2025-12-28
Blog Page 212

Olazabal y Huarteko plantilla greban dago hitzarmen duin baten alde

Zubiate(e)ko Aritz
-
0
Olazabal y Huarteko plantilla greban dago hitzarmen duin baten alde

OLAZABAL Y HUARTE SAU enpresak, Betoñuko industrialdean kokatua, 60 urte baino gehiagoko ibilbidea du. Urteetan etengabeko gorabeherak izan ondoren, 2021ean soldatak nabarmen jaitsi (% 15 inguru) eta enpresak polibalentzia eta postu-mugikortasuna exijitu ondoren, Arteaga enpresa-taldeak, Fumbarri eta Innovarri enpresek ere osatua, erosi zuen azkenean.

Une honetan, langileak greban daude gaurtik, uztailak 12, lan-baldintza duinak, bidezko hitzarmen bat eta horietan galdutako erosteko ahalmena berreskuratzea exijitzeko. Soldata jaitsiera, azken urteetako KPIaren igoerarekin batera suposatu du gure erosteko ahalmenaren murrizketa ikaragarria.

Horregatik, hainbat negoziazio-saioren ondoren, eta enpresak inolako akordio-borondaterik eduki gabe, plantilak uztailaren 21era arte aurreikusitako greba hasteko erabakia hartu behar izan du. Gaurkoan, lehenengo egunean greba ia-ia erabatekoa izan da.

Greba-egunetan mobilizazioak egingo ditugu 13:00etatik 14:30era Gasteizen, Gamarrako Atea eta Kantauri Hiribidearen arteko bidegurutzean eta Latinoamerikako biribilgunean.

EHUko ordezkapen politika berriak irakasle guztion lan-baldintzak eta irakaskuntza kalitatea okertzen ditu larriki

Zubiate(e)ko Aritz
-
0
EHUko ordezkapen politika berriak irakasle guztion lan-baldintzak eta irakaskuntza kalitatea okertzen ditu larriki

Unibertsitate sistemari buruzko LOSU lege berria bere erara interpretatu du EHUko zuzendaritzak, irakasle guztien lan-baldintzak eta irakaskuntzaren kalitatea okertzea ekarriko duelarik.

LOSUren 80. artikuluak dio ordezkapen bat egingo duen unibertsitateko irakasleak ezingo duela ikertu edo egiturazko kudeaketa eta koordinazio funtziorik izan. Hori baliatuz, EHUk erabaki du arduraldi osoko irakasle-ikertzaileen ordezkoak lanaldi partzialekoak izango direla nahiz eta irakasle-ikertzaileen lan-hitzarmenak eta 41/2008 dekretuak arduraldi osokoak izan daitezela ahalbidetzen duten. Beraz, kasurik onenean arduraldi osoko irakasle-ikertzaileen ordezkoei asko jota soldata osoaren %34,29 ordainduko zaie beraien irakaskuntza zama %75ekoa denean. Beraz, ordezkoen urteko soldata gordina 7.584,37€ eta 11.360€ artean egongo da, astean emandako klase kopuruaren arabera. EHU jada hasi da amatasun baimen zein bajen ordezkapenak era horretan egiten. LABentzat hau onartezina da eta zuzendaritzak, horrela jarraituz gero, erantzun tinkoa izango duela ohartarazi du sindikatuak.

Bestalde, EHUko irakaskuntza kalitatea larriki okertuko da. Ordezkoei eskolak eta tutoretzak bakarrik ordaintzen baldin badizkiete, irakasle hauek ez dute denborarik izango klaseak prestatzeko, lanak eta azterketak zuzentzeko edo beste irakasleekin koordinatzeko, besteak beste. Hain zuzen, tutoretza orduak ikasleak pertsonalki artatzeko erabili behar dira, eta ez bestelako zereginetarako, EHUren beraren irizpideen arabera.

Ordezkapen politika honek irakasle-ikertzaile guztien lan-balditzetan eta sailen irakaskuntza ahalmenean izango du eragina, eta gainera lan-hitzarmena eta lan-poltsen akordioa larriki urratzen ditu, zeintzuetan partzialtasuna murrizteko neurriak adostu ziren. Egoera berrian hau guztia aldatu da, eta EHUk ordezkoen politika berria ezarri du irakasle-ikartzaileen ordezkaritza sindikalarekin inolako negoziaziorik egiten saiatu gabe.

Orain dela gutxi ordezkapen poltsen deialdira hainbat pertsona aurkeztu dira ordezkapen osoak egiteko esperoan; gehienek horiek bakarrik hartu ditzakete bizitza duina izateko. Iruzur egiten zaie pertsona horiei.

Irakasle-ikertzaileak, ordezkatuak izan behar direnean (bajak, baimenak, eszedentziak…), jakinda bere kideengan erortzen dela askotan beraien lan karga, eta gaizki ulertutako arduragatik, epe hori minimizatzen saiatzen dira. Horretaz kontziente izanik, lan-osasun eskubideak, kontziliazioa, edo zaintzak errazteko aukera, ardura politikoak, akademikoak edota sindikalak hartzeko eskubideak kolokan jartzen dira.

Ordezkapen politika honek arlo instituzionalean ere izango ditu eragin negatiboak. Askoz zailagoa izango da irakasleek baldintza kaskar horiekin ordezkapenak onartzea, eta, nolanahi ere, lanaldi osoko plazen ordezkapenak partzialekin betetzeak sailetako benetako irakaskuntza ahalmena murriztuko du. Beraz, saileko irakasle-ikertzaileen lan-karga handituko da eta irakasgaien esleipena bat-batean birplanifikatu beharko da. Kontuan hartu behar da sail eta jakintza arlo batzuetan gainzama dutela.

Errektoretza aspaldi ari da esaten balizko irakasle-ikertzaileen plan zuzentzaile batean sailei emango zaiela irakaskuntza ahalmen nahikoa ordezkapenen beharrik ez izateko. Langileek ez dakite noiz egongo den plan utopiko hori, baina nahiko argi daukagu ordezkapen luzeak direnean ez dela justua izango sailentzako ordezkorik ez jartzea. Eta badakite, gaur egun, irakaskuntza gainkarga duten sailei plaza berriak ukatzen ari zaizkiela.

LABek eskaera zuzena egiten dio Errektoretzari:

  1. Lanaldi osoko irakasle-ikertzaileen lanpostu guztien ordezkapen guztiak (baimenak, bajak, nahitaezko eszedentziak, zaintzarekin lotutako eszedentziak…) lanaldi osoko kontratuekin betetzea.
  3. Lanaldi partzialerako kontratuei soldata duina ezartzea klaseen prestakuntza eta zuzenketa lanak, oinarrizko koordinazioa eta kudeaketa, formakuntza eta irakaskuntzari loturiko ikerketa kontuan hartuz.

Datorren astean Irakasle-ikertzaileen arloko Errektoreordearekin bilera daukate. Zuzendaritzak irakasle guztien lan-baldintzak okertzen dituen ordezkapen politika murritzailea ez badu aldatzen, LAB beste sindikatuekin jarriko da harremanetan mobilizazio kanpaina bat aurrera eramateko, grebak baztertu gabe.

Erabiltzaileentzako Arreta Zerbitzuko bost langile EITBkoak direla aitortzea lortu dugu epaitegietan

Zubiate(e)ko Aritz
-
0
Erabiltzaileentzako Arreta Zerbitzuko bost langile EITBkoak direla aitortzea lortu dugu epaitegietan

Bost langile legez kanpo azpikontratatuta zeudela eta, beraz, EITBko beharginak direla aitortzea lortu dugu lau urteko ibilbide judizialaren ostean.

2019ko udazkenean, Lan Ikuskaritzara jo zuen LABek, EAZ-CAUko (Erabiltzaileen Arreta Zerbitzua) bost langileren
lagapen ilegala salatzeko. 2021ean, ikuskaritzak arrazoia eman zion, baina EITBko zuzendaritzak ez zuen ebazpena onartu, eta Bilboko epaitegiak eraman zuen auzia.

2022ko ekainean egin zen epaiketa, eta Bilboko auzitegiak Lan Ikuskaritzak esandakoa berretsi zuen: INETUM konpainiako beharginak legez kanpo utzita ari ziren EITBrentzat lanean. Enpresak beste helegite bat aurkeztu zuen EAEko Justizia Auzitegi Nagusian, eta berriro galdu zuen epaiketa.

Lau urte luze horien ostean, bost langile kaltetuei arrazoia eman die Lan Ikuskaritzak, Bilboko epaitegiak eta EAEko Auzitegi Nagusiak. Eta, beste behin, agerian geratu da EITBn kontratazio irregularrak eta langile lagapen ilegalak egiten direla.
Denbora tarte horretan, EITBk era bikainean funtzionatzen duen EAZ-CAU zerbitzua hankaz gora jarri du: gure bost lankideak eta INETUM enpresarentzat lan egiten zuten gainontzeko langile guztiak EITBtik kanpo daude orain.

Horrez gain, EITBko zuzendaritzak beste mugimendu zikin bat egin du, eta bost langile horien kasuak banaka salatzera eta berriro epaitegietan borrokatzera behartu gaitu.

Joan den ekainean egin zenlehen epaiketa indibiduala, eta epaileak, enegarren aldiz, arrazoia eman zigun. Enpresak aurreratu digu helegitea aurkeztuko duela EAEko Auzitegi Nagusian. Ibilbide judizial guztia kontuan hartuta, ebazpena, beste behin ere, langileen aldekoa izango dela uste dugu.

Zer gertatuko da EAZ-CAUko langileekin?
Bestalde, bost langile horiek EITBra bueltatzen direnean, enpresaren asmoa zein den ohartarazi nahi dugu; izan ere, soldatarik baxuenetakoa duten lanpostuetan jarri nahi dituzte, EITB-Enteko lan-hitzarmenean erabiltzenez den kategoria batean. Kontu honek, gainera, EITB-Enteko komiteak zuzendaritzarekin duen kategoriei buruzko negoziaketa zeharo zailtzen du.

Laburbilduz, EITBko zuzendaritzak ez du errealitatea onartu nahi, eta bide horretatik jarraituz gero, beste hiru urte eman ditzakegu epaitegietan aipatu langileen eskubideen defentsan. Baina emaitza beti berdina izango da. Zergatik luzatu nahi du EITBk langile horien sufrimendua? Noiz arte jarraituko dute krudelkeria horrekin? Hauek al dira EITBrentzat “batzengaituztenemozioak”?

Enteko Langile Batzordeak lanuzteak deitu ditu uztailaren 17ko asterako.

Euskal enpresa bateko arrantzalea hil da Seychelle uharteetatik hurbil lanean zebilela

Zubiate(e)ko Aritz
-
0
Euskal enpresa bateko arrantzalea hil da Seychelle uharteetatik hurbil lanean zebilela

Jakin berri dugu INPESCA euskal enpresarentzako lanean ziharduen arrantzale bat hil zela joan zen astean Ozeano indikoan, arrazoi ez-traumatikoak tarteko. Jarduera mota horretako lan baldintzek dakartzaten arrisku faktoreak nabarmenak dira, eta arrantza eredu horrek eskubide urraketak dakartza.

Lehenik eta behin, elkartasuna eta samina senide, lagun eta lankideei.

2023an gutxienez 27 langilek galdu dute bizia lan istripuz. Itsasontzian arrantzan ziharduen 44 urteko langilearen azken heriotza hau ez traumatiko bezala izendatua izan da.

Bada, 2008az geroztik INPESCA arrantza enpresak gutxienez hiru langileren heriotza eragin du, bi modu traumatikoan eta azken hau modu ez traumatikoan, denak Ozeano Indikoan. Istripu hauek aztertzeko eta argitzeko traba handiak izaten ditugu, eta gardentasun falta handia da.

Heriotza ez traumatikoen atzean faktore ezberdinak daude eta lan kargak, erritmoak, estresak eta jarduera mota horretako bestelako faktoreek eragin zuzena dute. Hala, heriotza irmoki salatzeaz gain, arrantza sektorean gertatzen diren eskubide urraketek, hitzarmen duinen faltak, segurtasun neurririk ezak, etenik gabeko jardunaldiek zein lan neurri gogor eta arautu gabeen eragina azpimarratu behar dugu.

Horrez gain, hemengo enpresak dira hango itsasoak ustiatzen dituztenak, hemengo agintarien laguntzarekin.Ezaguna da Eusko Jaurlaritzaren apustu neurrigabea Atunontzi eta Altura handiko flota kudeatzen duten enpresekiko. Horrek, halaber, beste arrantza arteak gutxiesten ditu, baxurako arrantza bezala, askoz ere jasangarriagoak eta hurbilagoak direnak baina, plan estrategiko baten beharrean, itotzen ari direnak. Hala, arrantza sektore guztiak behar du lan baldintzen aldaketa eta arauketa legala, horrek eragina izango bailuke istripu eta heriotzen tasan.

Eusko Jaurlaritzaren arrantza politikek beste herrietako itsasoak ustiatzea dute helburu, eta horrek dakarrena da bertako herritarrak baldintza prekarioetan eta bizia galtzeko arriskuarekin kontratatzea. Hala, sasoi bateko sistema kolonialak erabiltzen dituzten enpresak diru publikoz lagundu eta, gainera, baldintzarik gabeko laguntza eskaintzen zaie. Hauek ere badira itsasoan gertatzen diren arrantzaleen istripuen errudun.

Horregatik, laneko osasun baldintza egokiak bermatu ditzaten exijitzen diegu enpresariei, eta Eusko Jaurlaritzari, aldiz, ereduaren inguruko norabide aldaketa eta laneko osasunaren betearazpena berma dezala.

Bilboko Udalean pribatizazio bat gelditzea #LortuDugu

Zubiate(e)ko Aritz
-
0
Bilboko Udalean pribatizazio bat gelditzea #LortuDugu

Esperantza Frontoia zegoen lekuan irekiko den udal-ekipamendu berriko zerbitzuak kanpoko enpresek emateko argitaratutako lizitazio iragarkiei errekurtsoa jarri ostean, asmoa geldiaraztea lortu du sindikatuak. Ekipamendu horrek Gaztegune, Mediateka eta Haurgune/Kidegunea izango ditu, bai eta atezaintza-zerbitzua ere, besteak beste.

Duela aste batzuk, Esperantza kaleko lokal horretan eskaini behar ziren zerbitzu publikoen balizko pribatizazioari buruzko zurrumurrua zabaltzen hasi zen. Eta zurrumurru hori errealitate bihurtu zen ekainaren 12an ekipamendu horren lizitazio-iragarkia argitaratu zenean.

Bilboko Udaleko LABeko atal sindikalak bere garaian Negoziazio Mahaian adierazi zuen ez zuela beste aldera begiratuko inolako pribatizazioren aurrean; izan ere, sindikatu honentzat lehentasunezkoa da udal-zerbitzu publikoak defendatzea eta zerbitzu-publiko horiek udal-langileen bidez kudeatzea.

Hori horrela, Bilboko Udaleko LABeko atal sindikalak, sindikatuko zerbitzu juridikoekin batera, La Esperanzako udal-ekipamendua kudeatzeko eta dinamizatzeko zerbitzua kontratatzeko espedientearen aurkako errekurtsoa aurkeztu dugu, eta dagokion arloko zinegotziari eta Giza Baliabideen zuzendariari jakinarazi diegu.

Udalak jakinarazi zigun pribatizazio hori bertan behera uztea aginduko zutela, berrikusi ahal izateko. Bere hitzetan, “beste kudeaketa-eredu bat posible izan zitekeela” uste dute.

Gaur egun, pribatizazio hori gelditzea lortu dugula iragarri dezakegu. Argi dugu eta ez dugu etsiko: udaleko zerbitzu publiko guztiak udal-langileek kudeatu behar dituzte. Oinarrizko erreklamazioa da, eta borondate politikoa baino ez du eskatzen.

Zerbitzu publikoen defentsan jarraituko dugu. Zerbitzu publikoak defendatu!

Haurreskolak Partzuergo publikoan plazen eskaintza urria da

Zubiate(e)ko Aritz
-
0
Haurreskolak Partzuergo publikoan plazen eskaintza urria da

Haurreskolak Partzuergo publikoan hurrengo ikasturterako izena eman duten haurren behin betiko zerrendak argitaratu dira gaur. LABetik salatzen dugu matrikulazio garaian egin zen eskaintza ez dela mantentzen hainbat herritan, matrikulatzeko itxaron zerrenda dagoen herrietan, alegia.

Besteak beste, 2023an jaiotako haurren familiei ez zaie onartu izen emate honetan parte hartzea gurasotasun baimenarekin egoteagatik, eta askok paperak prest dituzte iraileko izen ematerako. Orain berriz, adin desberdinetako haurren taldekatze gelak sortu dira itxaron zerrendan zeuden 2022an jaiotako haurrak onartzeko. Honekin, 2023an jaiotako haurrei ez zaie aukerarik ematen haurreskola zerbitzua izateko.

Familia horiek, irailean paper guztiekin haurreskoletara joaten direnean plaza librerik ez dagoela ikusiko dute. Apirileko izen emateko eskaintzan libre geratu zirenak beteta egongo dira beste adin tarte bateko haurrekin.

Haurreskolak Partzuergoak egin zuen eskaintza errespetatzea eskatzen dugu, taldekatze gelak beharrezkoak diren haurreskoletan soilik ezarriz.

Halaber, azkenengo urteetan egindako mobilizazioen ostean lortu dugun Haurreskolak Partzuergoaren doakotasunak izan duen arrakastaren emaitzak ikusita, hezkuntza zerbitzu honen unibertsaltasuna bermatuko duen plaza eskaintza nahikoa egitea eskatzen diegu administrazio ezberdinei.

Gorabideko langileen batzarrek enpresak LAB eta ESK sindikatuekin sinatutako akordioa berretsi dute, langileentzako funtsezko hobekuntzak dakartzana #LortuDugu

Zubiate(e)ko Aritz
-
0
Gorabideko langileen batzarrek enpresak LAB eta ESK sindikatuekin sinatutako akordioa berretsi dute, langileentzako funtsezko hobekuntzak dakartzana #LortuDugu

Plantillarentzat historikoa izan den egunean, atzo osteguna, uztailaren 6an, Gorabideko langileek egindako bi batzarrek babestu egin dute LAB eta ESK sindikatuek enpresarekin lortutako aurreakordioa. Honek, %23,76ko soldata-igoera jasotzen du langile guztientzat, besteak beste, KPI baino handiagoa.

Azken hilabeteetan, Gorabideko langileek lan eta bizi baldintzak hobetzeko borroka eredugarria egin dute. Izan ere, 26 greba-egunen ondoren, non langile gehienek parte hartu baituten, beste behin ere baieztatu dugu kaleetan piztutako borrokekin lortutako akordioak hobeak direla.

  • % 23,76ko soldata-igoera lortu dugu langile guztientzat. Igoera horrek KPIaren gainetik dagoen soldata-igoera dakar, ezagutzen diren KPIak eta etorkizuneko urteetako aurreikuspenak kontuan hartuta.
  • KPI erreala eta ziurra berrikusteko bermea; KPIak hitzartutako igoera baino handiagoak badira, aldea urtarrilaren 1etik aurrera kobratuko da.
  • Akordio honekin gainditu egin dira Bizkaiko Foru Aldundiak eta Gorabidek sektorean inposatu nahi zituzten soldata-topeak, euren esanetan mugiezinak zirenak.

Azken batean, KPIren gainetik dagoen akordio bat lortu dugu.

Akordio honetan, gatazkaren hasieratik gure aldarrikapenak izan ziren neurri sozialak ere jasotzen dira:

  • 8 egun libre.
  • Lanaldi murrizketak izateko aukera semeak edo alabak 14 urte izan arte zabaltzea.
  • 70 urtetik gorako gurasoei laguntzeko lizentzia.
  • Enpresak PAD22 eta PAD 22/ITP kontratuak dituzten pertsonen lan-zikloak 7 egunera mugatzea.

Akordioak beste aldarrikapen batzuk sakontzeko eta eztabaidatzeko aukera emango diguten konpromisoak ere jasotzen ditu, hala nola lanaldi partzialak, behin-behinekotasun tasa % 10etik behera izatea.

Horregatik, LABen oso positibotzat jotzen dugu lortutako akordio hau, langile guztiei baldintzak benetan hobetzea baitakarkie. Akordio honek eros ahalmena bermatzen du, eta Gorabideko langileen bizitza eta kontziliazioa hobetzeko neurri sozialak aplikatzen ditu.

LABetik zorionak eman nahi dizkiegu, beste behin ere, borrokari bizirik eutsi dioten langile guztiei, grebetan parte hartu dutenei, batzarretan, kanpaldietan, trafiko-mozketetan eta mobilizazio guztietan parte hartu dutenei. Zuetako bakoitzak gatazka honetan jarri duen ahalegin eta dedikazio guzti hau izan ez balitz, ez genukeen akordio hau lortuko.

Borroka honek bi aurrerapen handi lortu ditu, akordioan jasotakoaz gain. Batetik, ahaztutako sektore bat ikusarazi du, eta aniztasun-funtzionala duten pertsonak zaintzen, laguntzen eta hezten dituzten langileak agenda sozialean jartzea lortu du. Bestetik, langileak enpresaren aurrean ahaldundu ditu, eta inposizioaren garaiak amaitu direla erakutsi dio azken honi.

EAEko udal legearen kontrako epaia jauzi kualitatibo larria da

Zubiate(e)ko Aritz
-
0
EAEko udal legearen kontrako epaia jauzi kualitatibo larria da

Espainiako Auzitegi Konstituzionalak atzera bota du EAEko Udal Legearen atal bat, udalei euskara hutsez jarduteko aukera ematen ziena eta Eusko Legebiltzarrak onartutakoa. Euskaldunok pairatzen dugun mendekotasun eta bigarren mailako hiritar izatearen estatusa irauli eta menderatzaile gisa aurkezten gaitu Konstituzionalak. Euskaldunok ezin dugu euskaraz bizi eta lan egin, gure hizkuntza-eskubideak ez daude aintzat hartuta, baina, errealitate hori irauliz, gu ez-euskaldunen hizkuntza-eskubideen urratzaile garela diote.

Epai hau ez da edonolako epaia. Azkenaldian euskararen aurka izaten ari diren epaien segidan jauzi kualitatibo larria dela salatu beharra dugu. Auzitegi Konstituzionalak eta Espainiako Estatuko legediak, oro har, euskal herritarroi eta euskal instituzioei euskaraz neurri batean egin ahal izateko aukera ematen digute, baldin eta euskaraz osoki eta normaltasunez bizi eta jardutera iristen ez bagara. Herri gisa pairatzen dugun zapalkuntzaren oinarrietako bat da hori. Epai honek argi erakusten du euskaldunok ezin dugula modu burujabean euskararen egoerak eta euskaldunon hizkuntza-eskubideek behar duten hizkuntza-politika egokia aplikatu; gure araubidea estatuen borondatearen menpekoa dela.

LAB sindikatuak euskalgintzak zein gainontzeko eragile sozial eta sindikalok batera deituko ditugun erantzun ekimenetan parte hartzera dei egiten die euskal langileei eta euskal herritarrei, oro har. Horrekin batera, dei egiten dugu aspaldian euskararen eta euskaldunon hizkuntza-eskubideen aurka ezagutzen ari garen segidaren aurka, eta azken epai hau segida horretan azkena da oraingoz, Euskalgintzaren Kontseiluak azaroaren 4rako Bilbon deitu duen manifestaziora ere. Azaroaren 4ko manifestazioa euskal herritarrok euskaraz lan egin eta bizitzeko dugun desio irmoaren erakusle izan behar da.

Etxeko langileei langabezia prestazioa eta subsidioa jasotzeko baldintzak arintzea #LortuDugu

Zubiate(e)ko Aritz
-
0
Etxeko langileei langabezia prestazioa eta subsidioa jasotzeko baldintzak arintzea #LortuDugu

Bilboko lan arloko 6. epaitegiak arrazoia eman dio LABi, eta ebatzi du 2022ko urriaren 1a baino lehenagoko kotizazio aldiak aintzat hartu behar direla 52 urtetik gorako langabezia subsidiorako baldintzak aztertzean. 16/2022 errege dekretu-legeak dioena zuzendu du epaiak.

Gogoratu behar dugu Europako Batasuneko Auzitegi Gorenak 2022ko otsailaren 24ko epaian ebatzi zuen etxeko langileek langabezia prestaziorik ez izatea dakarren disposizio oro 79/7 zuzentarauaren aurkakoa izango dela; hau da, diskriminatzailea dela. Horrela, egoera hori zuzendu asmoz, 16/2022 errege dekretu-legea onartu zuen Espainiako Gobernuak, zeinak etxeko langileen hainbat eskubideren hobekuntza arautu zuen; besteak beste, langabezia prestaziorako kotizazio betebeharra eta ondoren prestazio hori jasotzeko eskubidea. Arau hori 2022ko urriaren 1ean sartu zen indarrean; ondorioz, data horretara arteko kotizazio aldiak ez dira kontuan hartzen langabezia prestazioa eta subsidioa kalkulatzerakoan.

Orain esku artean dugun kasuan, hain zuzen, aztertzen dena da ea etxeko langile baten 2022ko urriaren 1a baino lehenagoko kotizazio aldia aintzat hartuko den 52 urtetik gorako langabezia subsidioa kalkulatzerakoan. Aztergai dugun kasuan, langileak zituen kotizazio aldiak etxeko langileen erregimen berezikoak zein erregimen orokorrekoak ziren, eta SEPEk ukatu egin zion subsidiorako eskubidea.

Langileak 52 urtetik gorako subsidioa eskuratzeko baldintza guztiak betetzen zituen; hain zuzen, edozein pentsio kontributibo jasotzeko baldintzak betetzea adina izan ezik, hau da, 15 urteko kotizazio aldia. Betetzen ez zuen baldintza zen bere lan-bizitzan 6 urtez langabeziagatik kotizatu izana, baina, eta hemen dago koska, 2022ko urriaren 1a baino lehenagoko etxeko langileen erregimen berezian kotizaturiko aldian aintzat hartuz gero, sobera betetzen zuen baldintza.

Hori izan da LAB sindikatutik borrokatu duguna, argudiatuz Europako Batasuneko Auzitegiaren epaia zein direktibaren aplikazioa zuzenak direla eta ez dela zertan aldaketa legal bati itxaron horiek betearazteko. Eta Bilboko lan arloko 6. epaitegiak arrazoia eman digu, ulertuta europar auzitegiak diskriminatzailetzat jo zuela etxeko langileek langabeziagatik ezin kotizatu izana, eta hortaz, 2022ko urriaren 1a baino lehenagoko kotizazio aldiak aintzat hartu behar direla 52 urtetik gorako subsidioen baldintzak baloratzean. Eta ulertzen dugu langabeziagatiko prestazioari ere bete-betean aplikatu ahal zaiola.

Epai hau oso garrantzitsua da, eta etxeko langileei arrazoia ematera dator. Izan ere, epai honek dioenari jarraituz, edozein etxeko langilek, gainontzeko edozein langilek bezala, 2022ko urriaren 1a baino lehenagoko kotizazio aldia aintzat hartzeko eskatu ahalko du langabezia prestazioa edo subsidioa eskatzean.

Halaber, epai honek agerian uzten du beste behin etxeko langileek jasaten duten egoera diskriminatzailea. Azken errege dekretu-legeak, 16/2022ak, zioen 2022ko urriak 1etik aurrerako kotizazioak soilik hartuko zirela aintzat, eta epai hau hori zuzentzera dator.

Borrokan jarraitzea, beharrezkoa

Epai honek berresten du etxeko langileen lan-eskubideen defentsan dugun ibilbide luzea. Etengabe borrokan egon gara eta beti zalantzak daude etxeko langileek eskubideak dituzten ala ez.

Epaia oso esanguratsua da guretzat. LABeko etxeko langileen sail sindikalak kolektibo honek dituen eskubideak aldarrikatu ditu, beste langileak dituztenekin parekatzea eskatuz. Etxeko langileen borroka justua da, eta haien lanak Euskal Herriko bizitzak sostengatzen dituztela aldarrikatu dugu. Lehen aldiz, justizia-esparru batera hurbildu gara, zeina 16/2022 errege dekretu-legearen erreformak berak ukatzen baitigu. Etxeko eta zaintzako langileek langabezia-prestazioa eta subsidioa jasotzea baino gehiago merezi dute; euren lana eta kotizazioak modu erreal eta atzeraeraginkorrean aitortzea merezi dute. Behar horrek elkarrekin egotera eta antolakuntza kolektiboa borrokarako tresna eraginkor bakar gisa defendatzera bultzatzen gaitu. Sektore hau gure sindikatuaren apustua da, eta urratsak ematen jarraituko dugu eskubide guztiak onar daitezen.

1...211212213...1,583Page 212 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus