Mugica andereak jakitera eman ditu egindako ikerketaren emaitzak eta hartu beharreko neurriak. Eta orain arte berak eta Darpon jaunak egin duten moduan, gertatu denari garrantzia kendu, ondorioak mugatu eta hainbat espezialitate medikutan izandako azterketen filtrazioak ezeztatu baino ez du egin. Azken finean, ez zaie interesatzen bururaino joatea, Urkullu jaunak komunikabideetan adierazi zuen bezala. Hilabete hauetan guztietan mahai gainean ipinitako froga guztiak, salaketak, ikerketak, datuak eta abar ez dira, antza, nahikoa izan, espezialitate medikuetako EPEetan errotuta dagoen praktika ustelak argi eta garbi agerian uzteko, ezta arduradunak seinalatzeko eta hartu beharreko neurriak hartzeko ere. Mugicaren esanetan, ezin da demostratu filtraziorik izan denik, eta prozedurako irregulartasunen aurrean baino ez gaude.
Fiskaltzak eta Arartekoak ikerketa propioak egiten dituzten bitartean, Osasun Sailak eta Osakidetzak ustelkeria kasu berri hau itxi nahi dute, ahalik eta azkarren eta inor zipriztindu gabe. EAJren estilo klasikoenean. Eta bide batez, LABen sindikalismo kontsekuente eta borrokalariaren kontra inolako lotsa barik jotzen dute, inork bozkatu ez duen Kontseilari jaunak egin duen bezala LABi zilegitasuna kendu nahian modu barregarri eta histerikoan.
Izan ere ez da bakarra izan, pasa den astean Bilbo-Basurtoko ESIak ere gezurretan genbiltzala esan zuen udako murrizketak eta gero Bilbon hiru EAP (Etengabeko Arreta Puntuak) itxita jarraituko zirela salatu genuenean, ESI horretako zuzendariak baieztatu zigun moduan eta bertako auzokideek salatu duten bezala. Honetan ere, deskalifikazioak erabili dituzte egiten ari diren murrizketak estaltzeko.
EPEan gertatutakoa oso larria da. Eta larritasun horrek kudeaketa ausarta eskatzen du. Gaurko agerraldia eta hartu diren neurri eskasek argi uzten dute EAJren kudeatzaile onaren irudia propaganda hutsa baino ez dela.
LABek EPE sistema agortuta dagoela aldarrikatzen jarraituko du, orokorrean eta bereziki ustelkeria zabalduta dagoen medikuen espezialitateen kategorietan gutxienez. Beraz, Osakidetzari berriro exijitzen diogu irregulartasunak eta erantzukizunak argitzeko ikerketa serio eta ausarta egin dezala, eta EPE sistema barri baten eztabaida demokratikoa ireki dezala, gertatzen eta gertatu diren guztiak ez errepikatzeko.
