2026-01-26
Blog Page 708

“Herenegun” egitasmoa bertan behera uztea eskatu diogu Eusko Jaurlaritzari

admin
-
0
Eusko Jaurlaritzak “Herenegun” izeneko unitate didaktikoa aurkeztu du, Historiako irakasgaian 1960 eta 2018 urteen arteko epealdia jorratzeko.

Eskola Kontseiluari igorritako materiala aztertu ondoren, LAB sindikatuak egitasmo hori bertan behera uzteko eskatu du, honako arrazoi hauetan oinarrituta:

1. Unitate didaktikoa faltsukeria batean oinarritzen da. Izan ere, 1960 eta 2018 urte bitarteko epealdi historikoa aztertzea omen da bere helburua, baina ez da horrelakorik egiten. Epealdi horretako gertakari asko eta asko gainetik bakarrik aipatzen dira: bigarren industrializazioa, langile mugimenduaren olatu berria, euskara batua, Ez Dok Amairu eta abar luze bat. Unitate didaktikoak ETAren jardun armatuan sakontzen du eta, bigarren maila batean, talde parapolizialen eta estatuaren bortizkeriaren kontakizun motzegia egiten du. Azken batean, epealdi historiko bat landu baino, benetan LOMCEk ezarritako helburu bati erantzuten dio unitate didaktikoak, alegia, “terrorismoaren deslegitimazioa” egiteari. Ez da beraz Euskal Herritik egindako gogoeta etiko eta historiko baten ondorio, baizik eta PP-ren Gobernu batek ezarritako katezismo berria egokitzeko ariketa.

2. Jendartearen ordezkariak ez dira (ez gara) gai izan, gaur gaurkoz, Euskal Herriak bizi izan duen gatazka armatuaren inguruko errelato desberdinak barne bilduko duen orume komun bat eratzeko. Esango genuke, gainera, euren burua gatazkaren “garaile” irudikatzen duten horiek direla zubiak eraikitzeko inolako ahaleginik egin ez dutenak. Eta gabezi sakon hori bere horretan dagoela ikasgeletara errelato jakin bat (“garaile”ena, hain zuzen ere) eramatea arduragabekeria galanta da.

3. 1960 eta 2018 urte bitarteko epealdiaz hitz egiten da itxitako garai historiko bat balitz bezala. Zalantzazkoa da horren gertu dagoen epealdi baten inguruko historia egin eta irakastearen kontzeptua bera, ez baitago horretarako nahikoa perspektiba historikorik. Baina gainera, garai historiko hori ez dago itxita, gatazkaren ondorioak ez baitaude konponduta ez eta konponbidean: ehunka preso sakabanatuta daude, salbuespenezko legedi baten pean; Espainiako Gobernuak ez du eragindako minaren inguruko gogoetarik egin; torturatuak eta Estatuak hildakoak bigarren mailako biktimatzat dira hartuak. Ikastetxeetako bisitetan Estatuaren biktimetako batzuk parte hartzeak ez du arazoa konpontzen. Zer sentituko du motxiladun ume batek, klasean gatazkari buruz itxitako garai historiko bat bailitzan hitz egiten badiote? Zer, torturatu baten edota biktimatzat aitortu gabeko baten seme-alabak?

Unitate didaktikoak ikuspegi etiko batean omen du oinarri, baina ikasgeletan egoera erabat bidegabeak sor ditzake.

Honekin guztiarekin ez dugu esan nahi hezkuntza esparruan gatazkari dagokionez urratsak eman behar ez direnik. Aitzitik, hezkuntza komunitateak ekarpena egin dezake memoriaren eta elkarbizitzaren norabidean, esparru politikoan egon litezkeen urratsen zain egon gabe.

Baina horretarako hezkuntza komunitatearen baitako lanketa zabal eta sakona beharko litzateke. Azken batean, hezkuntza komunitatean oro har, eta zehazki hezitzaileen artean, gatazkari dagokionez jarrera desberdinak izan dituzten eta bizipen/errelato desberdinak dituzten pertsonak daude. Horien guztien arteko elkarrizketa bat jarri beharko luke martxan Hezkuntza Sailak, elkarren arteko zubiak eraiki eta ariketa zintzo bat egiteko. Prozesu horren ondorio gisa jaiotako hezkuntza materialak (aipatutako arrazoiengatik Historia irakasgaiaren mugak gaindituko lituzkeenak) bai izango lukeela balio hezitzailea.

Horren ordez, Eusko Jaurlaritzak aditu talde bat bildu eta material itxia aurkeztu dio Eskola Kontseiluari, ekarpenak egiteko hiru asteko epe murritza emanez. Horrela ez dira egiten gauzak eta gutxiago euskal jendartearentzat hainbeste min eta zatiketa eragin duen auzian.
 

 

 

Sindicato Andaluz de Trabajadoreseko bozeramaile Oscar Reinaren kontrako jazarpena etetea exijitzen dugu

admin
-
0
Sindicato Andaluz de Trabajadoreseko bozeramaile Oscar Reinaren kontrako jazarpena etetea exijitzen dugu

Gaur eguerdian, Espainiako poliziak Sindicato Andaluz de Trabajadores-eko (SAT) bozeramaile nazionala den Oscar Reina atxilotu du Granadan. Leporatzen dioten delitua koroaren kontrako irainena da.

LAB sindikatutik, gure elkartasuna adierazteaz gain, Oscar Reinaren senide, lagun eta SATeko kide guztiei besarkada handi bat bidaltzen diegu. Aldi berean, bere adierazpen askatasuna gauzatzeagatik jasaten ari den jazarpen egoera gogor salatzen dugu.

Gogoratu behar da ez dela Oscar Reinaren kontra zabalik dagoen kausa bakarra, eta horiengatik behin baino gehiagotan atxilotua izan dela. Ez genuke ahaztu behar da SAT dela Europa osoan gogorren jazarritako eta isun gehien dituen sindikatuetakoa, Andaluziako langile klaseak pairatzen duen egoeraren kontra ekintza zuzenean oinarrituriko ekintza sindikala aurrera eramateagatik.

Gaur txio batzuk idazteagatik Oscar Reina atxilotua izan da. Altsasuko gazteek muntai polizial bat dela medio bi urte baino gehiago daramatzate kartzelan, aurretik txio batetan euskal preso politikoek pairatzen duten sakabaneta salatzeagatik Alfredo Ramirezek urte bat pasa zuen kartzelan. Gainera, Kataluniako preso politikoek 25 urtetako kartzel zigor eskariari aurre egin beharko diote jendeak bozkatu ahal izateko erreferendum bat antolatze hutsagatik, eta bitartean, Espainiako gobernuak euskal preso politikoen eskubideen alorrean inolako pausurik eman gabe jarraitzen du. Honek guztiak, zuzenbide estatu bat bizitzetik urrun gaudela erakusten du.

Aipatutako guztiagatik, LAB sindikatutik Oscar Reinaren berehalako askatasuna exijitzeaz gain, bere kontra eta orokorrean SAT guztiaren kontrako jazarpen polizial eta judiziala behin-betiko eten dadila exijitzen dugu.
 

 

 

Gipuzkoako helduen egoitzetan greba egingo dugu azaroaren 26an eta abenduaren 24 eta 31n

admin
-
0
Gipuzkoako helduen egoitzetan greba egingo dugu azaroaren 26an eta abenduaren 24 eta 31n

Auto karabana bat egin dugu gaur Deba Garaian, eta elkarretaratze bat Bergaran, hitzarmenaren alde. Patronalen eta Gipuzkoako Foru Aldundiaren jarrera ikusita, azken hau sektore honen arduradun nagusia izanik, LABek mobilizazioekin jarraituko du.

Gipuzkoako helduen egoitzetako probintzia hitzarmena negoziatzen ari diren mahaikideak elkartu ziren azaroaren 9an; LAB bilerara joan zen, patronalak egiazko negoziazioari ekiteko gogoz egongo zirelakoan. Baina errealitatea bestelakoa da; ADEGI, MATIA 2020, LARES eta ACGG patronalak berriro utzieraz aritu dira sektore honetako kudeatzaileak izanik, sektore honetako langileen laneko eta gizarte mailako baldintza duinik jaso litekeen proposamen berririk ekarri ez dutelako, eta horrez gain, gainera, 2017 eta 2018. urteak ez dituzte kontuan hartzen.

Jakina, LAB sindikatua ez dago gertu aipatu egoera onartzeko.
Gainera, sektore honetako sindikatu nagusia deitu dugu azaroak 20 izango dituenean, sektoreko mahaiak egingo duen bileran parte har dezan, azken bileran ez zelako agertu, hura egitea oztopatu zuten.

Patronalek eta Gipuzkoako Aldundiak agertu jarreraren harira, azken hau sektore honen arduradun nagusia izanik, eta oraindik ezikusiarena egiten duenez, LAB sindikatuak erabaki du eutsiko diola mobilizazioen egutegiari; iraungo dugu borrokan, ondoren adierazi aldarrikapenak lortzearren:

• Soldatak areagotu soldata-tauletan eta egiazko soldatetan.
• Kontratazioa zuzenean, ez-mugatua eta aldi osoz egin dadin.
• Lanerako bitariko batzordea sor dadin, ratioei buruzko neurriak har daitezen.
• Prestakuntza kontuan hartuko den puntu garrantzitsua izan dadin.
• 20 minutuko atsedenaldi ordaindua.
• 3 urteko indarraldia.
• Norberaren zereginak.

Honengatik, grebara deitzen dugu azaroaren 26rako eta abenduaren 24 eta 31erako, gure eskubideak aldarrikatzen irauteko, borroka eta mobilizazioa bide bakarra dugulako langileok.

Hauxe da hurengo asteetarako aurreikuistako mobilizazioen egutegia:

-Azaroak 22. 17:00etan prestaketa lanak Groseko egoitzan. 19:00tan informazio banaketa Groseko pintxo potean. 

-Azaroak 26. GREBA HELDUEN EGOITZETAN. 

-Abenduak 5. 9:30ean kotxe-karabana Hernanialdean (irteera LIDL aparkalekua, Galarreta). 

-Abenduak 13. 10:30ean informazio banaketa Zumarragako merkatuan. 12:00etan kontzentrazioa. 

Abenduak 21. 11:00etan informazio banaketa Azpeitiko plazan. 11:00etan informazio banaketa Donostiako Bulebarrean. 

-Abenduak 24. GREBA HELDUEN EGOITZETAN. 

-Abenduak 31. GREBA HELDUEN EGOITZETAN.

 

 

 

Beste lau greba egun egingo ditugu Gizarte Ekimeneko ikastetxeetan

admin
-
0
Beste lau greba egun egingo ditugu Gizarte Ekimeneko ikastetxeetan

EAEko Gizarte Ekimeneko ikastetxeetan ordezkaritza dugun sindikatu guztiok hurrengo azaroaren 27, 28, 29 eta 30ean egingo ditugun greben erregistroa egin dugu gaur Bilbon. Hitzarmen berri baten alde egingo ditugu mobilizazioak, azken hilabeteetan egindako protesten eta greba egunen harira.

 

 

 

Txartel Bakarraren aldeko foroak eskuduntza, legezkotasuna, bideragarritasuna eta kostua aztertzeko txostena egiteko proposamen bat aurkeztu du Bizkaiko Batzar Nagusietan

admin
-
0
Txartel Bakarraren aldeko foroak eskuduntza, legezkotasuna, bideragarritasuna eta kostua aztertzeko txostena egiteko proposamen bat aurkeztu du Bizkaiko Batzar Nagusietan

Txartel Bakarraren aldeko Foroak bilera egin du Batzar Nagusietan ordezkatuta dauden talde politiko guztiekin eta ARAUZ BESTEKO PROPOSAMENA aurkeztu eta babesteko eskatu die Bizkairako Txartel Bakarraren eskuduntza, legezkotasuna, bideragarritasuna eta kostua aztertzeko txostena egin eta OSOKO BILKURAN azter daitezen.

Txosten horretan gutxienez parametro hauek aztertu beharko lirateke:

• Garraio-aldaketak doan garraio-modu guztietan.
• Tarifa-integrazioa. Tarifa berberak garraio-operatzaile guztientzat.
• Progresibo izatea. Zenbat eta gehiago erabili hainbat eta merkeago ibili.
• Txartelaren prezioa pertsona/familia-errentara egokitzea.
• Bizkaiko garraiobide publiko guztietan erabiltzea.
• Oraingo garraio publikoko sareari eusten edo hobetzen oinarritzea.

Proposamena gaur osteguna, azaroak 15, aurkeztu da Batzar Nagusietan, eta TXARTEL BAKARRAren aldeko Foroak espero du alderdi politiko guztiek, aho batez, proposamena babestu eta Bizkaiko Foru Aldundiari eskatzea txosten hori lehenbailehen egin dezaten.

Txosten tekniko horrek aukera emango liguke denoi txartel bakarra ezartzeak zer kostu ekarriko lukeen jakiteko informazio guztia izateko. Era berean, herritarrekin eta mugimendu sozial eta sindikalekin garden jokatuko litzateke eta, gainera, txartel bakarra martxan jartzeko erabakiak hartzean lehentasunak non dauden jakiteko funtsezko tresna ere izango lukete erakundeek.

TXARTEL BAKARRAren aldeko Foroaren iritziz, hitzetatik ekintzetara igarotzeko garaia da. Horregatik, erakunde-esparru osoari eskatzen dio ekimen hau sustatu eta urrats sendoak egiteko Txartel Bakarra ezartzeko. Bizkairako garraio publikoko sistema bateratu eta kalitatezkoa lortzeko elkarlanean jarduteko prest dagoela ere azpimarratzen du.
 

 

 

Gipuzkoako Aldundiaren hitzak errealitatetik urrun daudela salatu dugu, Egogain egoitzaren egoera adibide

admin
-
0
Gipuzkoako Foru Aldundiko LABek salatu du aldundiak pribatizazio eta prekarietateranzko norabidea hartu duela, lan baldintzak kaltetuz eta instituzionalizaturik dauden pertsonarik zaurgarrienek merezi duten arretaren kalitatea erasatuz.

Hauxe da Gipuzkoako Foru Aldundiko LABen oharra:

EAJ-k agintzen duen Gipuzkoako Foru Aldundiak kanpora begira eman nahi duen irudia honako hau da: modernoa, garai berrietara egokitua, lurralde aurreratua, berdintasunarekin inplikatua, kontziliazioaren aldekoa, pertsona helburu,… bla, bla, bla. Bide horretan badu zer eginik ordea! Errealitatea deskribatzetik oso urrun dauden hitzak baitira. GFAk kudeatzen duen Egogaineko nagusien egoitza da honen adibide.

Egogain, Eibarren kokatzen den egoitza da, bertan pertsona nagusi, mendekotasun handia, adimen urritasuna eta gaixotasun mentalak dituzten pertsonak artatzen ditugu, guk, zaindu eta maitatu egiten ditugu, gehienek hemen egingo baitituzte beraien bizitzako azken urteak, behar duten bizi duina eta merezi duten kalitatezko arreta izan dezaten lanean dihardugu.

Aldundiaren azken urteetako jarrerarekin (Elena Basagoitik egindako adierazpenak horren adibide), aldundiak pribatizazio eta prekarietateranzko norabidea hartu du, zeinek eta bertan lan egiten dugunon lan baldintzak kaltetuz, instituzionalizaturik dauden pertsonarik zaurgarrienek merezi duten arretaren kalitatea erasaten duen.

Honen adibide dira; langileriaren etengabeko aldaketak, ratio desegokiak, lanpostuen desagerpenak, amortizazioak, CLECE azpikontratetako gaueko lankideei egiten zaien jazarpena (etengabe zigorrak ezarriz e.a.) eta baldintza prekarioak edo instalazio zaharkituak (GUREAK enpresako langileek ikustegian jasan dituzten tenperatura altuengatik berriki salatu dugun egoera) besteak beste.

Testuinguru honetan, berriki irekiko den Unitate psikogeriatrikoan (8. solairuan) gauden langile kopuru berdinarekin irekitzeko asmoa agertu dute, Langileoi inongo informaziorik eman gabe eta beldurrezko mezuak zabalduz.

Berdintasunari dagokionez, Egogaineko langileriaren kolektiboa osatzen dugun gehiengoa emakumezkoa izanik, Aldundiak arlo honetan zabalduriko mezuak propaganda hutsa direla iruditzen zaigu: batetik aldundiak berdintasunaren aldeko apustua egiten ari dela saltzen dio gizarteari; komunikabideetatik alegia, baina bestetik, aldundiko langile garen eta Egogainen lan egiten dugun emakumeok egoera guzti honen jomugan jartzen gaitu. Berdintasunaren mesedetan hedabideetan zabaldutako hitz horiek guztiak gezur hutsa besterik ez direla deritzogu. Kalean uso, etxean otso!

Honen adibide garbia da haurren zaintzagatik lanaldi murrizketa metatuak ukatu izana. Eta, era berean, gure kategoria profesionala “Erizain Laguntzaile” izatetik “Zaintzaile” izendapena izatera aldatzea.

Hau da, gure lana gutxietsi eta desprofesionalizatu egin du Aldundiak. Erizain Laguntzailearen funtzioak bete eta “Zaintzaile” izendapena jarriz. Gipuzkoako Foru Aldundiak ez bezala, Bizkaiko eta Arabako Aldundiek, “Erizain Laguntzaile” kategoria aitortzen die langileei guk egiten dugun lan berdina egiteagatik. Aldundia egoera honen jakitun aspaldi, baina eskaera historikoa den honi muzin egiten dio. Dagokigun izendapenaren onartzeak, egindako lanaren aitortza eta etorkizunerako garapen profesionalaren bermatzea ekarriko liguke. Kalitatezko zerbitzuaren mesederako.

Aurreko paragrafoan aipatutako honek, “Kabia”-ri ematen ari zaion ereduak eta gure etorkizun profesionalarekiko ezjakintasunak, garrantzia handia du Aldundiko langile izandako oso profesionalak diren lankideen joatea eragin duelako eta Egogain, azpikontraten negozio eta paradisu bilakatzea ahalbidetzen duelako.

EAJk gizarteari eslogan eta irudi politekin saltzen digun ereduaren atzean, “pertsona helburu” duen horretan, zaurgarritasun egoeran egon gaitezkeen edonori prekarietaterantz garamatza. LABen iritziz aurreko gai hauei irtenbidea eman behar zaie, zerbitzu publikoak garatuz, langileon baldintzak hobetuz eta pertsona zaurgarrienen kalitatezko arreta integrala bermatzeko. Guztiok zerbitzu hauen erabiltzaile izan gaitezke eta. Horregatik, LABetik gizarte eragile, langileria eta erabiltzaile diren senideei hastear dauden ekimenetan inplikatzea eskatzen dizugu.

Orain pertsonak, orain Egogain!

 

 

 

“Euskal oasian” ere badago ustelkeria

admin
-
0
Hau ez da berria, Euskal Herrian ere beti egon da ustelkeria, erakunde ezberdinetan eta aukera politiko batzuen aldetik. De Miguel kasuan argi ikusten ari gara zigorraren inguruko akordioa adostua izango dela.

Kasuan zerikusia izan duten guztiek beraien ardurak ordaindu behar dituzte, eta lapurtu dutena bueltatu egin behar dute. Berdin gertatzen da dagoeneko epaituak dauden beste kasu batzuekin, Gipuzkoan Bravo, Kutxabankeko Cabiecesena, zein Euskal Herriko beste hainbat Udaletako ustelkeria kasuetan. Argi dago Euskal Herria ez dela salbuespena, eta Estatuan bezala, berton ere ustelkeria kasu gehiegi daukagula. Gure ustez, premiazkoa da hauetako ardurak argitzea, baita hauen atzean iskutatzen diren ardura politikoak ere. Beste behin, ardurak mugatu nahi dira. Atzo Fiskaltzaren eskaerak ezagutu genituen, zigor eskaerak erdira jaitsi dituzte, eta prozesuan zehar, Estatuak are gehiago murriztera joko du, ardurak izkutatuz eta lapurtutakoa itzultzera behartu gabe.

Ez dira PPren eskutik ematen diren Estatuko kasuak bakarrik. Euskal erakundeetan ere hainbat iruzur eta ustelkeria kasu badagoela ari gara ikusten, ikusten gaude bertoko politikarien eskutik egoera hau baliatuz. LAB kasu hauetariko batzutan Herri Akusazio modura aurkeztu da epaitegietan, gure nahia kasu guzti hauek argitzea eta ardurak ordaintzea delako, euskal herritarroi lapurtu diguten azken zentimoa ere bueltatuz.

Zoritxarrez, sarri askotan entzun diegu politikariei “tolerantzia zero ustelekin” baina geroko jarrera bestelakoa da, beste alde batera begiratu dute, eta beste kasu batzuetan, akusatuei aurpegia atera edo justifikatu egin dituzte. De Miguel kasuan nabarmenak dira horrelako praktikak. Horrelako kasuetan murgildurik dauden politikariek errudun gutxi batzuk jarri dituzte aurrean, eta beste asko, atzeko atetik atera dira, denok dakigunean ustelkeria bera erakundetan txertaturik dagoela.

Ezin ditugu ahaztu ustelkeriak zuzenean herritarrongan dauzkan ondorioak, beharrizan sozialetara bideratu beharko ziren baliabide ekonomikoek politikari jakin batzuen kontu korronteetan bukatzen baitute. Ordua da, lapurtu diguten azken zentimoa ere bueltatu diezaguten.

De Miguel kasua ez da isolatua, ezagutzen ari garenetatik beste bat da, eta arduradun zehatzak ditu. Erakundeak beraienak balira bezala kudeatzen dituzten horiek dira egoera hauen arduradunak, herriaren baliabide ekonomikoak eta erakundeak Batzokiak balira bezala kudeatu dituztenak.

Esandako guztiagatik eta sarri salatu dugun bezala, LABetik, ardurak argitzeko eman beharreko pausu guztiak ematea exijitzen dugu, bai arlo penalean, zein politikoan; lapurturiko guztia bueltatu dadila eta administrazio eredua goitik-behera aldatu dadila. Hau da iruzur hauei bukaera jartzeko modu bakarra.
 

 

 

“Ekintza sindikalari esker, gauza asko aldatzea lortu dugu”

admin
-
0
“Ekintza sindikalari esker, gauza asko aldatzea lortu dugu”

2017ko irailean, nekazaritza elikagaien sektoreko Huerta de Peralta enpresan hauteskunde sindikalak egin zituzten estreinakoz. LABek sei delegatu lortu zituen; CCOOk, bi; eta UGTk, bat. Emaitza horiek ilusio handia sortu zuten sindikatuarengan enpresa kokatua dagoen tokiagatik, Huerta de Peraltako langile gehienak migratzaileak direlako eta esplotazio egoera larrian daudelako.

“Hauteskundeen aurretik egoera oso txarra zen”, kontatu du Huerta de Peraltako LABeko delegatu Mustafa Ourhok. “Baina, LABen ekintza sindikalari esker, eta demanda asko aurkeztuta, gauza asko aldatzea lortu dugu. Lehen, langile gehienok aldi baterako kontratuak genituen; %10ak bakarrik zuen aldizkako kontratu finkoa. Lehen, lan egindako ordu bakoitzeko ordaintzen ziguten, baina ez genituen oporrak kobratzen, ezta jaiegunak ere. Orain asko nabaritu da LABen esku-hartzea. Gehienoi kontratu finkoa egin digute”, azaldu du.

Antolakuntzak eta borrokak emaitzak ekarri dituztela begibistakoa da. “Nomina bidez kobratzen dugu, eta jaiegunak ordaintzen dizkigute. Orain, egunean 7 ordu egiten ditugu lan, eta ez 11, 12, 13 edo 14, lehen bezala. Asko nabaritu da”, erantsi du Ourhok.

Greba arrakastatsua
Langileek LABen aurkitu duten babesaren isla egunotan ikusi ahal izan da, enpresaren dinamika errepresiboa salatzeko egindako mobilizazioen harira. Hain justu, nekazaritza enpresako langileek grebara deitu zuten joan den azaroaren 12rako, eta deialdia arrakastatsua izan zen oso, barazkiak landatzen eta biltzen lan egiten duten langile guztiek eta, oro har, langileen %80ek babesa eskaini baitzioten grebari. Lanuzteak enpresan egondako kaleratzeak salatzeko egin zituzten, enpresa komiteko presidente El Houssine Yagoubik azaldutakoaren arabera: "Azken bost hilabeteetan zortzi langile kaleratu dituzte; delegatu bat, tartean. Langileen eskubideak defendatzeko gaude".

Hain zuzen ere, antolakuntza da bidea langileen eskubideak eta beharrak defendatzeko, Huerta de Peralta enpresako langileen borroka adibide.

 

 

 

Santi Brouard eta Josu Muguruza gogoan izango ditugu azaroaren 20an, urtero legez

admin
-
0
Santi Brouard eta Josu Muguruza gogoan izango ditugu azaroaren 20an, urtero legez

Azaroaren 20an, eta urtero moduan, gogora ekarriko dugu Bilbon duela 34 eta 29 urte, hurrenez-hurren, erahildako Santi Brouard y Josu Muguruza politikari abertzaleak. Hain zuzen ere, Sortuk egun horretarako deitutako manifestazioan izango gara, ekitaldiaren aurkezpenean gaur egon garen moduan. "Etorkizun haziak" leloarekin, azaroaren 20ko manifestazioa 19:30ean abiatuko da Bilboko Arriaga Plazatik.

Arkaitz Rodriguez Sortuko idazkari nagusiak eta Nerea Guijarrubia Kontseilu Nazionaleko kideak honako hau adierazi dute, azaroaren 20an Santi Brouard eta Josu Muguruzaren oroimenez egingo den manifestazioaren aurkezpenean:

Estatu-terrorismoak hil zuen Santi Brouard 1984ko azaroaren 20an.

Estatu-terrorismoak hil zuen Josu Muguruza egun berean, baina bost urte geroago: 1989ko azaroaren 20an.

PSOE gobernuan zela hil zituzten ezker abertzaleko kide esanguratsu biak, helburu garbi batekin: herri honen aspirazio askatzaileak zapuztea, bai nazionalak bai sozialak. Jakin bazekiten ezker abertzalearen eskaintza politikoak eraldaketa ekar zezakeela. Horregatik hil zituzten. Min egin ziguten, min handia, beste askotan bezala. Hiru hamarkada geroago, baina, hemen gaude, zutik eta indartsu, askapen nazionala eta soziala eskuratzeko prest, Santik eta Josuk beste militante askorekin batera ereindako haziari esker.

Hiru hamarkada pasa dira. PSOE berriz dago gobernuan.

Hiru hamarkada pasa dira. Hilketa horien ardurek argitu gabe jarraitzen dute.

PSOEri eskatu nahi diogu bere ardura onar dezan, eragindako minaren aitortza egin dezan, behingoz gatazkan izan duen ardura onar dezan, ezker abertzaleak aspaldi egin zuen moduan. Ez dugu mendeku goserik, baina egia eta justizia behar ditugu, herri honetan bakea eta bizikidetza eraikitzeko ezinbestekoa baita denok aurrera pausoak ematea. Denok.

Asko dago jokoan. Pedro Sanchezen Gobernuak aukera paregabea du orain gatazkari erabateko amaiera emateko, gatazka eragin zuten kausei erreparatuz –herri honen gehiengoak erabakitakoa modu demokratikoan onartu behar da horretarako– eta ondorioak konponduz –presoak, iheslariak, ergindako minaren aitortza…–.

Urtero bezala, hilaren 20an, manifestazioa egingo dugu. Santi eta Josu gogora ekartzeko eta PSOEri bere ardura onar dezan eskatzeko irtengo gara kalera. Etorkizun haziak goiburupean 19:30ean abiatuko gara Arriaga Plazatik
 

 

 
1...707708709...1,586Page 708 of 1,586

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus