Navarra Sin Fronteras elkarteko zuzendaritzak Enpresa Batzordeari jakinarazi dio enpresaren berehalako itxiera. Horretarako, ehunka mila euro alegatzen ditu 2020tik aurrerako galeretan. LAB sindikatuak 9 ordezkaritik 7 ditu Batzordean, eta enpresari bideragarritasun-plana eskatu dio, baina ixteko erabakia irmoa dela jakinarazi zaio. LABek gizarte-zerbitzuak publifikatzearen alde egiten jarraitzen du, ez dago prest enplegua suntsitzeko, eta, lehen protesta gisa, bihar 12:30ean kontzentratuko da Nafarroako Parlamentuaren aitzinean.
Navarra Sin Fronteras elkartea enpresa pribatu bat da, 150 pertsona inguru enplegatzen ditu eta, bertzeak bertze, egoera zaurgarrian dauden pertsonei arreta emateko Administrazioak azpikontrataturiko funtsezko gizarte-zerbitzuak kudeatzen ditu, baita Albernia Enplegu Zentro Berezia ere, desgaitasunen bat duten pertsonei lana ematen diena.
Zuzendaritzak itxieraren berri eman dio Enpresa Batzordeari, eta adierazi du azken urteotan galera ekonomikoak izan dituela. Zehazki, 237.000 € 2021ean eta bertze 216.000 € 2020an; 2022rako, berriz, 500.000 €-ko galera aurreikusi du. LAB sindikatuak ez du ulertzen ahal nola iritsi den enpresa puntu horretara; izan ere, zuzendaritzak ez daki azaltzen arazoaren arrazoi zehatzak. Alegatu dute Administrazioak ez duela nahikoa finantzatu, baina hori ulertzen zaila da, batik bat bertze enpresa batzuk antzeko zerbitzuak inolako arazorik gabe kudeatzen ari direlako.
Milioi askoko galerak izan dira urtetik urtera, eta ez da ikusi egiazko kezkarik edo jarrera proaktiborik, ezta erabaki horren berri emateko eta plantillari aurpegia emateko ere; komunikazioaren erantzukizuna baliabideak kudeatzen dituzten koordinatzaile eta arduradunen esku utzi dute. Ulertezina da.
LABek bideragarritasun-plan bat eskatu du, eta zuzendaritzak erantzun du erabakia irmo hartua dela: enpresak ateak itxiko ditu, baina ez dakite noiz. Administrazio kontratatzaileei jakinarazi diete uko egiten diotela kudeatzen jarraitzeari, eta zerbitzuen kudeaketan eskualdaketa egitea planteatzen dutela.
Nafarroako Gobernuak LAB sindikatuari jakinarazi dio bere asmoa dela kudeaketa ahalik eta azkarren eskualdatzea eta plantilla subrogatzea. Arazoa da plantilla osoa ez dagoela baldintza-agirietara atxikita eta, beraz, langile guztiak ezin direla subrogatu; horregatik, baliteke angile batzuek lana galtzea. Horren aurrean, sindikatu honen aldarrikapena argia da: langileek ez dute arazo hau sortu eta ez dute egoera honen galtzaile izan behar; horregatik, ez dugu onartuko enplegua suntsitzea.
LAB sindikatuak jarraitzen du pentsatzen publifikazioaren alde egin behar dela behingoz eta betiko, modu serio, irmo eta ausartean. Funtsezko gizarte-zerbitzuen kudeaketa pribatizatuz horrelako egoerak gerta daitezen laguntzen baita. Gizarteak kalitatezko zerbitzu publikoak behar ditu, esku eta interes pribatuen kudeaketatik kanpo. Alde horretatik, LABek bihar, irailaren 13an, elkarretaratzea eginen du 12:30ean, Nafarroako Parlamentuaren aitzinean, pribatizazio horiek guztiak bukatzeko eskatzeko.
