2026-04-23
Blog Page 667

Idatzi bat erregistratu dugu Iruñean, SAT sindikatuarekin batera, uzta biltzeko kontratatutako langileen eskubideak errespeta ditzatela eskatzeko

admin
-
0
Idatzi bat erregistratu dugu Iruñean, SAT sindikatuarekin batera, uzta biltzeko kontratatutako langileen eskubideak errespeta ditzatela eskatzeko

LAB eta Sindicato Andaluz de Trabajadoras y Trabajadores (SAT) sindikatuok, LABeko Nafarroako Zerbitzu Pribatuen federazioko arduradun Berta Garcia eta SATeko bozeramaile Oscar Reinaren eskutik, idatzi bat aurkeztu dugu Nafarroako Lan Departamentuan. Ekonomia Garapenaren Kontseilaria den Manuel Ayerdiri eta Landa Garapena, Ingurumena eta Toki Administrazioaren Kontseilaria den Isabel Elizalderi zuzendutako testuan, langileen eskubideak berma ditzatela eskatzen dugu, sasoiko uzta biltzeari ekin dioten honetan.

Hauxe da erregistratu dugun idatzia:

Ekonomia Garapenaren Kontseilaria den Ayerdi jaunari,
Landa Garapena, Ingurumena eta Toki Administrazioaren Kontseilaria den Elizalde andreari.

Gutun honen bidez, LAB sindikatuak, zeina nekazaritzako elikagaien Hitzarmenaren Mahaian ordezkatua dagoen, eta SAT sindikatuak, zeinak sasoiko uzta biltzeko kontratatzen diren langile andaluziar asko ordezkatzen duen, eskatzen dizuegu esku-har dezazuela langileen eskubideak gorde daitezen.

Aipatu langileak, batzuk sortzez Nafarrak izaki, eta bertze batzuk hainbat lekukoak izanagatik, adibidez Andaluziakoak, babesgabetasun handiz dihardutenez, gure ustez, Espainiako gobernuaren menpe dagoen Lan Ikuskaritzak, nahiz Nafarroako Gobernuak elkarrekin aritu behar dute segurtatzeko nekazaritza eta abeltzaintza Hitzarmena betetzen dela, eta horrela, prekaritatea eta esplotazio jarduera oro deusezta dadin.

Zehaztearren, Nafarroako Gobernuari eskatzen diogu gisa honetako egintzak bete ditzala:

• Sasoiko pertsonak kontratatzen dituzten ekoizle guztiei jakinaraziko zaie ofizioz haien betebeharrez, eta adieraziko zaizkie bermatu behar dituzten arauak eta baldintzak.
• Landako langileei, haien laneko eskubideei buruz, zuzenduriko jakinarazpen kanpaia egin dadila.
• Nafarroako landan ematen diren baldintzei buruzko galderak, kexuak eta salaketak jasotzeko bide eraginkorrei ekin, sindikatuekin koordinatuz. Urtero eginen den txosten batean jasoko dira kexuak; eta Lan Ikuskaritzari jakinaraziko zaizkio ilegaltasunak antzemanen diren kasuak.
• Nafarroako landa esparruan ematen diren jardute egokiak nabarmendu behar dira.
• Laneko jardute egokiak “Reyno Gourmet” markaren eta nekazaritzako elikagaien esparruan
dauden kalitateko marketan aldagarri berritzat kontuan har daitezela.
• Sasoiko langileen premiak aztertu behar dira, lan esparruaz gain (ostatua, garraioa, eskolatzea, osasungintza), jaso ohi dituzten zerbitzuak hobetzeko egitasmo bat erdiesteko aurreko urrats gisa.
• Aipatu esparruetan, Nafarroan eskuragarri dauden baliabideei buruzko informazioa (ostatua, garraioa, eskolatzea, osasungintza) banatuko da sasoiko langileen artean.

Horretaz guztiaz mintzatzeko agertzen gara.
 

 

 

Lantokietan ere ikusgarriak garela aldarrikatu dugu, Ikusgarritasun Lesbikoaren Nazioarteko Egunaren bezperan

admin
-
0
Lantokietan ere ikusgarriak garela aldarrikatu dugu, Ikusgarritasun Lesbikoaren Nazioarteko Egunaren bezperan

Apirilaren 26a Ikusgarritasun Lesbikoaren Nazioarteko Eguna da. LGTB+ eragileek, bere mobilizazio agendan jaso dute egun hau lesbianek jendartean betetzen duten papera aldarrikatzeko. Jendartean, erreferentzia positiboak sortu nahi dira, diskriminazioarekin bukatzeko. Egun honetan, eskubide berdintasuna eta diskriminazioarekin bukatzea aldarrikatzen dira.

Emakume* langile eta lesbianok lantokietan ere, geure existentzia aldarrikatu behar dugu patronal, lankide bezero, erabiltzaileen eta ikasleen aurrean. Jendarte heteropatriarkalaren aurrean zaila bada, horren gatazkatsua, indarkeriaz betea eta arrotza den lan munduan, orduan eta zailagoa.

Merkatuaren logikan, lesbianok ez gara existitzen. Emakumeok* beraien senar edo bikote gizonen soldatak osatzeko egiten dugu lan, ez da planteatzen bi emakumek edo emakume bakar batek bere bizi proiektua izatea.

Kapitalak, gayekin ez bezala, ez du gugan errentagarritasun ekonomikorik aurkitu, horregatik mantentzen gaitu izkutuan eta eskubide gutxiagorekin. Beldurrez bizi gara beraz, gure eskubideak arlo guztietan erasotuak daudenez, gure aukera ez dugu erakusten.

Izkutatzera derrigortuak gara, nahi edo nahi ez, eta horrek, ondorio zuzenak dauzka: ez gara existitzen, eta beraz, ez da gure erreferentzia positiborik sortzen, eta beraz, ez da normalizatu eta naturalizatzen, eta existitzen ez bagara, dagoen gure aurkako gorrotoa ere ez da ikusten eta beraz ez da gorroto horrekin amaitzen. Baina gorrotoa, eskubide falta eta diskriminazioa egunero pairatzen ditugu.

Egoera honen aurrean, LABek apirilaren 26a bere agendan sartu nahi du eta bat egiten du LGTB+ mugimenduarekin. Emakume*, langile, lesbiana eta feministok aldaketa sozialaren kide aktibo izan behar dugu. Langile guztiok klase borrokan indar egin behar dugu sexu aniztasuna aldarrikatzeko.
 

 

 

Txus Martin eta gaixo dauden beste presoak etxeratzeko exijitu dugu Gasteizen, Jaurlaritzaren aurrean

admin
-
0
Txus Martin eta gaixo dauden beste presoak etxeratzeko exijitu dugu Gasteizen, Jaurlaritzaren aurrean

LAB Osakidetzako delegatuek eta kideek Eusko Jaurlaritzaren aurrean elkarretaratzea egin dute, Gasteizen,Txus Martin euskal preso politikoaren egoera larria salatzeko. Hain zuzen ere, Txus Martinek bihotzeko ebakuntza larri bat zuen gaur.

Txus Martin euskal preso politikoarekiko elkartasunean bildu gara gaur, Eusko Jaurlaritzaren aurrean, Gasteizen. Preso honek gaixotasun larriak dauzka, bai fisikoak, bai psikologikoak, espetxe politika honek eraginda. Isolamenduak, urrunketak, dispertsioak…presoak gaixotzen ditu heriotzera eraman arte.

Espetxe politika honek heriotza zigorra ezartzen die euskal preso politikoei.Txus Martin presoaren bihotzeko ebakuntza oso larria baldin bada, medikuen arabera postoperatorioa oraindik eta larriagoa izan daiteke. Beraz, etxean behar du egon bizirik eta onik jarrai dezan.

Gaur 21 gurutze ekarri ditugu elkarretaratzera, heriotza zigorra ezarri zaielako 21 euskal presori. Gaur, berriz ere, beraien eskubideen alde borrokan jarraituko dugunaren konpromisoa berretsi nahi dugu. Etxean eta bizirik nahi ditugu.

LAB Osakidetzatik, Nekane Murga kontseilari berriari, Osakidetzako buruari, argi utzi nahi diogu 21 euskal biztanle hauek ere bere ardura direla. Gaixo dauden 21 euskal presoak euskal herritarrak dira, eta Euskal Herrian ez badaude, espetxe politikak, dispertsioa politika krudel honek, herritik ehundaka kilometrora urrunduta dituelako da. Baina Osakidetzako erabiltzaileak dira. Eta Osakidetzako erabiltzaile diren heinean, beraien eskubideak bermatu behar ditugu. Osasuna eskubide unibertzala da. Pertsona orori dagokiona, baita preso daudenei ere.

Beraz, Nekane Murgarekin hitzordua eskatu dugu, batetik momentu honetan Txus Martinen egoeraren larritasuna jakinarazteko, baita beste 20 presoen berri emateko ere, eta, bestetik, arazo honi konponbideak bilatzen saiatzeko.

Osakidetzan lan egiten dugunok badakigu gauzak ondo egin daitezkela, baina argi daukagu ere ardurak nork dituen.
Horregatik egin dugu elkarretaratzea, Eusko Jaurlaritzaren aurrean. Mendeku garaiak alde batera utzi eta goazen konponbide garaiak jorratzera. Mendeku garaiak utzi eta ekar dezagun Txus Martin etxera, baita gaixo dauden beste 20 presoak ere. LAB Osakidetzatik argi dugu horretan jarraituko dugula lanean, orain arte bezala.
 

 

 

Egiaztatu egin dugu Gipuzkoako obra handietan ez dutela eraikuntzako hitzarmena betetzen

admin
-
0
Egiaztatu egin dugu Gipuzkoako obra handietan ez dutela eraikuntzako hitzarmena betetzen

Hitzarmena urratzen ari dela antzeman ondoren, LAB sindikatuak Lan Ikuskaritzari eskatu dio azter dezala Gipuzkoako obra handietako lan-egoera. LAB sindikatuak, azken hilabetean, hitzarmenaren arabera ordaintzen ez delako hainbat salaketa jarri ditu, Zubietako errauskailuko obrei nahiz Abiadura Handiko Trenari dagokienez, UTE Zubieta eta UTE Aduna enpresa sustatzaileen aurka, hurrenez hurren.

Lehen adibidean, Zubietako errauskailuarenean, enpresak dagoeneko onartu eta ordaindu dizkio langileari zor zizkion kopuruak.

Gainera, Lan Ikuskaritzan salaketak aurkeztu ditu LABek Anoetako estadioan egiten ari diren obren harira, dorre-garabia gaizki kokatu dutelakoan, neurri handiko hiru dorre-garabi kokatu dituztelako 50 metro baino txikiagoa den erradio batean, perimetro horretan langile kopuru handiak diharduenean. Horrek arrisku handia eragiten die langileen integritateari eta segurtasunari.

Gertakari hauek agerian uzten dute eraikuntza sektorean prekarietatea eta segurtasun neurri eza ez direla kasu bakanak, behin eta berriz errepikatzen direnak baizik, obra publiko eta pribatu guztiei eragiten dietenak. Eraikuntzan masiboki kontratatzean errazten da lan legeria ez dela beteko, eta langileek haren ondorioak jasango dituztela. Obretan eta zerbitzuetan azpikontratazio pila lotzearen erabakia politikoa da, langileen kontura kostuak aurrezteko helburuarekin hartua.

Enpresei nahiz obra hauen menpe dauden euskal erakundeei (Eusko Jaurlaritza, Gipuzkoako Aldundia eta Donostiako udala) Gipuzkoako eraikuntza hitzarmena betetzen dela berma dezatela eta azpikontratazioari mugak jar diezazkiotela eskatzen die LABek.

Hiru erakundeetan agintzen ari den EAJri dagokionez, Gipuzkoako eraikuntza hitzarmena betetzen dela bermatzea eta azpikontratazioari mugak jartzea eskatzen dio LABek.
 

 

 

Portugalgo langile klaseari gure elkartasuna luzatzen diogu, Krabelinen Iraultzaren 45. urtemugan

admin
-
0
Portugalgo langile klaseari gure elkartasuna luzatzen diogu, Krabelinen Iraultzaren 45. urtemugan

Gaur, apirilak 25, Portugalgo Krabelinen Iraultzaren 45. urtemuga ospatzen da eta LAB sindikatutik Portugalgo CGTP IN sindikatuari eta Portugalgo herriari gure agurra bidali nahi diegu. Hain zuzen ere, Portugalgo langile klaseari gure elkartasuna eta gizarte justu bat eraikitzeko gure konpromisoa berresten ditugu.

Gaurkoa egun berezia da Portugalen, 1974ean Salazar diktadorea boteretik bota zuen Krabelinen Iraultzaren 45. urtemuga ospatzen delako. Iraultza honek, ordea, ez zuen diktadorea bakarrik bota nahi izan eta gizarte justuago bat eraikitze bidean urrunago joatea zuen helburu.

Horregatik, Portugalgo herriarentzat hain berezia den egun honetan gure internazionalismo politikotik, eta anaitasun nahiz adeitasun osoz, Krabelinen Iraultzak bilatzen zituen helburuen aldeko borrokak Euskal Herriko langile klasea eta LAB sindikatua aliatu eta bidelagun izango dituela adierazi nahi diegu.

Bai Portugaldarrek eta baita guk ere berdinen errepublika bat eraikitzea dugu helburu komun bezala. Zapalkuntzarik gabeko mundu bat dugu amets, eta, bide horretan, elkarlanean jarraitzeko konpromisoak indartsu jarraitzen du. 1974Ko apirilaren 25ean, Portugalgo herriak amets egiten zuena bilatzen jarraitzen dugu, konbentzituta gaudelako, Jose Saramagok zioen bezala, “aurkitzeari benetako zentzua bilaketak ematen dio… asko ibili behar da benetan hurbil dagoena aurkitu ahal izateko”. Gu ziur gaude, bai Euskal Herria eta bai Portugalgo herria amesten duguna lortzetik hurbil gaudela.

 

 

 

Amiantoaren ondorioz hildako bi lankide ohiren omenezko omenaldia eta lanuztea egingo dituzte CAF Beasainen, apirilaren 30ean

admin
-
0
Amiantoaren ondorioz hildako bi lankide ohiren omenezko omenaldia eta lanuztea egingo dituzte CAF Beasainen, apirilaren 30ean

10:00etatik 11:00etara, CAF Beasaingo Sarrera Nagusian amiantoaren biktimen omenez eginiko monumentuaren inguruan omenaldia eta elkarretaratzea burutuko dute.

Hauxe da enpresa batzordearen oharra:

Amiantoarekin lana egitearen ondorioz, CAFeko langile erretiratuak ziren bi lankideren I.S.E eta A.S.H.en heriotzaren aurrean, ondorengoa adierazi nahi dugu:

– APIRILAK 30 asteartea, 10.00etatik 11.00etara CAF Beasaingo Sarrera Nagusian amiantoaren biktimen omenez eginiko monumentuaren inguruan (amiantoarenean) omenaldia eta kontzentrazioa burutuko dugu.

– Beasaingo lantegian dagoeneko 37 langile dira , beraien lanpostuetan amiantoa arnastearen ondorioz hildakoak eta heriotza amiantoa lanpostuetan izatearen ondorioz eragin duenaren errekonozimendua lortutakoak.

– Gai honetan nahastuta dauden enpresen jarrera salatu nahi dugu, gaixo edo hildakoei, eta ondorioz baita familiartekoei ere, indemnizazio edo laguntzen errekarguak eskatzeko oztopoak jartzen bai dizkiete.

– Administrazioen jarrera itxia ere salatu nahi dugu. Biktimak laguntzeko bideak zaildu eta Europako beste hainbat herrialdetan funtzionatzen duten konpentsazio fondo baten sorrerari eragozpenak jarri bai dizkiete urtez urte. Bide hauek ireki eta garrantzia emango balie, biktimek ez lukete auzitegietara joan beharrik izango.

 

 

 

Gasteizko Lan Epaitegiak berretsi egin du Eusko Jaurlaritzak ez zuela bete Arabako eskuhartze sozialeko hitzarmen kolektiboa

admin
-
0
Eusko Jaurlaritzaren Lan eta Justizia Sailak, 2018. urtean argitaratu zuen bitartekaritza judizialeko zerbitzua lizitatzeko lehiaketa publikoa (gaur egun, justizia konpontzailearen zerbitzua izenez ezagutzen dena). Plegu horietan lan-arautegia eta Arabako eskuhartze sozialaren hitzarmen kolektiboa urratuz, ez zen jaso zerbitzua bete ohi zuten pertsonen subrogazioa.

Bizkaia, Araba eta Gipuzkoako eskuhartze sozialeko hitzarmen kolektiboetako batzorde parekideek, hitzarmenaren urraketa larri hau antzemanda, Sailari jakinarazi zion gertakaria, eta espresuki eskatu zuten, zerbitzua betetzen ari ziren langileak enpresa esleipendun berak subrogatu zitzan.

Martxoan, Lan eta Justizia Sailburua den Ma Jesus San José Lopez andreak, maniobra iheskor eta arduragabe batean, zerbitzua ez zela berdina zioen eta ondorioz, jarduera berria ez zegokiola eskuhartze sozialaren hitzarmenaren eremu funtzionalari. Beraz, inolako klausulak ez zuela behartzen enpleguaren egonkortasuna edo zerbitzua betetzen duten langileen lan eskubideak bermatzera.

Zerbitzu honetako langileak posta elektroniko batez jakinarazpena jaso ostean, abuztuaren 28an kaleratuak izan ziren. Aldi berea, zerbitzua utzi zuen enpresak, fiskaltzan salaketa jarri zuen zerbitzua ematean prebarikazioa egon delakoan. Sei hilabeteren buruan ikerketa hau itxi dute, behar adina frogarik ez zegoela argudiatuz.

Abendurako aurreikusita zeuden epaiketak. Azkeneko momentuan atzeratu ostean, 2019ko otsailean egin ziren zerbitzu honetan ziharduten langileen kaleratzeen epaiketak. Hauen ebazpenean argi gertu zen zerbitzuari izena aldatu izanak ez zuela zerbitzuaren berezko aldaketarik suposatzen, eta ondorioz, kaleratzeak bidegabeak izan zirela ebatzi zuen. Horrela, enpresa esleipendunaren esku (IRSE EUSKADI) geratzen da langileak berrartzearen nahiz kalte- ordainak ordaintzearen artean aukeratzea. Gauzak honela, enpresak kalte-ordainak kitatzea eta epaiari helegitea aurkeztea hautatu du; hori egiteko jadanik kalte-ordainen kopurua gordailutu duelarik, 132.000 bat mila euro. Momentu honetan dena Auzitegi Nagusiaren ebazpenaren zain gelditu da.

LAB, ELA, CCOO, ESK eta UGT sindikatuok berriro salatu nahi dugu zerbitzu publikoa pribatizatzeko eredua, baita haren ondorioak ere. Salatu nahi dugu Eusko Jaurlaritzak ez duela Hitzarmen Kolektiboa bete, eta ondorioz, langileen lan eskubideak urratu dituela. Aldi berean guzti honek erakusten du Jaurlaritzak lotsagabekeriaz eta oinarri sendorik gabeko argudioak erabilita, lan araudia eta hitzarmen kolektibo bera ez dituela bete.
 

 

 

Redin plaza, mobilizazioen ondorengo topagune

admin
-
0
Redin plaza, mobilizazioen ondorengo topagune

Festarako tartea ere egongo da Maiatzaren Lehenean. Hain zuzen ere, berritasun gisa, M1 Gunea deitutako eremua egokituko dugu Iruñeko Redin plazan, mobilizazioen ondorengo topagune gisa. Heldu eta haurrentzako jarduerak egingo ditugu bertan, borroka eta lana ere ospatu beharra dagoelako. 13:30etik aurrera egongo da zabalik M1 Gunea.


 

 

 

Debekuen gainetik, Maiatzaren Lehenean kaleak masiboki hartzeko deia egiten dugu

admin
-
0
Debekuen gainetik, Maiatzaren Lehenean kaleak masiboki hartzeko deia egiten dugu

Prentsaurrekoa egin dugu Iruñean, Maiatzaren Lehenean egingo ditugun mobilizazio eta ekimenak aurkezteko, Iruñea eta Baionan egingo ditugunak. Imanol Karrera Nafarroako eledunak eta Maider Jauregi komunikazio idazkariak hartu dute parte bertan. Imanol Karrerak azaldu du 12:00etan egingo dugula Hego Euskal Herriko mobilizazioa, eta ekitaldia Iruñeko Gaztelu Plazan izango dela. Nafarroan dagoen Espainiako Gobernuaren Ordezkaritzak LABen sei manifestaziotik hiru debekatu ditu, orden eta bake publikoa zapuztu, ondasun eta pertsonen integritatea arriskuan jarri eta bizikidetza normal garatzea eragotziko dugula argudiatuz. Ez dugu M1 despolitizatu eta folklorikoa onartzen, ezta onartuko ere. Hori dela eta, masiboki kalera ateratzeko deia egin dugu.

Mobilizazioak bost zutabe izango dituela zehaztu du Karrerak, “bost kolektibori dagozkionak: lantokietako gatazkak, feministak, langile migranteak, gazteak eta pentsionistak. Sektore guzti hauek langile klasearen barruko aktoreak dira gizarte-aldaketarako prozesu baterako”.

Mobilizazioek debekuak izan dituzte, eta, horregatik, hasierako planteamenduan aldaketak egin behar izan ditugula adierazi du Karrerak. Nafarroan dagoen Espainiako Gobernuaren Ordezkaritzak eta Iruñeko Hiri-Segurtasuneko Sailak orden eta bake publikoa zapuztea argudiatzen dute, ondasun eta pertsonen integritatea arriskuan jarriz, eta baita bizikidetza normal garatzea ere hiria kolapsatuz.

Karrerak adierazi du “langile-klasea kalean egoteak, Maiatzaren Lehena bezalako egun seinalatuan, antza, sistema gogaitu egiten du. Aldarrikapen laboral eta sozial anitzen presentziak gogaitu egiten du sistema, borroka sindikalak gogaitu egiten du". Hala, LABeko ordezkariak nabarmendu du sistemak gero eta tresna gehiago dituela bere eskura: mozal legea, ordenantzak eta, oraingoan egin bezala, debekuak; hori guztia, gogaitu egiten duen guztia eragotzi ahal izateko.

“Maiatzaren Lehenaren despolitizazio eta folklorizazioaren aurrean, LABek dei egiten du kalera ateratzera. Gaur, inoiz baino gehiago, honakoak aldarrikatzeko. Batetik, gure klase izaera; Maiatzaren Lehenaren garrantzia aldarrikatzea borroka eta mobilizaziorako egun bezala”. Eta bestetik, gazteak, ikasleak, pentsiodunak, langabezian dauden langileak, feministak, migranteak, etxeko langileak, borrokan ari diren langileak, prekarietate modu berriak jasan behar dituzten langileak (ustezko autonomoak, bekadunak, azpikontratetako langileak…). Benetako mehatxua gara sistemarentzat, aliantzak sortu eta gure borroka guztiak artikulatzeko gai bagara, gai izango baikara jendarte eraldaketa bultzatzeko. Ez dituzte gure borrokak ez gelditu ez isilduko. Elkar ikusiko dugu Iruñean Maiatzaren Lehenean”, amaitu du Karrerak.
 

 

 
1...666667668...1,611Page 667 of 1,611

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus