LABeko idazkari nagusi Garbiñe Aranburu Goiena Telebistako Harira saioan izan zen atzo, hainbat kontuei buruz hitz egiteko; urtarrilaren 30eko Greba Orokorrari buruz, kasu.
Blog Page 568
[IRITZIA] “Euskara ez dago osasuntsu Osakidetzan”
![[IRITZIA] “Euskara ez dago osasuntsu Osakidetzan”](https://www.lab.eus/wp-content/uploads/2019/12/materiala_argazkiak_Arloak_euskara_19_12_11Osakidetza_Kilometroak-768x576.jpg "[IRITZIA] “Euskara ez dago osasuntsu Osakidetzan”")
LABeko Osakidetzako euskara taldeko kide Gotzone Amurizak Osakidetzako langileek euskaraz lan egin eta erabiltzaileek euskaraz artatuak izateko eskubidea dutela aldarrikatu du iritzi artikuluan.
Abenduaren 3a, Euskararen Nazioarteko Eguna igaro da. Egun horretan bertan, Osakidetzan, 2013ko abenduan abiatu zen Euskararen Erabilera Normalizatzeko II. Planari amaiera eman zitzaion. Orain, planaren balorazioa dator eta balorazio honen ostean, III. Planaren diseinua eta onarpena.
II. Plan honen helburuetako bat zerbitzu-hizkuntza gisa euskararen ahozko eta idatzizko presentzia eta erabilera bermatzea izan da. Begi bistakoa da helburua lortzeko oraindik bide luzea egiteko dagoela, gaur egun oraindik ez baita zerbitzu euskalduna bermatzen. Planaren arabera, lehentasun gorenekoak diren unitate askotan ere, umeen arreta guneetan edota informazio guneetan, adibidez, oraindik erabiltzaileen kexak sortzen dira zerbitzua euskaraz jaso ezin izanagatik.
Planaren arabera, Osakidetzan euskara lan hizkuntza izan dadin ere pausoak eman behar ziren urte hauetan. Zoritxarrez bide honetan ez da aurrerapauso txikiena ere eman. Euskarak baztertua izaten jarraitzen du lan hizkuntza izateari dagokionez, horretarako baldintza egokiak dituzten unitateetan ere. Zuzendari eta jefaturek, orokorrean, euskararen normalizazioarekiko anbizio eta konpromiso gabezia nabarmena izatea izan da Euskara Planak behar besteko emaitzak ez ematearen arrazoi nagusietako bat, eta euskara lan hizkuntza izatearen inguruan aurrerapausorik ez ematea horren erakusle garbia da.
LABetik, Euskararen Plana eta legedia betetzen direla motzean jarraitzen dugu eta horrek, urte hauetan, Osakidetzari hainbat eta hainbat interpelazio, kexa eta salaketa egin behar izatera eraman gaitu. Etengabe aritu behar izan gara zuzendaritza eta arduradun desberdinei gutxienez beraien araudiak, Euskara Planak, ezartzen dituen minimoak bete zitzaten eskatzen. Karteldegia, intraneta, kontratazioa, lanpostuen Hizkuntz Eskakizunak, ikastaroetako hizkuntza, erabiltzaileenganako zerbitzua, lan-hizkuntza… Behin eta berriro, Euskara Planaren arabera bete beharrekoak ziren hainbat minimo urratzen zirela ikusi dugu eta Osakidetzari etengabe eskatu zaio urraketa horiek zuzentzeko.
Osakidetzan Euskara sustatzeko lidergoa izan behar dutenak izan dira neurri handi baten normalizaziorako oztopo handienak jarri dituztenak. Publikoki bestelakorik adierazten duten arren, urte hauetan ikusitakoak ikusita, argi eta garbi esan dezakegu euskara ez dela izan, eta ez dela gaur egun, inolaz ere lehentasunezko gaia ez Osakidetzako Zuzendaritza Nagusian, ez Zerbitzu Erakunde desberdinetako zuzendaritza organoetan, ezta tokian tokiko jefaturetan ere. Salbuespen isolatu batzuk egon badaude, baino panorama orokorra benetan etsigarria da, eta zuzendaritzek euskararen normalizazioari arreta eta dedikazioa jarri arte nekez emango du euskarak aurrerapauso handirik Osakidetzan.
Osakidetzak langileen gain jarri du zerbitzua euskalduntzeko pisu gehiena, baina euskararen normalizazio prozesuak zuzendaritzen inplikazio aktiboa behar du ezinbestean.
Euskararen erabilera normalizatzeko III. Plana Osakidetza euskalduntzea lortzeko plangintza izatea espero dugu. Salto kualitatiboa, euskara jakitetik euskara erabiltzen duen Osakidetza, nahi dugulako. Osakidetza euskahalduna nahi dugu.
Horretarako, LABetik, Osakidetzako arduradunei, euskararen normalizaziorako lidergotza, inplikazioa eta erantzukizuna hartzea eskatzen diegu. Zerbitzua euskalduntzeko asmoz, trabarik gabe, lanean jardungo duen lidergotza.
Osakidetzako langileok euskaraz lan egin, eta erabiltzaileok euskaraz artatuak izateko eskubidea dugulako.
Mobilizatzen jarraitzeko deia luzatu dugu Baionan, lan, pentsio eta bizitza duinaren defentsan
Greba eguna dugu gaur, berriro, Ipar Euskal Herrian. Joan den ostegunean egin bezala, Baionako kaleak hartu ditugu erretreten defentsan. Hain zuzen ere, Macronen Gobernuak sustatutako erretreten erreformarekin, denok gehiago eta denbora luzeagoz eginen dugu lan, gutxiago eta denbora laburrago batean irabazteko.
Macronen Gobernuak langileak, prekarioak, gazteak eta gaixorik direnak babesten dituzten berme kolektiboekin amaitu nahi du. Erreformaren helburua Erresistentzia Kontseilutik sortutako errepartizio edo banaketan oinarritutako erretreta sistema haustea da. CAC 40 sistemak inoiz baino etekin gehiago izanik, berreskuratu eta bana ditzagun irabazi horiek! Sistema hori hobetu behar dugu, denen pentsio eta bizi baldintza duinak bermatuak izan daitezen.
Denok ahal dugun neurrian mobilizatu behar gara mugimendu historiko hau hedatzeko:
-Nagusi edo patroi handiei eginak zaizkien opari fiskalak gelditu behar dira.
-Hilabetesari guztien emendapena, emazteenekin hasita, gizonezkoekiko diren soldata ezberdintasunak desagertarazteko.
-Ikasketak egiten dituzten gazteen urteak kontutan hartuak izan daitezen.
-Berriz 37,5 urte kotizazioetara itzuli, berriz 60 urterekin erretretara joateko aukera eta SMICa bermatzen duen pentsio sistema bat plantan jartzeko.
Urtarrilaren 30erako deia
Baionako manifestazioan, Ipar Euskal Herriko LABeko arduradun Eñaut Aramendik eta LABeko Exekutiboko kide Edurne Larrañagak hartu dute hitza, eta mobilizatzeko beharra nabarmendu dute.
Hain zuzen ere, Edurne Larrañagak adierazi du Frantzian eta Espainian hartzen ari diren erabakiak norabide berean doazela: "Elkartasuna eta eskubideak bermatu beharko lituzkeen sistema batetik kapitalizazio sistema batera ematen ari dira urratsak, langileon bizi eta lan baldintzak okertuz. Hori dela eta, mobilizazioekin jarraituko dugu Frantziako Gobernuak erretreten aurka hartutako erabakiak salatzeko, eta, aldi berean, deia luzatzen dugu Hego Euskal Herrian egingo dugu Greba Orokorrerako. Hain justu, urtarrilaren 30ean, lan, pentsio eta bizi duina aldarrikatuko dugu. Ofentsibara planteatzen dugun Greba Orokorra da, bizi, lan baldintza eta pentsio sistema duinak izateko neurriak exijitzeko".
Eñaut Aramendik Macronen Gobernuak sustatutako pentsioen erreformaren ondorioak ohartarazi ditu: “Bizi baldintzak okertuko ditu, pentsio sistema ahalduko du eta, bereziki, gazteak kaltetuak izango dira, ez baitute pentsio sistema duin bat izango lan ibilbidea bukatzerakoan. Beraz, ezin ditugu gauzak bere horretan utzi. Europan markatzen ari den bide batetik etorri dira erabaki hauek guztiak, eta, horregatik, borroka honi ikuspegi nazional bat eman behar zaio".
Elecnor enpresako langileek hasiera eman diote greba mugagabeari
Gaur hasi dute Elecnor Comunicaciones enpresak Araban duen langileen greba mugagabea. Telefónica-ko azpikontrata honek bi elkarretaratze burutu dituzte haien egoera salatzeko, batetik enpresaren aurrean goizeko 09:00-10:00 bitarte, eta bigarrena General Loma plazan dagoen Telefónica dendaren aurrean eguerdian.
Lehen greba jardunaldi honetan, Instalazio eta Mantentze (I+M) ataleko langileen %100-ek egin du bat grebarekin, eta baita beste atal batzuetako langile askok ere.
Pasa den asteko asteazkenean, enpresak eskura eman zion idazki bat langile bakoitzari greba egin ez zezaten, bakoitzari banaka deituaz. Duela haste batzuk greba bera erregistratu zenetik, hau da enpresak eman duen pausu bakarra, eta argi ikusi dira bere gezurrak eta engainuak. Gogoratu behar da soilik 2018 urtean bere lagunen artean 28 milioi euro banatu zituztela. Gainera, komunikabide ezberdinetan argitaratu dute fakturazioa %1,5 handitu dutela urtarrila eta iraila bitartean. Honek argi uzten du enpresak langileon baldintzak duintzeko duen borondate eza, langileon esfortzuaz baliatuz gutxi batzuen poltsikoak betetzeko.
Gainera, beste herrialde batzuekin josten ari den langileen ordezkari sareari esker, jakin dute probintzia ezberdineko langileak Arabara lanera etorri behar dutela jakinarazten ari diela enpresak. Hau grebalarien greba eskubidearen urraketa larria da.
Hau guztiagatik, goizero eta eguerdiro elkarretaratzeak burutzen jarraituko dute enpresak bere aldarrikapenei erantzun arte, eta gainera Telefónica-ko bezeroei laguntza eskatuko diete, Telefonica-k berak pausuak eman ditzan gatazka konpontzeko.
Haurreskolak Partzuergoaren mahai negoziatzailetik altxa gara, langileei egindako iruzurra salatzeko
Bihartik aurrera kudeaketa arloko afiliatu zein gainontzeko langileekin bilduko gara eta denon artean erabakiko dugu zein izango den aurrera egin beharreko bidea eta gure erantzuna.
Gaur, Bilboko Eusko Jaurlaritzako Delegaritzan Haurreskolak Partzuergoaren mahai negoziatzailea bildu da. 2018an Haurreskolak Partzuergoaren langileentzat LAB sindikatuak sinatutako akordioan garatzeke zeuden kudeaketa arloko negoziazioan aurrera egiteko asmoz etorri gara. Izatez, 2018ko akordioa sinatu genuenetik, bere garapena lortzeko helburua izan dugu eta horren alde etengabe lan egin dugu.
Akordioa sinatu genuenetik, kudeaketako langileek eskatzen ziguten moduan, ordezkoen zerrendak zabaltzea lortzeaz gain, Hezkuntza departamentuaren kudeaketako langileen baldintzen ekiparazioa eskatzeko bidea zabaldu genuen. Horretarako, Lanpostuen Balorazio Batzordea osatu eta guztion ekarpen eta lanarekin, proposamen bat landu genuen. Horrez gain, mahai negoziatzailean guztion ekarpenekin kudeaketako langileen ordezkoen araudia, barne sustapenerako araudia eta ordezkapenak egiteko kasuistikaren dokumentuak negoziatu ditugu.
Irailaren 11n, LAB sindikatuak azken ekarpenak egin zituen, departamentu honetako lan kargak txikitzeko lanpostuen zerrenda handituz eta abian jarritako ekiparazio prozesua nola gauzatuko zen zehaztapenak eskatuz. Ordutik, Administrazioaren partetik ez dugu inolako erantzunik jaso eta mahai negoziatzailerik ez du deitu gaur arte. Hori dela eta, gaurko bileran Hezkuntza departamentuko eta Partzuergoko arduradunei exijitu diegu egindako eskaerei ganorazko erantzun bat ematea, kudeaketako langileei zor zaien akordioaren garapena bermatuko duena.
LAB sindikatuak negoziazio kolektiboan sinesten du eta hainbat eta hainbat saiakera egin ditugu akordio batera iristeko, baina une honetan bide guztiak agortu ditugu. Administrazioaren aldetik ez dugu ganorazko erantzunik jaso, ezin esan gabe utzi beren lanak oraindik ere ez dituztela bete. Haurreskolak Partzuergoan, Irakaskuntza publikoko beste sektoreetan gertatzen ari den bezala, haiek sinatutako akordio desberdinak biribiltzeko aurrekonturik ez dutela argi utzi digute, eta, beraz, ez digute beste biderik utzi. Gaurkoan, langileoi egin diguten iruzurra salatzeko, mahai negoziatzailetik altxa gara. Haurreskolak Partzuergoko haurreskolen kudeaketa guztia langile hauen menpe dagoenez, kolektibo osoan izango du eragina, baita familiengan ere.
Jendetza batu da Bilboko kaleetan, Euskal Errepublikaren alde
EH Bilduk deitutako manifestazioarekin egin dugu bat, Konstituzio propio bat, Estatu egitura propio bat nahi eta behar dugulako. Gaurko egunean, abenduaren 6ko inposatutako jai egunaren etorrerarekin, ez dugu zer ospatu, baina badugu zer borrokatu: independentzia, sozialismoa eta feminismoa. Demokrazia, justizia eta bakea. Burujabetza. Azken batean, Euskal Errepublika aldarrikatzeko eguna dugu.
Eskubide Sozialen Kartako eragileok topaketak egingo ditugu abenduaren 13an, aldaketa sozialerako aukera berriak eta Greba Orokorra hizpide
Abenduaren 13an, Euskal Herriko Eskubide Sozialen Kartaren birkokapen prozesuan mugarri bat jartzeko eta aurrera begirako norabidea zehazteko helburuarekin, topaketak antolatu ditugu Barakaldoko BECen. Hain zuzen ere, mugimendu eta mobilizazio sozialaren loraldiarekin aukera berriak sortu dira aldaketa sozialaren bidean, eta aukera berri horiei buruz ariko gara Karta osatzen dugun eragileak, urtarrilaren 30eko Greba Orokorra ere oso presente izanda.
Goizean, “bizitza duina” ardatz hartuta, bi eztabaida nagusiren inguruan jardungo dugu: alde batetik, lan eta babes soziala; eta, bestetik, krisialdi sistemikoa eta larrialdi klimatikoa.
Arratsaldean, asanbladan batuko gara Euskal Herriko Eskubide Sozialen Kartaren birkokapen prozesuaz eta Greba Orokorrari buruz hitz egiteko.
Berriak Supermerkatuetako langileek aurreakordioa lortu dute zuzendaritzarekin, borrokari esker
Langileak irmo mantendu dira beti, eta Berriak Supermerkatuetako zuzendaritza negoziatzera esertzera behartzen zuen alegatu bateratu baten ondoren, atzo, abenduak 5, bilera luze baten ondoren, aurreakordio batera iritsi gara mobilizazioak bertan behera uzteko. Langileen batzarrak berretsi du aurreakordioa.
Joan den azaroaren 26an, asteartean, langileen ordezkariek bilera luzea egin zuten Berriak Supermerkatuetako zuzendaritzarekin. Zuzendaritzaren jarrera irmoa eta negatiboa zen negoziatzen ari ginen hainbat puntutan, eta langileek, ausardia eta elkartasun alardea eginez -langile kaleratuarekin-, abenduaren 9tik aurrera greba mugagabea deitzeko erabakia hartu zuten.
Langileen erabakiaren ondorioz, aste honen hasieran enpresako zuzendaritzak mobilizazioaren aurkako erasoaldia hasi zuen, dendak ez hornitzen hasi zen eta langileen batzar bat deitu zuen enpresa ixteko mehatxua egiteko, greba mugagabea egiten bazen.
Langileak irmo mantendu dira beti, eta Berriak Supermerkatuetako zuzendaritza negoziatzera esertzera behartzen zuen alegatu bateratu baten ondoren, atzo, abenduak 5, bilera luze baten ondoren, aurreakordio batera iritsi gara mobilizazioak bertan behera uzteko. Langileen batzarrak berretsi du aurreakordioa.
Aurreakordio horrek honako puntu garrantzitsu hauek jasotzen ditu, besteak beste:
– Kaleratutako langilearen berronarketa
– Bidegabeko kaleratzeen aurrean blindajea
– Dietengatik eta beste lantoki batzuetara joateagatik plusa
– Garraio-plusa
– Lanbide-kategoria berriak
– ABLEen erabilera mugatzea
Aurreakordio horrek prekarietatearen aurkako borroka lehenesten du Aiaraldean, eta ez litzateke posible izango eskerrak eman nahi dizkiegun pertsona eta kolektibo askoren babesik gabe:
Larunbatero gurekin pankarta eutsi duten bezero guztiei, Aiaraldeko Mugimendu Feministari, Ernaiko kideei, Artiacheko langile kaleratuei, LAB sindikatuari eta babesa eman diguten ordezkari guztiei eta nola ez, gure senide eta lagunei, baldintzarik gabe emandako babesagatik, MILA ESKER.