2025-12-21
Blog Page 118

Lantokietan aske!

Zubiate(e)ko Aritz
-
0
Lantokietan aske!

2024ko ekainaren 28 honetan, sexu askatasuna aldarrikatu nahi dugu, baita lantokietan ere. Aske izateko neurri eraginkorrak behar ditugu. Zuriketa arrosari ez!

Eskuin muturraren gorakadaren eta diskurtso erreakzionarioen hedapenaren aurrean, mugimendu transmaribibolloaren borrokari esker instituzioetan lege eta politika publikoetan aurrera urratsak egiten ari diren testuinguruan gaude: Espainiako Estatuko Trans Legearen ondotik, otsailean onartu zen Eusko Legebiltzarrean EAEko trans legea deiturikoa, esaterako.

Baina nahikoa al dira neurri hauek LGTBIQ+ kolektiboaren eskubideen defentsarako, edo, are gehiago, heteroarautik kanpo gure askatasuna bermatzeko?

Instituzioek eta patronalak dituzten zuriketa arrosezko jarreren aurrean, LABetik lantokietan aske izateko neurri eraginkorrak eta errealak exijitzen jarraituko dugu, gure lan sindikalaren bidez.

Jakin badakigu instituzio eta patronalaren aldetik ez dela etorriko guk desio dugun mundua eraikitzeko proposamen erradikalik, baina eskuin muturraren eta diskurtso erreakzionarioen gorakada bizitzen ari garen honetan, garrantzitsua da LGTBIQ+ kolektiboko kideon bizitzen alde bermeak jartzea.

Gaur gaurkoz ez-nahikoak diren lege eta “berdintasun politiken” aurrean, guk politika feministak aldarrikatzen jarraituko dugu. Egiturazko aldaketa errealak eta bitartekoak behar ditugu. Enpleguaren eremuan, LGTBIQ+ kolektiboaren zapalkuntza espezifikoak identifikatu, landu eta aurre egiteko protokolo eta plan espezifikoak behar ditugu.

Horrekin batera, mugimendu transmaribibolloak deitutako mobilizazioetan parte hartzera dei egiten dugu.

Sexualitatea askatasun osoz bizitzeko hautua erabat zilegia dela aldarrikatu nahi dugu: kapitalismo heteropatriarkalak inposatutako leku, eredu eta roletatik asakatzen gaituen hautu bezala ulertzen dugu. Izan ere, sexuaren araberako lan banaketa posible egiten duena bikote heterosexualean oinarritzen den familia nuklearra da. Familia funtsezko instituzioa da produkzio eta erreprodukziorako egungo sistema existitzeko, baita betikotzeko ere.

Helburua heteroaraua gainditu eta gure harreman eta identitateak modu askean erabakitzeko burujabe izatea delako, eman diezaiegun su heteroarauaren armairuei. Saretu, ahaldundu, salatu eta erantzuteko konpromisoan berretsiz, lantokietan ere aske izan nahi dugu!

Microliquid-en greba mugagabea hasiko dugu, enpleguaren defentsan

Zubiate(e)ko Aritz
-
0
Microliquid-en greba mugagabea hasiko dugu, enpleguaren defentsan

Astelehenean abiatuko da lanuztea, eta goizetik ekingo diete mobilizazioei langileek. Enpresari prozesua geldiarazteko eskatzen diogu.

Ekainaren 19an, Microliquid-eko (Te Connectivity) zuzendaritzak Enpresa Batzordeari jakinarazi zion Enplegu Erregulazio Espediente bat (kaleratze kolektiboa) aplikatzeko asmoa zuela, eta hogei bat langileri eragingo diela, krisi-egoera batean kostuak aurrezteko aitzakiarekin. Honek langileen herena kaleratzea ekarriko luke.

Enpresa batzordean (LABeko 5 kidek osatutakoa) hasieratik kaleratzeen aurka agertu gara, batetik enpresak ez duelako nahikoa informazio ematen argudiatutako arrazoiak justifikatzeko eta, gainera, langileen zati handi bat oporretan dagoelako prozesuaren negoziaketak iraungo duen bitartean. Horregatik, enpresari prozesua geldiarazi eta kaleratzeak bertan behera uzteko eskatzen diogu.

Zuzendaritzak prozesuarekin aurrera jarraitzen duenez, aste honetan langile batzarra egin dugu, eta asanbladaren %95 baino gehiagoren babesa jasota, uztailaren 1etik aurrera greba mugagabeari ekingo diogu.

Astelehenetik aurrera, beraz, langileak greban egongo dira enpresari kaleratzerik ez egiteko exijituz, eta elkarretaratzea egingo dute enpresa aurrean 8:00-10:30 bitartean. Jarraian manifestazioa egingo dute Arrasateko kaleetan zehar, geldialdi bat eginez parke teknologikoko biribilgunean 11:00etatik 12:00etara.

Zerbitzu publikoen defentsan mobilizatu dira Bilboko Udaleko langileak osoko bilkuraren aurrean

Zubiate(e)ko Aritz
-
0
Zerbitzu publikoen defentsan mobilizatu dira Bilboko Udaleko langileak osoko bilkuraren aurrean

Langileen Batzordeak salatu du Bilboko Udalak ez duela negoziatzeko borondaterik eta dekretuen bidez langile guztien baldintzei eragiten dieten aldaketak inposatzeko jarrera duela.

Azken urteotan egindako negoziazio-mahai guztietan egiaztatu dute bertako langileek Udalak ez duela benetako borondaterik sindikatuei premiazkoak eta garrantzitsuak iruditzen zaizkigun gaietan aurrera egiteko, hala nola:

– Hitzarmena berritzea eta modernizatzea.

– Kalitatezko enplegu publikoa sortzea eta pribatizazioak saihestea.

– Lanpostuen balorazioa.

– Telelaneko plan bat.

– Karrera profesionala onartzea.

– Plantilla gaztetzeko plan bat, langile berriei sartzeko eta langile beteranoei erretiratzeko aukera emango diena.

– Egutegiak eta familia bateragarri egiteko murrizketak ezartzea.

– Baja medikoengatiko kenkariak.

Bilboko Udalak urteak daramatza hitzarmena eguneratu eta modernizatu gabe, Udaleko langileok azken hamarkadan pilatutako erosteko ahalmenaren % 20ko galera daramagu.

Langileen Batzordeak urteak daramatza EAJk eta PSEk udal zerbitzu publikoak pribatizatzeko estrategia salatzen. Estrategia horrek murrizketak, azpikontratazioa eta lan-prekaritatea dakartza.

Juan Mari Aburto alkateak eta EAJ eta PSEk osatutako bere gobernu-taldeak Bilboko Udalak ematen dituen zerbitzu publiko guztiekin amaitu nahi dute.

Asko eta asko izan ziren sektore publiko osoko grebetan kalera atera ziren langileak, zerbitzu publikoak indartzea eskatzeko eta lan-baldintzak Udalean negoziatu ahal izatea bermatzeko.

Langileen Batzordeak dei egiten du udaleko langile guztiek parte har dezaten enplegu publikoa sortu eta mantentzearen aldeko hurrengo deialdietan.

EAJ-PSE Bilboko Udalaren zerbitzura dauden langileen lan-baldintzak negoziatzera esertzea nahi dute langileen ordezkariek, ez dute zerbitzu publikoen pribatizazioa bermatuko, ezta enplegu publikoak suntsitzea ere.

“Ez ditugu onartuko Madriletik datozen mugak, udal langileen osasuna bermatu nahi dugu, erosteko ahalmena berreskuratzea bermatu, kalitatezko enplegu publikoa sortu eta plazen amortizazioak saihestu”, adierazi dute.

Plantilla gaztetzeko premiazko neurriak eskatzen dituzte: txanda-kontratua eta lanaldi-murrizketak, langile guztientzat.

Horregatik guztiagatik, Juan Maria Aburto alkateari eta Gobernu Batzordeari (EAJ-PSE) eskatzen diete inposizioko jarrera alda dezatela eta Langileen Batzordearekin negoziatzeko eta adosteko prest daudela adieraz dezatela.

Enplegu Zentro Berezietan abian jarriko dugun borroka ildoa aurkeztu dugu, eskubideak, erabakimena eta aitortza eskuratzea helburu izango duena

Zubiate(e)ko Aritz
-
0
Enplegu Zentro Berezietan abian jarriko dugun borroka ildoa aurkeztu dugu, eskubideak, erabakimena eta aitortza eskuratzea helburu izango duena

Kolektibo honetako 10.000 langile baino gehiago daude gaur egun Hego Euskal Herrian, eta sindikatutik hitzarmen propioak bultzatuko ditugu EAEn eta Nafarroan, politika baztertzaileak salatu eta lan-baldintzetan aurrera egiteko asmoz borroka egiteko konpromisoa hartu dugularik. Delegatuen batzarra egin dugu gaur Altsasun.

30 urte baino gehiago dira Enplegu Zentro Bereziak martxan daudela, nahiz eta, LABek salatu bezala, hainbat erakundek, gaur egun oraindik, pentsatzen duten langile-taldetxo soil bat baino ez garela, eremu txikietan balio erantsi txikiko lanak egiten ari garena. Baina egungo errealitatea bestelakoa da. 10.000 langile baino gehiago gara Hego Euskal Herrian. Zerbitzuen, garbiketaren, lorategien, ostalaritzaren, arretaren eta zaintzaren sektorean ari gara, hainbat lan-sektoretako kide gara, eta Enplegu Zentro Bereziak osatzen dituzten ehunka enpresatan gaude, administrazio publikoek finantzatuta eta enpresa pribatuek eta elkarte autonomoek kudeatuta. Langile indar handia gara, beraz.

Hainbat lege, errege-dekretu eta arauk baztertutako eta diskriminatutako langileak gara, ordea. Eskubiderik gabeko langileak, prekarizatuta lan egitera beharturik gaudenak.

LAB sindikatuan antolatutako lankideok urteak daramatzagu aldarrikatzen eskubide osoko langileak garela. Enpresa horietara iristen den diru publikoaren kontrola ez ezik, enpresa horien guztien barne-funtzionamenduaren kontrola egon dadin ere eskatzen dugu. Izan ere, erakundeak lanbidearteko gutxieneko soldatatik beherako ordainsariak, behin-behinekotasuna, gehiegizko produkzio-erritmoak eta ohiko enplegua lortzeko zailtasunak ahalbidetzen ari dira. Eta ez hori bakarrik: enpresek arriskuen prebentzioaren gainean duten erabateko jarrera axolagabea ahalbidetzen dute instituzioek. Horren ondorioz, beharginon osasun fisiko eta psikologikoa kaltetzen da, etengabe.

Hori guztia aintzat hartuta, LABen datorren ikasturtera begira landuko ditugun ekintza-ildoak aurkeztu ditugu:

– Sektorerako hitzarmen propio baten negoziazioa bultzatuko dugu EAEn eta Nafarroan. Elkarrizketa mahai serio bat eskatuko dugu, sektore horretan integrazio erreala eta ez-baztertzailea lortzeko, eta, horrela, etorkizuneko bidea landu eta gauzatu ahal izateko. Beharrezko urratsak emango ditugu sektoreari loturiko patronalak deitzeko eta hemen, Euskal Herrian, lan baldintzak negoziatzeko.

– Prekaritatera bultzatzen duten politika baztertzaile guztiak salatuko ditugu, lan arrunterako benetako trantsiziorako proposamenak sustatuz.

– Beste sektore batzuetako enpresa nagusietan aniztasun funtzionala duten milaka langileren lan baldintzak hobetzeko proposamenak defendatuko ditu, lan bera soldata berdinarekin eta baldintza berberetan egitea eskatuz.

Enplegu zentro berezietako LAB sindikatuko ordezkariek ohartarazi dute gure borrokak enpresa eta/edo erakunde guztien aurrera helaraziko ditugula. Klase politikoaren eta enpresarien entzungorkeriaren gainetik, era antolatuan, aniztasun funtzionaleko eta prekarizatutako langileen defentsan, gure ahotsa altxatuko dugu behar den leku eta eremu guztietan.

Preso orok du espetxe zigorra bete ahala nahiz bete ostean bere bizitza berregiteko beharra eta eskubidea, besteak beste, lan duin bat eskuratuz

Zubiate(e)ko Aritz
-
0
Preso orok du espetxe zigorra bete ahala nahiz bete ostean bere bizitza berregiteko beharra eta eskubidea, besteak beste, lan duin bat eskuratuz

“Langileok konponbidean, salbuespen neurriak STOP” lemapean mobilizazioak egin ditugu berriro gaur Bilbo, Donostia, Gasteiz eta Iruñean, ELA, ESK, STEILAS, CGT/LKN, CNT eta HIRU sindikatuekin. Hauetan, preso politikoak jasaten ari diren salbuespenezko espetxe politika guztiz gainditzea eskatu dugu.

Izaskun Garcia LABeko Batzorde Exekutiboko kidea Bilbon izan da, Bizikidetzaren plazan egindako mobilizazioan, eta onartu du azken urteetan, euskal preso politikoei dagokionez urrats garrantzitsuak eman dira, hala nola, Euskal Herriratzea edota gradu aldaketak.

Hala ere, nabarmendu du oraindik ez dela guztiz gainditu salbuespenezko espetxe politika, zenbait erakundek eta eragilek oztopoak jartzen dituztelako euskal presoek legedi arruntaren arabera egin beharreko ibilbidean.

LABeko ordezkariak argi utzi du sindikatuaren jarrera: “Bereziki salatu nahi dugu euskal presoek eta preso ohiek lanerako duten eskubidea auzitan jartzen duen gorrotozko diskurtsoa”. Norbanakoaren oinarrizko eskubideen kontrakoak izateaz gain, ikuspegi kolektibotik elkarbizitzaren kontrako erasoak ere badirela azpimarratu du.

“Preso orok badu espetxe zigorra bete ahala nahiz bete ostean bere bizitza berregiteko beharra eta eskubidea, besteak beste, lan duin bat eskuratuz. Eta euskal jendarteak badu oroimenerako, bakerako eta elkarbizitzarako beharra eta eskubidea”, gaineratu du Garciak.

LABetik salbuespenezko legedia salatzen eta konponbide osoa aldarrikatzen jarraituko dugu kalean zein lantokietan, eta baita horrek eskatzen duen bultzada sozial eta sindikala sustatzen ere.

Nafarroako irakasleon eskakizunei muzin egiteari uzteko exijitzen diogu Hezkuntza Departamentuari

Zubiate(e)ko Aritz
-
0
Nafarroako irakasleon eskakizunei muzin egiteari uzteko exijitzen diogu Hezkuntza Departamentuari

Hezkuntzako Negoziazio Mahai Sektorialeko sindikatu guztiok Hezkuntza kontseilariari eta Nafarroako Gobernuari hurrengo galdera luzatzen diegu: zer nahi dute, 24/25 ikasturtea benetako negoziazioekin hasi, hau da, irakasleen aldarrikapenei erantzunez, ala ikasturte gatazkatsua?

23/24 ikasturtean, sindikatuok negoziatzeko prest agertu gara eta hezkuntza publikoko irakasleentzat hobekuntzak lortzen saiatu gara. Ikasturte hasieratik planteatutako aldarrikapenak lortzeko lantaldeetan aritu gara, baina ez da gutxieneko aldaketarik ere gertatu.
Ikasturte bukaeran, egiaztatzen dugu irakasleek hasieran salatzen genituen arazo berberak ditugula: lan gainzama, gehiegizko ratioak, erosahalmenaren galera eta plantillen ezegonkortasuna. Jakina denez, gai horiek guztiek eragina dute Nafarroako hezkuntza sistema publikoaren kalitatean.

Horregatik, kontseilariak eta Nafarroako Gobernuak gure eskaerei benetako prestutasunez erantzutea nahi dugu, akordioak lortzeko eta horiek finantzatzeko konpromiso irmoarekin. Aipatutako arazoak Parlamentuko taldeei ere helarazi zaizkie eta horiek bat egin dute irakasleek dituzten arazoei aurre egiteko eta irtenbideak negoziatzeko beharrarekin.

Hezkuntza Departamentuarekin egindako bilera guztietan erantzun bera jaso dugu sindikatuok: irakasleen eskaerei heltzeko aurrekonturik ez dagoela. Irailean 2025erako Nafarroako aurrekontuaren osaera abian jarriko denez, ekiteko unea dela uste dugu eta Gobernuak lehentasuntzat har ditzala hezkuntza publikoko irakasleak. Kontu hau nahitaez aurrekontu partidetan islatu behar da, eta Gobernuak dauka horren ardura.

Ildo horretan, iragartzen dugu irailean irakasleen ordezkariak garen sindikatu guztiak mobilizazioekin hasiko garela. Nafarroako datorren urteko aurrekontuetan irakasleen aldarrikapenei erantzuteko partidak eskatuko ditugu. Badakigu arazo guztiei aldi berean irtenbidea ematea ezinezkoa dela, baina hori bideratuko duen egutegi bat osa daiteke.

Ikasturte hasieran mobilizazioak ugarituko dira eta sindikatu guztiok bat eginik greba egun baterako deitzen dugu, irailaren 26an hezkuntza sistema publikoa geldituko dugu. Espero dugu kontseilaria eta Nafarroako Gobernua errealitateaz ohartzea, eta aintzat hartzea Nafarroako irakaskuntza publikoko irakasleen eskaerak

Exijitu dugu Erorien Monumentu frankistan aldaketa erradikal bat egotea

Zubiate(e)ko Aritz
-
0
Exijitu dugu Erorien Monumentu frankistan aldaketa erradikal bat egotea

Frankismoa eta faxismoa goraipatzen dituen Erorien Monumentuaren izaera eta esanahia errotik aldatzeko aukera demokratiko guztiak babestu ditugu beti LAB sindikatuan. Garaian, Mola eta Sanjurjoren gorpuzkiak ateratzea babestu genuen bezala. Legegintzaldi honetan Monumentu frankista horretan aldaketa erradikal bat gauzatzea (eraispenaren aukera barne) aldarrikatzen dugu, eta horretarako herritarren parte hartzea ahalbideratzea. Nafarroan frankismoak erabilitako lan esklaboaren inguruko dinamikarekin erakusten ari garen moduan, LAB sindikatuan, langileon ikuspegitik, klase kontzientziatik memoria historikoari, memoria demokratikoari ekarpena egiteko konpromisoa berresten dugu.

LAB sindikatuarentzat epe motzean, hau da, legegintzaldi honetan, Erorien Monumentu frankistan aldaketa erradikal bat egotea ezinbestekoa da. Horren alde denok bat egiteko unea da, memoria demokratikoa aldarrikatzen dugunon arteko batasuna eta bide orri komuna funtsezkoak baitira horren aldeko gehiengo sozial bat osatzeko. Lan filosofiak horri erantzun behar dio. Ikuspegi demokratizatzailetik proposatu diren alternatiba ezberdinen arteko talkarekin nekez lortuko da aipatutako helburua.

Halaber, ezer ez egitea ez dela aukera bat. Beste era batera esanda, eskuin frankistaren kontakizunaren aurrean garrantzitsuena da memoria integrala eta haustura ordezkatuko eta irudikatuko duen aldaketa erradikal bat ziurtatzea. Iruñeko Udala eta Nafarroako Gobernua, eragile sozial eta sindikalak, nahiz oroimenaren inguruko eragileak, nor bere izaera eta ikuspegitik baina denok batera aritu behar dugu erronka hau bururaino eramateko. LABen ustez, interbentzio erradikal horrek eraispenaren aukera ere aintzat hartu behar du. Beste aukera batzuen gainetik, eraispenaren aukera lehenesten dugu.

Azkenik, aipatutako helburua lortzeko tresna eraginkorrak erabiltzea defendatzen dugu, eta horien artean herritarren aktibazioa eta parte hartzea kokatzen dira.

Patronala da absentismoaren eragile nagusia,lan osasuneko arau hauste etengabeko eta zigorgabeeen ondorioz

Zubiate(e)ko Aritz
-
0
Patronala da absentismoaren eragile nagusia,lan osasuneko arau hauste etengabeko eta zigorgabeeen ondorioz

Azken hilabeteotan, Eusko Jaurlaritza, patronala eta eurekin lerrokatutako komunikabideak absentismoaren inguruko etengabeko erasoan ari dira, baina datu ofizialek erakusten digutenez, patronalak berak erantzukizun handia dauka gai honekiko. Izan ere, bajak daude honen atzean, eta horietako askok, gainera, laneko jardunarekin lotura zuzena daukate. Lan istripuek gora egiten eta laneko gaixotasunek aitortu gabe jarraitzen dute.

Arrisku psikosozialak dira azken urteotan lanak eragindako arrisku faktore nagusiak, aldi baterako ezintasunak eragitean duten garrantziagatik. Gogorarazi nahi dugu mutualitateek ez dituztela sekula laneko kontingentzia bezala aitortzen, nahiz eta ikerketa guztiek, baita gobernuenek ere, lanak eragindako faktore nagusien artean kokatu. Beraz, aldi baterako ezintasunen atzean dagoen baja andana lanak eragindakoak dira, nahiz eta ofizialki ez diren aitortzen. Adibide honek azaltzen du patronalak luzatzen duen mezuak ez duela oinarririk. Izan ere, patronala da absentismoaren eragile nagusia, lan osasuneko arau hauste etengabeko eta zigorgabearen ondorioz. Guzti hau ordea, langileok pairatzen dugu gure osasun fisiko eta mentalean.

Azken datu ofizialen irakurketa

Osalanek 2024ko urtarriletik apirilera artean EAEn izandako lan istripuen datuak argitaratu ditu, eta LABen iritziz esanguratsuak dira. Izan ere, patronalak lan osasuneko araudia urratzearen ondorioz sortutako lan istripuek %7,26 egin dute urtebetean. Honela, iazko lehen lau hilabeteetan 25.673 istripu izan ziren EAEn eta aurtengo denbora tarte berdinean 27.539 izan dira. Guztien artean, baja eragin duten istripuak, larrienak, izan dira gehien igo direnak, %12,1, 12.908tik 14.470era. Gogoratu dezagun hauek datu ofizialak direla, patronalak berak gizarte segurantzari komunikatutakoak, eta jakina da beste milaka istripu ez direla komunikatzen. Bestalde, in itinere istripuak, hau da, lanerako joan-etorrietan gertatutakoak, ez dira aintzat hartzen datu ofizialetan.

Osalanek argitaratutako datuok laneko gaixotasunen aipamen testimoniala egiten dute. Izan ere 1.248 gaixotasun aitortu dira 2024ko urtarriletik apirilera. Honek Osasunaren Munduko Erakundeak (OME) zehaztuta duen istripu eta laneko gaixotasunen proportzioa iraultzen du, honen arabera laneko gaixotasunak istripuak baino gehiago baitira.

Beraz, istripuen gorakada berri batean gaude, azken urteetako joeraren erakusle. Honek oinarri nahikoa ematen digu Jaurlaritzaren eta Osalanen lan-osasunaren arloko politikek porrot egin dutela esateko, datu guztiek horixe berresten baitute hilabetez hilabete. Askotan salatu dugun moduan, patronalari enbarazurik ez egitea da Jaurlaritza eta Osalanen politiken helburua eta ondorioz, langileon osasuna bermatzea bigarren maila batean geratzen da.

Olaberriako Arcelor Mittalen enplegu arloko akordio baten alde agertu gara

Zubiate(e)ko Aritz
-
0
Olaberriako Arcelor Mittalen enplegu arloko akordio baten alde agertu gara

Lantegiak baditu bere beharrizanak eta gabeziak enpleguari dagokionez, maiz azpimarratu izan dugun bezala, eta esparru-akordioak ez ditu horiek konpondu. Bi urte daramatzagu jakin gabe lankideak nola aterako diren, enpresak ez baitu errelebo kontratua aplikatzen, ezta langile berriak noiz hasiko diren ere.

Afiliatuekin bildu eta langileei entzun ondoren, aktibatzeko eta enpresako zuzendaritzaren gelditasuna hausteko urratsak emateko unea dela uste dugu, eta horregatik lanuztea egin dugu gaur.

Adierazi behar da, halaber, mobilizazioen proposamena batzordean aurkeztu genuela LABetik, ikusteko ea gainerako sindikatuek gure irakurketarekin bat egiten zuten Olaberrirako enplegu-plan bat lortzeko aktibatzeko premiari buruz. UGTk eta CCOOek ez zuten bat egin, eta ELA sindikatuak osoko bilkuratik alde egin zuen gainerakoei entzun ondoren, baloraziorik ere eman gabe.

Gure ustez, garrantzitsua izango litzateke gainerako sindikatuek ere bat egitea, egungo egoeraren aurrean eta Olaberriaren etorkizunerako enpleguari dagokionez gauzak ondo egiteak ezinbesteko garrantzia duen honetan.

Langile zahartuak daude oraindik Arcelor Mittalen, milaka aparteko ordu egiten… Zuzendaritzarekin batzartu gara behin baino gehiagotan eta Olaberriari irtenbideak emateko eskatu izan dugu. Erantzunak ez gaitu asebetetzen, enpresak ez baitu konpromiso zehatzik hartzen eta kontua luzatzen baino ez baita ahalegintzen. Gauzak horrela, mobilizazioa eta borroka funtsezkoak dira akordio batera iritsi ahal izateko. LABen ildo horretan lan egiten jarraituko dugu, Olaberriako lantegian enpleguaren arloan akordio duin bat izatea helburu.

1...117118119...1,582Page 118 of 1,582

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus