2026-05-01
Blog Page 281

Gizarte Ekimeneko sindikatuok Lan Hitzarmenaren negoziazio mahaia agortua dagoela salatzen dugu

Zubiate(e)ko Aritz
-
0
Gizarte Ekimeneko sindikatuok Lan Hitzarmenaren negoziazio mahaia agortua dagoela salatzen dugu

LAB, ELA, STEILAS, CCOO eta UGT sindikatuok Gizarte Ekimeneko Ikastetxetako Lan Hitzarmenaren negoziazio mahaia agortua dagoela salatzen dugu. Patronalek edukiak izango dituen proposamen bat egin ezean, mobilizazioei ekitea beste biderik ez dugu izango, eta sektoreko langileak mobilizazio dinamika honetan parte hartzera deitzen ditugu.

Gizarte Ekimeneko Lan hitzarmen berriaren negoziaketa prozesuan, 13 negoziazio bilera gauzatu ditugu jadanik. 2022Ko maiatzean hasitako negoziaketetan, sindikatu guztiok ildo berdintsutik doazen eskaerak jarri ditugu mahai gainean. Patronalek, ordea, ez dute inolako negoziaketarako borondaterik erakutsi. Are gehiago, jadanik aurreko Lan hitzarmenean lortutako eduki batzuen inguruan atzerapausoak planteatu dizkigute. Besteak beste, tutoretza plusa erregulatzen duen artikuluaren erredakzio aldaketa, Haur Hezkuntzako Lehen zikloko eta Lanbide Heziketako langileek plusa jasotzeko eskubidea gal dezaten, Lanbide Heziketan asteko derrigorrezko 26 eskola-orduren ezarpena, Aste santu eta Gabonetan gozatu ez diren oporrak berreskuratzeko eskubidea kentzea, edo Hitzarmenean jasotako soldata zein lan-baldintzen betetzea finantzaketa publikora lotzea.

Azken negoziaketa-mahaia otsailaren 2an izan zen. Bilera hura hurrengo mahai baterako datarik gabe amaitu zen. Izan ere, Kristau Eskola eta AICE-IZEA patronalek oso argi adierazi ziguten ez zutela edukien inguruko proposamenik egingo. Horretarako, aldez aurretik entzundako argudio berdinak jarri dituzte aitzakia gisa. Ziurgabetasun eszenatoki bat eta ikastetxeen bideragarritasuna bermatzeko beharra, beraien finantziazioa inoiz baino handiena izango denean zaharrak berri!

Haatik, Eusko Jaurlaritzarengana eskutik joateko planteamendua egin ziguten. Sindikatuok oso presente daukagu Eusko Jaurlaritzak baduela zeresanik, baina argi dago, une honetan mahaian egindako planteamenduak lan hitzarmenaren negoziaketa luzatzeko, beraien ardura lausotzeko eta mobilizazioa ekiditeko patronalen estrategia bati erantzuten diola.

Hortaz, argi dugu Kristau Eskola eta AICE-IZEAren inmobilismoa, erantzukizun falta eta erasoen aurrean langileok ez garela geldirik geratuko. Tamalez, patronalek negoziazio kolektiboari zilegitasuna kendu nahi eta gatazka berriro sortzeko hautua egin dute, langileoi mobilizazioen bidea besterik ez utziz.

Hau horrela, ohar honen bitartez, Gizarte Ekimeneko sindikatuok:
• Mahai negoziatzailea blokeatuta dagoela partekatzen eta salatzen dugu;
• Lan Hitzarmenaren negoziaketarako aldarrikapen nagusiak zerrendatzen ditugu;
• Zentzuzko negoziazioa ahalbideratuko lukeen edukizko planteamendua mahai gainean jartzeko deia egiten diegu patronalei
• Eta, azkenik, patronalen aldetik edukiak izango dituen proposamen bat egin ezean mobilizazioei ekitea beste biderik ez dugula izango adierazi nahi dugu.

Lan-zama areagotzen ez duen formakuntza adostua eta ikastetxeko autonomiaren araberakoa eskatzen diogu EAEko Hezkuntza Sailari

Zubiate(e)ko Aritz
-
0
Lan-zama areagotzen ez duen formakuntza adostua eta ikastetxeko autonomiaren araberakoa eskatzen diogu EAEko Hezkuntza Sailari

Mobilizazio dinamika abiatu dugu gaur “Lan Zama gehiagorik ez, formakuntza adostua bai! Curri-digi: pertson@k helburu?” lelopean, EAEko Hezkuntza Publikoko irakasleei curri-digi izeneko formakuntzak sortutako noraeza, lan zama handitzea, eta ordutegiz gaindi lan egitea salatzeko. Araban hasi dira prestakuntza era adostuan antolatzeko eskatzeko egingo dituen mobilizazioak.

Goizean, Gasteizko Europa Jauregian Berrikuntza Arduradunek ikastaro bat jaso dutela-eta, protesta haraino eraman du LABek irakasle figura hauen funtzioak langileen ordezkariekin negoziatu behar direla eskatzeko. Egunean zehar, gainera, Arabako zenbait ikastetxetan eskaera berdina egin dute irakasleek: besteak beste, Gasteizeko Aita Orbison, Odon Apraizen, Mariturrin, Salburua eta Errekabarrin; Abendañoko ikastolan, Murgiako Oroko Andra Mari ikastetxean eta Maeztuko herri ikastetxean.

2022ko maiatzaren 26an beste sindikatu batzuekin batera LABek lortutako akordioari esker, Berrikuntzarako arduradunak ditugu egun eskola publikoetan. Irakasle hauen lana zentro bakoitzaren garapen metodologikoan bidelagun izatea beharko lukeen arren, bestelako eginkizunetan jarri ditu Hezkuntza Sailak; ikastetxe bakoitzaren beharrei kasu egin gabe eta baliabideak Europako funtsen exigentzia arrotzetara bideratuz.

LABen borroka beti izan da ikastetxeen autonomian sakontzeko tresnak eskuratzea eta horren baitan, ikastetxe bakoitzak beharrezko dituen formakuntzak identifikatu eta planifikatzea, Sailaren eginkizuna izanik horretarako baliabideak ahalbidetzea.

Horregatik, Hezkuntza Sailari eskatzen diogu formakuntzarako proposamen oro langileekin adostua eta aurrez planifikatua izan behar duela. Sekula ere lan zama handituz, lan-ordutegiaren barruan eta digitalizazioari dagokionez, 60 urtetik gorakoentzako salbuespenak eginez.

Gure ustez, euskararen normalkuntzarako, pedagogia feministarako, inklusiorako eta berrikuntza metodologikorako baliabideak dira lehentasuna Euskal Eskola Publiko Komunitariorako bidean.

Honengatik guztiagatik, gaurko mobilizazioaz gain, elkarretaratzeak deitu ditugu ostegunean  Bizkaiko eskola publikoetan eta hilaren 21ean Gipuzkoan.

Donostiako DHL Parcelen hitzarmen duina lortzeko borrokan jarraitzen dugu

Zubiate(e)ko Aritz
-
0
Donostiako DHL Parcelen hitzarmen duina lortzeko borrokan jarraitzen dugu

DHL PARCEL GIPUZKOA SPAIN S.L enpresan sinatutako azken Hitzarmen Kolektiboa 2018ko urtarrilaren 1ean sartu zen indarrean, lau urterako; hau da, 2021eko abenduaren 31ra arte. Indarraldia amaituta, hainbat bilera ospatu izan dira Enpresa Batzordearen eta Enpresaren artean, Hitzarmena berritzeko helburuarekin. Bi aldeak adostasunetik oso urrun gaude, ordea.

Alde batetik, langileen ordezkaritzatik KPI-a bermatzeko beharra ikusten dugu: bizitza garestitzearekin, DHL-ko plantillaren eros-ahalmena handitu egin behar dela defendatzen dugu. Aldiz, kontua da Enpresak behin eta berriro adierazi duela ezin duela KPI-rik ordaindu, nahiz eta erantzun hori arraroa egiten zaigun DHL bezalako multinazional baten aldetik.

Bestalde, egunerokotasuneko gestio eta produkzioan zuzendu beharreko kontu ugari daude: ordu gehigarrien erabilera, kategoria profesionalen aitorpena, plus ezberdinen ordainketak, etab. Beraz, gure eskubideen defentsan eta lan-baldintza duinak lortze aldera, kalera atera gara!

Pasaden astean, martxoaren 7an, lehen kontzentrazioa antolatu genuen: Fernando Mugika, 1 kalean elkartu ginen (Belartzako Mercadona parean), 12:45etatik 13:30etara. Gaur, martxoak 14, mobilizazio-eredu berean jardun gara: 13:00etatik 13:30etara lehengo asteko toki berean bildu gara, gure aldarrikapenak egitera.

Mobilizazioekin hasi ginenetik, Enpresak ez du berriro bildu eta akordio bat lortzen saiatzeko ahaleginik adierazi. Beraz, bidea koplexua izan daitekeela uste dugu, baina gogotsu gaude gurea dena defendatzeko!

Osasungintzaren pribatizazioa geldiarazteko beharra azpimarratu eta Osasunbideko langileek deitutako mobilizazioan parte hartzeko deia luzatu du Eskubide Sozialen Kartak

Zubiate(e)ko Aritz
-
0
Osasungintzaren pribatizazioa geldiarazteko beharra azpimarratu eta Osasunbideko langileek deitutako mobilizazioan parte hartzeko deia luzatu du Eskubide Sozialen Kartak

“Euskal Herriko Eskubide Sozialen Kartatik, osasun-sistema publikoak egin beharko lituzkeen jarduera askoren deribazioak, azpikontratazioak eta kanporatzean salatu nahi ditugu. Finean, jarduera hauen pribatizazioa salatu nahi dugu prentsaurreko honetan. Izan ere, zentro pribatuetara deribazioak finantziatzen diren bitartean, sistema publikoak gero eta pisu handiagoa galtzen du aurrekontuetan”, adierazi dute Medicis enpresaren lokalaren aurrean egindako agerraldian. Hain zuzen ere, Osasun Zerbitzuak zentro horretara bideratzen ditu lesio eta patologia jakin batzuk diagnostikatzeko behar diren irudi-proba ohikoenetako batzuk (erresonantzia magnetikoa, ekografiak…), eta pribatizazioranzko joera hori islatzen duen adibideetako bat da, San Migel edota San Juan de Dios kliniken kasuan gertatzen den bezala: “Izan ere, lankidetza publiko-pribatuaren aldeko apusta egiten dutela esaten badute ere, aurrekontu publikoen parasitazioan eta empresa horietako enplegu- eta lan-baldintzen okertzea gauzatzen dute errealitatean”.

Ildo beretik, Osasunbidea – Nafarroako Osasun Zerbitzutako Intersindikalak (LAB, CCOO, UGT, ELA eta SAE) eta Nafarroako Osasun Plataformak martxoaren 15, 18 eta 23rako deitutako mobilizazioetan parte hartzeko deia egin nahi izan diete herritarrei Eskubide Sozialen Kartatik.

Kartak nabarmendu duenez, jendartea mobilizatzea beharrezkoa da pribatizazio horri aurre egiteko: “Ospitaleko sukaldeen itzultzeak, CUNeko pertsonalari eta haien familiei osasun-arreta emateko kontratuak baliogabetzeak eta bateraezintasun medikoen anulazioaren paralizazioak adierazten digute zeinen garrantzisua den gizarte-mobilizazioa; deskapitalizazio eta pribazitazio arriskuan dagoen osasun-sistema publikoaren defentsan”. Hala, ordezkari politikoei ere dagokien erantzukizuna beren gain hartzeko exijitu diete.

Martxoaren 15ean, asteazkena, 11:00etan kontzentrazioak egingo dira osasun zentroetan. Hilaren 18an (larunbata) berriz, manifestazioa egingo dute, 17:30ean Golem zinemetatik abiatuta. Azkenik, martxoaren 23an Nafarroako Osasun Zerbitzuan egitekoa den grebari ere babesa adierazi dio Eskubide Sozialen Kartak.

Transfusio eta Giza Ehunen Euskal Zentroan beste 13 greba egun deitu ditugu, apirilaren 18tik 30era, Osakidetzak eta Osasun Sailak negoziatzeari uko egin diotelako

Zubiate(e)ko Aritz
-
0
Transfusio eta Giza Ehunen Euskal Zentroan beste 13 greba egun deitu ditugu, apirilaren 18tik 30era, Osakidetzak eta Osasun Sailak negoziatzeari uko egin diotelako

Orain arte deitutako 14 greba-egunen arrakastaren ondoren, eta Osakidetzaren eta Osasun Sailaren immobilismoaren aurrean, beste 13 greba-egun deitu ditugu, jada 27 greba-egun direlarik, gatazkaren konponbide negoziatu bat eskatzeko.

Transfusio eta Giza Ehunen Euskal Zentroko langileek 2021eko abenduan, 2022ko apirilean eta abenduan eta 2023ko otsailean egindako greben jarraipena Osakidetzaren eta Osasun Sailaren aurrean aldarri bat izan da; hala ere, jarrera immobilista izaten jarraitzen du, eta gatazkaren konponbidea negoziatzeari uko egin dio. 2021eko apiriletik, Mahai Sektorialera proposamen bat ekarri zuen, eta, jarraian, erretiratu egin zuen. Hortik aurrera ez da mugimendurik egon, nahiz eta sindikatuok eta langileek negoziatzeko eta gatazka konpontzeko borondatea erakutsi dugun.

· 2021eko apirileko Mahai Sektorialetik, etengabe eskatu dugu gatazkaren negoziazioa Mahai Sektorialen gai-zerrendan sartzea, eta Osakidetzak uko egin dio horri.


· 2022ko abenduaren 7an, Mahai Sektorialeko sindikatuok Gotzone Sagardui sailburuarekin bildu ginen, eta negoziatzeko borondatea agertzeko eskatu genion, TGEEZren gatazka berehala konpontzeko. 3 hilabeteren ondoren, ez dugu erantzunik jaso.


· 2023ko otsailaren 14an, Greba Batzordeak Osakidetza, Osasun Saila eta Transfusio eta Giza Ehunen Euskal Zentroko Zuzendaritza deitu zituen Lan Harremanen Kontseiluan bilera bat egiteko, eta ez ziren hitzordura joan.


· Otsailean zehar eta 2023ko martxoan birritan, sindikatuok Mahai Sektorialera deitu gaituzte, eta gai-zerrendan ez dago Transfusio eta Giza Ehunen Euskal Zentroaren gatazkari buruzko aipamenik.

Hori da Osakidetzak eta Osasun Sailak Osakidetzako langileen lan-baldintzak negoziatzeko eta hobetzeko duten borondatea.

Aitzitik, Administrazio Publikoaren jarrera horrek zuzenean eragiten die herritar guztiei; izan ere, haien jarrera inposatzaileari esker, odolaren, ehunen eta odol-eratorrien erreserbak murrizten ari dira. Horiek beharrezkoak dira hainbat tratamendu eta interbentzio egiteko, eta dagoeneko Osakidetzako hainbat ESItan eragiten ari dira. Jarrera horri eutsiz gero, egoera larriagotu egin daiteke, interbentzio kirurgikoak eten behar izateraino.

Horregatik, Transfusio eta Giza Ehunen Euskal Zentroko langile guztien soldata-baldintzak parekatzeko eta jasaten ari diren diskriminazioarekin amaitzeko borrokan jarraitzea beste aukerarik ez dago. Sindikatuetatik gatazkaren konponbidea negoziatzeko borondatea agertuko dugu etengabe, eta Osakidetzari eta Osasun Sailari ildo horretan urratsak emateko eskatzen diegu.

Akordio onak lortzeko, borroka ezinbertzeko tresna dela frogatu da Eduardo Albeniz enpresan #LortuDugu

Zubiate(e)ko Aritz
-
0
Akordio onak lortzeko, borroka ezinbertzeko tresna dela frogatu da Eduardo Albeniz enpresan #LortuDugu

LAB sindikatuak alde bakarrez egindako lanuzte egutegiari esker, Barbataingo Eduardo Albeniz etiketatze enpresan lau urtetarako Nafarroako KPIa bermatzea lortu da.

Hasiera batean Enpresa Batzordean ordezkaritza zuten sindikatu guztiek (LAB, UGT eta independenteak) aldarrikapen bateratua bazuten ere, laster ikusi zen UGT eta independenteak Nafarroako KPIari uko egiteko prest zeudela. Arrisku horren aitzinean, borroka egutegi bat planteatzeko beharra ikusi zuen LABek, bai enpresa eta baita langileen eskubideak saltzeko prest zeuden sindikatuak ere baldintzatzeko asmoz. Zorionez, erran daiteke deialdia egitea nahikoa izan zela sindikatu honek markaturik zituen helburuak lortzeko.

Enpresarekin adosturiko akordioan lortu da hurrengo lau urteetarako Nafarroako KPIa bermatzea. Horretaz gain, ezintasun arruntak 2. egunetik 4.era %85arekin osagarrituko dituzte eta 5. egunetik aitzinera %100ean.

LAB sindikatuak Eduardo Albeizeko langileak zoriondu nahi ditu, beraien jarrera tinkoari esker lortu ahal izan delako garaipen hau.

Pentsioen erreforma: egiteko moduak kritikatzeaz gain, azken hamarkadetako murrizketak lehengoratzea eskatu eta euskal erakundeen utzikeria salatzen dugu

Zubiate(e)ko Aritz
-
0
Pentsioen erreforma: egiteko moduak kritikatzeaz gain, azken hamarkadetako murrizketak lehengoratzea eskatu eta euskal erakundeen utzikeria salatzen dugu

Espainiako Gobernuak Estatuko elkarrizketa sozialeko mahaian aurkeztutako pentsioen erreformaren xehetasunak ezagutu eta baloratu bitartean, LABen lehenengo balorazioa honako hau da:

Lehenik eta behin, kritika egiten diegu Espainiako Gobernuak erabilitako moduei. Europako Batzordearekin aldez aurretik adostutako erreforma da, eta horrek erakusten du zer nolako tutoretza daukan. Eta erreforma hori Hego Euskal Herriko gehiengo sindikala ordezkatzen ez duen mahai batean aurkezten da: euskal langileen pentsioei eragiten dieten erabakiak haien parte-hartzerik gabe eztabaidatzen dira.

Erreformaren edukiari dagokionez, azken hamarkadetako murrizketak lehengoratzea eskatzen dugu, besteak beste, erretiro-adina 67 urtera atzeratzea, kotizaziopeko pentsioa eskuratzeko gutxieneko kotizazio-aldia handitzea, eta pentsioaren zenbatekoa kalkulatzeko epea handitzea. Era berean, genero-arrakalarekin eta miseria-pentsioekin amaitzeko neurriak eskatzen ditugu, hala nola lan egin duten baina kotizatu ez duten emakumeei zor patriarkala aitortzea eta 1.080 euroko gutxieneko pentsioa berehala ezartzea, progresiboki 1.260 euroraino igotzeko. Hobekuntza partzial batzuk gorabehera (errenta altuenei kotizazioak areagotzea, kasurako), Espainiako Gobernuak aurkeztutako erreformak ez ditu gai horiek modu estrukturalean jorratzen.

Bestalde, hainbat komunikabidetan argitaratu denez, Espainiako Gobernuaren asmoa kotizazio-aldia 25 urtetik 27ra luzatzea litzateke (29, bi txarrenak kenduta), pixkanaka. Alde horretatik, lehengo lepotik burua: kalkulua egiteko epea luzatzen joan da, 2 urtetik 8ra (1985), 8 urtetik 15era (1997) eta 15 urtetik 25era (2011), betiere pentsioen zenbatekoa murrizteko helburuarekin.

Azkenik, kritikatu egiten dugu euskal erakundeek pentsioen gaiarekiko erakusten duten utzikeria. LABen ustez, EAEko eta Nafarroako Gobernuek pentsioen gaineko eskumen esklusiboa eskatu beharko lukete, eta transferentzia hori egiten ez den bitartean, euskal pentsiodunen gutxieneko pentsioa 1.080 eurora arte osatu beharko lukete, Euskal Herriko Pentsiodunen Mugimendua aste honetan baraualdi baten bidez aldarrikatzen ari den bezala. Bihar, asteartea, LABeko ordezkaritza bat joango zaie bisitan, Garbiñe Aranburu koordinatzaile orokorra buru izango dutela, babesa eta elkartasuna adierazteko asmoz. Horri dagokionez, Pentsiodunen Mugimenduak martxoaren 18rako Bilbon deitutako manifestazioan parte hartzeko deia egiten diegu euskal langileei.

Arabako Esku-Hartze Sozialeko Hitzarmena sinatzea #LortuDugu

Zubiate(e)ko Aritz
-
0
Arabako Esku-Hartze Sozialeko Hitzarmena sinatzea #LortuDugu

Gaur, 2023ko martxoaren 10ean, ostirala, iragarri dugu Arabako Esku-hartze sozialeko III. Hitzarmena sinatu dela. Lan Harremanen Kontseiluan goizean egindako bileran testu osoa sinatu dute eta argitaratzeko izapideak hasi ditugu.

Azken urtean birritan jakinarazi dugu negoziazioa ixtea ahalbidetzen zuen akordio bat lortu zutela. Lehenik iazko udan, testuaren eduki nagusiak jasotzen zituen aurreakordioa sinatu ostean, eta bigarrenez duela zenbait aste, urtarrilaren 18an, testu osoaren akordioa itxi ondoren. Jakinarazi izan dugun bezala, momentu hartan Arabako Foru Aldundiak zuzenean esku hartu zuen lortutako akordioan, hitzarmenean jasotako atzerapenen kobrantza baldintzatu zuelarik. Egoera horri erantzuteko, mahaian ordezkaritza duten sindikatu guztiok martxoaren 15ean, 16an, 21ean, 22an eta 23an bost greba egun deitu genituen, eta greba mugagaberako deialdia egiteko asmoa iragarri genuen, harik eta blokeo-egoera konpondu arte.

Gaur goizean, akordioa sinatu ostean, grebak bertan behera utzi ditugula baieztatu dugu, eta LABek funtsezko hiru aipamenekin itxi nahi du negoziazio prozesua:

Arabako Foru Aldundiaren injerentzia salatzen dugu, hitzarmena negoziatu den bi urteetan akordio bat lortzeko aukera oztopatu baitu. Hasieran ez zuen negoziazio-mahaian lortutako akordioa finantzatzeko konpromisorik hartu, eta, gero, azken asteetan, negoziazioaren itxiera blokeatu izan du. Uste dugu esku-hartze sozialaren sektoreko zerbitzu sozial gehienen titularra den erakunde honen jardunak erakusten duela LABek luzaroan adierazitako exijentziaren garrantzia: sektore honetako langileak langile publikoak izan daitezela.

Salatu nahi dugu, halaber, Arabako esku-hartze sozialeko patronalak, AISAk, agerian utzi duela bi urte hauetan erakundeekin erabat lerrokatuta dagoela, bere behar propioei erantzunez eta sektoreko langileen interesak urratuz.

Azkenik, adierazi behar dugu sektoreko langileen antolakuntza eta mobilizazioa erabakigarria izan dela, negoziazioak aurrera egin ez duen aldi orotan. Hori dela eta, gaur berriro ere helarazi nahi izan dugun mezua da borrokak merezi duela. Horrenbestez, zorionak langile guztiei.

Uliazpiko joan den asteko epaia deitoratzen dugu

Zubiate(e)ko Aritz
-
0
Uliazpiko joan den asteko epaia deitoratzen dugu

Euskal Autonomia Erkidegoko Justizia Auzitegi Nagusiak Uliazpin 34 zaintzaile-plaza betetzeko deialdia eta prozeduraren oinarriak baliogabetzat jotzen dituen epaia aztertu ondoren, Uliazpiko Enpresa Batzordearen gehiengoak, hau da, LABeko bost ordezkariek eta ELAko hirurek, guztiz arbuiatzen duela adierazi du. Beste bost ordezkari dituen CCOOk, aldiz, uko egin dio epaia gaitzesteko adierazpena babesteari.

Epaia guztiz bidegabea da langileek plaza bat lortzeko egin duten ahaleginarekin, Lan Eskaintza Publikoa egiteko 15 urte baino gehiago zain egon ondoren. Horrez gain, erabiltzaileen, senideen eta erakunde publikoko langileen eskubideen aurkako eraso
larria dela uste dugu. Oinarri horiek, gainera, aho batez onartu genituen batzordeko ordezkari garen sindikatu guztiek, Euskara Plana onartu zen bezala, zeinaren testutik eratorri baita aipatutako LEP.

Uliazpi adimen-desgaitasuna duten pertsonen eta haien familien bizi-kalitatea garatzen laguntzen duen erakundea da, eta hizkuntza-eskakizunak, herritarren eskubideei erantzuteaz gain, lanpostuaren ezaugarriei lotuta daude, erabiltzaileek behar dituzten laguntzak emateko beharrezkoak baitira. Hori dela eta, uste dugu epaiak akats larria egiten duela pertsona orok enplegu publiko bat lortzeko duen eskubide generikoa eta lanpostu jakin baterako baldintzak betetzeko beharra nahasten dituenean. Izan ere, Uliazpin hezkuntza-lanak egiteko, komunikazioa, eta, beraz, hizkuntzaren ezagutza, funtsezkoa da langileek esleituta dituzten zereginetan.

Epaimahaiak deialdia baliogabetzen duenean, hizkuntza-eskakizuna duten plazen kopurua gehiegizkoa dela iritzita, langileek plaza lortzeko egiten duten ahalegina gutxiesteaz gain, urratu egiten du erakundeek herritarren hizkuntza-eskubideak bermatzeko duten betebeharra, eta urratu egiten ditu gure erakundeek duela 30 urte baino gehiagotik euskararen normalizazioan aurrera egiteko adostutako hizkuntza-planak; horrez gain, urratu egiten du Uliazpiko erabiltzaileek behar dituzten laguntzak jasotzeko beraiek dakiten hizkuntzan komunikatzeko duten eskubidea.

1...280281282...1,613Page 281 of 1,613

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus