitzarmena ez da aplikatzen, soldata-eskala bikoitzak, lanaldi bukaezinak, soldata ordaintzen ez zitzaielako lanpostua utzi behar izan duten langileek,…). La Navalen etorkizuna ezin daiteke iraganari eusten dion lan eredu batean mamitu, lan baldintzen esplotazioan eta prekarizazioan oinarritua. Eta hori azpikontratetako langileek bakarrik berma dezakete.

LABen iritziz, ontzigintza sektore estrategikoa izanik, honako galdera egiten diegu geure buruei: Eusko Jaurlaritzaren ustez, ontzigintza sektore estrategikoa al da? Industria-politika ezak egunero ikusten ditugun ondorio lazgarriak dakarzkigu. Eusko Jaurlaritzak dabilen politika bakarra enpresa handien jarduna erraztea da, euskal kapitalez osatutako enpresak atzerriko kapitalari saltzen lagatzea da. Horretan datza Eusko Jaurlaritza horrenbeste harrotzen duen euskal kapitalaren konpromisoa. Horrela jokatuz, erakundeei dagokien interes sozialen zaintzari uko egiten zaio. Horixe da hain zuzen berriro jazoko dena, oraingoan La Navalen.

Ontzigintza estrategikoa da Euskal Herriarentzat, Ezkerraldeko eskualdean sortzen duen enpleguagatik eta beste industria-enpresetan sortzen dituen sinergiengatik. Eusko Jaurlaritzak argi eta garbi egin behar du sektore honen aldeko hautua, industria-egitasmoa landuz.

Itsasontzi handiak eraikitzen jardungo den, kalitateko enplegua sortuko duen eta lan baldintza duinak bermatuko dituen ontzigintza sektorea behar dugu. Horretarako ezinbestekoa deritzagu erakunde eta eragindako eragileek langile azpikontratatuak konponbidearen alderditzat onartzeari.

Azpikontratutako langileak kontuan hartu barik, La Navalek ez du konponbiderik.
 

 

 

Amiantoak hildako langileak gogoan izan dituzte CAFen

admin
-
0
Amiantoak hildako langileak gogoan izan dituzte CAFen

CAFen amiantoarekin lana egitearen ondorioz hil dira azken hilabeteotan bi lankide: J.L.V.R, 60 urte zituela uztailean hil zen; eta J.A.B.D, 72 urte zituen eta irailean hil zen. Heriotza hauen aurrean, Enpresa Batzordeak deituta, omenaldia, geldialdia eta elkarretaratzea egin dituzte CAF Beasaingo sarrera nagusian amiantoaren biktimen omenez eginiko monumentuaren inguruan.

Beasaingo lantegian dagoeneko 31 langile dira, beraien lanpostuetan amiantoa erabiltzearen ondorioz hildakoak eta beraien heriotza amiantoa manipulatzeak eragin duenaren errekonozimendua lortutakoak.

Gai honetan nahastuta dauden enpresen jarrera salatu du enpresa batzordeak, gaixo edo hildakoengatik kalte ordainak edo laguntzen errekarguak eskatzeko oztopoak jartzen baitituzte.

Administrazioen jarrera itxia ere salatu du, biktimak laguntzeko bideak zaildu eta Europako beste hainbat herrialdetan funtzionatzen duten konpentsazio fondo baten sorrerari eragozpenak jarri baitizkiete urtez urte. Borroka askoren ondoren eskaera hau errealitate bihurtzen ari dela badirudi ere, amiantoarekin kutsatutako biktimekiko errekonozimendua instituzioen aldetik, berandu datorrela uste du enpresa batzordeak.
 

 

 

Joan den astean hildako garraiolariaren lan heriotza salatuko dugu bihar, Atxondon

admin
-
0
Joan den astean hildako garraiolariaren lan heriotza salatuko dugu bihar, Atxondon

Elkarretaratze bat egingo dugu Sorazulen izandako lan istripuaren ondorioz hildako garraiolaria gogora ekartzeko, euskal gehiengo sindikalak deituta. Urriaren 5ean izan zuen istripua, eta urriaren 13an hil zen. Comercial Arrate enpresaren aurrean izango da protesta, Artia industriagunean, Atxondon. 12:00etan elkartuko gara, "Prekarietatea hiltzailea, lan istripu gehiagorik ez" leloarekin.
 

 

 

Elkarretaratze bat egingo dugu bihar, Basurtoko ospitalean, adierazpen askatasunaren alde

admin
-
0
Elkarretaratze bat egingo dugu bihar, Basurtoko ospitalean, adierazpen askatasunaren alde

Duela egun gutxi arrautzak bota zituzten LABek Basurtoko ospitalean duen bulegoaren aurka. Sakabanaketaren aurkako banderola eta Kataluniarekin elkartasunean jarritako estelada izan zituen jomuga erasoak, leihoan zintzilikatuta baititugu bi ikur hauek. Bada, elkarretaratze bat egingo dugu bihar, urriak 20, Basurtoko Ospitalean, erasoa salatzeko. 11:30ean bilduko gara, kanpoko kontsultak egiten diren aldean.
 

 

 

Itziarreko Reiner e Hijos SL enpresan askatasun sindikalari eraso egiten zaio

admin
-
0
Itziarreko Reiner e Hijos SL enpresan askatasun sindikalari eraso egiten zaio

Itziarreko Reiner e Hijos S.L.- ko delegatu batek falta larri baten komunikazioa jaso zuen maiatzaren 12an enpresaren partetik Kimikako hitzarmen estatalean 60.5 artikuluan oinarrituta, “desobedentziaren” akusaziopean. Ez dugu egoera hau ez ulertzen, ez konpartitzen, denbora luzean enpresari kontu ezberdinak eskatu dizkio gure delegatuak, denon baldintzak eta eskubideak hobetzeko asmoz, horregatik ez dugu onartuko enpresako langile eta delegatua jo puntuan jartzea.

Uztailaren 10ean kontziliaketa saiakera bat izan genuen. LAB sindikatutik prozesu horren baliogabetasuna aitortu, eta subsidiarioki zigorraren inprozedentzia onartzeko eskaera egin genuen; aldi berean, prozesua bertan behera eta eraginkortasun gabe gera zedin eskatuz. Kontziliaketan, enpresak jarrera kaxkarra izan zuen, elkarrizketarako eta arazoari konponbide bat topatzeko intentziorik erakutsi gabe; hori dela eta, urriaren 20ean epaiketa bat burutuko da.

LABek enpresaren jarrera gaitzesten du. Egoera hau diskriminazio eta askatasun sindikalari eraso bat besterik ez da; eta ez gaude Reiner e Hijos S.L. enpresan delegatu lana egiteagatik jazarpen hau jasateko prest.

Horregatik, kontzentrazioa egin genuen atzo, bertan zigortutako ordezkariari gure elkartasun osoa helarazteaz gain, enpresari zentzugabekeri hau alde batera lagatzeko eskatu genion.
 

 

 

Altsasura iritsi da Ekimen Ibiltaria

admin
-
0
Altsasura iritsi da Ekimen Ibiltaria

Altsasun geldiadia egin du gaur Ekimen Ibiltariak, "Lan duina, bizi duina" mezua Sakanan zabaltzeko helburuarekin. Hain zuzen ere, tailer bat egin dugu goizean Gure Etxean, lan munduko hainbat gairen inguruan. Sindikatuaren ekintza soziosindikal berrituaren nondik norakoen berri eman dugu, besteak beste. Arratsaldean, Sakanako egoera orokorra izango du hizpide.

Ekimen Ibiltaria Leitzatik iritsi da Altsasura, baita dinamika hau laguntzen duen furgoneta ere. Leitzan, atzo gauean, Kataluniarekin egin genuen bat, elkarretaratze baten bitartez.

Lizarrara egingo dugu jauzia bihar, urriak 19. Ekintza sindikaleko tailerrekin hasiko dugu eguna. Ondoren, elkarretaratze bat egingo dugu SAR QUAVITAE enpresaren aurrean. Amaitzeko, propaganda banatuko dugu azokan.

 

 

 

LAB eta ELA Ostalaritzako Akordio Markoaren inpugnazioaren aurka mobilizatuko gara urriaren 24an

admin
-
0
LAB eta ELA Ostalaritzako Akordio Markoaren inpugnazioaren aurka mobilizatuko gara urriaren 24an

Giza kate bat egingo dugu Eusko Jaurlaritzatik EAEko Justizia Auzitegi Nagusiraino, CCOO eta UGT sindikatuek aurkeztutako demandaren epaiketaren hasiera dela-eta. Agerraldi bat egin dugu gaur Bilbon, eta Ostalaritzako Akordio Markoa indargabetzeak izango lituzkeen ondorioen berri eman dugu, hots, sukaldaritza kolektiboko hitzarmen estatala aplikatzeak. Hain zuzen ere, zenbait kasutan soldata %50 baxuago izango litzatekeela salatu dugu, besteak beste.

Garbiñe Aranburuk eta Saul Arangibelek, LABeko idazkari nagusiak eta Zerbitzu Pribatuetako Federazioko idazkariak, hurrenez hurren, hartu dute hitza gaurko agerraldian, ELAko ordezkariekin batera. Arangibelek ohartarazi du, inpugnazioak aurrera eginez gero, ondorioak larriak izango liratekeela langileentzat: “Soldata okerragoa jasotzeaz gainera, langileok, asko aldizkako kontratuak dituztenak, kaltea jasango lukete langabezia-prestazioetan eta etorkizuneko erretiroan. Estatu mailako zenbait enpresa, esaterako Eurest, Sodexho eta Serunion, beren langileei dagoeneko aplikatzen ari dira estatu mailako lan-hitzarmeneko baldintzak”.

Hortaz, LABek eta ELAk honakoa salatu dugu:

-EAEn %17ko ordezkaritza duten CCOO eta UGT sindikatuen jarrera antidemokratiko eta antisindikala.

-Patronalak CCOO eta UGTrekin elkar hartu izana milaka langileren enplegua prekarizatzeko; langile hauetako gehienak emakumeak dira, eta hauek, lanaldi partzialaren arazoak ez ezik, lan-baldintza miserableak ere pairatu behar dituzte.

-CCOOk eta UGTk estatuko hitzarmena sinatzeagatik lortu dituzten onurak; esaterako, enpresek ordaindutako lanaldi osoko hainbat liberatu sindikal.

EAEko Ostalaritzako Akordio Markoaren helburuak gogoratu dituzte, jokoan zer dagoen erakusteko:

-EAEko Lanbidearteko Akordioaren moduan, ostalaritzan lehentasuna ematea Bizkaiko, Gipuzkoako eta Arabako lan-hitzarmen sektorialei, estatu mailako hitzarmenaren baldintza txarragoak saiheste aldera.

-Kolektibitateetan (hezkuntza-sare pribatuko jantokiak, sukalde zentralak, erietxeetako jantokiak, zahar-etxe eta enpresetako jantokiak, besteak beste: aipatutako hitzarmenak aplika daitezela, eta ez estatu mailako sukaldaritza kolektiboko hitzarmena.

Marko propioaren defentsa
Garbiñe Aranburuk inpugnazioa erretiratu dezatela eskatu die CCOO eta UGT sindikatuei. Eusko jaurlaritzari ere zuzendu zaio: “Eusko Jaurlaritzari negoziazio kolektiborako marko propioa erasotzen duen inpugnazio honen aurrean jarrera argia har dezala eskatzen diogu. Ezin da autogobernuaz hitz egin negoziazio kolektiborako eskubidea ezin badugu defendatu, injerentziarik gabe. Eztabaida Sozialerako mahaia bertan behera uztea ere eskatzen diogu, bertan negoziazio kolektiborako marko propioa erasotzen duen gutxiengo sindikala bakarrik dagoelako eta Jaurlaritzak ezin duelako bi sindikatu hauei babesa eta zilegitasuna ematen jarraitu”.

Patronalarentzat ere izan ditu hitzak: “Ostalaritzako Akordio Markoa defendatu eta aplikatzen jarraitzeko eskatzen diogu Patronalari. Ez daude derrigortuak estatuko soldata eta lan baldintzak aplikatzera”.
 

 

 
1...868869870...1,584Page 869 of 1,584

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus