2025-12-30
Blog Page 228

Arcelorrek eta sindikatu estatalek euskal ordezkaritza errespetatzen ez duen akordio berri bat erdietsi dute

Zubiate(e)ko Aritz
-
0
Arcelorrek eta sindikatu estatalek euskal ordezkaritza errespetatzen ez duen akordio berri bat erdietsi dute

Bost urte luze ondotik, Arcelorrek eta estatuko sindikatuek Asturiaseko interesen neurriko Akordio Marko berri bat erdietsi dute.

Azkenean, aurreikus zitekeen egoera eman da eta, ohikoa den moduan, betikoek betikoekin hurrengo urteetarako lan baldintzak ezarriko dituen Akordio Marko eskas bat inposatu diete Euskal Herriko Arcelorreko lantegiei.

Alde batetik, garbi gelditzen da edukiak hagitz urrun daudela duinak edo onuragarriak izatetik, are gehiago kontutan hartzen badugu enpresak azken urteetan inoiz izan dituen irabazi ekonomiko handienak izan dituela. Ez genuen bertzerik espero marko estatal batetik eta sindikatu paktisten aldetik. Tristea da horrelako edukiak adosteko bost urte luzez euskal lantegietako negoziaketa kolektiboa bahituta izan izana.

Aipatutako bahiketa hori negoziaketan zehar egon den euskal sindikatuekiko errespetu falten adibide bat baino ez da. Eta errespetu faltak aipatzeko beharrean gaude, alde batetik Olaberria eta Bergara bezalako euskal lantegiei bertan egotera inposatu zaie, euren hitza eta nahia kontuan hartu gabe, modu horretan bertzeen erabakien menpe egotera bortxatuz, eta bertze aldetik, negoziaketa bilera aunitzetan, eta azkenekoetan are gehiago, bizi behar izan dugu nola ordu luzeetako etenaldiak eskatzen ziren estatu mailako sindikatu batzuekin negoziatzeko. Bitartean, euskal ordezkaritza esperoan egon behar izaten zen, bueltatzerakoan dagoeneko guztiz bideratutako eztabaida batekin aurkitzeko.

Gure aldarrikapen eta posizioa, betiko moduan, garbia da eta ikusita zenbat luzatu den azken Akordio Marko hau, ze baldintzetan sinatu den eta ze modutan bideratu den negoziaketa, aldarrikapen hau indartu bertzerik ez da egin; Euskal Herriko negoziaketa marko propioa, hemen borrokarako gaitasun gehiago dugulako, ez gaudelako Asturiasen mesedetan Euskal Herriko lantegiak nola desegiten diren ikusteko prest eta hemen ez garelako saltzen.

Hemendik aurrera, hurrengo kapitulua zabaltzen da, lantegietako akordioak borrokatzea. LABek argi eta garbi adierazi nahi du Akordio Marko ziztrin honek baldintzatuta bada ere, ez dugula inongo atzera pausurik onartuko Euskal Herriko lantegietan eta lan baldintza duinen eta enpleguaren defentsaren alde borrokatuko dugula.

Azkoitian gertatutako lan-heriotza salatu eta berehalako neurriak eskatu ditugu

Zubiate(e)ko Aritz
-
0
Azkoitian gertatutako lan-heriotza salatu eta berehalako neurriak eskatu ditugu

Aurten Euskal Herrian hildako 20. langilea gogoan izan eta familiari, lankideei nahiz ingurukoei doluminak adierazteaz gain, beste behin ere exijitu dugu patronalak nahiz instituzioek laneko prebentzio neurriak betetzeko eta betearazteko duten erantzukizunari behingoz heltzeko.

Hilaren 11n zendu zen R.O.G., 62 urtekoa, Montajes Olaizola S.L. enpresako langilea, garabi bat maneiatzen ari zela altueratik erorita. LAB-ESK-STEILAS-EHNE-HIRU intersindikalaren izenean, Ugarte industrialdearen sarreran egin dugu gaurko elkarretaratzea, enpresa bertan baitago kokatuta.

Eraikuntza sektorean gertatutako istripu hau ez da kasu isolatua. Izan ere, gremio ezberdinen koordinazioan sortzen diren arrisku gehituak kontrolatzeko araua ez da betetzen.

Hori gertatzen da patronalak kapitala langileriaren bizitzaren aurretik jartzen duelako. Bada, hori ahalbidetzen duena Eusko Jaurlaritza ere bada, ez baititu beharrezko neurriak hartzen lan osasun eta prebentzio arloko arauak zorrotz bete daitezen.

Nabarmentzekoa da Azkoitikoa ez dela izan Euskal Herrian hil den azken behargina. Izan ere, joan den astean, hilaren 18an, egun batzuk lehenago Burlatako industrialde batean lanean zebilela larriki zauritu zen 22 urteko langile gaztea zendu zen. Hori dela eta, LAB-ESK-STEILAS-EHNE-HIRU CGT intersindikalak elkarretaratzea egingo du bihar, asteartea, 11:30ean Iruñean, Nafarroako Gobernuaren aurrean.

Kanpaldia hasi dugu Gurutzetan Osakidetzako garbiketako langileen grebaren baitan

Zubiate(e)ko Aritz
-
0
Kanpaldia hasi dugu Gurutzetan Osakidetzako garbiketako langileen grebaren baitan

Osakidetzako garbiketa-zerbitzuaren enpresa esleipendunetako langileok hilabete eta erdi baino gehiago daramagu Greban, gure hitzarmena defendatzeko. Alegia, lan-baldintzak Osakidetzako langileen baldintzekin homologatzea helburu duen hitzarmena.

Horiek izan dira, hain zuzen ere, bere garaian inplikatutako hiru alderdiok (enpresak, langileak eta Osakidetza) onartu genituen joko-arauak, eta horien arabera jardun dugu urteetan eta urteetan.

Hala ere, enpresek eta Osakidetzako zuzendaritza homologazio-printzipioa hausten ari dira, uko egin baitiote Osakidetzako langileei azken urte hauetan aplikatu zaien gaiak egokitzeari eta aplikatzeari.

Ez gara homologaziotik haratago doazen gaiak aldarrikatzen ari, EZ! Besterik gabe, Osakidetzako langileen baldintzen homologazioari eustea eskatzen ari gara: karrera profesionalaren deialdietara sarbidea izatea; txanda-kontratuari lotutako erretiro partziala hartzea; lanpostu hutsak betetzeko sistema bidezkoagoa eta objektiboagoa… Azken batean, eskatzen ari gara lan berdina egiten dugunean, baldintza berdinak izatea.

Enpresa esleipendunek eta Osakidetzako zuzendaritzak elkarri botatzen diote pilota, eta garbiketa-zerbitzuko langileok, berriz, beharrik gabe luzatzen ari den bidegabekeria handia jasaten ari gara.

Maiatzean, gehiengo sindikalak keinu bat egin du negoziazioan planteamendu berri bat eginez; hala ere, enpresak intransigente agertu dira, eta Osakidetzako zuzendaritzak ez dio eskaintzari erantzun.

Egoera honek mobilizatzera eta sektoreko grebak deitzera bultzatu gaitu. Ez gaude prest dagokiguna galtzen uzteko. Dagokiguna defendatzeko erabaki irmoa dugu. Ildo horretan, beste pauso bat emango dugu, eta aste honetan protesta gogortuko dugu; gaur,
Gurutzetako Ospitalearen aurrean kanpaldia hasiko dugu, eta bertan langileok gauak igaroko ditugu, eta eguneko 24 orduetan bertan egongo gara. Programa bat prestatu dugu, eta bertan hainbat jarduera eta mobilizazio egingo ditugu egunero.

Hauteskunde-kanpainan gaudela, mezu bat bidali nahi diogu EAJri, alderdi horretakoa baita Gotzone Sagardui Osasun sailburua, Osakidetzako arduradun nagusia eta, beraz, arduradun politikoa gatazka honetan: iraingarria eta lotsagarria iruditzen zaigu zuen
jarrera. Urtebete baino gehiago irekita daraman lan-gatazka baten aurrean, Osasun Sailak beste alde batera begiratu du, langileekiko erabateko axolagabekeria eta mespretxua erakutsiz; Osakidetzako Zuzendaritzak luzatu dizkiogun bilera-eskaera formalei ez die erantzun, zakarrontzian amaitu baitute. Sagardui andrea kide den alderdiak ez diezagula orain botoa eskatu; erakutsitako bihozgabetasunak agerian uzten du langile-klasearen arazoekiko kezka gutxi edo batere ez duela alderdi horrek.

Gogoan hartuko dugu. Baina argi gera dakizuela eta ez izan zalantzarik; ez gara geldituko duela hamarkada batzuk lortutakoari eutsi eta mantendu arte, alegia, Osakidetzako langileekiko lan-baldintzak homologatu arte.

Aniztasun funtzionalaren sektoreko beharginak kalean egongo dira asteon ere, beren borroka areagotu eta ikusarazteko asmoz

Zubiate(e)ko Aritz
-
0
Aniztasun funtzionalaren sektoreko beharginak kalean egongo dira asteon ere, beren borroka areagotu eta ikusarazteko asmoz

Gaude eta Gorabide, aniztasun funtzionalaren arloan pertsonei zerbitzu publikoa ematen dieten bi elkarte, greban egongo dira aste honetan zehar. Gorabideren kasuan, gaurkoa lehenengo eguna izan da, eta manifestazioa egin dute Bilboko kaleetan. Gaude bihar hasiko da greban.

Gaur-gaurkoz entitate pribatuak dira biak, Bizkaiko Foru Aldundiak diru publikoz lagunduak. Hori dela eta, zuzeneko ardurandutzat jotzen dute Gizarte Ekintzako diputatua, Sergio Murillo, nahiz ahaldun nagusia, Unai Rementeria, baita datozen hauteskundeetan azken horren ordezko hautagaia izango den Elixabete Etxanobe ere. Izan ere, agintaldian zehar ahalbidetzen ari direna da pandemian esentzial izan ziren langile horiek, horrenbeste txalotu eta loatu zituztenak, gaur egun kudeatzaileen partetik hutsaren hurrengotzat hartzea eta Ertzaintzak txarto tratatzea.

Joan den maiatzaren 9an, ertzain baten bortizkeria neurrigabekoa tarteko, bi kide ospitalean artatu behar izan zituzten beren adierazpen askatasuna baliatze hutsagatik. Horrez gain, hainbat grebalari identifikatu, katxeatu eta, are, jarraitu zituzten. Beharginek nabarmendu dute komunikabide bakar bat ere ez zegoela han bizitzen ari ziren horren berri emateko.

Hori dela eta, komunikabideetan ikusgarritasun handiagoa merezi dutela aldarrikatu nahi izan dute gaur. Sektore feminizatua da aniztasun funtzionalarena, eta marea urdina deritzona osatzen dute Gaudek eta Gorabidek Madres Mercedariasekin, Aspacerekin eta Argia fundazioarekin batera. Horien guztien hitzarmenak iraungita daude, eta galdutako eros-ahalmena berreskuratzea eta lan-baldintza hobeak izatea eskatzen ari dira.

Gaude eta Gorabide 2021etik ari dira mobilizazioetan, 2022an lanuzteak eta 2023an hainbat greba egun (21 Gorabiden, 9 Gauden) egin dituztelarik. Aste honetan zehar bost greba egun deitu dituzte Gorabiden, eta lau Gauden. Horietan zehar, hainbat protesta ekimen eramango dituzte aurrera.

Nabarmendu dutenez, marea urdina geldiezina da eta hitzarmen justuak lortu arte segiko dute borrokan.

Honako hauek dira bihartik aurrera prestatu dituzten hitzorduak:

  • Maiatzak 23, asteartea: Kotxe karabana, 11:00etan Muskizko hondartzatik abiatu eta Biboko Moyua plazaraino joango dena (Gorabide)
  • Maiatzak 24, asteazkena: – 08:30-16:45 Informazio piketeak zentro okupazionaletan (Gaude) – Manifestazioa 10:30ean hasita. Gorabidekoak Poza Lizentziatuaren kaletik abiatuko dira, eta Gaudekoak Errekalde zumarkaletik. Bidean elkartuko dira Moyuara iritsi arte. Handik, elkarrekin joango dira Ugaskora, Gizarte Ekintza Sailera. Madres Mercedarias, Aspace Bizkaia eta Argia Fundaziokoak izango dituzte lagun.
  • Maiatzak 25, osteguna: – 07:45-16:45 Informazio piketeak etxebizitzetan (Gaude) – 10:30 Gorabide eta Gauderen elkarretaratzea Sabin Etxean. Madres Mercedarias, Aspace Bizkaia eta Argia Fundaziokoak izango dituzte lagun.
  • Maiatzak 26, ostirala: – 08:30-16:45 Informazio piketeak eguneko zentroetan (Gaude) – 10:00 Eserialdia Kale Nagusian, Foru Jauregiaren aurrean. Jarraian Poza Lizentziatuaren kalerantz abiatuko dira (Gorabide). – 18:00 Manifestazioa Gauderen bulegotik abiatuta (Gaude)
  • Maiatzak 27, larunbata: 12:00etatik aurrera, triki-poteoa, jaima eta otarren zozketa Romoko Santa Eugenia plazan (Gaude). Jarraian, informazio piketeak aisialdi giroan.

Zaintza lanak aitortu eta sistema publiko komunitarioa eraikitzearen aldeko mezuek hartu dituzte Bilboko kaleak

Zubiate(e)ko Aritz
-
0
Zaintza lanak aitortu eta sistema publiko komunitarioa eraikitzearen aldeko mezuek hartu dituzte Bilboko kaleak

Gaur, Bizkaiko egoitzetako langileen azken greba egunean, Bilbon mobilizatu gara Zaintza lanak publikoak dira lelopean. Pribatizatutako zaintza zerbitzu sozialetako langileak eta beren borrokarekin bat egiten dutenak egon dira gaur kalean.

Gaur zaintza zerbitzu sozialetako langileak elkartu dira Bilbon; izan ere, azken hilabeteotan borroka eredugarriak bultzatu dituzte Bizkaian beren lan baldintzen hobekuntzan eta defentsan. Madres Mercedarias, Gorabide, Apnabi, Gaude, Etxez etxeko laguntza, etxeko langileak, erresidentziak, Santa Mariñe egoitza… guztiek daukate zerbait komunean: zaintza lanak egiten dituzte, sistema sostengatzen dute eta beren lana funtsezkoa da Euskal Herriak duen zaintza beharra asetzeko.

Zaintza zerbitzu sozialen titularitateak instituzioen menpe daude, eta hauek dira pribatizatzea erabaki dutenak. Euskal Herritarrok zainduak izateko dugun eskubidea merkantilizatzen dute EAJ-k, Eusko Jaurlaritzak eta Aldundiek. Zaintza zerbitzu sozialetako langileek zerbitzu publikoa ematen dute, beren lanak zaintza sistema oso bat sostengatzen du, baina Aldundiak zein Eusko Jaurlaritza, enpresarien eskutik, zaintza sistema hondoratzen ari dira. Pribatizazioak zaintza sistema degradaziora eramaten du, eta eragin zuzena dauka langileongan zein erabiltzaileengan. EAJ-ren eta enpresarien arteko negozioak eta irabazi ekonomikoen grinak miseriazko lan eta bizi baldintzak areagotzen ditu.

Honen aurrean, zaintza zerbitzu sozialen instituzioen aldetik kudeaketa zuzena exijitzen dugu, borondate politikoa ezin baita izan langileen berme bakarra. Hala, ziurtasunak, konpromiso errealak eta publifikazio prozesua eskatzen ditugu. Zaintza lanak ezin dira pribatizatu, zerbitzuen degradazioari eta okertzeari aurre egin behar zaio, publifikazioaren bitartez.

LABek hurrengoa aldarrikatzen du:

1- Zainduak izateko eskubidearen aitortza, gizarteak dituen zaintza beharrei erantzungo dion zaintza sistema publiko baten beharra, bizi eta lan baldintza duinak bermatuko dituena.

2- Bizitzaren sostengarritasuna bermatzen duten zerbitzu guztien aitortza eta pribatizatuta dauden zaintzarako gizarte zerbitzuak publifikatzea. Hau da, dagokien administrazio publikoak zerbitzu guztien garapena, finantzaketa eta kudeaketa zuzenaz arduratu daitezela.

3- Pribatizatutako zaintza eta gizarte zerbitzuetako langileak publikoak gara. Zor patriarkalaren aitortza sozial, politiko eta ekonomikoa orain.

4- Zaintza eta Gizarte Zerbitzu publikoak indartzea eta langileen lan baldintzak duintzea; langileen eros- ahalmena bermatzea, ratioak handitzea, lizentziak edota bestelako baimenak hobetzea, negoziazio kolektiboa desblokeatzea…

Bizkaiko egoitzetako grebaren harira aurrera eramaten ari garen mobilizazioekin presioa areagotu dugu

Zubiate(e)ko Aritz
-
0
Bizkaiko egoitzetako grebaren harira aurrera eramaten ari garen mobilizazioekin presioa areagotu dugu

Bihar LABek deitutako Bizkaiko nagusien egoitzetako sei greba egunak eta baraualdia bukatutzat emango ditugu. Borroka isilarazteko saiakeren eta grebalariak Foru Jauregiaren aurretik bidaltzeko udaltzainen mehatxuen aurrean, beste behin ere borroka ziklo bat duintasunez aurrera eraman dugu. Sektoreko langileen erantzuna, mobilizatzeko gaitasuna eta indarra azpimarratzekoa da, eta aldundiaren nahiz patronalaren erantzun ezaren aurrean tinko mantendu gara.

Greba hauetan argi geratu da,LAB sindikatua sektoreko langileekin batera hitzarmen hau borrokatzeko prest dagoela, eta horrela aldarrikatu dugu 2021eko abenduko lehen greba egunetik. Denbora luzea daramagu borroka honetan, eserialdiak, martxak, itxialdiak eta baraualdiak eginez, borrokatzeko prest egon garela eta bagaudela argi utziz.

Greba gehiago deitzeko eta mobilizazioak indartzeko hautua egingo dugu, langileona den hitzarmena lortu arte. Sektoreko enpresak eta aldundia sektoreko hitzarmena blokeatzen ari dira. Egoera honen aurrean, patronalei eta aldundiari erantzun bat eta negoziatzeko mugimendu bat exijitzen diegu. Premiazkoa da hitzarmena desblokeatzea, edukiz hitz egiteko mahai negoziatzaile erreal bat bultzatzea. Patronalek eta aldundiak borondate onez beharginen lan eta bizi baldintzen negoziazioari heldu behar diote behingoz.

Manifestazio jendetsuak Osakidetzako grebaren bigarren egunean

Zubiate(e)ko Aritz
-
0
Manifestazio jendetsuak Osakidetzako grebaren bigarren egunean

Grebari emandako erantzuna atzokoa baino are handiagoa izan da; eta berriro ere, bereziki garrantzitsua izan da Lehen Arretan, eta horrek erakusten du langileek jasaten duten egoeraren larritasuna. Lanuztearekin bat egin ahal izan dutenen artean %65ekoa izan da jarraipena.

Gaur, Osakidetza, bigarren greba eguna egiten ari da LAB, SATSE, ELA, SME, CCOO eta UGT sindikatuek deituta. Goizeko 12etan manifestazioak egin dira hiru hiriburuetan. Parte-hartzea jendetsua izan da, eta langileek herritarren babesa izan dute, mobilizazioan ere aktiboki parte hartu baitute.

Atzo gertatu zen bezala, jarraipena bereziki garrantzitsua izaten ari da Lehen Arretan, eta horrek agerian uzten du, beste behin ere, arreta-maila horrek jasaten duen egoera larria, baita langileen haserrea ere. Ildo horretan, azpimarratu behar da Arangoitiko (Bilbo), Zaramagako, Lakua-Arrigagako, Salburuko, San Martingo (Gasteiz), Oiartzungo eta Lazkaoko osasun-zentroak itxita egon direla, adibidez. Jarraipen garrantzitsua izaten ari da ere toki askotan, hala nola, Kabiezesen (Santurtzi), Oñatin, Arrasaten, Bergaran edo Dunboan, baita Goierri Urola Garaiko eta Tolosaldeko ESIetako osasun-zentroetan ere. Horietako askotan gutxieneko zerbitzua bakarrik daude lanean. Arabako landa-eremuko lehen arretaren jarraipena %80koa izan da berriz ere gaurkoan.

Gainerako arreta-mailek ere irmoki egin dute bat lanuzteekin. Zumarraga, Mendaro eta Arrasateko ospitaleetan, ebakuntza-gelak itxita daude, baita Zumarraga Ospitaleko Antomia Patologikoko zerbitzua, Gasteizko Santiago Ospitaleko izpien zerbitzua eta Arrasate Ospitaleko farmazia ere. Jarraipen oso garrantzitsua edo zerbitzu itxiak Basurtuko, Gurutzetako, Donostia Ospitaleko eta Galdakaoko biltegietan. Baita Donostia Ospitaleko eta Galdakaoko sukaldean ere. Itxita dago Gurutzetako erresonantzia magnetikoaren zerbitzua. Arabako ESIko ebakuntza-gelak urgentzietarako bakarrik ari dira funtzionatzen. Grebaren jarraipena oso garrantzitsua izaten ari da Gurutzetako Ospitaleko laborategietan, ospitale horretako mantentze-zerbitzuan edo Bidasoa Ospitalean. Osasun Mentalean, Arrasateko Osasun Mentaleko Zentroa ere, adibidez, itxita dago.

Aipamen berezia merezi du berriz ere Transfusio eta Giza Ehunen Euskal Zentroak. Azpimarratu behar dugu, bi greba deialdi hauek baino lehen, guztira 27 greba egun egin dituela pairatzen duten soldata-diskriminazioa amaitzeko eskatuz. Atzo bezala, kolektiboan jarraipena oso zabala izan da berriro ere.

Atzoko egunean gertatu zen bezala, gutxieneko zerbitzuak gehiegizkoak dira eta milaka langile greba eskubiderik gabe geratu dira. Kolektiboaren greba-eskubidea neutralizatzeko, eragozteko eta erasotzeko beste ahalegin baten aurrean gaude. Lan Sailak emandako Gutxieneko Zerbitzuen Aginduaren eduki murriztaileaz gain, salatu behar dugu, gaur ere, hainbat ESItako zuzendaritzek greba neutralizatzeko eta zailtzeko egin duten ahalegina, Agindua modu murriztailean interpretatuz eta bertan jasotakoaz haratago, gutxieneko zerbitzuak egitea ezarriz. Hori gutxi balitz, ESIetako zuzendaritzek sindikatuei jarraipen-daturik ez emateko agindua jaso dute Zerbituz Zentraletatik. Osakidetzaren opakutasunaren beste adibide baten aurrean gaude.

Grebaren jarraipenari dagokionez, Osakidetzak datuak manipulatzen dituela salatu behar dugu beste behin. Portzentaia kalkulatzeko, ez du greba egin dezaketen langileen kopurua hartzen (izendatutako gutxieneko zerbitzuak kenduta), baizik eta plantilla osoaren gainean kalkulatzen du, kontutan hartu gabe, horietariko askok, ez daukatela greba egiteko aukerarik minimak direlako. Horregatik, adibidez, jarraipena %0koa izan da gaueko txandan. Baina ez du esaten gauez lan egiten duten langileek ezin dutela grebarekin bat egin, gutxieneko zerbitzua direlako. Manipulazio jasanezin baten aurrean gaude.

LAB, SATSE, ELA, SME, CCOO eta UGT sindikatuek elkarrizketa eta negoziazioa berreskuratzeko deia egin diote Osasun Sailari, Osakidetzak bizi duen egoera larriaren aurrean benetako eta berehalako irtenbideak martxan jartzeko helburuarekin. Bestela, mobilizazioekin jarraituko dugu.

2023ak dagoeneko lan istripuz hildako 21 langile utzi ditu Euskal Herrian

Zubiate(e)ko Aritz
-
0
2023ak dagoeneko lan istripuz hildako 21 langile utzi ditu Euskal Herrian

Joan den astean Burlatako Iturrondo industrialdeko lantegi bateanlarriki zaurituriko langilea zendu da

Burlatako pabiloi batean lanean ziharduen 22 urtetako langile azpikontratatua pieza astun batek azpian harrapatu eta larriki zauritu zuen joan zen ostiralean. Bada, eta istripuaren xehetasun guztiak argitzeke dauden arren, argi dago kasu honetan ere lan osasuneko protokoloak ez direla behar bezala bete.

Behin eta berriz salatu dugu patronalak ez dituela laneko osasuna bermatzeko neurriak hartzen eta araudia bera ere ez duela betetzen. Ez ditu arauak errespetatzen, nabaria delako ez duela inolako isunik jasoko guzti hau betearazi behar lukeen administrazioaren aldetik. Izan ere, Nafarroako milaka langileei eragiten dien lan osasun araudia betearazteko 14 ikuskari soilik daude. Kasu honetan, estatuko gobernuaren eskumenpean dauden ikuskariak dira, eta gaur berriz salatu nahi izan dugu Txibiteren gobernuak ez duela eskumena bereganatu nahi nahiz eta horretarako aukera izan. Estatuko eta Nafarroako gobernuen ardura falta tarteko, patronalak erraztasun osoa du araudia bete gabe jarraitzeko. Bada, erabaki politiko hori langileria larrutik ordaintzen ari da.

Era berean, azpikontratazioaren arrisku erantsia azalarazi nahi dugu, errealitate honek lanpostu arriskutsuak eta prekarioak sortzen baititu, baldintza horietan langileriak bere eskubideak egikaritzeko zailtasun handiak dituelako, segurtasunari berari bizkar emateraino.

Langileriaren elkartasuna adierazteko eta patronalak eragindako azken heriotza hau salatzeko egingo diren ekimenetan parte hartzeko deia luzatzen diegu herritarrei.

Gipuzkoako Mendizale Federazioan hitzarmena sinatzea #LortuDugu

Zubiate(e)ko Aritz
-
0
Gipuzkoako Mendizale Federazioan hitzarmena sinatzea #LortuDugu

Hilabete hasieran, Gipuzkoako Mendizale Federazioan LAB-en ordezkaritza lortu ostean, Lan Harremanetarako Kontseiluan (PRECO) bildu gara gaur, maiatzak 18, federazioko hitzarmen kolektiboa sinatzeko.

Orain arte, bertako langileei Bulego eta Despatxuen Hitzarmena aplikatzen zitzaien, baina jakin badakigu hitzarmen hori erabat zaharkitua gelditu dela; izan ere, 2006-2009 urteetarako sinatu zen eta geroztik ez da berritu.

LAB sindikatuan hitzarmen sektorialen alde egiten dugu eta Bulego eta Despatxuen Hitzarmenarekin ere, dagokionean, horrela jokatuko dugu: hitzarmen sektorialak dira langileria babesteko tresna juridiko eraginkorrena. Horregatik, LABen, Hitzarmen horien negoziaketa eta aplikazioa babestu eta lantzen ditugu.

Aldiz, ezinbestekoa zen Gipuzkoako Mendi Federazioko Hitzarmena sinatzea: euren lan-baldintzak berritu eta bermatuz, langile kolektiboaren jarduna duindu dugu.

Gora langileon borroka!

1...227228229...1,583Page 228 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus