Bizkaiko metalgintzako hitzarmenaren aldeko grebak, Tubacex, PCB eta Petronorreko lan gatazkak… azken hilabeteotan egondako hainbat gatazketan salatutako langileek agerraldia egin dute Bilbon, hainbat sindikaturen babesarekin. Bertan, manifestu bat aurkeztu dute, baita hemendik aurrerako ekimenen berri eman ere.
Langileen oharra:
Joan den urtarrilean manifestu bat argitaratu genuen, hainbat lan-gatazkatan errepresioak eragindako langileen ezinegona jasotzen zuena. Ildo horretan, Eusko Jaurlaritzari dei egiten zitzaion patronalarekin lerrokatzeko estrategia horri amaiera eman ziezaion eta langile klasearen mobilizaziorako eta grebarako eskubidea errespeta zezan. Horrelako egoerei elkarrizketaren eta negoziazioaren bidez ekitearen aldeko apustua egiten genuen. Dinamika bat jarri genuen martxan, gertakari horiek publikoki salatzeko, eta sindikatuen eta gizarte- mugimenduen atxikimendua eta konplizitatea jaso genuen, baita Enplegu Sailarekin eta Eusko Jaurlaritzako Segurtasun eta Herrizaingo Sailarekin elkarrizketa-bide bat irekitzeko asmoa ere.
Zoritxarrez, ikusi dugu nola jarraitu den errezeta berarekin Alconza edo Artiacheko gatazketan, eta zigor ekonomikoak iristen jarraitzen duten Tubacex eta Petronorri dagokienez. Nabarmentzekoa da Bizkaiko Metalaren Hitzarmeneko bi grebalariren aurkako kondena-epaia, zeinaren aurka errekurtsoa aurkeztu baita. Gainera, urtarrilaren amaieran bilera bat izan genuen Laneko sailburuordearekin, baina ezin dugu balantze positiborik egin. Egoera horri buelta emateko borondate falta nabarmena ikusten dugu, eta horren froga dira arestian aipatutako adibideak. Segurtasun eta Herrizaingo Sailarekin biltzeko eskaerari dagokionez, esan behar da erantzunik ere ez digutela helarazi.
Egoera gero eta larriagoa da. EAEko egungo gobernu-taldeak Mozal legearen aurka adierazpen publikoak egiten dituen bitartean, borrokan ari diren langileen eskubideen aurka zakarki aplikatzen du. Josu Erkoreka bozeramaileak, duela gutxi idatzizko hedabide baten eskainitako elkarrizketan, Tubacexen emandako poliziaren jokabidea defendatu du. Hau, arduragabekeri hutsa eta enpleguaren defentsarako eskubidea indarraren bidez desaktibatzeareko apustu argia da.
Horregatik, argi daukagu horrelako jardueren aurka agertzeko beharra zabaltzen jarraitu behar dugula. Akatsa litzateke langileek euren gain hartzea hauen aurkako mehatxuak, isunak eta ekintza judizialak. Jarduteko modu horren helburua ez da soilik oraina oztopatzea, baizik eta hurrengo belaunaldiak zalantzazko etorkizun batera kondenatzea. Bizi-baldintzak egunetik egunera okertzen ari diren testuinguru honetan, gure gatazketan zuzenean lagundu eta parte hartu duten gazteak epaituko dituzte, batzuk espetxe- eskaerekin, datozen asteetan, beren bizitzetan prekarietatearen hedapena salatzeagatik. Desproposamen horren aurrean, gure babesa adierazi nahi dugu eta datozen egunetarako deitu dituzten mobilizazioekin bat egin.
Amaitzeko, joan den urtarrilean egin genuen bezala, dei egin nahi diegu herritar guztiei ekainaren 7an, 09: 15ean, Berroeta Aldamarreko (Bilbo) epaitegien aurrean egingo dugun elkarretaratzean parte har dezaten, Aitor eta Arkaitz grebalarien aurkako akusazioak salatu eta Eusko Jaurlaritzari hauen baliogabetzea exigitzeko. Biak Bizkaiko metalaren hitzarmena lortzeko borrokan aritzeagaitik daude auzipetuta, eta 23 hilabeteko zigorra eskatu dute bakoitzarentzat.
AITOR- ARKAITZ, ZUEKIN GAUDE!
