2026-01-17
Blog Page 844

Hiru greba egunetatik lehena egin dugu gaur, Arabako Esku-hartze Sozialaren hitzarmenaren defentsan

admin
-
0
Hiru greba egunetatik lehena egin dugu gaur, Arabako Esku-hartze Sozialaren hitzarmenaren defentsan

Arabako Esku-hartze Sozialaren Hitzarmen Kolektiboa hari batetik zintzilik dago, eta artaziak Arabako Foru Aldundiak ditu. Hitzarmen Kolektiboa aurre-akordioaren puntuekin sinatzeko eskatzen dugu sektorean ordezkaritza dugun 5 sindikatuok (LAB, ELA, CCOO, ESK eta UGT), eta, helburu hori bultzatze aldera, 3 greba-eguneko deialdia egin dugu, abenduaren 13, 20 eta 27rako. Gaur, lehen greba egunaren harira, manifestazio bat egin dugu Gasteizen.

Sektorean ordezkaritza dugun 5 sindikatuok (ELA, CCOO, LAB, ESK eta UGT) eta ordezkaritza duen enpresa—elkargo bakarrak (AISA) 2016ko abenduaren 29az geroztik hainbat bilera egin dugu, orduan eratu baitzen negoziazio—mahaia, eta azkenean aurre-akordio bat sinatu genuen uztailaren 27an, soldatak eta lanaldiak jasoz, eta 2017-2020 urteetarako. Sindikatuontzat oso apalak izan ziren lorpenak, baina gure asmo nagusia sektore-hitzarmena finkatzea zen.

Arabako Foru Aldundiak "Ekonomia Espainiarraren Desindexazioaren Legea" uztailean mahai gainean jarri zuenetik hitzarmenaren akordioa Gizarte Zerbitzuen Sailaren erabakien menpe egon da, Marian Olabarrieta eta Jose Luis Alonso Quilchanoren zuzendaritzapeko sailaren erabakien menpe. Foru gobernua lege horretaz baliatzen ari da, horretarako baliatzerik ez badu ere, 2018ko Aurrekontuetako diru—
murrizketak zuritzeko, eta funtzionarioentzat jarrita dauden soldata—igoeretarako mugen parekoakjartzeko.

Ordutik negoziazioa baldintzaturik egon da, eta azkenean, azaroaren 30ean, AlSAk, aldundiarekin bileran egon eta gero, jakinarazi zigun lankidetza-hitzarmenetan desindexazio—legearen klausula ezartzeko erabakia irmoa zela. Hori horrela, AlSAk esan zigun ezin zuela hitzarmen kolektiboa sinatu, haren aldeko apustua egina bazuten ere. Alde horretatik, klausula hori duten lankidetza-hitzarmenak ez sinatzea gomendatu diete elkarteei. Horren ondorioz, baliteke aldundiak finantzabidea moztea elkarteei, eta horiek, beren aldetik, ordainketak moztea hornitzaileei eta langileei. Arazoa, beraz, guztiz larria da, berehala konpondu ezean.

Arabako Foru Aldundiak, erakutsi duen jarreraren bidez, sektoreko negoziazio kolektiboa baldintzatu eta suntsitu nahi du, eta horrekin batera, lan-baldintzak hobetzeko akordioetarako aukerak; nahiz eta, horretarako, negoziazio-mahaietako aurre-akordioak berak urratu behar. "Ez da finantzaketa—arazoa, ezta aurrekontuena ere, —diote——arazo juridiko-teknikoa da". Arazo tekniko horrek hitzarmen kolektibo bat utzi du
berritu barik, alderdiek aurre—akordio bat sinatu badute ere. Arazo tekniko horrek milatik gora lagunen lan— baldintzak hobetu barik utzi ditu. Arazo tekniko horren eraginpean administrazioek azpikontrataturiko gizarte- zerbitzu guztiak geratuko dira, arduraduna nor den eta nork finantzatzen duen berdin dela. Hortaz, hitzarmenaren blokeo horrek kalte egiten die AFAren ardurapeko gizarte—zerbitzuei, eta udalaren pekoei, eta Eusko Jaurlaritzaren pekoei.

Sektorean ordezkaritza dugun sindikatuon iritziz jarrera hori onartezina da. Aldundiari dagokio konponbide bat premiabidez aurkeztea. Sektore honetako langileek ezin dituzte gehiago jasan PPko gobernuaren murrizketa-politikak, EAJren eta PSEren laguntzak ezartzen dituenak. Ez gaude prest gure lepo gainean eramateko Aldundiaren eta sektoreko patronalaren interesak.

Egoera hain larria denez, maila bereko neurriko erantzuna emateko antolatu gara. Horregatik, Arabako Esku- hartze Sozialaren Hitzarmenaren eraginpeko gizarte-zerbitzuetako sindikatuok eta langileok negoziazioa errespetatzeko eta lan-baldintzak hobetzeko eskatzen dugu.
 

 

 

Edesa Industrial-Geyserreko enpresa batzordeak ez dira inongo momentutan informatuak izan inolako egitasmoren inguruan

admin
-
0
Ezagutzen dutena komunikabideetan irakurri dutela adierazi dute, langileen zati batekin atzo egin zen bileratik harago.

Edesa Industrial eta Geyser-eko enpresa-batzordeak, atzo komunikabideetan agertutako albistearen inguruan, honakoa adierazi nahi du:

Enpresa-batzordeak ez dira inongo moementutan informatuak izan inolako egitasmo edo plan zehatzen inguruan. Ezagutzen duguna komunikabideetan irakurri dugu, langileen zati batekin atzo egin zen bileratik harago. Bilera honetan ez ziren egindako galderak erantzun.

Proposamenaren inguruko informazioa jasotzeko konpromisoa dugu, abenduaren 13ko epe- mugarekin. Zuzendaritzari bere konpromisoa betetzea exijitzen diogu eta Administrari Konkurtsalari hau horrela izan dadin egin dezan.

Jarduera industriala eta lanpostuak hemen mantetzearen alde egingo duen proiektu bideragarri baten aldeko apustua egiten dugu.
 

 

 

Patronalaren inpunitatea salatu dugu, Anoetako estadioaren eta Zubietako errauste plantaren obrak adibide hartuta

admin
-
0
Patronalaren inpunitatea salatu dugu, Anoetako estadioaren eta Zubietako errauste plantaren obrak adibide hartuta

Joan den abenduaren 4an, LAB sindikatuak Lan Ikuskaritzan bi salaketa aurkeztu ditu: lehena, Anoetako estadioan egiten ari diren lanak direla eta, legez kontra, laga direlako langileak; eta, bigarrena, Zubietako errauste plantaren lanei dagokienez, hitzarmena ez delako betetzen ari.

LABek egiaztatu ahal izan duenez, Administrazioaren menpe dauden aipatu herri-lanetan hainbat irregulartasun gertatzen ari dira, adibidez, Gipuzkoako eraikuntza hitzarmenak agintzen duenaren azpitik ordaintzen direla soldatak, edo bestela, eraikuntza hitzarmenak baimentzen dituen lanaldiak baino askoz ere handiagoak betetzen ari direla.

Salaketa horiek oinarri bera daukate: Gipuzkoako hitzarmena ez da betetzen. Gipuzkoako eraikuntza sektorea inpunitate-gune bihurtu da enpresarientzat, non hainbat eta hainbat azpikontratazioen bidez, hitzarmen kolektiboa behin eta berriz ez den aplikatzen. Hau ez da kasualitatez gertatzen, administrazioen utzikeriak eraginda baizik.

Eraikuntzan ematen den esplotazioa suntsitu daiteke, eta suntsitu behar da. Eraikuntzako sektoreak ez dezake “legerik gabeko sektorea” bailitzan iraun. Borondate politikorik balego, eraikuntzako sektorean, baldintza duinak berma litezke denontzat.

LABek baditu alternatibak eta esplotazioarekin bukatzeko AKORDIOA adosteko eskaintza egiten du. Laburbilduz, akordio honek honako puntuak jasotzen ditu:

– Herri lanen esleipenean, obraren kostea lehenetsi beharrean, lanak epean, kalitatez eta lan baldintzak beteko direla bermatuz lehenesteko konpromisoa.

– Kontratazioaren eta azpikontratazioaren kate osoan lan baldintzak betetzeko bermea. Ezarri beharreko gutxieneko baldintza herrialdeko hitzarmena izango da eta azpikontratazio kate osoan eta lan baldintzak betetzen direla egiaztatzeko ardura enpresa esleipendunari eta azpikontrata guztiei dagokie. Kontrol honetarako LABek hainbat neurri zehatzak planteatzen ditu, adibidez, obretan erlojuak jarri lanera sartzerakoan eta lanetik irteterakoan langileak fitxatzeko.

– Lan-baldintzak eta lan osasuneko baldintzak betetzen ez dituzten enpresen erregistroa sortzea. Zuzenean edo zeharka, herri lanetan zein lan pribatuetan baldintza horiek betetzen ez dituen enpresa oro agertuko litzateke aipatu erregistroan, eta ez litzateke kontratatuko inongo herri lanetarako hurrengo lau urtetan. Une berean, baldintzak errespetatzen dituenari edota bere langileekin aritzen denari lehentasuna emango zaio.

Proposamen hauek helaraziko zaizkie herri lan hauen sustatzaileei. Horretarako Donostiako udaletxea zein Gipuzkoako diputazioari bilera bana eskatuko diegu. Alderdi politiko guztiei ere obra hauen egoeraren berri emango zaie.

LABek eskatzen du eros ahalmena berreskuratuko duen eraikuntzako hitzarmena berria

Egun indarrean dagoen eraikuntzako hitzarmena aplikatzea ez da nahikoa LABentzat. LAB sektoreko langileen eros ahalmena berreskuratuko duen eraikuntza hitzarmena berritzearen alde agertzen da, sektorean ematen den lan baldintzak, gaur egun, 2009. urtean zeudenak baino txarragoak direlako. Obren hazkundeak langileen lan baldintzak hobetuko dituen hitzarmen berria eskatzen du ere. Enpresarien diruzalekeriarekin amaitu eta aberastasuna banatu behar da. LAB borrokatuko da errealitate berri hori artikula dadin.
 

 

 

Lanuzteei ekin diete La Asuncion klinikako langileek

admin
-
0
Lanuzteei ekin diete La Asuncion klinikako langileek

Aurreikusitako mobilizazioak abiatu dituzte, LAB eta ELA sindikatuok deituta. Hain zuzen ere, Gaurko egunari dagokionez, lau orduko lanuzteari ekin diote 8:00etan. Hain zuzen ere, elkarretaratze bat egin dute klinikaren atarian, eta, ondoren, auto karabana bati ekin diote. Arratsaldean, elkarretaratze bat egingo dute, 15:15etik 16:15era, zentroan bertan.

Tolosako La Asuncion klinikako zuzendaritzak negoziatzeko asmorik ez duela jakinarazi die langileei: ez du soldata igoeraz hitz egin nahi, 2010etik izoztuak dauden arren; ez du urteko lanaldia murrizteari buruz hitz egiteko asmorik, langileek Osakidetzan baino 78 lan ordu gehiago dituzten arren; eta ez dio klinikako zerbitzuan gertatzen ari den gainbeherari heldu nahi, medikuak joaten ari diren arren. Hori dela eta, gaurko lanuzteaz gain, ondorengo mobilizazioak deitu ditugu LAB eta ELA sindikatuok:

-Abenduak 20: Egun bateko lanuztea.

-Abenduak 27: Auto karabana, 18:00etatik 19:00ak bitartean.

-Urtarrilak 8 eta 9: Bi eguneko lanuztea.
 

 

 

Hitzarmen duin baten alde irten dira kalera Bizkaiko Aspaceko langileak

admin
-
0
Hitzarmen duin baten alde irten dira kalera Bizkaiko Aspaceko langileak

Aspace Bizkaiko enpresa batzordeak salatu du enpresako zuzendaritzak negoziatzeko gogo urriz diharduela. Hori dela eta, atzo, Aspacek Deustuko Julio Urquijo kalean duen bulegoaren aurrean elkarretaratzeak egin zituzten goiz eta arratsaldez, baita beste egoitzen aurrean ere.

Hauxe da Aspace Bizkaiko enpresa batzordearen oharra:

Gure kolektiboan arreta espezializatu eta nabarmena behar duten pertsonekin egiten dugu lan. Langileoi eskatzen zaigun titulazioa eta berariazko prestakuntza ez da aintzakotzat hartzen egungo hitzarmenaren edukian.

Enpresarekin 2016. eta 2017. urteetan zehar hainbat bilera egin ostean, egun bizi dugun blokeo egoera horren handia da, ezinbestean irten behar dugula kalera egiazko edukiz beteriko benetako negoziazioa aldarrikatzera.

2011. urteaz geroztik egin ditugun ahaleginak ahalegin, duela 7 urte etengabe txirotzen ari garela (soldatak izoztuak, antzinatasunak murriztu eta izoztu, bideragarritasun plana,…).
Aspace-Bizkaia Eusko Jaurlaritzaren hezkuntza sailaren eta Bizkaiko Foru Aldundiaren “azpikontrata” da. Gure ustez, administrazioak nahiz Aspace-Bizkaiak jasaten ari garen egoera honetan dute ardura .

Horrengatik Aspace-Bizkaiari eta administrazioei eskatzen diegu erakundearen langileen eskubideei eta baldintzei eusteko erronkari eutsi diezaiotela, eta ez daitezela berriro atzeratu 21. hitzarmen kolektiboaren negoziazioak.

Elkarretaratze hauek egin ostean, sindikatuak ez ditu baztertzen beste ekimenak, egungo egoera lehengoratu ezean.
 

 

 

Interinoak errespetatzeko aldarrikatu dute Bilboko Udaleko langileek

admin
-
0
Interinoak errespetatzeko aldarrikatu dute Bilboko Udaleko langileek

Enplegu Publikorako Eskaintzan (EPE) irizpide orokorrak zein deialdi bakoitzaren irizpideak ezartzen direnean, zentzuz eta interinoekiko sentsibilitateaz aritzea eskatu dugu gaur Bilboko Udaleko LAB eta ELA sindikatuok. Hain zuzen ere, mobilizazio bat egin dugu gure aldarriak kaleratzeko.

Bilboko Udaleko LAB eta ELA sindikatuok EPEn negoziazioarekin zerikusirik duen guztiarekin zera hau adierazi nahi dugu:

– Deialdi guztietan orokorki eragina izango duten aspektuetan irizpide globalak aplikatzea galdegiten dugu, deitutako kategoria desberdinen artean diskriminaziorik ez egoteko.

– Deialdi bakoitzaren oinarriak langileon ordezkaritzarekin negoziatzea galdegiten dugu.

– Deialdien (oposaketak) egutegiak ELA eta LAB sindikatuek Negoziazio Mahaian behin baino gehiagotan aipatutako irizpideak, interinitatearen kopurua, barne promozioak ematen dituen aukerak, azken oposaketaren data, lan poltsen egoera, besteak beste, kontutan hartzea galdegiten dugu.

– Giza Baliabide sailaren jarrera negoziatzailean aldaketa galdegiten dugu helburu bakarrarekin: enpleguaren egonkortasuna.

– Gora behera guzti hauek negoziatzean, oposaketak egin barik pasatu den denbora luzea kontutan hartzea ere galdegiten dugu, langile interinoek inolako errua izan ez dutelako. Egoera hau oposaketak ez egiteko aurreko kudeatzaileek hartu zuten erabakian datza. Honetaz gain, kontutan hartu behar da Espainiar Estatuak, aurten EAJren oniritziarekin, inposatzen dituen birjartze tasak, guztiz ez nahikoak direla Bilboko Udalean daukagun akordioa, gehienez %6aren interinitate tasa, betetzeko.
 

 

 

Siemens-Gamesan ez dago inor soberan

admin
-
0
Siemens-Gamesan ez dago inor soberan

LABek zoriondu nahi die Siemens Gamesako langile guztiei enpresaren aurrean beren lanpostuen defentsan erakutsitako tinkotasunagatik. Honek ahalbidetu du enpresak iragarritako EEE erretiratu izana. Zalantzarik gabe, albiste pozgarri bat.

Gainontzeko sindikatuen (UGT, CCOO eta ELA) jarrera aldaketarekin, ordea, kezkatuta gaude, publikoki Siemens-Gamesan inor soberan ez dagoela defendatzetik enpresak dioen bezalaxe enpleguan murrizketa beharrezkoa dela onartzera pasatu baitira, nahiz eta murrizketa hau adostasunaren bidez izan.

Gainerako sindikatuen jarrera aldaketa dela eta, LABek inor soberan ez dagoela defendatzen jarraitzen du, zergatik?

1.- Siemens Gamesa ez dago krisian. Gamesak iaz izan zuen urterik hoberena, bai fakturazioari dagokionean baita emaitzari dagokionean ere, zehazki, 300 milioi € baino gehiago.

2.- Emaitza horretan oinarrituta, Gamesak apenas duela 6 hilabete argi berdea eman zion Siemensekin bat egiteari, Siemens dagoen merkatu berrietara heltzeko eta hazteko helburuarekin. Enpleguan inongo murrizketarik ez zela emango ziurtatu ziguten, alderantzizkoa gertatu da. Siemensekin salerosketa dela eta, Gamesako akziodunek 1.047 miloi € eraman dituzte euren poltsikoetara.

3.- Ez dugu enpresako plan estrategikoa ezagutzen. Enplegua kaltetuko dituen neurriak hartzeaz hitz egiten ari gara Siemens-Gamesak hurrengo otsailean ezagutaraziko duen plan estrategikoa ezagutu gabe. Langileok plan hau ezagutzeko eskubidea daukagu eta berau ezagutu baino lehen neurriak hartzea ez zaigu bidezkoa iruditzen.

4.- Hainbat lantokitan langileen beharra dago. Egungo lan zamari aurre egiteko, ezinbestekoa da langile gehiago kontratatzea, adibidez, 11 langile kaleratzeko asmoa duten Arazuriko lantokian, besteak beste.

Langileok ezin dugu ordaindu akziodunen arteko botere lehiak edota konfidantzarik ezak.

Lanpostuak soberan daudela onartuko bagenu, hau adostuta izan arren, etorkizunean enpresak planteatu ditzakeen kaleratzeak erraztuko genituzke, baita lan baldintzen prekarizazioa ere. Beraz, ezin diogu garrantzirik kendu egungo egoerari. Siemens-Gamesan ez dago inor kaleratzeko arrazoirik. Siemens- Gamesan norbait soberan egotekotan, agian egoera honetara ekarri gaituzten edota langileak eta instituzioak engainatu dituzten goi-mailako karguak lirateke.

Azkenik, asteburu honetan komunikabide batean azaldutako Tapia kontseilariaren deklarazioak errotik gaitzesten ditugu. Tapiak esan zuen “ez zuela zalantzan jartzen irteerak eman behar direla”. Hau da bere “Basque industry 4.0”? Bi enpresen batuketa txalotu ondoren, 6 hilabete beranduago kaleratzeak justifikatzen dute. Lotsagarria eta onartezina da agintari baten ahotan.
 

 

 

EAEko unibertsitatez kanpoko hezkuntza publikoko bosgarren grebak %75etik gorako jarraipena izan du kolektibo guztietan

admin
-
0
EAEko unibertsitatez kanpoko hezkuntza publikoko bosgarren grebak %75etik gorako jarraipena izan du kolektibo guztietan

Pasa den ikasturtean hasi eta ikasturte honetan irailetik abendura bitarte deitutako mobilizazioei jarraiki, EAEko irakaskuntza publikoko sektore ezberdinetako milaka langilek babestu dute gaurko greba eguna eta mobilizazioa, murrizketa politikak alde batera utzi, lan-baldintzak hobetu eta pertsonen eta jendartearen garapen integrala lehentasun izango duen hezkuntza publikoa aldarrikatu asmoz.

Unibertsitatez kanpoko Hezkuntza Publikoan ia 28.000 langile (irakasle, heziketa bereziko langile, sukaldari eta garbitzaile) eta Haurreskolak Partzuergoan 1.200dik gora langile zeuden deiturik gaurkoan grebara.

Aurreko ikasturtean burututako 3 greba egunek oso jarraipen zabala izan zuten lurralde, eskualde eta kolektibo guztietan; Orain, ikasturte honetan Iraila eta Azaroa bitartean kolektiboka deitutako greba eta mobilizazioek izan duten babes zabalari (%65-90 bitartekoa kolektibo ezberdinen arabera), gaurko honetan burututako greba eta mobilizazioen jarraipen aparta gehitzen zaio, %75etik gorakoa kolektibo guztietan ( %90ekoa Haurreskoletan, %85 Heziketa Berezian, % 80 Sukalde eta Garbiketan, eta %75etik gora Irakasleetan).

Horrela, milaka izan dira gaurko deitutako mobilizazioetan parte hartu duten langileak. Hezkuntza inbertsioa, plantilak eta baliabideak handitzea, onartezinak diren behin-behinekotasun mailak eta gelako ikasle kopurua murriztea, eta soldatetan, ordezkapenetan, bajetan, erretiroan eta gainerako lan baldintzetan ezarritako murrizketak alde batera uztea exijitu dute beste behin ere. Ikasle euskaldun eleaniztunak sortuko dituen euskarazko murgiltze eredua garatzea eta, LOMCE eta Heziberri zein hezkuntzaren merkantilizazioa alde batera utziz, hezkuntza berdintasuna, justizia soziala, integrazioa eta gizarte kohesioa bermatzeko oinarrizko tresna izatea ere aldarrikatu dute gaurkoan.

Hezkuntza Sailburuak adierazitakoaren kontra, milaka langile, ikasle eta familiek bere egiten dituzten aldarrikapenek, hezkuntza sistemaren diagnostiko larri bati erantzuten die eta premia larrienei irtenbideak eskaintzen dizkiete.

Orain arte ordea, Eusko Jaurlaritzak ez du proposamen hauen inguruan benetako negoziazio asmorik agertu, eta are gehiago, propagandaz bildurik plazaratu duen aurrekontu egitasmoak ez du egungo egoerari irtenbidea emateko inolako neurririk jasotzen.

Hau horrela, Hezkuntza sailak aldarrikapen hauei erantzungo dioten neurri zehatzak mahai gainean jartzen ez dituen bitartean greba eta mobilizazio dinamika indartu beste biderik ez zaigu geratuko.
 

 

 

Inboluzio sozial eta politikoaz hitz egin dugu Podemosekin

admin
-
0
Inboluzio sozial eta politikoaz hitz egin dugu Podemosekin

Sindikatuak lantzen dituen interlokuzioen baitan, Podemos alderdiarekin bildu gara gaur Donostiako egoitzan. Egoera sozioekonomikoaren eta testuinguru politikoaren azterketa elkarbanatu dugu.

LABeko idazkari nagusi Garbiñe Aranburuk adierazi du "adostasunak" izan ditugula egoera sozioekonomikoa eta testuiguru politikoari buruzko diagnostikoan: "Inboluzio bikoitzaz hitz egin dugu, inboluzio sozialaz eta politikoaz, eta azterketa horretan koinzidentzia batzuk izan ditugu".

Garbiñe Aranburuk berretsi ditu sindikatuaren erronkak: "Bizitzaren prekarizazioari aurre egiteko, estatus politiko berriari eskatzen dioguna da eskuduntza osoa edukitzea enplegu eta babes sozial gaietan. Esparru sozioekonomiko propio bat egituratzeko aukera izateko, estatus politiko berri bat behar dugu, eta guk beti kritikatu duguna izan da indarrean dagoen Autonomia Estatutuak hasieratik izan duela defizit estruktural bat. Guretzat ezinbestekoa da defizit estruktural hori gainditzea; bestela, berriro ere langileei iruzurra egingo litzaiekeelako".

Bileran ere desadostasunak izan dira. "Erabakitzeko eskubideari dagokionez, momentu honetan ez dugu inolako aukerarik ikusten Espainiako Estatuarekin akordio bat iristeko. Zentzu honetan, desadostasun batzuk ditugula argi geratu da. Guk defendatu dugu burujabetza prozesu bat martxan jarri behar dela herri honetan", zehaztu du LABeko idazkari nagusiak.

 

 

 
1...843844845...1,585Page 844 of 1,585

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus