LABek elkarretaratze bat egin du gaur Gasteizko Legebiltzarraren aurrean, “Iruzurrik ez, hezkuntza burujabea iruten” lemarekin, Hezkuntza akordioaren monografikoa egin bitartean.
Blog Page 727
Lautada eta Arabar Errioxan Correoseko langileen %30eko murrizketa salatu dugu
Arabako Correoseko LABen Sail Sindikalak salatu nahi du Lautadan eta Arabar Errioxako banaketa- lanpostuen %30a ezabatu dela. Itzela den lau lanpostuen ezabatze honek zuzenki eragingo dio Correosek betetzen duen zerbitzuari, eta hortaz, hiritarrei, udalei eta Arabako eskualde horietako enpresei.
Banatze-eskualdeak handitu izanak, horietako batzuk 100 kilometrotakoak eta hamarnaka herri zeharkatzen dituztenak, ezinezkoa egingo du eguneko banaketa, eta enpresa publikoak bete ohi duen posta zerbitzu unibertsala paper errea izango da. Egoera horrek zuzenean eragiten die, adibidez, administrazioei, epaitegiei eman behar zaizkien jakinarazpenei, medikuaren hitzorduen, diru-laguntzen, baimenen eta abarren jakinarazpenei. Noiz, eta posta eta batik bat paketeria handitzen ari den unean.
Murrizketa honek lan-zentru hauetako langileei ere eragingo die, lan-zama handiagoa izango delako. Gainera, salatu beharra dugu enpresak ez zuela Arrisku Psikosozialen Ebaluaziorik egin, aldez aurretiko neurri gisa, lan gainkarga berri honek langileen osasunari ekar ziezazkiekeen kalteak ezagutzeko, aldatzeko eta ebaluatzeko. Egoera horrek arriskuan jartzen du langileen osasuna.
Zerbitzu publikoek pertsonen beharrei erantzuten diet; aitzitik, ez liokete errentagarritasun ekonomikoari erantzun behar; honela, Arabako herrietan bizi diren pertsonak baztertzen dira. LABek lanean jarraituko du publikoa eta kalitatekoa den Correos baten alde.
Garbiñe Aranburu: “Garaia da egungo salbuespenezko espetxe politikari amaiera emateko” #OrainPresoak
LABeko ordezkaritza zabal batek hartu du parte gaur, Donostian, "Orain Presoak" dinamikak antolatutako ekitaldian eta manifestazioan. Azken honetan, milaka herritarrek hartu dute parte, euskal preso politikoen eskubideen defentsan.
Elkarbizitza eta bakea hizpide izan dituen ekitaldi bat egin dute lehenik, Donostiako Miramar jauregian. Hain zuzen ere, sindikalgintzan, politikagintzan, herri ordezkari gisa instituzioetan eta giza eskubideen, bakearen eta elkarbizitzaren alorrean lanean dabiltzan pertsonak elkartu dira bertan, baita sufrimendua jasan behar izan duten eta jasaten duten hainbat herritar ere. Antiguako tuneletik abiatutako manifestazioari ekin diote ondoren, euskal preso politikoen eskubideak aldarrikatzeko. "Orain Presoak" dinamikak antolatu ditu bi ekimen hauek, eta jendetza hurbildu da Donostiara babesa emateko.
LABeko idazkari nagusi Garbiñe Aranburuk nabarmendu du ezinbestekoa dela mobilizazio soziala gobernuen jarreran eragiteko, eta berretsi du bizikidetza demokratikoan aurrera egiteko lehentasuna duela presoen afera konpontzeak: "PSOEren gobernuak, mugimendu txikiren bat baino harago, ez du urrats eraginkorrik egin eta hemendik exijitzen diogu garaia dela egungo salbuespenezko espetxe politikari amaiera emateko".
Garbiñe Aranbururen hitzetan, "Estatuan ematen ari diren pausoak, ez nahikoak izateaz gain, kontrako norabidean doaz bake eta bizikidetza eszenatoki bat eraikitzeko. Hauxe da egiten dugun irakurketa Karlos Apeztegiaren atxiloketa eta kartzelaratzearen aurrean. Bere berehalako askatasuna exijitzen dugu".
LABeko idazkari nagusiak balioa eman nahi izan die eragile desberdinen artean eta, bereziki, sindikatuen artean lortutako kontsentsuei, Foro Sozial Iraunkorraren eskutik astelehenean egindako agerraldia adibide.
Garbiñe Aranburuk ondorengo pausoak eman behar direla azpimarratu du, presoen aferari konponbide integral bat emateko bidean: "Larriki gaixo dauden presoen kaleratzea; sakabanaketa politikarekin amaitzea; eta graduen progresioa ahalbidetzea, lehen gradutik bigarrenera. Euskal preso politikoen %96 lehen graduan daude".
Asier Nieblaren heriotza salatzeko bihar Urnietan egingo den elkarrateratzearekin bat egiten dugu
Bihar urriak 20, elkarretaratzea egingo da 12:00etan, Urnietako San Juan plazan Asier Niebla Martinezen hilketa salatzeko, bertako Udalak deituta. LABeko kidea urriaren 11an hil zen, abuztuaren 12an Donostian izandako eraso matxista baten ondorioz.
LABek bere elkartasuna eta babesa erakutsi nahi dio hildakoaren senide eta ingurukoei eta dei egin nahi du kontzentrazioan parte hartzera.
Indarkeria sexistaren aurrean mobilizatzeko beharra azpimarratu du sindikatuak.
UGT, CCOO eta CENek sinatutako Akordio Intersektoriala ez-legitimoa, baztertzailea, hipokrita eta ez eraginkorra da
Formari dagokionez, Madrilen sinatutako akordioen traslazio hutsa da eta UGT, CCOO eta CENek Nafarroa sukurtsal hutsa bailitzan tratatzen dutenaren erakusgarri. Gainera, akordioek ez dute gehiengo sindikalik, UGT-k eta CCOO-k Nafarroako ordezkaritza sindikalaren %49a dutelako.
Erregimenaren garaietan bezala egin da prozesua. Ez dira sindikatu guztiak deitu, CEN, UGT eta CCOOk besteok baztertuz jarduten dutenaren erakusgarri. LABek bere prestasuna erakutsi du negoziazio kolektiborako nafar esparrua blindatzeko eta prebentzio delegatuen prestakuntza ziurtatzeko akordio intersektorialak lortzeko. Baina bietan egin dio uko Eztabaida Sozialaren hirukoak. Holding bat bezala jarduten jarraitu nahi dute. Horrelako jarduerak babesteari utzi eta behingoz Eztabaida Sozialaren Kontseilua indargabetzea eskatzen diogu.
Akordioan gomendioak jasotzen dira, ez da betebeharrik zehazten. Ez du patronala ezertara behartzen, horrela prekarizazioa bultzatzen jarraituko du UGT eta CCOOk aurpegia garbitzen dioten bitartean.
Edukiei dagokionez, hilean 1.000 euro gordineko gutxieneko soldata aholkatzen du; alegia, 900 euro garbi ozta-ozta. Nafarroan hilean 1.200 euro garbiko soldata behar da, eta horren aldeko apustua egiten dugu.
Berdintasun planei buruz ere hitz egiten dute, baina hipokrita hutsak dira. Nafarroako enpresa nagusian, Volkswagenen, %50eko emakumezkoen kopurua ezartzeari uko egin diote. Hala, UGTk, CCOOk eta CEN-ek diskriminazioa babesten dute enpresa horretan zein beste askotan. Aipatutako Volkswagen enpresaren kasuan, esaterako, %12 soilik dira emakumeak lan taldean.
Lan osasunari dagokionez, UGT, CCOO eta CEN arazoaren parte dira. Lobby gisa aritzen dira prebentziorako eta lan osasunaren kudeaketarako sistema publiko baten garapenaren aurka. Interes korporatiboak besterik ez dituzte; prebentziorako diru publikoaren banaketa, kasu.
Akordio hau borrokari uko eginda lortu dute, hain zuzen ere aktibazioa eta borroka langileek bizi duten prekarietateari aurre egiteko inoiz baino beharrezkoak direnean.
Lan Harremanetarako Marko Propioa beharrezkoa da Nafarroatik gure beharrak asebetetzeko eta errealitateari aurre egiteko.
Loramendiko grebalariek mobilizazioak indartu dituzte, euren lan baldintzen eta zerbitzuaren kalitatearen alde
Erandioko Sanitas Loramendi helduen egoitzako langileak geba mugagabean daude irailaren 17az geroztik, garbiketako lan taldearekin elkartasunean 4 ordutako lanuzteak ari dira egiten egunero. Hamahiru langile daude garbiketa taldean, sukaldea, garbitegia eta solairuetako garbiketa egiteko. 15 urte daramate lanaldi partzialarekin, eta egoera horrek are eta gehiago areagotzen du prekarietatea. Langile hauei lanaldi osoa eman diezaieten ari dira greban, eta lanuzteak indartuko dituzte: bihartik aurrera, 24 orduko greba mugagabeari ekingo diote. Ildo honetan, Erandioko Udalaren aurrean bildu dira gaur, datozen egunetarako aurreikusitako protesten harira. Hain zuzen ere, idatzi bat erregistratu dute Erandioko Udaleko gobernu-taldearekin eta talde politiko bakoitzarekin batzartzea eskatuz, euren egoeraren berri emateko.
Hauxe da Loramendiko langileek osatutako adierazpena eta datozen egunetarako aurreikusitako mobilizazioak:
Hainbat hilabetetan zehar lanuzte partzialak burutu ondoren eta patronalaren inmobilismoaren aurrean, gure lan baldintzen defentsan eta zerbitzuaren kalitatearen alde, geure burua behartuta ikusi dugu honako erabakia hartzera.
Gure eskaerak argiak dira, garbiketa taldeak duela 10 urte baino gehiago pairatzen duen bazterketarekin bukatzea eta gerokultoren taldeak lana eta bizitza pertsonala kontziliatu ahal izatea, hauxe aldarrikatu beharrean “de facto” onartu beharko ligukete gure eskubidea baita.
Hauexek dira gure eskaerak, hots, prekarietate eta bazterketarekin bukatzea eta langileek eskubide bat eskura dezatela bermatzea.
Gure eskaerak guztiz logikoak izan arren ere, zuzendaritzak ez du pausurik eman nahi.
LORAMENDIko langile guztiok injustua den egoera konpontzen murgilduta ibili gara, Sanitaseko zuzendaritzak era arduragabean jokatzen duen bitartean.
Jarrera honen atzean enpresak langileoi digun beldurra dago, elkartuta gaudelako; koherenteak, solidarioak garelako; eta, batez ere, prekarietatearekin, sexismoarekin, klasismoarekin bukatzea helburu dugulako… gu-danok batera goaz, danok gara bat eta bera.
Gure lan baldintzen kalitatearen alde, egoiliarrei eskainitako zerbitzuaren kalitatearen alde.
Mobilizazioak:
Urriak 19, goizeko 11ean
Erandioko udaletxean
Urriak 20 eta 21, 17etatik 18 arte
Kontzentra SANITAS LORAMENDI EGOITZAN
Urriak 22, 11etatik 13 arte
Haima Erandioko metro geltokian
Urriak 23, 17etatik 18 arte
Kontzentra LORAMENDIN
Urriak 24, goizeko 11ean
Kontzentra UGASKON (BILBON) DEPARTAMENTO DE ACCIÓN SOCIAL
Urriak 25, 17etatik 18 arte
Kontzentra LORAMENDIN
Urriak 26, 11etatik 13 arte
Haima Astrabuko metro geltokiaren ondoan
Urriak 28, 17ean
Haima LORAMENDIREN egoitzan
Urriak 29, 11etatik 13 arte
Haima diputazioan (Bilbon)
Urriak 30, goizeko 10ean
Kotxe karabana LORAMENDIREN egoitzatik
Urriak 31, 11etatik 13 arte
Haima Leioako Sakoneta Polikiroldegian
Irekiera mugagabedunen merkataritza ereduaren aurka mobilizatu gara
DIA&Go denda berri bat zabaldu dute DIA Supermerkatuek Bilbon, Licenciado Poza kalean. Denda hau “komenientziako denda” formatuarekin zabaldu dute, hau da, goizeko 8:00etatik gaueko 23:00etara egongo da zabalik. Aldi berean, Bilboko Mª Díaz de Haro kalean dagoen Carrefour Express igandeetan zabaltzen hasiko da. Hau dela eta, igande eta jai-egunetako irekieren kontra LAB, ELA, CCOO eta UGTk osatutako Bizkaia, Gipuzkoa eta Arabako plataformatik, irekiera mugagabedunen komertzio eredu hauen erabat kontra gaude, merkataritza sektore bultzatu ordez, langileen baldintzak malgutu eta esplotatu egiten dituzte. Langile batzuen beharrizanaz eta prekarietateaz baliatzen dira 365 egun irekiak dauden dendak ezarri edo goitzeko 08:00etatik gaueko 23:00ak arte ordutegien zabaltzea ezartzeko. Honen aurrean, mobilizazio bikoitza egin dugu gaur, Poza kaleko DIA%GO dendaren artean eta Maria Diaz de Haroko Carrefour Expressen.
Igande eta jai-egunetako irekieren kontra LAB, ELA, CCOO eta UGT-k osa-tutako Bizkaia, Gipuzkoa eta Araba-ko plataformatik, hurrengoa adierazten dugu:
Irekiera mugagabedunen komertzio modelo hauen erabat kontra gaude, merkataritza sektorea bultzatu ordez, langileon jornadak exibilizatu eta es- plotatzen gaituzte. Langile batzuen beharrizanaz eta prekarietateaz baliatzen dira 365 egun irekiak dauden dendak ezarri edo goizeko 08:00tatik gaueko 23:00ak arte ordutegien handitzeak ezartzeko.
Auzo eta herrietako merkataritza eta ondorioz sektoreko enplegua suntsitzen dute, soilik kate handietako jabeak aberastuz.
Bestalde merkataritza sektoreko langileak (saltoki handiak, textila, merkataritza orokorra, oinetako, altzari, metal zein elikagai merkataritza), langile guztion batasuna gure borrokaren muina izan behar dela kontuan izan behar dugu. Momentu hauetan erasoa elikagai sektoretik etortzeak ez du esan nahi gainontzekoak salbu zaudetenik, komertzioak liberalizatzeko patronalak ematen duen pausu bakoitza langile guztiontzat kaltegarria izango da eta ondorioz gizartearentzat.
Merkataritza sektoreko liberalizazio izugarria eta modelo berriak mehatxu iraunkorra dira baina orain defendatzen gara edo gutxi barru sektorea erabat desregulatua izango dugu eta hori argi izan langile eta merkatari askoren kal- tetan izango dela.
Azkenik, kontsumitzaile bezala dugun erantzukizunari erreparatu nahi diogu, gure eros beharrak sobera ase bete ditugu eta erantzule izan behar gara, zer eta noiz kontsumitu behar dugun pentsatuz. Gizarte justu bat izan eta sektore bakoitzaren erreklamazioak lortzetik urrun izango gara (gazteak, pentsionistak, langabeak, sektore publiko zein pribatuetako langileak…) langile klasearen arteko elkartasuna eta errespetuan oinarritzen ez bagara.
Honegatik, DIA, Carrefour, Opencor, Simply eta BM-ko zuzendaritzei batzarrak eskatu dizkiegu, hemengo errealitatea zein den gogorarazteko eta etorkizuneko beraien asmoen kontra izango gaituztela adierazteko.
Bizkaiko Txartel Bakarra sustatzeko arrazoiak berretsi ditugu
Bizkaiko Txartel Bakarraren aldeko Foroak urtebete egin du, eta, hori dela eta, agerraldia egin du etorkizuneko erronkak aurkezteko. LAB Foroaren parte da, hainbat eragilerekin batera.
Hauxe da gaurko agerraldian irakurritako adierazpena:
Orain urtebete, 2017ko urriaren 17an, TXARTEL BAKARRAREN ETA GARRAIO PUBLIKO INTEGRATUAREN SISTEMAREN ALDEKO FOROA aurkeztu genuen hementxe.
Aldi berean, Txartel Bakarrak bete beharreko 6 premisen adierazpena ere aurkeztu genuen, BARIK txartelak orain eskaintzen duenetik urrun.
Urtebete joan denean, berresten dugu Txartel Bakarra sustatzen jarraitu behar dugula. Hamabi hilabeteotan eskualdez eskualde ibili gara Foro hau aurkezten eta hasieran 15 erakunde baginen, jada 27 sinatzaile bildu ditugu.
STEILAS, CGT-LKN eta CNT gurekin daudela, euskal sindikatuen espektroa ia osorik hartzen dugu: pentsiodunen kolektiboak, kontsumitzaileen elkarteak, eta Ezkerraldea, Txorierri eta beste eskualde batzuetako auzo- elkarteek eta bestelako taldeek, eta gazte, ikasle, auzo, ekologista eta abarren talde askoren sinadurak batu ditugu. Gehituz goaz, eta jarraituko dugu txartel bakarraren aldeko borondatea handitzen.
2018an, gainera, urrats bat egin dugu maila instituzionalean, Bizkaiak TXARTEL BAKARRA eta SISTEMA INTEGRATUA izan dezan benetako jauzi kualitatiboa izan litekeena, gure ustez. Txartel Bakarraren aldeko Foroa Bizkaiko Batzar Nagusietan ordezkatuta dauden alderdi politiko guztiekin egon da, eta Bizkairako Txartel Bakarraren proposamenaren eskumena, legezkotasuna, bideragarritasuna eta kostua hizpide izango dituen txosten teknikoa egiteko ARAUZ BESTEKO PROPOSAMENA babesteko eskatu die, osoko bilkuran eztabaidatzeko.
Txosten horretan gutxienez parametro hauek aztertu beharko lirateke:
• Garraio-aldaketak doan garraio-modu guztietan.
• Tarifa-integrazioa. Tarifa berberak garraio-operatzaile guztientzat.
• Progresibo izatea. Zenbat eta gehiago erabili hainbat eta merkeago ibili.
• Txartelaren prezioa pertsona/familia-errentara egokitzea.
• Bizkaiko garraiobide publiko guztietan erabiltzea.
• Oraingo garraio publikoko sareari eusten edo hobetzen oinarritzea.
Horregatik, gure asmoa da talde politiko guztiek, aho batez, Bizkaiko Foru Aldundiari eskatzea Bizkaiko Garraio Publikoaren 2018-2018 eperako Plan Estrategikoaren baitan Bizkairako Txartel Bakarraren proposamenaren eskumenari, legezkotasunari, bideragarritasunari eta kostuari buruzko atala sartuz, lehen esandako parametroak kontuan hartuta.
Horrela txartel bakarra ezartzeak zer kostu ekarriko lukeen jakiteko informazio guztia izan genezake. Herritarrekin eta mugimendu sozial eta sindikalekin garden jokatzea litzateke. Eta, gainera, txartel bakarra martxan jartzeko erabakiak hartzean lehentasunak non dauden jakiteko funtsezko tresna ere izango lukete erakundeek.
Bestela ere, oraintsu aurkeztu den Garraio Publikoaren 2017ko Txosteneko datuek argi uzten dute Txartel Bakarra ezinbestekoa dela Bizkaiko garraio publikoa hobetzeko:
• Datu egonkorrak, igoera nabarmenik gabe azken bost urteotan: 165 eta 170 milioi bidaia arteko datuak daude, igoera barik 2012tik. 5 urtean milioi bat erabiltzaile soilik gehitu dira (168.988.000tik 169.809.000ra). Eta 3. lineak soilik 3.000.000 gehitu ditu. Beraz, bidaiariak garraio publiko batetik bestera aldatzen dira baina ez da errepideetatik autorik ateratzea lortzen.
• Bidaiak vs. diru-bilketa. Beste datu garrantzitsu bat da 2012-2017 artean bidaiak % 0,5 baino gehitu ez badira (821.000 bidaia), diru-bilketa % 7 hazi da (7.821.000 euro). Garraio publikoa erabiltzen dugunok gara garraio publikoaren sistema sostengatzen ari garenak tarifa-politika bidegabearen ondorioz.
• Eskualde batzuetan, berbarako, Txorierrin, egiaztatzen da 3. linea heldu eta maiztasunak hobetu direnean bidaien kopuruak ere gora egin duela, 2016an baino %16 gehiago izan direla, hain zuzen. Alabaina, diru-bilketa % 46 hazi da 2017ko tarifakadaren (tarifazoa), eskualdea zigortzen duen gune- banaketa berriaren ondorioz, ez baitzaio egin Kukullaga-Matiko zatiari doan eman zaion Metro Bilbaorekiko garraio-aldaketa. Hala ere, Txorierri eskualdea oso urrun geratzen da 2013an erregistratu ziren 1.663.000 mugimenduetatik, orain 1.210.000 badira. Hobekuntzak, gorabehera, ez dira L3 obren aurreko emaitzak berreskuratzen.
• FEVEren bidaia-kopuruen gainbehera etengabea, egun ez baita urtean milioi bat bidaia zenbatzera iristen. Datu adierazgarria da tarifak bateratu eta koordinazio-erakunde bakarra izatearen alde. Ezin dugu onartu gure trenbide-azpiegiturak “trenbide-zabor” bihurtzea desegin aurreko urrats modura.
Eta, horrela, datuak eman eta eman jarrai genezake, Bizkaian benetako TXARTEL BAKARRA jartzea premiazkoa dela berresten duten datuak, alegia.
BARIK txartela, bere garaian, urratsa izan zen Bizkaiko garraiobide publiko gehienetan erabil zitekeen euskarria izan baitzen. Urrats horren ostean, eta BARIK euskarri bera baliatuz, TXARTEL BAKARRAREN alde egiteko unea heldu da, gure iritziz.
TXARTEL BAKARRAK aukera emango luke herritarren mugikortasuna eraginkorragoa eta jasangarriagoa izatea bermatuko lukeen garraio-sistema publikoa ezartzeko. TXARTEL BAKARRAK ibilgailu pribatuaren baldintzetan sustatu eta garatuko litzatekeen garraio publikoa izaten lagunduko luke, Bizkaiko herritarren mugikortasun- beharrak asetzea eta ingurumena errespetatzea ziurtatuz.
Azken finean, TXARTEL BAKARRAREKIN homogeneotasun eta berdintasun handiagoak lortuko genituzke, eskualdeak hobeto orekatuz, batez ere garraio-maiztasun txikienekoak dituztenen mesedetan.
Ondo baloratzen dugu Haurreskoletako doakotasunerako lehen urratsa eman izana
Berandu heldu bada ere, LABek ondo baloratzen du Legebiltzarrak eskatutako Haurreskolak Partzuergoko doakotasunerako lehen urratsa eman izana. Haurreskoletako langile, hezitzaile eta familien urteetako borroka izan dena, Legebiltzarreko familia politikari buruzko eztabaida monografikoan onartu zen, alderdi guztien aldeko bozkarekin eta PPren abstenzioarekin onartu zen.
LABentzat, errenta baxuentzat haurreskolak doakoak izatea aurrerapausu handia ematea da, jaiotzatik aukera berdintasunean hezkuntza eskubidea bermatu ahal izateko.
Hala ere, ezin dugu ahaztu helburua Haurreskolak Partzuergo haur guztientzako doakotasuna lortzea dela.
LABentzat borroka ez da amaitu eta beti esan dugun moduan doakotasunaren giltza Legebiltzarrean eta gainontzeko eragileen arteko elkarlana medio etorriko da. Beraz, LABen borrokan jarraituko dugu Hezkuntza Sailekoa den Haurreskolak Partzuergoa denontzat doakoa eta 3 urte artekoa izan arte!