2026-07-25
Blog Page 654

Biarritzera eraman ditugu gure aldarri eta alternatibak, jazarpenak jazarpen

admin
-
0
Biarritzera eraman ditugu gure aldarri eta alternatibak, jazarpenak jazarpen

G7 EZ! plataformako eragileetako ordezkariok prentsa agerraldia egin dugu, Biarritzen dauden goi mandatariei mezu bat bidaltzeko, hauek euren herrialdeetara itzuli aurretik alternatiben alde borrokatzen jarraituko dugula garbi izan dezaten. Hain zuzen ere, hiriaren atarian egin dugu prentsaurrekoa, G7ren goi gailurraren azken egunean, eta zazpi aldarrikapenez osatutako adierazpen bat irakurri dugu. Agerraldia amaituta, Biarritzerako bidea hartu dugu, baina poliziak manifestazioa geldiarazi du. Hala, eserialdia egin dugu, neurri eta okupazio poliziala salatzeko eta asteburuan izandako atxiloketak eta jazarpena gaitzesteko. Irun eta Hendaiako kontragailurrean adostutako manifestua  oinarri, zazpi puntuko adierazpena helarazi diogu segurtasun indarren artean azaldutako ordezkari bati, goi mandatariei helaraz diezaien.



 

 

 

Bizkaiko itundutako anbulantzietan kontratu prekarioak eta diskriminazio sexista nagusi direla salatu dugu

admin
-
0
Bizkaiko itundutako anbulantzietan kontratu prekarioak eta diskriminazio sexista nagusi direla salatu dugu

LAB sindikatuak uste du badela unea Ambuiberica enpresak bere jarrera aldatzeko, praktiketan dagoen jendearekiko eta emakumezko langileekiko. Hortarako, has dadila praktiketan dagoen jendearen kontratuak mugagabe egiten, daudenei zein oraindik berritu ez dituztenei dagokienez.

Osasun-garraio arloan dabilen Ambuiberica enpresak 2018. urteko maiatzean lortu zuen Bizkaiko Osakidetzako anbulantzietako programatutako zerbitzuaren kudeaketa, baita IMQ-ko anbulantzietakoa ere. Hasiera hasieratik, enpresak ohitura izan du praktiketako kontratuak egiteko langile ez nahikorekin egin ohi duen zerbitzua indartzeko, hots, kontratu mugatuak egin izan ditu (bi urtekoak, asko jota), soldata mugatuarekin (lanpostuari dagokion soldataren %75, gehienez). Lanaren bitartez, arloko ikasketak egin dituzten pertsonek esperientzia har dezaten omen da helburua. Honeraino, dena dago legalitatearen barruan.

Arazoa da Ambuibericak mota honetako kontratuak modu neurrigabean erabili dituela, langileak bere aginduetara izateko, oinarrizko lan baldintzak errespetatu gabe: inposatutako txanda aldaketak, egun batetik bestera; gutxieneko atseden garaiaren urraketa; lan arriskuen prebentziorako legearen ez betetzea; dietak ez ordaintzea; gehiegizko ordutegiaren konpentsazio eza…

Gainera, egiturazko postuak ordezkatzeko erabili dituzte langile hauek, esperientzia hartzeko kontratua dutenean. Anbulantziak eurak bakarrik gidatzen ibili dira, laguntzaileak eramanez kasu batzuetan, kontratuan ezarritako helburuen kontra.

Hala, zer nolako lana egin dezakete langile hauek esperientzia duten beste langileen laguntza eta zaintzarik gabe ari direnean? Bada, langile hauek euren esfortzuari esker ari dira aurrera ateratzen, enpresaren utzikeriak utzikeria. Kontutan hartu behar da lan hau behar bereziak dituzten pertsonekin egiten dela, eta arreta eta sentsibilitatea behar dela horretarako. Hortaz, esperientzia oso beharrezkoa da.

LABek egoera tamalgarri hau salatu zuen hasiera hasieratik, oinarrizko eskubideak urratzen direlako, langileek eurek ezin baitute lana eta bizitza uztartu. Hasiera batean egutegia eta txandak errespetatzea lortu bagenuen ere, ikusten ari gara egoerak okerrera egin duela.

Ikusi dugu ere nola praktiketako emakumezko langileei ez dieten anbulantziak gidatzeko aukerarik uzten; gizonezko kideei bai, ordea. Ikusi dugu nola enpresak ez dien kontratua berritu emakumezko langileei; gionezkoei bai, ordea. Ikusi dugu nola gizonezko langileak promozionatu dituzten, esperientzia gehiago duten emakumezko langileen aurretik. Hau da, ikusten ari gara enpresaren izaera eta jarrera matxista.

LAB sindikatuak uste du badela unea enpresak bere jarrera aldatzeko, praktiketan dagoen jendearekiko eta emakumezko langileekiko. Hortarako, has dadila praktiketan dagoen jendearen kontratuak mugagabe egiten, daudenei zein oraindik berritu ez dituztenei dagokienez.

Egoera honen erantzuleak ere badira zerbitzua esleitu duten erakundeak; Eusko Jaurlaritza, tartean. Hain zuzen ere, Eusko Jaurlaritzak langileen eskubideak bete daitezela bermatu beharko luke, oinarrizko zerbitzu bat eskaintzen baitute osasun zerbitzu publikoan.

 

 

 

Osasunbidea: etxea teilatutik hasita

admin
-
0
Osasunbidea: etxea teilatutik hasita

Osasuneko kontseilari berria azkar hasi da lanean, baina pentsatu gabe nondik eta nola hasi. Edo bai? Domínguezen lau urteko agintaldiko politika kontinuisten ondotik, kontseilari berriak egin duen lehenengo gauza izan da plantillako kolektiboaren zati bat ordezkatzen duen sindikatu batekin biltzea haien eskakizunak asetzeko bidea aurkitzeko, alde batera utziz departamentuan dauden egiturazko gabezia nabarmenak.

Osasunbideko langileak zur eta lur gelditu dira Santos Indurain Osasuneko kontseilari berriaren lehenengo mugimenduak ikusita. Denborarik batere galdu gabe, Osasunbideko kolektibo baten zati baten ordezkariekin bildu da alde batera utzita gainerako langileak. Jakin badakigu presio korporatibista handiak jasan dituela, eta ongi dakigu, orobat, zenbait fakultatibok beren eskakizunetako batzuk (batez ere, eskakizun ekonomikoak) lortzeko egindako mobilizazioak traba handi bat direla kontseilariak departamentuan egin beharreko lanari ekiteko, bera ere medikua baita.

Lau urte eman ditugu Domínguez kontseilariaren kudeaketa kontinuista sufritzen (berau ere medikua izanik), bai eta Moracho kudeatzailearen geldotasuna (plantillari dagokionez, ez, ordea, hornitzaileei dagokienez) eta ospitaleguneko antolaketaren hondamendia sufritzen ere. Horregatik, LAB sindikatuak ez du onartu behar orain plantillako langileria osoaren eskubideak urratu daitezela sindikatu korporatibista batzuen erreibindikazioei mesede egiteko; izan ere, sindikatu horiek elite baten interesen alde jokatzen dute bakarrik, neurriz kanpoko burutzen egitura bat defendatzen dutelako eta beren eskakizun ekonomikoei eta lidergoa eusteari besterik ez diotelako begiratzen.

Gaur egungo ustezko gatazka-egoera ikusita, Osasuneko kontseilariak aukeratutako bidea ez da izan sindikatu guztiekin bilera txanda bat egitea. Horren ordez, erakunde bakar bati eman dio hitza, eta alde batera utzi du Osasunbideko profesional guztiak ordezkatzen dituen gehiengo sindikala.

Kontinuismoan noraezean
Kontseilariak, arazo partikularrei ekin aurretik, Osasuneko Departamentuaren egitura ezartzeari ekin beharko lioke; izan ere, lan hori egin gabe duen departamentu bakarra da gurea. Ospitalegunea berrantolatzeari ekin beharko lioke, azkeneko legealdiko politika kontinuisten ondorioz Nafarroako Ospitalegunean lan egiten duten ia 6000 lagunek lan baldintzetan jasan dituzten galerei buelta emateko. Era berean, funtsezkoa da Oinarrizko Osasun Laguntza berrantolatzea, plantillak eta lan kargak beste modu batera banatuz, eta ez adabakiak jarriz produktibitate-sariak ordainduta.

Karguetan ere, kontinuismoa izan da nagusi, kudeaketa-kargu batetik bestera izan diren aldaketak gorabehera. Buru horiek guztiek beren interesei begiratu diete bakarrik, prestakuntzari, kontratazioei eta boterea mantentzeari dagokienez, eta bigarren maila batean gelditu dira plantillako langileen eskubideak.
Fakultatiboen eskakizunak legezkoak dira goitik behera; izan ere, gainerako langileek bezala, haiek ere jasan zituzten gaizki deitutako krisi baten ondoriozko murrizketak, eta horietako gehienak ez dituzte oraindik berreskuratu. Lan baldintzak kaskartu egin dira, behin-behineko langileen kopurua eta lan kargak handitu egin dira eta gero eta gehiago eskatzen zaigu trukean deus ere eskaini gabe.

Horregatik guztiagatik Nafarroako Gobernuari eta Osasunbideari eskatzen diegu erantzukizunez joka dezatela eta, egitura organikoa eta betiko izenak aldatzeaz gainera, argi eta garbi egin dezatela langile guztien eskubideen alde eta osasun laguntzaren kalitatea hobetzearen alde.

 

 

 

Borrokak indartzera eta aliantzak sendotzera deitu dugu G7ak ordezkatzen duen ereduaren aurrean

admin
-
0
Borrokak indartzera eta aliantzak sendotzera deitu dugu G7ak ordezkatzen duen ereduaren aurrean


G7aren kontrako manifestazioa arrakastaz gauzatu da Hendaia eta Irun artean. Hain zuzen ere, 15.000 lagun inguru bete dute Hendaiako portua eta Irungo Ficoba arteko bidea, G7 EZ! plataformak deituta. Santiago zubian iritsi da une hunkigarriena, manifestariek mugak eta harresiak modu sinbolikoan eraitsi dituztenean. Behin Ficoban, Bidasoa ibaiaren bestaldean, kontragailurrean aritu garen mugimendu sozial, sindikal eta politikoek adostutako manifestua egin dugu publiko. Berriro ere kapitalismo neoliberalaren aurrean alternatibak ditugula nabarmendu dugu, demokrazia, elkartasuna eta emakume zein gizonen arteko parekidetasuna ardatz.  


G7 EZ! plataformako kide izanik, eta kontragailurraren sustatzaile izan garen neurrian, LABek ordezkaritza zabala izan du manifestazioan. Garbñe Aranburu idazkari nagusiak mobilizazioaren arrakasta nabarmendu du, eta, aurrera begira ere, adostasuna dela bidea berretsi du: "G7ak ordezkatzen duen ereduaren aurka eta alternatibak proposatzeko gaudenak etorri gara. Bizitzaren jasangarritasuna erdigunean jarriko duen eredu baten alde, hainbat eragile sozial eta sindikal elkartu gara, eta hori da bidea. Aurrera begira, kontragailurrak oinarri sendoak utzi ditu elkarren arteko adostasunak bilatzen jarraitzeko".

Eñaut Aramendi, Ficobako plazan, hitza hartzen.

Manifestazioaren amaiera ekitaldian, berriz, LABeko Ipar Euskal Herriko bozeramaile eta G7 EZ! plataformako ordezkari Eñaut Aramendik hartu du hitza, manifestuaren berri emateko: "Emakumeek bizi duten zapalkuntza,migranteen drama, klima aldaketa, laborantza eta elikaduraren industrializazioa, bioaniztasunaren desagertzea, lan eskubideen murrizketa, askatasunen murrizketa, Ongizate Estatuen eraispena… egoera honen aurrean, ezinbestekoa da borrokak indartzea eta aliantzak maila lokal, nazional, estatal, kontinental zein mundialean sendotzea".

Joaldunak, Santiago zubian jarritako harresietako bat suntsitzen.
 

 

 

“Prest gaude mobilizazio berrietan bat egiteko”

admin
-
0
“Prest gaude mobilizazio berrietan bat egiteko”

Familia argazki batekin eta kontragailurraren balorazio baikor batekin amaitu dira Hendaia eta Irunen egunotan izandako solasaldi eta tailerrak. Hain zuzen ere, asteburuko mobilizazioei begira bukatu dira jardunaldiak. Hala, Hendaiako portutik larunbata goizean irtengo den manifestazioa eta igandean Biarritz inguruan egingo diren desobedientzia ekintzen faltan, amaiera ekitaldia egin dugu Ficoban, baina, G7 EZ! plataformako bozeramaileek nabarmendu bezala, borrokak aurrera darrai, ez du etenik: "Prest gaude mobilizazio berrietan bat egiteko".



 

 

 

Bayer-Monsanto enpresaren sarrera blokeatu dugu, multinazionalen jarduera salatzeko

admin
-
0
Bayer-Monsanto enpresaren sarrera blokeatu dugu, multinazionalen jarduera salatzeko

Kontragailurretik kilometro gutxira, Biarritzetik gertu, LABek, beste eragile batzuekin batera, ekintza egin du Landetako Peyrehorade herriko Bayer-Monsanto enpresan. Bertako sarrera blokeatu dugu, "zuen irabazia gure minbizia" leloarekin. Hain zuzen ere, ekologiaren eta gure osasunaren kontura aberastu nahi dutenen aurrean, bizitza erdigunean jartzeko aldarria egin dugu. Izan ere, estatuek beste alde batera begiratzen dute multinazionalak tartean daudenean, eta Bayer-Monsanto kapitalismoaren ikurren artean dago.



 

 

 

Alternatibak garatzera deitu dugu, elkartasuna, balore demokratikoak eta berdintasuna oinarri

admin
-
0
Alternatibak garatzera deitu dugu, elkartasuna, balore demokratikoak eta berdintasuna oinarri

Kontragailurraren hirugarren eta azken jardunaldian, mugimendu sozial, sindikal eta politikoetako ordezkariok batzar herritarra gauzatu dugu Ficoban, egunotako balantzea egiteko eta larunbata goizeko manifestazioaren amaieran irakurriko dugun manifestua konpartitzeko. Hain zuzen ere, larunbateko protesta 11:00etan abiatuko da Hendaiako portutik, eta Irungo Ficoban bertan amaituko da.

Batzar herritarrean, alternatibak garatzea posible dela nabarmendu du LABeko Ipar Euskal Herriko eta G7 EZ! plataformako bozeramaile Eñaut Aramendik. Emakumeen zapalkuntza, migranteen drama, klima aldaketa… eredua aldatzeko arrazoiak soberan daudela adierazi du, eta alternatibek elkartasuna, balore demokratikoak eta berdintasuna izan behar dutela oinarri berretsi du.

Egunean zehar, solasaldiek eta tailerrek lekua izan dute berriro. Ficoban, besteak beste, burujabetza zergatik eta zertarako galderari erantzun diote EH Bilduko legebiltzarkide Larraitz Ugartek, CUPeko kide David Fernandezek eta EHUko irakasle Ion Azkunek. Laborantza eta migranteen harrera izan dira solasaldietako beste gaietako batzuk.

Kontragailurreko espazioetan aurreko egunetan baino jende gehiago nabaritu da, eta ekintzak eta jarduerak oso harrera ona izan dute.
 

 

 

“Emakumeak XXI. mendeko esklaboak gara”

admin
-
0
“Emakumeak XXI. mendeko esklaboak gara”

Kontragailurreko bigarren jardunaldian lehen lerroan egon da LAB, Garbiñe Aranburu idazkari nagusiaren hitzartzeekin. Era berean, sindikatuak sustatutako borrokak presente izan dira; hala nola, borroka feminista eta Huerta de Peralta enpresan gauzatutakoa. Lehenengoari buruz LABeko Ekintza Sozialeko kide Maddi Arrietak hitz egin du; bigarrenari buruz, Huerta de Peraltako langile Hossein Yagoubik.

Sektore feminizatuetan prekarietatea nagusi dela salatu du Maddi Arrietak, eta zaintza lanaren aitortza eza berretsi du Ficobako 3. aretoan egindako solasaldian: "Sistemak zaintzaren beharrizan soziala baztertzen du, ardura kolektiboa ukatzen du eta emakumeak ikusezin bilakatzen ditu. Eta hau ez da kasualitatea".

Hizlarien artean, Las Kellys mugimenduko Mercedes Nortem Mohamed-ek hartu du hitza, eta ideia horri jarraipena eman dio: "XXI. mendeko esklaboak gara emakumeak".

Esklabotza, Nafarroako landa eremuan ere
Nekazaritza hizpide izan dute goizean zehar. Hendaiako zineman sektorearen inguruan aritu dira, eta, handik gertu, eskolan, LABek aurten arlo honetan izandako borroka eredugarri baten kontakizuna plazaratu du.

Hain justu, Huerta de Peraltako langileen izenean hitz egin du Hossein Yagoubik, eta azaldu du antolakuntza eta borrokari esker lortu dutela lan baldintza duinak izatea. 12, 13 eta 14 orduko lanaldia zuten lehen, oporrak izateko eskubiderik ez, jai egunetan lan egin behar zuten eta enpresariaren irainak eta mehatxuak pairatu behar zituzten. Migrantez osatutako kolektiboa LABera gerturatu eta sindikatuaren baitan antolatu eta gero, 28 eguneko greba eredugarri bat gauzatu zuten, eta, jazarpen poliziala eta judizialaren gainetik, helburua lortu zuten: euren lana duintzea.
 

 

 

Bizitza erdigunean jarriko duen eredu baten aldarria eraman dugu kontragailurrera

admin
-
0
Bizitza erdigunean jarriko duen eredu baten aldarria eraman dugu kontragailurrera

Irun eta Hendaian egiten ari den kontragailurraren sustatzaileen artean dago LAB, G7 EZ! plataformaren baitan. Bada, sindikatuak berak lehen lerrora egin du jauzia topaketen bigarren jardunaldian, eztabaida eta mobilizazioetan eragile aktibo bilakatuta. Hain zuzen ere, kontragailurraren bigarren egunak hainbat interesgune izan ditu, eta horietara eraman ditugu gure aldarriak. Esaterako, eguerdian, Hendaiako McDonald’s-en aurrean mobilizazioa eta ekintza sinbolikoa egin dugu, eta, arratsaldean, "Munduaren bukaera, hilabetearen bukaera, borroka bakarra!" solasaldian hartu dugu parte; bietan, Garbiñe Aranburu idazkari nagusia buru izan dugu.

Arratsaldeko hitzaldian, Ficobako 1. aretoa beteta zegoela hartu du hitza Garbiñe Aranburuk, Solidaires, Attac eta Greenpeace erakundeetako ordezkariekin batera, besteak beste.

LABeko idazkari nagusiaren esanetan, "lana versus kapitala dikotomia klasikoa zabalduz, bizitza versus kapitalaz aritu behar dugu. Kapitalaren aurkako borrokan, borroka feminista eta ekologiaren aldeko borroka barnebildu eta borrokari dimentsio berria eman behar zaio".

Borroka sozial eta sindikal ugari daude piztuta eta guztien arteko baterajotzeak bultzatu behar ditugu, hots, langile, pentsiodun, emakume, gazte edota etorkinei mobilizazio orokor eta bateratuetan parte hartzeko aukera ireki.

G7aren kontra bakarrik ez, zerbaiten alde ere bagaude, "bizitza erdigunean jarriko duen eredu berri baten alde", LABeko idazkari nagusiak nabarmendutakoaren arabera. Hain justu, aurrera begira elkarren arteko aliantzak sustatzen jarraitzeko oinarri sendoak jartzen ari gara egunotan.

Prekarietatearen aurka eta elikadura burujabetzaren alde
Ficobako hitzaldiaren aurretik, bazkaltzeko garaian, Hendaiako McDonald’s aurrean mobilizatu gara, "kapitalismoaren ikur" delako. Bertan, prekarietatearen aurkako eta elikadura burujabetzaren aldeko mezua zabaldu dugu. "Multinazional honek ez du inongo erreparorik planeta ustiatzeko, eta, era berean, ez du inolako erreparorik lan eskubideak oztopatzeko eta suntsitzeko", adierazi du Garbiñe Aranburuk.

Ekintza sinboliko gisa, McDonald’s aurrean bazkaldu dugu, bertako haragi eta produktuekin.

 

 

 
1...653654655...1,637Page 654 of 1,637

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus