2026-04-24
Blog Page 730

Milaka langilek gure alde egin dute hauteskunde sindikaletan, kendutako eskubideak berreskuratzeko bidelagun gisa

admin
-
0
Hauteskunde sindikalak abian daude hainbat lantokitan, eta LAB emaitza oso onak lortzen ari da, azken urteetan osatutako ibilbidearen harira. Lan baldintzak bakarka inposatu nahi dizkiguten garaiotan, LABek irtenbide argia proposatzen du: kolektiboki erantzutea. Izan ere, eskubideak lortzeko elkartasuna eta antolakuntza da gure alternatiba, eta errezeta horrekin bat egiten ari dira milaka langile.

LAB klase sindikatua da, borrokalaria, elkartasuna oinarri duena, kendutako eskubideak berreskuratzeko bidelagun aproposena. Hain zuzen ere, murrizketa garaiak bizi izan ditugu azken urteotan; horrenbestez, sindikatuaren lehentasunen artean daude enplegua egonkortzea, soldata arrakalarekin bukatzea eta hemen negoziatzea.

Orain pasa omen da krisia, atera omen gara. Bada, LABen iritziz, lotsagarria da aberastasunaren handitze hori langileen prekarietatean, malgutasunean eta lanaldia handitzean oinarritzea. Sindikatuak ezin du onartu lanera sartu diren kontratazio berriei lan baldintza okerragoak ezartzea, kontratatzerakoan diskriminatzea, emakumeak lan munduan bigarren mailako langile izatea edo lan osasuna negozio bilakatzea.

Hauteskunde sindikaletan babesa erakutsi diguten langileek ongi baino hobeto dakite antolatuta egoteari esker lortzen direla gauzak aldatzea, maila guztietan; eremu sindikal, politiko zein sozialean. Eta LAB eraldatzailea, solidarioa, ekintzailea eta eraginkorra da. Horregatik aukeratu gaituzte bidelagun.

Emaitza esanguratsuenak
Orain arte egin diren hauteskundeetan emaitza esanguratsuak lortu ditu LABek. Horietako batzuk aipatuko ditugu ondoren.

Donostiako Udalean, hauteskundeak irabazi ditugu. Hain zuzen ere, 24 delegatu hautesleetatik 10 lortu ditugu, 2014ko hauteskundeetan baino bat gehiago. Lau hauteskunde mahaietatik hirutan irabazi dugu.

Bilboko El Corte Inglesen, LABek sindikatu bozkatuena izaten jarraitzen du, FASGArekin 10 delegatutan berdinduta, baina azken honek baino boto gehiagorekin.

Gascan, delegatu bat gehiago lortu dugu, erabateko gehiengoa indartuz. 23 delegatuetatik 14 ditu LABek.

Lasarteko Michelinen, hirugarren aldiz jarraian irabazi ditugu hauteskunde sindikalak, 6 delegatu eskuratuta. Bereziki nabarmena izan da tailerretan jasotako babesa, beharginen %39k LABen alde egin baitu.

Cementos Rezolako (Financiera y Minera, SA) enpresan, emaitza historikoa lortu dugu; lehen aldiz atera da garaile LAB, 5 delegatu lortuta.

Polmetasa enpresan, 4 delegatu lortu ditugu, ELArekin berdinduta, baina boto gehiago eskuratuta.

Debako Teknikerren lehen indarra gara, duela lau urteko emaitzak goitik behera aldatu eta gero. LABek 9 delegatu ditu eta ELAk, 4; 2014an, ELAk 7 zituen eta LABek, 6.

Donostiako Odol Bankuan, lehen indarra gara ere, 3 delegaturekin; duela lau urte, ELA sindikatuarenak ziren lantoki honetako 5 delegatuak.
 

 

 

Ordaindutako baimenen inguruko epai garrantzitsua irabazi dugu

admin
-
0
LABetik langile guztiei gogoratu nahi diegu euren eskubidea dela ordaintutako baimenak lehen lanegunetik kontatzen hastea, eta eskubide hau onartzen ez bazaie, erreklamatzeko deia egiten diegu.

2018ko otsailaren 13ko Auzitegi Goreneko 145/2018, epaiaren ondorioz, ordaindutako baimen egunak kontatzen hasi behar dira baimena hartzeko eskubidea izan eta hurrengo lan egunetik aurrera.

Hau da, adibidez, larunbatean ezkontzen diren langileen kasuan, astelehenetik ostiralera lana egiten badute, astelehenetik aurrera hasi behar da baimena kontatzen.

Enpresa batzuetan ordea ez dute aplikatu nahi izan epai horrek zioena, eta langileek epaitegira joan behar izan dute euren eskubideak gauzatzeko. LABek lehen epaiketa izan du gai honekin SAM enpresaren aurka, eta epaiketa irabazi dugu. Donostiako Lan Arloko 5, epaitegiak, azaroak 12an argitaratutako sententzian. Epai horretan, langileak ezkontzagatik zegokion baimenean, bi egun gehiago hartzeko eskubidea onartzen zaio, eta bi eguneko soldataren indemnizazioa ordainarazten dio gainera enpresari.
 

 

 

Euskara erabili nahi dutenentzat ingurune sozial eroso, abegikor eta naturala da eta izango da sindikatua, Euskaraldiak iraun bitartean ere

admin
-
0
Euskara erabili nahi dutenentzat ingurune sozial eroso, abegikor eta naturala da eta izango da sindikatua, Euskaraldiak iraun bitartean ere

Abian da Euskaraldia, eta 11 egunez Ahobizi eta Belarriprest izango gara sindikatuan. Hain zuzen ere, langileok Euskaraldian subjektu aktiboak izango gara. Lanean zein kalean, askatasunean, euskararen hazia erein egingo dugu euskararen erabilera hazteko.

Donostiako Groseko egoitzako kideak.

2000. urtean LAB sindikatuak erabaki zuen sindikatuaren LAN eta KOMUNIKAZIO hizkuntza euskara izango zela. Erabaki horren aurretik euskararen normalizazioan lan handia egina bagenuen, erabakiaren ostean EUSLAB egitasmo estrategikoa jarri genuen martxan sindikatu barruko jardueran zein lan munduan euskararen erabilera areagotzeko. Ez gara berriak lan munduan euskararen erabileran eragiteko dinamiketan.

Euskaraldiaren alde, Gasteizko egoitzaren aurrean.

EUSKARALDIA euskararen erabilera areagotzeko ariketa sozial eta kolektiboa den neurrian, LABek bat egin du dinamikarekin eta EUSKARALDIAn eragile aktiboa izatea erabaki dugu. LAB sindikatuko kideok, urte osoan zehar bezala, azaroaren 23tik abenduaren 3ra, 11 egunez, euskara erein egingo dugu kalean zein lanean, langileok euskararen erabileran hazteko.

Lizarrako egoitzako kideak.

Euskararen berreskuratze proposamen guztietan lan mundua eta langileak bazter geratu gara eta EUSKARALDIAn subjektu aktiboak izan nahi dugu. LABeko kideok gure eginbide sindikalean AHOABIZI eta BELARRIAPREST izango ditugu eta horrela, sindikatuaren jardueran euskararen erabilera areagotu nahi dugu eta langileekin euskararen erabileraren erantzukizuna partekatuko dugu eta aukera eskainiko diegu gurekin eta lan munduan euskara erabiltzeko.

Durangaldeko LABeko kideak.

Sindikatu barruan zein lan munduan hizkuntzarekin ditugun inertziak astindu nahi ditugu eta sindikatu barruko prozesuetan euskararen erabilera areagotzeko ahalegin kolektiboa egingo dugu.

Oarsobidasoko kideak.

LABek EUSKARALDIA baliatu nahi du lan munduko euskaltzaleen sareak berraktibatzeko eta indartzeko, eta 11 egun horietan gure sindikatuan eta lan munduan sortutako dinamikak denboran mantentzeko ahalegin berezia egingo dugu.

Eusko jaurlaritzako LABeko kideak

EUSKARALDIAn LAB sindikatua euskara erabili nahi dutenentzat ingurune sozial eroso, abegikor eta naturala izango da. Gure eginbide sindikala egiteko moduari eta prozesuari emango diogu garrantzia: Euskaraz egingo dugu.

Gipuzkoako Foru Aldundiko LABeko kideak.
 

 

 

Bizkaiko etxez etxeko laguntza zerbitzuko langileak kalera irten dira berriro

admin
-
0
Bizkaiko etxez etxeko laguntza zerbitzuko langileak kalera irten dira berriro

Bizkaiko etxez etxeko laguntza zerbitzuko langileek lau greba egun deitu dituzte azarorako. Lehena atzo egin zuten eta bigarrenari gaur egokitu zaio txanda. Astelehenean eta asteartean jarraituko dute grebekin, euren lan eskubideen defentsan. 
 

 

 

Erditze unitateko murrizketen aurka protesta egin dugu Gurutzetako ospitalean

admin
-
0
Erditze unitateko murrizketen aurka protesta egin dugu Gurutzetako ospitalean

Gurutzetako ospitaleko LAB, ESK, ELA, UGT, CCOO eta SAE sindikatuok Erditze unitateko 6 erizain laguntzaile, txanda bakoitzeko bana, eta zelari baten murrizketak salatzeko elkarretaratze bat egin dugu.

Hauxe da sindikatuok osatutako oharra, mobilizazioaren harira:

Murrizketa hauek irizpide ekonomizistetan eta datu estatistiko hotzetan oinarritzen dira besterik ez, kalitate asistentzialako irizpideak eta erizain laguntzaileek burutzen duten lanaren azterketa zehatzago bat alde batera utziz. Erditze unitatean burutzen den lana bilakaera handia izan du, zeregin berriekin. Zerbitzura doazen emakumeak erabiltzaile konplexuagoak dira, adin-tarte altuago eta zainketa behar handiagoekin.

Erditze zerbitzua larrialdi zerbitzua dela eta baliabideak zehaztea ezinezkoa dela ez dute kontutan hartzen, hortaz, prozedura larriei erantzun arin eta egokia eman ahal izateko langile nahiko egotea beharrezkoa da. Sarritan, halako egoeretan eta gaur egungo langile kopuruarekin, nekez lortzen da kalitatezko erantzun segurua ematea.

Erizain laguntzaile eta zelarien murrizketa honekin etengabeko arreta pertsonalizatua bermatzen duen eta segurtasun eta intimitate sentsazioa sustatzen duen emagin bakoitzeko erizain laguntzaile bat egoteko aldarrikapenetik urruntzen gara, kalitatezko lana bermatzen duen benetako talde lana ezartzea eragotziz.

MURRIZKETA HAU KATEGORIA GUZTIENGAN ERAGINA IZANGO DUEN PROZESU BATEN HASIERA DA.

Pertsonal murrizketa hau ez da gertaera isolatua, ez da bakarrik Erditze unitateko langileen arazoa. Murrizketa hau, Urdulizeko irekieraren azken fasea dela eta, ospitaleko kategoria guztietako 200 lanpostu ezabatzeko irteteko pistola-tiroa da. Guztiongan eragina duen arazoa da hau.

Pixkanaka-pixkanaka, plantilla murrizketako prozesu ugari ikusiko ditugu ospitalean. Gurutzetako langile eskasia, gehiegizko lan-kargak eta lan-erritmo altuegiak denon jakinean dago. Akatsaren bat egiteko arriskuaren handitzeak eta zerbitzuaren eskakizun guztiak bete ezin izateak presio psikologiko gogorra sortzen dute langileengan.

Sindikatuok langile guztion batasunetik gogor erantzutea beharrezkoa dela uste dugu. Langile eta erabiltzaileekiko kalitate eta segurtasuneko baldintzetan lan egitea bermatzen duen plantilla egokia defendatzea beharrezkoa da.

Gure lanpostuak eta orain arte erreferentea zen eta harrotzen gintuen ospitalearen kalitatea defendatzea premiazkoa da.

 

 

 

Bizkaiko etxez etxeko laguntza zerbitzuko langileak greban dira, lan baldintza duinen alde eta zerbitzuaren kalitatearen defentsan

admin
-
0
Bizkaiko etxez etxeko laguntza zerbitzuko langileak greban dira, lan baldintza duinen alde eta zerbitzuaren kalitatearen defentsan

2017az geroztik hilero bi lanuzte partzial egin ondoren, Bizkaiko etxez etxeko laguntza zerbitzuko langileek lau greba egun deitu dituzte azarorako; horietatik lehena, gaur. Azaroaren 23, 26 eta 27an ere egingo dute greba. Lanaldi partzial inposatuak dituzte, ez zaizkie prebentzio neurriak aplikatzen eta soldatari dagokionez enpresaren proposamena IPCaren azpitik geratzen da.

Bizkaiko Etxez Etxeko Laguntzako langileok sektorearen egoeraren berri eman nahi diegu Bizkaiko herritarrei:

• 1500etik gora langile gara, ia guztiak emakumeak. Dependentzia duten pertsonak artatzen ditugu, gure lana jendartearentzat ezinbestekoa izanik. Betetzen dugun lana, pribatizatutako zerbitzu publikoa bat da, Bizkaiko udalek eta mankomunitateek, enpresa publikoen bitartez azpikontratatzen dutelarik.

• Azken urteotan gure udalek eta mankomunitateek, estatuko Menpekotasunaren Legearen ezinbesteko laguntzaz, murrizketak egin dituzte aurrekontuetan, eta horrek ondorio larriak ekarri ditu gure lan-baldintzetan, eta beraz menpekoentzako zerbitzuan.

• Langileok egunetik egunera jasaten ari gara zerbitzualdiko ordu-murrizketa (8.000 ordutik gora azken 5 urteetan), soldata-jaitsierak, lan-eskubideen galera, lanaldi partzialeko kontratazioa, eta diru publikoz lortutako beraien milioietako etekinak baino kontuan hartzen ez dituzten enpresa azpikontratatuen baldintza eta erabakien inposizioak.

• Horregatik erabaki dugu ASKI esatea. Gure udalek eta mankomunitateek hartzen dituzten erabakien norabidea zeharo aldatzea eta horrekin batera, ordu-murrizketak gelditzea eskatzen dugu. Zerbitzualdiko orduak gehitu behar dira, gure lan-baldintzak duinagoak bihurtu, eta dependentziadun pertsonentzako kalitatezko laguntza-eredu baten alde apustu egin.

• Hori lortzeko, ez gara gehiago ikusezinak izango, antolatu behar gara. Gure herri eta hirietako kaleetan ikusi behar gaituzte!

 

 

 

Irekiera mugagabedunen merkataritza ereduaren aurka mobilizatu gara berriro

admin
-
0
Irekiera mugagabedunen merkataritza ereduaren aurka mobilizatu gara berriro

Supercor-en aurrean, Bilboko Errekalde Zumarkalean, eta Carrefour Express-en atarian, Katalunia kalean, San Inazion, bildu gara gaur protesta egiteko.

Igande eta jai-egunetako irekieren kontra LAB, ELA, CCOO, UGT, ESK eta CGT-k osatutako Bizkaia, Gipuzkoa eta Araba-ko plataformatik, adierazi nahi dugu DIA&GO, Carrefour Express, Simply 7×7, BM Urban eta Opencor bezalako ereduen guztiz kontra gaudela.

Irekiera mugagabedunen komertzio modelo hauen erabat kontra gaude, merkataritza sektorea bultzatu ordez, langileen lanaldia malgutu eta es­plotatu egiten dituztelako. Langile batzuen beharrizanaz eta prekarietateaz baliatzen dira 365 egun irekiak dauden dendak ezarri edo goizeko 08:00etatik gaueko 23:00ak arte ordutegien handitzeak ezartzeko. Auzo eta herrietako merkataritza eta, ondorioz, sektoreko enplegua suntsitzen dute, soilik kate handietako jabeak aberastuz.
 

 

 

Urtebeteko negoziaketa zailen ostean iritsi da akordioa Bizkaiko arrain kontserba eta gazituen sektorean

admin
-
0
Urtebeteko negoziaketa zailen ostean iritsi da akordioa Bizkaiko arrain kontserba eta gazituen sektorean

Bizkaiko arrain kontserba eta gazituen sektoreko langileek aurreakordioa lortu dute, sindikatuak eta patronalak 12 hilabetetan 19 aldiz bildu eta gero. Lanuzteak deituta zeuden aste honetarako, baina, azken bileran, LAB, UGT eta CCOO sindikatuok patronalarekin adostasuna lortu eta gero, lanuzteak bertan behera utzi eta akordioa erdietsi dugu. LABek jakinarazi duen moduan, zaila izan da adostasun batera iristea. Akordatutako gaien artean, soldatak eta lizentziak izan dira gakoak. "Langileen artean emakumeak nagusi diren sektorea da, eta, hau horrela izanik, lizentzia eta beharrizan bereziak behar dituzte izan", adierazi dugu gaur eskainitako agerraldi batean.

LABen Gernikako egoitzan agerraldi bat egin dugu gaur, akordioaren nondik norakoen berri emateko.

Hitzarmena hiru urteetan indarrean egotea adostu dugu patronalarekin, hots, 2018, 2019 eta 2020an. Urteroko soldata igoerak ere adostu ditugu, aurreko urteko KPI +%0,25.

Era berean, beste lorpen batzuen artean, batzorde bat eratuko da Berdintasun Plana adosteko, 50 langiletatik gorako enpresetan, kategoriak aztertzeko; sindikatu eta enpresa bateko delegatuen artean ordu sindikalak akumulatzea ahalbidetuko da; lizentzietan hobekuntzak adostu dira; eta mahai negoziatzailearen aurretik lortutako akordio guztia mantentzea erabaki da.

Baimenei dagokienez, osasun arazoengatik espezialistarengana jo behar izanez gero, langileek behar dituzten orduak izango dituzte eskura. Bestalde, senideei laguntzeko zortzi ordu eta ospitaleratuta dauden senideak zaintzeko bost egun izango dituzte. Egun bakarreko ospitaleratzeetarako ere baimena izango dute.

Hitzarmen berria eragin orokorrekoa da. Alde sozialaren eta patronalaren gehiengoak sinatu duenez, kontratu iraunkorrak edo aldi baterakoak dituzten guztiek jasoko dituzte onurak, eta hori oso garrantzitsua da. Akordio honi esker, Estatu mailatik datozen mehatxu eta erasoen aurrean sektoreko langileen lan baldintzak babesten dituen hitzarmen bat dugu orain. LABetik hainbestetan oihukatzen dugun “hemen lan egin, hemen erabaki” aldarrikapena egikaritu dugu oraingoan eta hori lorpen oso garrantzitsua da, lan harremanetarako euskal esparruaren defentsan dihardugunontzat. Paradoxikoa da aldarrikapen hori bera duen sindikatu batek akordio honekin bat egin ez izana eta sindikatu horrek berak estatalizazioaren aurkako borroka Madrilen kokatzea, zer eta Estatalizazioa bultzatu duten eragileei eskua luzatuz.

 

 

 

Gizarte ekimeneko ikastetxeetako patronalek langileen aldarrikapenei erantzunik eman gabe jarraitzen dutenez, mobilizazio eta grebekin jarraitu beste biderik ez digute uzten

admin
-
0
Gizarte ekimeneko ikastetxeetako patronalek langileen aldarrikapenei erantzunik eman gabe jarraitzen dutenez, mobilizazio eta grebekin jarraitu beste biderik ez digute uzten

LAB, ELA, STEILAS, CCOO eta UGT sindikatuok azaroak 27 eta 30 bitarteko 4 greba egunak babestera animatzen ditugu ikastetxeetako langileak.

Pasa den ikasturtean gauzatutako 3 greba egunei (Martxoak 20 eta Maiatzak 15-16), ikasturte honetan, Urriak 9 eta 10ean, gauzatutako beste 2 greba egun gehitu behar zaizkio jadanik. Bost greba egunek erantzun masiboa jaso dute sektoreko langileen aldetik, jarraipen-maila %65 eta %70 bitartekoa izanik. Era berean, mobilizazio eta manifestazioetara oldean doaz langileak; horrela, ikastetxe batzuetako zuzendaritzek, grebalarien legez kanpoko ordezkatze bidez greba indargabetzeko saiakerak gauzatu dituzten arren, ez dute lortu, kidegoa guztira 9.000 langile ingurukoa bada, 5.000 langiletik gora bildu baitira behin eta berriro greba egun hauetan antolatutako agerraldi eta manifestazioetan.

Urriak 9 eta 10eko greba egunek langileen aldetik izandako jarraipen zabalaren ondorioz, sektoreko patronal nagusiaren zuzendari orokorra (Kristau Eskola), sindikatuoi hilabete horretan bertan negoziazio mahairako deia luzatuko zigutela publikoki adierazi beharrean ikusi zen.

Patronalak mugiarazi ditugu, eta mahaia deitu beharrean ikusi dira, baina azken egunotan mahai gainean jarritako azken proposamena, grebetara eraman gaituzten aldarrikapenetatik urrun dago oraindik, eta 2017ko Azaroan egina zeukaten proposamenarekiko ez dute aurrerapauso nabarmenik suposatzen (sindikatuok mahaitik altxatu ginen). Agerikoa da beraz, patronalen negoziaketarako aldarterik eza.

Egoera honen aurrean, sindikatuoi, publiko egindako mobilizazio eta grebekin jarraitu beste biderik ez digute uzten. Beraz, ikastetxeetako langile guztiak animatu nahi ditugu datozen Azaroak 27 eta 30 bitarteko 4 greba egunak babestu eta antolatuko diren ekintzetan parte hartzera. Baita ikastetxeetan bultzatzen ari garen batzar eta elkarretaratzeetan zein borondatezkoak ez diren zereginetan planto egiteko kanpainan parte hartzera ere benetako negoziazioari ekiten ez dioten bitartean.

Sektoreko langileok ia hamar urtetan egon gara hitzarmena berritu gabe, eroste-ahalmenaren galera metatuak %10etik gorakoak dira, pedagogien modernizazioa, digitalizazioa eta hezkuntza-berrikuntza langileon kontura joan da, lan-kargak handituz jasanezinak izateraino. Sektore honetako langile-kidego batzuk (hezkuntza-laguntzako espezialistak eta haur-hezkuntzako lehen zikloko langileak) ugalduz joan dira azken urteotan, kopuruz eta prekarietatez, eta horiek dira, hain zuzen, feminizatuenak eta baldintzarik txarrenak dituztenak; hori dela-eta, premiazkoa da baldintza horiek hobetzeari ekitea. Jaiotza-tasa gutxitu izanak eragina izan du ikastetxeetan, eta haur-hezkuntzako lehen mailetan hasi dira langileak kaleratzen. Bestalde, zerbitzuen azpikontratazioa ere zabalduz doa, eta horrek kidego jakin batzuen lan-baldintzak prekarizatzea ekarri du bere baitan; 1-DBH eta 2-DBHko irakasleak parekatzea egiteke dago oraindik; eta beharrezkoa da, halaber, Lanbide Heziketa gehiago arautzea.

Hitzarmen berri baterako aldarrikapen nagusiak

Enplegua:
Akordio bat, enpleguari eusteko eta gelak balizko ixtearen eraginpeko pertsonala birkokatzeko.

Soldatak:
Eroste-ahalmena berreskuratzea.
1-DBHko eta 2-DBHko irakasleen soldatak parekatzea.

Lanaldia eta lan-kargak:
Irakasleen kasuan, ordu osagarriak erreserbatzea eskolak prestatzeko eta ikasleen jarraipena egiteko, zein urtean dedikazio ez presentzialeko 70 orduren aitortza.

Administrazio eta Zerbitzuetako pertsonalarentzat, lanaldia murriztea.

Lanbide Heziketan lanaldiaren banaketa adostea.

Bereziki prekarizatuen eta feminizatuen dauden kidegoen lan-baldintzak nabarmen hobetzea:

Hezkuntza-laguntzako espezialistak: haien lana irakaskuntza-izaerakotzat hartzea, ordu osagarriak ematea lana prestatzeko eta ikasleen jarraipena egiteko, lanaldia modu erregularrean banatzea irailaren 1etik ekainaren 30era arte.

Haur-hezkuntzako lehen zikloko langileak: haien lana irakaskuntza-izaerakotzat hartzea, lanaldia murriztea, ordu osagarriak ematea lana prestatzeko eta ikasleen jarraipena egiteko.

 

 

 
1...729730731...1,612Page 730 of 1,612

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus