LABLangile Abertzaleen Batzordeak

Denontzat eskubidea izan beharko zena, beste oinarrizko beharrizanekin batera, negozio bihurtu du kapitalak, gobernu ezberdinen konplizitate eta laguntzaz. Ez da harritzekoa ate birakarien funtzionamendua ikusita.

Azken urteotan, kontsumitzaileon fakturak gora eta gora baino ez du egin, eta egoera sozio- ekonomikoa zein izan den kontuan hartuta, erabiltzaile gehiegik ezin izan diote aurre egin, horrela, pobrezia energetikoa bezala izendatu dugun fenomenoarekin aurkitu gara. Bestaldean, gero eta irabazi handiagoak izaten ari diren konpainien ugazabak. Ez da bidezkoa, ez da justua eta bizitzaren aurka egiten du.

Errealitate honen aurreko erakunde publikoen papera eta zeregina ez da inondik inora inpartziala izan, egoera hau bultzatu eta ahalbideratu dute beraien erabaki eta politiken bitartez. Orain, gure ustez injustua, baina ere berean hauteskunde politikoen aurrekanpainan popularra den neurria iragarri digute Sanchezen gobernutik: energiaren ekoizpenaren %7ko zerga kenduko dute behin behineko neurri bezala. Kontua da, guztioi berdin aplikatuko digutela neurri hau, eta gure ustez, gastuaren arabera, eta errentaren arabera, batzuei zerga ordainarazi beharko zitzaiela.

Zerga kentzearen neurriarekin batera, bonu sozialak eskatu ahal izateko baldintzak arinduko omen ditu Estatuko Gobernuak, berogailuaren faktura apaltzeko deskontuak egitearekin batera. Beste behin ere partxeatzen ari direla deritzogu, oraingoan neurri guztiz elektoralak jarriz mahai gainean. LABen iritziz, gurea bezalako herri industrializatu batean, energiaren gaia estrategikoa da, eta guri eta hemendik dagokigu beronen gaineko erabakiak hartzea, Gernikako Estatutuak eta Nafarroako Foru Amejoramenduak ez digute balio herri bezala hartu beharreko bidea har dezagun. Gure herrian, krisi energetikoari, erregai fosilen mendekotasunari, klima aldaketari… aurre egiteko, gure beharrizanen eta baliabideen araberako bideen jabe izan behar dugu. Aukerak badaude, eta gurean, tokian tokiko esperientziak aurrera eramaten hasiko gara.

Herrialde Katalanetan, Bartzelona bezalako hiri handi batean adibidez, energia berriztagarrien aldeko apustua egiten duten kooperatibak indarra hartzen ari dira. Gure ustez, hauek ez dira irtenbidea, energiaren kudeaketa publikoa izan behar baita eskubide bezala guztiok bermatua izan dezagun, baina bai egoera berrietarako erdibidea, eta horretarako, hauen aldeko hautu politikoa egin beharra da.

LABek Iberdrola eta bere esanetara dauden botere politikoen eredu eta interesak deitoratzen ditu herritarren eta langile klasearen aurka egiten dutelako modu zuzenean. Guk bestelako eredu energetikoa bultzatu nahi dugu, aurreztean oinarritzen dena, eraginkortasunean eta energia berriztagarri eta alternatiboan oinarritzen dena eta natura errespetatuko duena. Era berean, eredu berriak demokratikoa izan behar du, herritarrek, langileok eta eragile sozialen parte hartzea bermatuko duena, eta gure iritzia aintzat hartuko dena erabakiak hartzeko orduan. Energia politikak Ama Lurraren zaintza bere planifikazioaren oinarri hartu beharko du.