| Page 187

Langileak gaixo daudenean kontrola handitzeko eta beren osasuna pribatizatzeko praktikak gaitzetsi ditugu

Zubiate(e)ko Aritz

-

2023-11-08

Langileak gaixo daudenean kontrola handitzeko eta beren osasuna pribatizatzeko praktikak gaitzetsi ditugu

Metro Bilbao, Avanza Durangaldea, Bilbobus eta Euskotreneko hainbat ordezkarirekin batera azken hilabeteetan zabaltzen ari den praktika salatu dugu Bilboko Intermodalean.

Gaixotasunagatiko bajetan osagarria jasotzen den enpresek eskubidea dute baja horien jarraipena (kontrola) egiteko zerbitzu mediko bat kontratatzeko. Zehazki, langileen osasun-egoera egiaztatzeko ahalmena ematen die, medikuen azterketa bidez.

Enpresa horiek, diru askoren truke, zerbitzu mediko osagarri gisa eskaintzen dute beren burua, gaixotasun arruntengatiko bajetan osasun-arreta hobea ematen dutela esanez. Asmo on horren atzean, baina, lanera lehenbailehen itzultzea dute helburu. Absentismoa murriztea da lortu nahi dutena, normalean gertakizun arruntengatiko bajei lotutako osagarriak ez ordaintzeko mehatxu eta gezurrekin.

Enpresek ezin dituzte osasun-jarduerarako egokiak ez diren bulegoetara deitzen dituzten langile horien datu pertsonalak eman. Bulego horietan, beren pertzepzioaren arabera baja justifikagarria den edo ez erabakitzen dute, eta enpresari jakinarazten diote langilea noiz itzuliko diren lanera. Bada, ez daukate eskumen hori.

Horrek, noski, presioa dakar; kasu askotan langileen kexak jaso ditu LABek, ez proba diagnostikoak edo bestelako elementu terapeutikoak aurreratu zaizkielako, baizik eta alta hartzeko presioengatik, osasun-dokumentazio pribatua entregatzeko presioengatik, eta abar.

Hori guztia diru publikoa gastatuz, garraio enpresen kasuan bezala (administrazio publikoetatik ateratzen dden dirua osasun pribatura bideratzen da). Avanzan, iaz ez zuten lortu ezarritako absentismo-helburua; Euskotrenen hainbat urte daramatzate ehunka mila euro gastatzen; bada, praktika horrekin hasi zirenean absentismo-maila %9,8 zen, eta gaur egun %12,09 da.

Hori guztia antolatutako kanpaina baten barruan kokatzen da (patronala, mutualitateak, politikari askok eta beste botere faktiko batzuk). Langilea absentismoaren erruduntzat jotzen dute, osasun arloko profesionalak deslegitimizatzen dituzten bitartean, baina beti ere arazoaren sustraira jo gabe, hau da, absentismo horren jatorria eta prebentzio falta, lanordu kopuruak, eta abar aintzat hartu gabe.

Garraio sektoreko LABen ordezkaritza sindikalak argi dauka: aipatutako enpresetako kasuei eta galdutako lanaldi kopuruari dagokienez, gihar eta hezurretako gaixotasunak dira arrazoi nagusia (%25-35 artean). Bigarrenik, arazo psikozozialekin lotutako kasuak agertzen dira, galdutako lanaldien % 15-25, hain zuzen ere.

Gero enpresak absentismoaz kexatzen dira eta mediku-poliziak kontratatzen dituzte. Absentismoa murrizteko, baina, beste gauza batzuk egin behar dira: esate baterako, prebentzio egokia, behin-behinekotasunarekin amaitzea, eta abar. Arriskuen ebaluazioari, osasun-zaintzari, ergonomiari eta psikosoziologiari arreta handiagoa eman behar zaie.

Arrisku psikosozialen ebaluazioak egiten badira ere, ez dira inoiz prebentzio-neurri erreal eta eraginkor bihurtzen. Adibide argi gisa, Metroan 2022ko irailean azken ebaluazioan lortutako emaitzen ondorioz ezarri beharreko hainbat neurri aurkeztu ziren, baina urtebete geroago ez da horren benetako islarik ikusten.

Jatorri arrunteko bajen iruzurraz hitz egiten denean, ez da esaten iruzur hori bajen %4an soilik baiesten dela, eta presentismoa (lanera gaixorik joatea, hau da, lan egiteko moduan egon gabe), berriz, % 41era iristen dela, hainbat inkestaren arabera. Langileok gaixorik joan behar dugu lanera lanpostua galtzeko beldurragatik, hori da errealitatea.

Beharginak medikuntzako zazpi espezialistarenetik pasa daitezke bajaren komenigarritasunari buruz erabaki dezaten (besteak beste, Gizarte Segurantzaren Institutua, ikuskaritza, mutualitateak, etab.); hala ere, langileei egotzi nahi diete errua. Hobe izango litzateke dirua kalitatezko osasun sistema publiko duin batera bideratzea, baina ez da hala egiten, benetako helburua langileria erasotu eta osasun-sistema publikoa eraistea delako.

Laneko bajei irtenbideak jarri nahi bazaizkie, planteamenduak desberdina izan behar du: enpresatan gehiago eta hobeto inbertitu behar da laneko arriskuen prebentzioan, ibilgailuen mantentze-lan egokiak eginez, lan-denborak neurtuz, lanpostu hutsak betez…

Azken batean, bajen benetako arrazoietan sakondu behar da; izan ere, ikusi berri dugunez, kasu gehienetan enplegu- eta lan-baldintzekin estuki lotuta daude, horiek hobetzearekin batera enpresetan osasuna sustatzea eta prebentzio- eta asistentzia-sistema publikoa eta kalitatezkoa hobetzearekin batera, bajen indizea eta horien iraupena nabarmen hobetuko lirateke. Hori da bidea, gainerako guztia langile klaseak pairatzen dituen osasun galeren kriminalizatzea da, egungo osasun sistema publikoa desegiteko eta, beti bezala, langileen eskubideak murrizteko.

Horren aurrean, LABek enpresa horien eta beren praktika mafiosoen aurka langileak antolatzen eta mobilizatzen jarraituko du, praktika horiekin amaitu arte.

Sei greba egun deitu ditugu azaroan Arabako salgaien garraioan

Zubiate(e)ko Aritz

-

2023-11-07

0

Sei greba egun deitu ditugu azaroan Arabako salgaien garraioan

Patronalak negoziazio mahaia etengabe blokeatzeko duen jarreraren aurrean, mahaian dauden sindikatuok greba deitu dugu sektorean azaroaren 9, 14, 16, 21, 22 eta 23an.

Arabako salgaien garraioaren negoziazio mahaiaren hamargarren bileraren ondoren, eta patronalaren jarreraren ondorioz blokeatuta dagoela ikusita, LAB, ELA, UGT eta CCOOek greba deitu dugu sektorean azaroaren 9, 14, 16, 21, 22 eta 23an.

Sektore horretako langileak, pandemian zehar, hainbat alditan txalotu zituzten, baina euren lan baldintzak izoztuta daude 2020tik. Azken urteotan, erosketa saskiak modu kezkagarrian garestitzen joan direla ikusi dute, eta haien soldatek, berriz, 2019koaren pareko jarraitzen dute.

Bitartean, pandemiaren ondoren eta normaltasunera itzulita, negoziatu ere egin nahi ez zuen patronalarekin egin genuen topo. Ez zen bileretara agertu, eta salaketa judizial baten ondoren bakarrik onartu zuen negoziatzera esertzea.

Baina kontua da negoziazio mahaira demanda judizial hori saihesteko asmoz bakarrik doala patronala, Arabako salgaien garraioaren sektoreko langileen lan baldintzak hobetuko dituen akordio bat lortzeko inolako asmorik gabe.

Horregatik guztiagatik, lau sindikatuok, LAB, ELA, UGT eta CCOOek, greba deialdia egin dugu. Dei egiten diegu sektoreak eragindako pertsona guztiei grebetan eta mobilizazioetan parte hartzera.

Azaroaren 9an, deitutako lehen greba egunean, manifestazioa egingo dute 12:00etan Gasteizko Andra Mari Zuriaren plazatik abiatuta. Bertan medioentzako adierazpenak eskainiko dituzte. Eta arratsaldean, 16:30ean, auto karabana egingo dute.

Palestinar herriaren suntsiketa eta okupazioa gelditzeko eskatu dugu berriro

Zubiate(e)ko Aritz

-

2023-11-07

0

Sindikatu guztiok bat egin dugu Gernika-Palestina ekimenak gaur arratsaldeko 7etarako udaletxeen atarian deitutako mobilizazioekin. Horrez gain, hainbat lantoki eta hezkuntza zentrotan mobilizazioak egin ditugu eguerdian.

Gazaren eta, oro har, Palestinako Herriaren kontrako azken sarraskia hasi zenean hainbat sindikatuk Iruñean eta Bilbon egindako mobilizazioan hauxe genion:

“Israelgo Estatu Sionistak Palestinaren aurkako erabateko gerra deklaratu izanak Gaza erabat suntsitzea, gerra-krimen kontaezinak, langile palestinarren hilketak (baita Israelgo estatuaren baitan ere) eta gizateriaren aurkako hamaika urraketa dakartza. Indarkeriaren zurrunbiloa ez da gauza berria Palestinan, eta azken 75 urteetan, bere lurraldearen kolonizazioaren eta bere herritarrei apartheid sistema inposatzearen ondorioz, etengabekoa izan da. 5,9 milioi palestinar errefuxiatu bizi baldintza ankerretara eta erbestera kondenatuak, 5.000 preso politiko baino gehiago, horietatik ehunka haurrak, de facto zeru zabaleko kontzentrazio eremu handiena den Gazaren kontrako 16 urtetako blokeoa eta bonbardaketa etengabeak, langile palestinarrentat checkpoint gizagabeak eta lan baldintza prekarioak nahiz esplotazio orokorra, palestinarren lurren lapurreta, eguneroko razziak palestinarren etxeetan, emakume palestinarren bortxaketak nahiz haurren kontrako jazarpenak, eta herri oso baten umiliazioa”.

Horregatik guztiagatik, Palestinak estatu propioa sortzeko duen eskubidea aldarrikatzearekin bat, Israeli bere esterminio-estrategiari eta palestinarren lurren okupazioari bukaera ematea eskatu dugu gaur berriro. Eta langile klaseari deia luzatu diogu ere, aipatu mobilizazioetan genion moduan, Israel presionatzeko eskura dituen mekanismoak akibatzeko, Nazio Batuen Erakundearen ebazpenak onartu ditzan.

LAB eta Solidari sindikatuok Correos-i exijitu diogu berehala konpon dezala bere bulegoak garbitzen dituzten langileen egoera

Zubiate(e)ko Aritz

-

2023-11-07

0

LAB eta Solidari sindikatuok Correos-i exijitu diogu berehala konpon dezala bere bulegoak garbitzen dituzten langileen egoera

Limpiezas Cordoba garbiketa enpresako langileek, Nafarroako Correosen bulegoak garbitzeko esleipendunak, 72 egun daramatzate greban, eta ez Correosek, ez Administrazioak, ez enpresak ez dute konponbiderik proposatzen. Langileak ortzegunero ari dira Iruñean elkarretaratzea egiten, 11:00etan, Correosen egoitza nagusiaren parean.

Nafarroan Correosen bulegoak garbitzen dituzten langileek bi hilabete baino gehiago greban eman ondoren, LAB eta Solidari sindikatuek egoera horri premiazko konponbidea ematea eskatzen dute. Greba abuztuaren 28an hasi zen, soldatak ez ordaintzeagatik, eta berehalako konponbidea ekarri behar zuena konpondu gabe dago oraindik

Joan den urriaren 2an Correosek Limpiezas Cordoba enpresarekin zuen kontratua deuseztatzeko prozesua hasi zuen arren, handik hilabetera egoera konpondu gabe dago oraindik, hau da, langileek greban jarraitzen dute, ez baitago inor beren soldatak ordaintzeaz arduratuko denik.

Enpresa hori Correoseko bulegoetako garbiketa-zerbitzuak egiten aritu den bitartean, ez zuen Berdintasun Planik, arriskuen prebentzioko ez-betetzeak etengabeak ziren, langileei berandu eta gaizki ordaintzen zien, baita aldi baterako ezintasun egoeran zeuden langileei Gizarte Segurantzaren ordainketa eskuordetua bete gabe ere, eta ez zituen langileen bajak eta oporrak estaltzen.

Hori guztia enpresaren dinamika konstante bat izan zen, harik eta langileen soldatak ordaintzeari utzi zion arte, eta hori izan zen plantillaren egungo gatazkarekin abiatu zuena.

Argi dago Correos dela egoera horren erantzule zuzena, lizitazioaren baldintzak betetzen ez dituzten enpresa piratak kontratatzeagatik; izan ere, jakitun zen egoera horretaz eta enpresak zituen ez-betetze guztiez, behin baino gehiagotan salatuak baitziren.

LAB eta Solidari sindikatuek gatazka berehala konpontzea eskatzen dute, Correosek duen kontratua berehala deseginda, eta enpresak langileekin duen zorra osorik ordainduko dela bermatuta. Ezin da onartu hau guztia administrazio publiko batean gertatzea.

[IRITZIA]: Igor Arroyo: “Euskal langileon agenda erdigunean jartzeko”

Zubiate(e)ko Aritz

-

2023-11-07

0

[IRITZIA]: Igor Arroyo: “Euskal langileon agenda erdigunean jartzeko”

LABeko koordinatzaile orokorrak iritzi artikulua osatu du, jarraian osorik irakur daitekeena:

Estatu Espainiarrean uztaileko hauteskundeek mapa argia utzi zuten. Hainbat alorretan inboluzioa lekarkeen eskuinaren eta ultraeskuinaren Gobernuari atea ixtea pozgarria da, inolako zalantzarik gabe. Egun hauetan, PSOE – Sumar Gobernuaren inbestidura eta legegintzaldirako negoziazio betean daude eta aritmetikak argi uzten du Euskal Herria, Katalunia eta Galizako indar politikoak ezinbestekoak izango direla gobernu aukera horri eusteko. Bada, aukera hori Lan Harremanetarako eta Babes Sozialerako Esparru Propioa eratzeko urratsak egiteko baliatu behar da.

Estatutik inposatutako lan eta pentsio erreformei Greba Orokorrekin erantzun izan diegu. Negoziazio kolektiboaren zentralizazioari aurre egiten diogu gure eguneoko ekintza sindikalean. Horixe izan da orain egun gutxi funtzio publikoko grebetan ere entzun den aldarri nagusia, bertan erabaki nahi dugula. Estatu plurinazionalaren aitortza eta lurralde egituraketaren eztabaida presente izan dira Gobernuarekiko negoziazioetan; testuinguru horretan ezinbestez hartu behar da aintzat euskal langileen gehiengoaren aldarrikapena: gure soldatak, lan baldintzak inolako esku hartzerik gabe bertan negoziatzeko dugun eskubidea.

Munduko eta zehazkiago Europako egoerak ez digu itxaropenerako arrazoi askorik ematen. Krisi sistemikoaren testuinguruan, ondasuna eta boterea esku gutxiagotan pilatzen ari da; estatuen arteko eta estatu bakoitzaren baitako norgehiagoka areagotzen; gatazka zaharrak gordintzen eta berriak pizten. Eskuin muturra hedatzen.

Alta, badira korronte autoritario eta atzerakoi horren aurkako joerak, hala nola, olatu feminista berria edota nazio desberdinetan garatzen ari diren burujabetza prozesuak, dagokien testuinguru politikoan indarrean diren baino parametro aurrerakoiagoetan, oro har. Ipar Irlandako bake prozesuaren 25. urteurrenaren harira sindikatu soberanisten topaketak egin berri ditugu Belfasten, hirugarrenak Bilbon eta Valencian egindakoen ondotik. Nabarmena da 25 urte hauetan subiranismoak hartu duen indarra Irlandan bertan, Eskozian, Groenlandian, Faroen, Korsikan edota Katalunian.

Gurera etorrita ere, ezker independentismoa eremu desberdinetan eragiteko gaitasuna irabazten ari da. Aukera bat dugu zabalik, zalantzarik gabe. Aukera zertarako baliatuko dugun eta, bereziki, norabide horretan zer egingo dugun da gakoa. Sindikalismoaren ikuspegitik erantzuna argia da: Hego Euskal Herrian Lan Harremanetarako eta Babes Sozialerako Euskal Esparrua eratzeko baliatu nahi dugu.

Azken urteotan errepikatu dugun bezala, Madrilen eta Parisen posible ez diren aldaketak Euskal Herrian bultzatu nahi ditugu, horretan ari gara. Jakina, estatu mailan lor daitezkeen hobekuntza soziolaboralak ongi etorriak izango dira eta, kontrara, etor litekeen edozein murrizketari aurre egingo dio sindikalismo independentistak. Baina, nagusiki, Hego Euskal Herrian lan harremanetarako eta babes sozialerako eredu propioa garatzeko dauden galgak eta oztopoak altxatzea da gure erronka.

Euskal lan kodea dugu helburu. Bide horretan, lehenik eta epe motzean lan harremanen estatalizazio prozesuari muga jarri behar diogu, alegia, bertako lan hitzarmenek estatukoen gainetik lehentasuna izan dezaten lortu behar dugu. Borroka sindikalari esker urratsak ematen ari gara: bertako hitzarmenei lehentasuna emateko lanbidearteko akordioa sinatu genuen EAEn; Nafarroan esku hartze sozialeko lehen hitzarmena lortu genuen eta eskura dugu adineko egoitzetakoa; Gasteizko Michelingo langileek negoziazio esparru propioa sortzea erabaki berri dute, besteak beste.

Jauzia emateko, estatuko negoziazio kolektiboari lehentasuna emanez 2010ean onartu zuten aldaketa bertan behera uztea lortu behar dugu. Era berean, negoziazio kolektiborako eskubide teorikoa izan bai baina horretarako biderik ez duten eremuetan ere, hala nola, etxeko langileei dagokienean, zabaldu beharra dago bertako hitzarmenen aterkia. Eremu pribatuan bezala publikoan ere bertan negoziatzeko eskubidea lortu behar dugu, 2008ko krisiaren ondotik ezarritako mugapenak bertan behera utzita.

Babes sozialari dagokionez,bi dira eman litezkeen urratsak: Batetik, Gizarte Segurantzaren kudeaketaren eskumena EAEren esku uztea, Estatutuan aurreikusi bezala, eta Nafarroarentzat ere aukera hori irekitzea. Bestetik, EAEn eta Nafarroan 1080 eurorainoko pentsioa bermatuko duen sistema publiko osagarria sortzeko aukera blindatzea. Urrats horien bidez, etorkizunean Euskal Gizarte Segurantza sortu ahal izateko baldintza hobeagoak izango genituzke.

Aipatutako gogoeta eta eskakizun horiek guztiak EH Bilduri eta EAJri helarazi dizkiegu bilera banatan. EH Bilduk begi onez hartu du LABen planteamendua eta elkarlanean aritzeko prestutasuna adierazi. EAJ, aldiz, uzkur azaldu da berak kudeatzen duen Jaurlaritza interpelatzen duten auziekin, hala nola, zerbitzu publikoetako lan baldintzak bertan negoziatzeko edota 1.080 eurorainoko pentsio osagarria ahalbidetzeko eskakizunaren aurrean.

Gauzak horrela, eremu politiko-instituzionala interpelatzen eta borroka sindikalaren bidez baldintza berriak sortzen jarraituko du LABek datozen aste eta hilabeteetan, euskal langileon lan eta bizi baldintzak hobetuko dituen Lan Harremanetarako eta Babes Sozialerako Esparru Propioaren norabidean.

Olazabal y Huarten greba mugagabea bertan behera uzteko aurreakordioa #LortuDugu

Zubiate(e)ko Aritz

-

2023-11-07

0

Olazabal y Huarten greba mugagabea bertan behera uzteko aurreakordioa #LortuDugu

Aste honetan, Olazabal Y Huarteko enpresako zuzendaritzak eta langileek aurreakordioa lortu dute greba mugagabea, bi hilabetez luzatu dena, bertan behera uzteko. Grebalariei asanbladan kontsulta egin ondoren, proposamena onartu eta greba bertan behera uztea erabaki dute.

72 eguneko grebaren eta bi hilabeteko greba mugagabearen ondoren, ia lantegi osoak babestutakoa eta lantokiko ekoizpena geldiaraztea lortu duena, alderdi sozialak Enpresa Paktuaren urteetarako (2023, 2024 eta 2025) KPIa bermatzea lortu du.

Greba bertan behera utzi aurretik, akordio batera heldu ziren testuaren erredakzioaren abiapuntua aurreko Paktuarena izan zedin. Enpresa lan-baldintzak okertzen saiatu arren, ez dago atzerapenik, eta, gainera, urteko lanaldia 4 orduz murriztea lortu da hitzarmenaren amaierarako, urtean 1710 ordura jaitsi arte.

Olazabal Y Huarteko langileak zoriondu nahi ditugu LAB sindikatutik, haien borrokari eta grebaren arrakastari esker nabarmen hobetu baitituzte lan-baldintzak.

Azkenik, gogorarazi behar da beste behin ere, antolakuntzari eta klase batasunari esker lortu direla langile klasearentzako hobekuntza hauek. Borrokak merezi du!

Mecanerren itxieraren aurka kalera atera gara beste behin ere

Zubiate(e)ko Aritz

-

2023-11-06

0

Mecanerren itxieraren aurka kalera atera gara beste behin ere

Zazpigarren greba eguna izan dute gaurkoa Urdulizko lantegiko beharginek. Hala, Bilbon barrena manifestazioa egin eta jarraian Bizkaiko Foru Aldundiko ordezkariekin bildu dira, konpromiso zehatzak hartzeko eskatu dietelarik.

Duela aste pare bat pasatxo Eusko Jaurlaritzarekin egin bezala, gaurkoan Mecanerreko ordezkariak Bizkaiko Foru Aldundiarekin bildu dira, eta eskualdean industria-ehuna babesteko nahiz lantegiaren itxiera saihesteko konpromisoak eskatu dituzte.

Gogorarazi behar da enpresaren erabakia plan estrategiko baten barruan dagoela, deslokalizazio-prozesu bat egin eta Urdulizko lantegia ixtearen helburua argia baita: irabazi-marjinak handitu eta kostuak murriztea. Aldiz, irabazi handiak izan ditu azkenaldian lantegiak. Hori dela eta, langileak ez daude amore emateko prest.

Eusko Jaurlaritzak entzungor egiten jarraitzen die urriaren 25ean kaleak bete zituzten milaka langile publikoei

Zubiate(e)ko Aritz

-

2023-11-06

0

Eusko Jaurlaritzak entzungor egiten jarraitzen die urriaren 25ean kaleak bete zituzten milaka langile publikoei

Gaurko Mahai Orokorrean, Eusko Jaurlaritzak baztertu egin ditu sindikatuek egindako eskaerak, nahiz eta urriaren 25eko greban langile publikoek aldarrikapen horiekin bat egin.

Grebaren ostean, Eusko Jaurlaritzak sindikatuekin negoziatzeko borondatea agertu zuen, baina gaur grebaren arrakastak behartuta deitu duen lehen bileran, Eusko Jaurlaritzak, beste behin ere, baztertu ditu, sindikatuen proposamen zehatzak. Gobernuak orokortasunak aipatzen dituen bitartean negoziatzeko ustezko borondate horren aurkako neurriak inposatzen jarraitzen du. Sindikatu guztiek atzera bota zuten Enplegu Publikoaren Legeak ezartzen duen joko eremura mugatu nahi du.

Hala, bileran, Eusko Jaurlaritzak belaunaldi-erreleboko politikak negoziatzeaz hitz egin du, baina langile guztiei erretiro partzial aurreratua ezartzeari uko egiten dio (erretiro-kontratua), hitzarmenetan aurreikusitako erretiro-sariak aplikatu gabe jarraitzen du, eta Itzarriko BGAEaren murrizketari eusten dio.

Lanpostuak hautatze eta betetzeko politikei buruzko negoziazioa abiaraztea planteatu du, behin-behinekotasun tasa % 40tik gora iraunarazten duten erabakiak hartzen dituen bitartean. Madrildik ezarritako birjarpen-tasak onartzen jarraitzen du, eta ez ditu erabili nahi legediak egonkortze-prozesuak egiteko irekitzen dituen muga estuak (Iceta legean, 2023ko Estatuko Aurrekontuen Legean edo 5/ 2023 Errege Dekretu legegilean aurreikusitakoak adibidez).

Soldatari dagokionez, adierazi du ordainsari-sistema aldakor bat garatu nahi duela, plantillaren erdia (behin-behineko langileak, gehienak emakumeak Administrazioan) aplikaziotik kanpo uzteko aukera ematen duena, eta langile publikoak Gobernuaren aurrean men egitea bermatzen duena. Eta hori, helburu bakar batekin: langile publiko guztiei galdutako erosteko ahalmena berreskuratzea helburu duen soldata-igoerari ez ekitea. Madrilgo aurrekontuen legearen mugen aitzakia erabiltzeak ez du balio: gezurra da, eta interesa duenean autogobernuaren defentsa irmoagoa erakutsi eat muga horiek gainditu dituzte.

Sektore publikoko greba deitu duten sindikatuek elkarretaratzea egin dute gaur Lakuan, eta mobilizatzen jarraituko dutela adierazi dute, Eusko Jaurlaritzak, gainerako erakundeek eta alderdi politikoek enplegua, soldata eta lan-baldintzak hemen erabakitzeko beharrezko neurriak hartu arte. Zerbitzu publikoak indartzea eta pribatizazioekin amaitzea ahalbidetuko duten aurrekontuak bermatzea; enplegu publikoa sortzea eta sendotzea, galdutako erosteko ahalmena berreskuratzea, plantillen osasuna bermatzea eta sektore publikoa euskalduntzeko beharrezko urratsak ematea eta genero- diskriminazioarekin amaitzea. Abendurako mobilizazioak eta 19 rako greba
prestatzen jarraituko dute beraz.

Atzegiko langileak enpresa hitzarmenaren alde mobilizatu dira

Zubiate(e)ko Aritz

-

2023-11-06

0

Atzegiko langileak enpresa hitzarmenaren alde mobilizatu dira

Atzegiko langileek enpresa hitzarmenaren aldeko mobilizazioa egin dute gaur enpresaren bulegoen aurrean, Donostiako Okendo kalean. KPIa bermatzea, 1.600 orduko urteko lanaldia eta ratioak hobetzea dira hitzarmeneko aldarrikapen nagusiak.

Pasa den urriaren 23an egin zuten langileen asanbladan 90 langile elkartu ziren eta gehiengo osoak ezezkoa bozkatu zion enpresaren proposamena onartzeari. Ondorioz, mobilizazioei ekitea erabaki zuten.

LABLangile Abertzaleen Batzordeak

Langileak gaixo daudenean kontrola handitzeko eta beren osasuna pribatizatzeko praktikak gaitzetsi ditugu

Sei greba egun deitu ditugu azaroan Arabako salgaien garraioan

Palestinar herriaren suntsiketa eta okupazioa gelditzeko eskatu dugu berriro

LAB eta Solidari sindikatuok Correos-i exijitu diogu berehala konpon dezala bere bulegoak garbitzen dituzten langileen egoera

[IRITZIA]: Igor Arroyo: “Euskal langileon agenda erdigunean jartzeko”

Olazabal y Huarten greba mugagabea bertan behera uzteko aurreakordioa #LortuDugu

Mecanerren itxieraren aurka kalera atera gara beste behin ere

Eusko Jaurlaritzak entzungor egiten jarraitzen die urriaren 25ean kaleak bete zituzten milaka langile publikoei

Atzegiko langileak enpresa hitzarmenaren alde mobilizatu dira

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD