Bizkaiko Bulego eta Langeletako langileak kalera irten dira berriro, hitzarmen duin baten defentsan. Hain zuzen ere, Euskal Encounterren inaugurazioan izan dira protestan, joan den asteartean egindako agerraldian iragarri bezala.
Blog Page 747
TUI MMko Europako ardura hartu dugu
TUI MM, WFTU (World Federation of Trade Unions) elkarteko industriako adarra da. LAB sindikatua Europako lehendakariordetzarako hautatua izan da, eta horrenbestez, hurrengo 5 urteetan TUI Mmko zuzendaritzan egongo da.
Pasa den uztailaren 19tik 21ra Kairon (Egipto) burutu zen Trade Union International of Workers in the Mining, the Metallurgy and the Metal Industries 3. biltzarrean, LAB sindikatua Europako lehendakariordetzarako hautatua izan da, eta horrenbestez, hurrengo 5 urteetan TUI Mmko zuzendaritzan egongo da.
TUI MM, WFTU (World Federation of Trade Unions) elkarteko industriako adarra da. WFTUk mundu osoko 92 miloi langile baino gehiago ordezkatzen ditu.
Kairon burututako kongresuan, parte hartu duten sindikatutako ordezkariek adostutako agirian, mundu mailan neoliberalismoak dakartzan ondorioak salatzeaz gain, industrian robotizazio eta digitalizazioak, multinazional eta trasnazionalen boterea handitzen ari denaren diagnostikoa egin da. Gainera, horren ondorioz, langileen lan eskubideen galera eta prekarizazioa ematen ari da, eta langileen arteko ezberdintasuna sustatzen. Emakumeen egoera, industriarako sarbiderako oztopoa eta gizon eta emakumeen arteko soldata arrakala mundu osoan ematen dela salatu ditugu.
Plataforma digital berriek dakartzaten esplotazio era berriak salatu ditugu, etekina bilatzen baitute baina lan harreman izaera ukatu, eta oinarrizko zerbitzu publikoetan ematen ari diren murrizketak.
Horren aurrean, langile batasuna eta eskubideen defentsaren aldeko hautua egin dugu, nazioartean elkartasuna eta aliantza sustatzeko konpromisoa hartuz.
LABek Kairon, industriaren bilakaerak dakarren prekarizazio egoera salatzeaz gain, Euskal Herriak burujabetzarako duen beharra eta eskubidea aldarrikatu du, eta Euskal Estatu bat aldarrikatu du, munduko gainontzeko herriekin elkartasunean. Estatu bat ez izatearen ondorioak salatu ditugu, eta Espainiar estatuko politika eta legediaren ondorio larriak.
Gainera, Europako ardura hartzeko hautatua izan da LAB, eta hortaz, hurrengo 5 urteetan TUIS MMko gainontzeko Europako sindikatuak koordinatzeko ardura izango du.
Herriok gure etorkizuna erabakitzeko dugun eskubidearen defentsan berresten gara, Moncada kuarteleko altxamenduaren urteurrenean
LAB sindikatuak, Moncadako kuartelaren aurkako 1953ko uztailak 26 altxamendu iraultzailearen data sinboliko honetan, Kubako herriari eta bere iraultza agurtu nahi ditu.
LAB Sindikatutik Kubako herriak bizi duen aro berria gertutik jarraitzen du. Aldaketa eta itxaropen garaiak dira Kuban. Diaz Canelen gobernua herriaren parte hartze eta babesarekin Kubako iraultzak beharrezkoak dituen aldaketak burutzen ari da, Kubako herriaren eta langile klasearen ongizatea hobetze bidean.
Aldi berean, inolako gizatasunik gabeko Kubako herriaren kontra aplikatzen den blokeo onartezina salatzen dugu, eta Guantanamo Kubako herriari itzulia izan dadin ere exijitzen dugu.
Herriek euren etorkizuna erabakitzeko duten eskubidearen defentsa berresten du LABek, inolako esku-hartze inperialistarik gabe. Horregatik, sindikatutik Kubako herriarekiko eta bereziki Kubako Central de Trabajadores de Cuba (CTC) sindikatuarekiko elkartasuna eta Kubako Iraultzaren defentsa berresten dugu, Kubako Iraultzaren 60. urtemugaren eta CTC Sindikatuaren 80. urtemugaren atarian gauden honetan.
Kubako Iraultzak Euskal Herrian lagun bat duela helarazi nahi dugu, Euskal Herriak Kubako herrian lagun bat izan duen bezala.
Oso positibotzat jotzen dugu martxoaren 8ko Greba Feministaren gutxieneko zerbitzuen epaia
Justizia Auzitegi Nagusiak 2018ko uztailaren 18ko 354/2018 sententzia eman du, martxoaren 8ko grebaren gutxieneko zerbitzuen harira.
Anulatu dituen apartatuak ondorengo hauek dira:
– Neguko errepideen egoerari buruzkoak. Atal honek esaten zuen emergentzia zerbitzuak jai egun batean bezala ezartzen zituen, baina salbuespena sartzen zuen alerta kasuetan, esanez kasu hauetan alerta kontutan hartuko zela zerbitzu minimoak ezartzeko.
Auzitegiaren aburuz, honek motibazio falta du, ez delako zehazten ze gradutako alertaren kasuan ezarriko diren, ezta zelako kopuruan, … eta beraz proportzionalitate juizioa egitea ezinezkoa dela.
– Zerbitzu sozialak: egoitzak. Kasu honetan gerokultoreen %70 zegoen dekretatuta eta %10 gehiago bazkalordu, goiz eta iluntzean. Eta erabiltzaileek %70ean dependentzia grado II eta III zituzten kasuetarako, gerokultoreen %80.
Justizia Auzitegi Nagusiak portzentaia horiek jeitsi ditu %70etik %50era eta %80tik %70era. Argumentazioa, ezin direla aurreko neguan izandako greba indefinituaren zerbitzu minimo berak izan, grebaren intentsitatea/iraupena ez delako berdina.
– Haurreskolak partzuergoa: Kasu honetan koordinatzailea eta zuzendaritzako kide bat zeudeten deituak zerbitzu minimoak egitera. Justizia Auzitegi Nagusiaren aburuz zuzendaritzako kide horren aipamena bertan behera geratu behar da, ez baitago zuzendaritzarik Haurreskoletan.
Osakidetzaren atalean aldiz, ez du anulatzen baina nola interpretatu behar den argitzen du.
Beraz, epaia oso positiboki baloratzen dugu.
Lanean pairatzen dituzten erasoak salatu dituzte Euskotreneko langileek
Euskotrenen Batzorde Iraunkorrak langilegoa deitu du gaur, Bilboko Zazpikaleko geltokiaren aurrean, aurreko larunbatean langile batek pairatutako erasoa salatzeko.
Hauxe da Euskotreneko Batzorde Iraunkorrak igorritako oharra:
Aurreko larunbatean berriro langile bat erasotua izan zen bere jardunean zela. EuskoTrenen Batzorde Iraunkorrak eraso hau zein gainerako langileek bere jardunean pairatzen dituzten erasoak berriro deitoratu nahi ditu.
Jendaurrean bere lana garatzen duten EuskoTrenen langileek (kontu hartzaileak, geltokietako langileak, gidaritza agenteak, Bezero Arretarako Bulegoetako langileak,…) EuskoTrenen erabiltzaileei laguntza emateko eta garraio publikoaren erabilera zuzena bermatzeko egiten dute lan.
Guztiz onartezina da bere lana egiteagatik hainbat langilek isekak, mehatxuak edota baita erasoak ere pairatu behar izatea pasa den larunbatean gertatu zen bezala.
Horrelako jarrerak gutxiengo batek burutzen dituela nabarmenduagatik ere gure kezka agertu nahi dugu. Harremanek abegigortasun eta elkar errespetuan behar dute oinarritu.
Datorren ikasturterako agenda finkatu du Euskal Herriko Emakumeon Mundu Martxak
Ikasturtea indartsu dator, Bilbon egingo duten Nazioarteko Topaketen etorrerarekin.
Hauxe da Euskal Herriko Emakumeon Mundu Martxak igorritako oharra:
Iritsi zaigu uda, oporrak eta eguzkia, azkenean! Denok horren gustura hartuko dugun deskantsurako momentua. Ikasturte potentea izan da aurtengoa ere, gure herri feminista eraikitzera bidean urrats asko eman ditugu: martxoak 8 ahaztezina, indarkeria matxistaren aurkako protokoloaren eztabaidak, Lolita Chávez ekintzaile feministari babesa ematea, Rana Plaza Gogoan eguna, asanblada irekiak, kaleko protestak… martxa honek ez du etenik, urrutira goaz denok aske izan arte!
Hurrengo ikasturtea ere indartsu dator. Apuntatu agendan honako data hauek:
· Irailaren 28 eta 29an formazio jardunaldia Iruñean.
· Urriaren 5ean asanblada irekia Bilbon.
· Urriaren 22tik 28ra Emakumeon Mundu Martxaren XI. Nazioarteko Topaketa Bilbon.
· Urriaren 27n FEMINISTON HERRIA Bilboko Areatzan.
Beraz, hartu indarrak udan eta datorren ikasturtean ere, martxan jarraituko dugu!
2018rako soldata igoera baieztatu da Nafarroako Gobernuan
Nafarroako Gobernuak baieztatu du %1,5eko igoera abuztuari dagokion ordainsarian jasoko dela; beste alde batetik, uztailetik aurrean aplikatuko litzatekeen erantsitako %0,25ari dagokionez, Nafarroako Gobernuaren asmoa da iraileko ordainsarian pagatzea, behin 2018.eko uztailaren 3an ospatu zen Ministro Kontseiluan hartu zen erabakiaren berri jasotzean, non aipatu soldata-igoeraren aplikazioa onartzen den.
Berriz ere LABek adierazi nahi du, Administrazioko langileentzako ordainsari-igoera atzeratzen ari dela Madrileko Gobernuak inposatzen digun politika-interbentzioagatik.
Alderdi Popularrak administrazio guztiei eskumen murrizpenak inposatu zizkien. Ordainsariei dagokienez, estatuko sindikatuek babesa eman zioten eroste-ahalmenari eustea bermatzen ez duen akordio bat sinatzen. Urte honetarako gehienezko ordainsari-igoera %1,75koa da, egungo inflazioa Nafarroan %2,1, eta ordainsari galera %0,35 handitzen zaigu, orain arte metatu dugun %13,6koari gehitzen zaiona.
Orain PSOEk segitzen du eskumenak murrizten eta ordainsari galera gehiagorekin zigortzen. Nafarroako Gobernuak, Geroa-Baikoak, langileei galdutako ordainsariak berreskuratzea ahalbidetuko dizkieten baliabideak jarri behar ditu. LABek exijitzen du negoziazio prozesu bat martxan jartzea, langileek lapurtu zaien dirua berreskuratzeko beharrezko neurriak inplementatzeko.
Nafarroako Hezkuntza Departamentuarekin larrialdizko bilera eskatuko diogu azken LEPan gertatu dena argitzeko
Hezkuntzako oposizioetan gertatzen ari dena ez da berria. Aurtengo bigarren hezkuntzako eta lanbide heziketako probek utzi dizkiguten zenbakiek, ordea, aldaketaren beharra areagotu egin dute. Premiazkoa da eredu aldaketa!
Irakasle kopuru handi batek, erdiak baino gehiagok, ez du lehen proba gainditu. Espezialitate batzuetan %80tik gorakoa izan da suspentsoen kopurua. (gehienek jada irakasle gisa lanean dihardutenak) eta ez dute aukera izan ahoko probara pasatzeko. Plazen %30 inguru bete gabe geratuko da eta ehunka langilek egonkortu gabe jarraituko dute behin behineko irakasle gisa jarraituz.
LABen argi daukagu oposizio eredu hau ez dela baliagarria irakaslerik egokienak hautatzeko. Aspaldi gabiltza irakasleak egonkortzeko eredu propioa aldarrikatzen eta Madrilen araututako oposizio eredu honi aurre egiteko ahaleginak egiten:
• Idatzizko proba baztertzailea da eta proba memoristiko hutsak gehiegizko balioa du.
• Gaitegiak: berritzea (estatu mailakoak dira eta gehienak 90. hamarkadakoak) eta euskaraz argitaratzea.
• Ebaluazio irizpideak eta kalifikazio irizpideak aurretik argitaratzea.
• Berehalako erreklamazioetan azterketa ikusi ahal izatea.
• Epaimahaikideen baldintza hobetzea: ordu asko, datak oso estu…
• Prozesuak aldez aurretik iragartzea eta prozesua lehenago hastea.
Aldi berean, gogora ekarri nahi dugu LEP honetan hainbat hautagaik espezialitate bereko froga bitan egin behar izan dutela, Zerrenda Bakarra zapuztu eta gero gaztelerako zein euskarako zerrendan egon ahal izateko. Lotsagarria iruditu zitzaigun zinismoa erabilita hainbat ordezkari politiko eta sindikalek aukera bikoitza izango zutela adierazi zuten baina orain agerian geratu da iruzur bikoitza jasan behar izan dutela eta erkidego honetako bi hizkuntza ofizialak menperatzea zigortu egin nahi dela, saritu beharrean.
Horregatik guztiagatik, premiazkoa iruditzen zaigu Hezkuntza Departamentuak gai horiei guztiei buruz duen ikuspuntua jakitea eta kalitatea, metodologia aktiboak eta berrikuntza pedagogikoa bermatuko dituen bideak abian jartzeko LABek larrialdizko bilera eskatuko dio, kontu hauek guztiak argitu asmoz.