2026-01-24
Blog Page 357

“Lorpen guztiak kapitalari aurre egiten lortu dira; inork ez digu ezer oparitu”

Aritz Sorzabal
-
0
“Lorpen guztiak kapitalari aurre egiten lortu dira; inork ez digu ezer oparitu”

46 urte bete dira langileek 1976. urteko martxoaren 3an Gasteizen pairatutako sarraskitik. Hala, urtero bezala, omenaldi propio bat egin dugu, arratsalderako euskal gehiengo sindikalak deitutako manifestazioaren aurrekari, eta irekita dauden lan gatazkak izan ditugu gogoan; sektore feminizatuetakoak, tartean. Ekitaldia San Frantzisko de Asis elizaren kanpoaldean egin dugu, odolustea izan zen elizaren ondoan.

Gasteizko LABeko arduradun Gotzon Kortazarrek ekitaldian adierazitakoaren arabera, “1976. urtean hildakoak ez ziren patronalaren indar armatuek eraildako lehen langileak izan, ezta, tamalez, azkenak ere. Langile klasearen borroka sufrimenduz eta ahaleginez josita dago, gaur ditugun lorpen guztiak kapitalari aurre egiten lortu dira; inork ez digu ezer oparitu, eta inori ez diogu ezer zor”.  

Sindikatuko ordezkariaren hitzetan, “borrokan jarraitzen dugu egun, langileen eskubideak bermatzeko, kapitalaren irabazi nahia salatzeko eta patronalaren gustuko erreformak saldu nahi dizkiguten horiek agerian uzteko”.

Hala, azken hilabeteetan borrokan diren sektoreak izan ditugu gogoan; hala nola, helduen egoitzak, garbitzaileak, kolektibitateak, etxez etxeko laguntza, hezkuntza, funtzio publikoa, metalgintza, banatzaileak, osasungintza publikoa, pentsiodunak… Zentzu honetan, sektore feminizatuetan irekiak ditugun borrokak nabarmendu ditu LABeko Zerbitzu Soziokomunitarioko kide Lorena Rejok, eta zaintza lanen aitortza aldarrikatu du.   

Datozen hilabeteei begira jarrita, erantzun maila guztiak aktibatuko ditugula jakinarazi dugu, bai lanean, baita jendartean ere, Urkulluren gobernuaren eta patronalaren politika ekonomiko eta sozialei erantzuteko. “Sindikatu integrala gara, eta, zentzu horretan, sektoreen eta aldarrikapenen arteko topaguneak ehuntzen joango gara, une bakoitzean beharrezkotzat jotzen ditugun erantzun-mailak erabakiz, hori guztia helburu argi batekin: Euskal Herritik eta Euskal Herriarentzat jendarte-aldaketa baten alde batzea”, erantsi du Gotzon Kortazarrek.  

   

Osakidetzak azpikontratatutako garbiketa zerbitzuetako langileek hitzarmen duin bat aldarrikatu dute Donostia ospitalearen aurrean

Aritz Sorzabal
-
0
Osakidetzak azpikontratatutako garbiketa zerbitzuetako langileek hitzarmen duin bat aldarrikatu dute Donostia ospitalearen aurrean

Azken hilabeteetan egin bezala, LAB, UGT, CCOO eta ESK sindikatuak mobilizatu gara Osakidetzak azpikontratatutako garbiketako langileak funtsezkoak direla aldarrikatzeko eta eurentzat lan baldintza duinak eskatzeko.

Homologazioa galtzeko arrisku larrian daude langileak. Hitzarmen berriaren negoziazioa 2018an hasi genuen, negoziazio erraza izango zelakoan, Osakidetzako langileekin homologatuta egoteak gai jakin batzuk akordio berrietara egokitzea baino ez baitzuen suposatu behar: 2012ko karrera profesionala, lanpostu hutsak betetzeko sistema zabalagoa eta bidezkoagoa, errelebo bidezko jubilazioa, Osakidetzako langilentzat onartu berri dituzten baimen eta lizentziak, etab.

Baina, enpresek ez dute hitzarmena eduki minimoetan egokitu nahi izan. Homologazioak ez du esan nahi soilik Osakidetzako langileei aplikatzen zaizkien soldata-igoera berberak izatea. Homologazioa askoz gehiago da, osagarri berberak, lizentzia berak, lanaldiak luzatzeko aukera berberak, erretiratzeko erraztasun berberak eta abar izatea esan nahi du.

2015ean hitzarmen bat sinatu genuen, homologazio-hitzarmen bat, baina badirudi garai hartan homologazioak islatzen zituen baldintza horiek izoztuta utzi nahi diuztela, 2015eko errealitate estankoan. Enpresak malgutasunik gabe azaldu dira, eta mahaia blokeatuta dute. Badirudi blokeo hori Osakidetzak berak babesten duela, eta ez du erantzun egin dizkiegun bilera-eskaera desberdinei. Homologazioa kendu nahi dute eta itxita daude ezer egokitzeko. Lortutakoa lapurtu nahi dute.

Emakumeentzako kristaleko sabaiak bere horretan segitzen du Nafarroako Administrazioan

Aritz Sorzabal
-
0
Emakumeentzako kristaleko sabaiak bere horretan segitzen du Nafarroako Administrazioan

Emakumeok gizonek baino gutxiago irabazten dugu, eta burutzetatik eta erantzukizunezko karguetatik diskriminatzen gaituzte.

Foru Administrazioa ez da lan eremuan gertatzen den emakumeenganako diskriminaziotik kanpo gelditzen. Horrela jasotzen da “Nafarroako Foru Komunitateko Administrazioan eta haren erakunde autonomoetan emakumeen eta gizonen arteko berdintasunari buruzko analisi kuantitatiboa” izeneko agirian. Azterketa hori Nafarroako Gobernuak berak egin du, Administrazioko I. Berdintasun Planari ekiteko aurretiazko lan gisa. Txosten horren alderdi deigarrienak hauek dira: batetik, soldata-arrakala, % 6,65ekoa dena, eta bestetik, emakumeen diskriminazioa burutzetan eta erantzukizuneko karguetan.

Azterketa hori batzorde batek egin du, non Administrazioko ordezkariek eta Mahai Orokorrean dauden erakunde sindikalek parte hartu baitute. Azterketa sakona da, oso datu interesgarriak erakusten dituena, eta informazio guztia Nafarroako Foru Administrazioaren eta haren erakunde autonomoen I. Berdintasun Planari ekiteko erabiliko da.

Nafarroako Foru Komunitateko Administrazioaren plantillan 29.939 langile daude. Plantilla feminizatua da: langileen % 71,29 emakumeak dira, eta % 28,71 gizonak. Itxuraz, gizonezkoek eta emakumeek eskubide eta betebehar berberak dituzte beren lan-harremanetan, baina adierazle batzuek erakusten dute emakumeak oraindik ere diskriminatuak eta gutxietsiak daudela. Bi alderdi dira argigarrienak: soldata-arrakala (%6,65) eta burutzen banaketa, non emakumeek baztertuak jarraitzen baitute, batez ere eskalafoian gora egin ahala.

IMQ-ko 76 garbitzaileek epaiketa irabazi dute eta berriz onartu beharko dituzte haien lanpostuetan #LortuDugu

Aritz Sorzabal
-
0
IMQ-ko 76 garbitzaileek epaiketa irabazi dute eta berriz onartu beharko dituzte haien lanpostuetan #LortuDugu

LABetik sententzia ospatzen dugu, bereziki beren lan-baldintzen aldeko borroka egiteagatik kaleratuak izandako 76 garbitzaileak haien lanpostuetara itzuliko direlako. Eta bigarrenik, sententzia ospatzen dugu, garbiketa sektorean mugarri bat ezartzen duelako. Enpleguen egonkortasuna nagusituko da, enpresen kodiziaren gainetik. Argi geratu da ezin izango dituztela garbitzaileen lanpostuak suntsitu soldatak handitzen direlako edota urteetan gora egiten dutelako.

Epaiaren arabera, IMQk 76 garbitzaileak kaleratzeko hartutako erabakiak elementu erreaktiboei erantzun zion, eta gainera, garbitzaile hauen izaera azpimarratzen du; “garbitzaileak osatzen dituen kolektiboaren ohiko sakabanatze eta zatikatzearen aurrean, langile hauek antolatzeko eta elkarrekin erantzuteko gaitasuna erakutsi zuten, baita mobilizazioak, kontzentrazioak eta greba mugagabe bat deitzeko gaitasuna ere”.

Ildo horretan, sententziak adierazi du ezin izan dela gezurtatu hori bera izan zela, eta ez beste ezer, IMQk garbitzaile horiek guztiak kaleratzearen arrazoia; “egiten zituzten erreklamazioek zerbitzu- kostua handitzea dakarte eta ondorioz enpresa-marjina murriztu (…) egoerak inbutu moduko bat sortu zuen”. 

IMQk lezio bat eman nahi izan zien: eskubideak erreklamatzea eta baliatzea langileentzako kaltegarria den emaitza batera eramaten duela, baina sententziak atzera bota du erabaki hori.

Gainera, garbitzaileak subrogatzera behartzen ditu, haien lana funtsezko zerbitzutzat jotzen duelako, eta ez hondar-jardueratzat. Izan ere, klinika bakoitzeko garbitzaileen kopurua klinika horietako langile guztien ehuneko handi bat da. 76ak itzuliko dira haien lanpostuera. Garbitzaile guztiak, gehienak emakumeak, lan-munduan bazterkeria eragiten duten adin-tarteetako emakumeak. Txalo bero bat haientzat. Zorionak!

Modu positiboan baloratzen dugu ISNko akordioa, aurreikusitako mobilizazioak bertan behera uztea ekarri duena #LortuDugu

Aritz Sorzabal
-
0
Modu positiboan baloratzen dugu ISNko akordioa, aurreikusitako mobilizazioak bertan behera uztea ekarri duena #LortuDugu

Enpresa batzordeak eta ISN enpresak aurreakordioa lortu dute, eta, horren bidez, bertan behera utzi dituzte Volkswagen-eko Iruñeko lantegian martxoaren 2an hastekoak ziren mobilizazioak.

ISN Volkswagenen soldata igoerak ordaindu ez izanak egoera jasangaitzera eraman zuen plantilla. Hori dela eta, greba mugagabea deitu zuen enpresa batzordeak, hainbat mobilizaziorekin batera. LAB eta Solidari sindikatuek sinatutako aurreakordioarekin (enpresa-batzordean 9 ordezkaritik 7 dituzte), %5eko soldata-igoera bermatuko da, baita 3 atseden- egun ere.

Greba-deialdia aurtengo soldata-igoerak bermatzeko aurreikusita zegoen arren, datorren urterako %2ko soldata-igoera lortu da, 2022ko KPIaren igoeraren araberako soldata-igoera eta lanaldia hobetzeko egun bat, enpresak 15 egunetik gorako aldi baterako lan-erregulazioa aplikatzen badu.

LAB sindikatuak eskerrak eman nahi dizkie langileei mobilizazioarekin eta borrokarekin izan duten konpromisoagatik; izan ere, berriro ere erakutsi du bere fruituak ematen dituela, eta hori gabe ez zatekeela langileen lan-baldintzak hobetzeko akordio honetara iritsiko, soldaten eta lanaldiaren esparruan.

Horrekin batera, ELA sindikatuaren jarrera deitoratzen dugu, gainerako langileekin batera borrokatu beharrean, oporretan egotea nahiago izan duelako, eta, ondoren, akatsez betetako informazioa zabaltzeagatik, ez baitu negoziazioetan parte hartu aisialdian egoteagatik.

Basozainek Nafarroako Gobernuari exijitu diote 15 lanpostu berri sortzeko konpromisoa bete dezala

Aritz Sorzabal
-
0
Basozainek Nafarroako Gobernuari exijitu diote 15 lanpostu berri sortzeko konpromisoa bete dezala

Nafarroako Basozainak taldeko hainbat kide Diputazioaren jauregiaren aurrean elkartu dira, Nafarroako Gobernuari eskatzeko bete dezala 2022an 15 lanpostu berri sortzeko hartu zuen konpromisoa, Basozainen Plan Zuzentzailean agertzen den bezala.

Kolektibo horrek bere harridura eta haserrea azaldu du Nafarroako Gobernuak orain esaten duelako lanpostu horiek ezin direla sortu, aurrekontu-esleipenik ez dagoelako. Basozainen iritziz, hori izugarrizko burugabekeria da, lanpostu horiek EH Bilduk eta PSNk sinatutako aurrekontu-akordioaren ondorioz sortu zirelako. 

Horregatik, Nafarroako Gobernuari exijitu diote sinatutako akordioak bete ditzala eta behar den guztia egin dezala 15 lanpostu horiek lehenbailehen sortzeko eta diruz hornitzeko.

Emakumeak, langabe zein enplegudunak, daude prekaritatearen erdigunean

Aritz Sorzabal
-
0
Emakumeak, langabe zein enplegudunak, daude prekaritatearen erdigunean

Herrialdeen artean alde nabariak badaude ere, Hego Euskal Herrian 747 langabe gehiago daude urtarrilarekin alderatuta. Nafarroan eta Araban langabezia igo bada, Bizkaian eta Gipuzkoan urtarrilean baino langabe gutxiago daude gaur publikaturiko datuen arabera. Herrialdeen artean aldeak daude, baita adin tarte edo sexu generoari dagokionean ere. Izan ere, oraingoan gazteak eta emakumeak izan dira langabeziaren igoera pairatu dutenak oro har, zerbitzuen sektorean lanean dabiltzanak.

Langabeziaren datuek enplegu bila aktiboki dabiltzanetatik enplegurik ez duen lortzen langile kopurua neurtzen digute. Enpleguaren bilakaera aztertzeko informazio garrantzitsua eskaintzen digute datuok. Ez dute azpienpleguan lanean ari den langile kopurua neurtzen ordea, ez eta esperantza galdu dutelako edo beste arrazoi batengatik enplegua bilatzeari utzi dioten langabeena. Enplegu bila ez dabiltzan eta doan etxeko eta zaintza lanak burutzen dituzten langile horien datuak ere ez daude gaur publikatu dituztenetan, nagusiki emakumeak diren milaka horienak, 182.000 langile Hego Euskal Herrian. Langabezia datuek beraz izebergaren punta soilik erakusten digute, eta lan eta enpleguaren eremuan gertatzen diren hainbat eta hainbat errealitate isilpean geratzen dira.

Gaurkoan, aurreko hilarekin alderatuta, langabe gehiago daude Hego Euskal Herrian. Eta, gainera, enplegua duten langileen baldintzak okertuz doaz urtez urte. Gaurkoan emakume gehiago ditugu langabezian, eta enplegua dutenen emakumeen errealitatean ere arreta jarri beharrean gaude. Izan ere, sektore feminizatuen lan baldintzak hobetzeko gero eta zailtasun handiagoak ditugula salatu beharrean gaude. Borrokak piztu eta garatu arren, patronalak uko egiten dio akordioari, uko langileen lan baldintzak hobetzeari. Ez da kasualitatea Hego Euskal Herrian emakumeen soldatak gizonezkoenak baino %20 baxuagoak izatea. Sexu-generoaren araberako lan banaketak balio gutxieneko enpleguetan kokatu ditu nagusiki emakumeak, bizitza sostengatzeko balio handienetakoa dutenean oro har. Patronalari hori ez zaio gehiegi axola ordea, balio erantsi gutxiago dutela argudiatzen baitute soldata baxuagoak justifikatzeko.

LABek, sektore eta enpresetan lan baldintzak hobetzeko borrokan jarraitzeko konpromisoarekin jarraitzen du, eta ez hori bakarrik, beharrezkoa dugu langile guztiei gutxieneko zoru amankomun bat ezarriko dien akordioa, gutxieneko soldata, soldata arrakala, lanaldi partzial inposatu eta lanaldi murrizketaren ingurukoa hain zuzen ere.

Otsailaren 22a, soldata arrakalaren aurkako nazioarteko eguna, pasa berri denean, eta Martxoaren 8a ate joka dugun honetan, diskurtsoetatik harago konpromiso konkretuak hartzeko garaia da. Patronalei arduraz jokatzea exijitzen diegu eta instituzioei eta eurak kudeatzen dituzten alderdi politikoei, ez ikusiarena ez egiteko, eta errealitate honen aurrean busti daitezela, euren ardura ez baita soilik enplegua sortzea, baita enplegu hori kalitatezkoa izatea eta banaketa orekatua izatea ere.

Enpleguaren defentsan esku har dezatela eskatu diegu erakundeei, Alconzan aurreikusitako kaleratzeen aurrean

Aritz Sorzabal
-
0
Enpleguaren defentsan esku har dezatela eskatu diegu erakundeei, Alconzan aurreikusitako kaleratzeen aurrean

Greba mugagabean daude Berangoko Alconzan, Irizar Taldeko enpresan, 38 langile kaleratu nahi dituen EEEa dela-eta. Langileek erakundeei egin diete dei, enplegu suntsiketaren kontra egin eta lantegiaren etorkizuna berma dezaten.

Hala, Eusko Jaurlaritzaren aurrean mobilizatu dira gaur, bilera baitute. Atzo gauza bera egin zuten Berangon. Bertako Udalbatzarekin bildu ziren, kasu honetan.

LAB sindikatuak Alconzan inor ez dagoela soberan nabarmendu nahi dugu. Hala, erakundeei eskatu diegu enpleguaren defentsan esku har dezatela, eta Jaurlaritzari, konkretuki, diru laguntzarik eman ez ditzala kaleratzeak dauden bitartean.

Artiach-eko langileek ehun egun bete dituzte greban, lan baldintza duinen defentsan

Aritz Sorzabal
-
0
Artiach-eko langileek ehun egun bete dituzte greban, lan baldintza duinen defentsan

Orozkon dagoen Artiach enpresako langileek ehun egun bete dituzte greban, eta, euren lan baldintzen alde borrokan sendo jarraituko dutela berresteko, mobilizazio eta aldarrikapen egun berezi bat egin dute. Bizikleta martxa, ekitaldia eta manifestazioa egin dituzte, besteak beste. Manifestazioari dagokionez, Deustuko Erriberatik Eusko Jaurlaritzaren Bilboko egoitzaraino joan dira.

Enpresa batzordearen oharraDeskargatu

Hitzarmen duin baten alde ari dira borrokatzen Artiach-en. Enpresak soldaten jaitsiera, lanaldiaren igoera eta osagarrietan murrizketak proposatu ditu. LAB lehen indarra da enpresa batzordean, eta sindikatutik berretsi nahi dugu, zuzendaritzaren jarrera ikusita, berriro agerian geratu dela antolakuntza, borroka eta mobilizazioa direla bidea langileen lan baldintzak defendatzeko. 

1...356357358...1,586Page 357 of 1,586

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus