![[ARGAZKIAK] Euskal Herria #Abian, #presoaketxera!](https://www.lab.eus/wp-content/uploads/2016/02/materiala_argazkiak_euskalHerria_euskalPresoak_16_02_20etxera_valentziaAzala.jpg "[ARGAZKIAK] Euskal Herria #Abian, #presoaketxera!")
Blog Page 1099
Sinadura-bilketa eguna zerbitzu sozialetan langile gehiago izatea aldarrikatuz
Zerbitzu sozialen sistema publiko eta unibertsala aldarrikatuz LAB sindikatuak martxan jarri duen “Zaintza zaindu. Langile gehiago, zerbitzu hobea" kanpainaren barruan aurrera daramagun sinadura-bilketak bere egun nagusia izan du gaur, hilak 19. Honetarako, Hego Euskal Herriko hiriburu eta herrietan sinadurak jasotzeko mahaiak jarri dira.
Bizitzan zehar, eta hamaika zergatirengatik, gizarte-laguntzaren beharra izan dezakegun egoera gorrietan egon gaitezke: menpekotasuna, babes eza, bazterketa, gabezia materialak edo bortxakeria matxista. Babes soziala eskatzen duten egoerak dira guztiak. Egoera hauei aurre eginez, bizimodu duina, autonomoa eta inguruarekin ondo integraturiko harremanak izateko kalitatezko zerbitzu sozialak behar ditugu.
Tamalez, gaur egun gizarte zerbitzuen egoera oso kezkagarria da. Gizarte laguntzaren eskariak erruz gainditzen du eskaintza. Gainera gizarte zerbitzuetan ematen diren lan baldintzek ezinezko egiten dute laguntza egokia eskaintzea. Egoera hau aldatzeko gizarte zerbitzu publiko eta unibertsalen beharra ezibesteko dela deritzogu.
Kalitateko zerbitzuak bermatze aldera, behar besteko baliabide eta bitartekoak ezartzeak berebiziko garrantzia du. Xede horrekin, gaurko sinadura bilketan, hiru aldarrikapen jaso dira. Batetik, adinekoen, adin txikikoen eta aniztasun funtzionala dutenen zentruetan plantilak handitzea. Bigarrenik, arreta integrala eskaintzea posible izan dadin, administrazioei profilen eta funtzio profesionalen hedapena berma dezatela. Eta hirugarrenik, langileen, erakunde sozialen eta erabiltzaileen parte-hartzea, zerbitzu sozialetako langileen beharrekin loturiko ebaluazio, kudeaketa eta erabakietan.
Datozen egunotan, jasotako sinadurak, EAEko parlamentua eta Nafarroako Gobernuari aurkeztuko dizkiogu egoerak eskatzen dituen neurriak har ditzaten.
O20an, ere, Euskal Presoen eskubideak aldarrikatuko ditugu
Otsailaren 20an Euskal Presoak dauden Espainia eta Portugaleko espetxe guztietara martxak burutuko ditugu presondegietan ABIAN eztabaida behar den bezala eman dezaten dispertsio eta sakabanaketak eragindako baldintzak salatzeko eta Euskal Presoen eskubideak aldarrikatzeko.
LABek gorriz markatua du asteburu honetako hitzordua eta kartzeletara egingo diren martxetan izango da. Gainera LABek autobusa antolatu du larriki gaixo den Lorentxa Guimon-en etxeratzea exijitzeko antolatu den martxan parte hartzeko.
Administraziopeko ikastetxeetako aurrematrikulazioan, “D” eredua baztertua
Nafarroan aurrematrikulazio epea ireki den honetan LAB sindikatuak Administrazioaren aldetik D ereduaren aldeko kanpainarik egin ez izana salatu nahi du. Era berean Aurrematrikulazio kanpaina Ikastetxeen eskutan uztea arduragabekeria dela uste dugu. Hau guztia azkeneko hogeita hamar urtetan UPNek eta PSNek beste eragileen laguntzarekin ezarri duten Napartheid linguistikoaren ondorio zuzena besterik ez da.
Aurrematrikulazio epea ireki den honetan LAB sindikatuak, era zuzenenean, eremu diskriminatuan ereduen inguruko ze informazio mota ematen ari den ezagutu nahi izan du. Gure ustez aukera berri baten aurrean gaudenean garrantzi handia du eskaintza hori saltzerakoan informatzailearen jarrera zein den, gero bere arrakasta neurtzeko. Hori da LABek neurtu nahi duena.
Eremu diskriminatuko berrogei Ikastetxetara deitu dugu informazio eske eta horietako lautan,%10, ez zuten telefonoz inongo daturik ematen.
Hamahiru Ikastetxetan,%32, “D” ereduaren eskaintza ez dute egiten, informazioan eskeintza horren berri ematen ez dutelako.
Hogeita hiru Ikastetxetan,%57, “D” ereduaren inguruko informazioa eman dute, horietako hamarretan, funtsarik gabeko informazioa izanez eta ez aukeratzera bultzatuz.
Beste hainbeste ikastetxetan “D-PAI”eredua eskaini dute gure harridurarako eta soilik hiru ikastetxetan,%7,5 eskeini dute “D” eredu hutsa.
Hau guztia ikusi ondoren gogoeta bat egin beharko genuke.
Lan honen ondorioz LABek Administrazioaren aldetik aurrematrikulazioan D ereduaren aldeko kanpainarik ez izatea salatu nahi du.
Aurrematrikulazio kanpaina Ikastetxeen eskutan uztea arduragabekeria dela uste dugu, bertatik eman den informazio eskasa izan delako eta ikastetxe bakoitzeko zuzendaritzaren iritziaren araberakoa.
D ereduaren zabalpenaren arrakasta horretan oinarritzen bada ezin gara oso baikorrak izan. Aukerak behar bezala ez badira eskaintzen edo zailtasunak jartzen badira eredu zehatz batean matrikulatzeko, gurasoak uxatuko ditu eredu horretatik. Are gehiago informazioa izkutatzen denean.
D-PAI eskaintzea ikastetxe gehienetan ardugabekeria da, PAI programaren eskaintza handitzen ari delako ebaluatzen ari den bitartean eta eskaintza hau ez dela handituko Hezkuntza Departamentutik adierazi zenean.
Hau guztia azkeneko hogeita hamar urtetan UPNek eta PSNek beste eragileen laguntzarekin ezarri duten Napartheid linguistikoaren ondorio zuzena besterik ez da.
Imegar SAko langileek mobilizazioa egin dute atzeratutako nominak ordaintzea exijitzeko
Imegar SAko Enpresa-Batzordeak deituta, enpresako langileek mobilizazioa egin dute gaur enpresaren kudeatzaile eta bazkideen jarrera salatzeko, atzerapenak baitituzte soldata kobratzerakoan. Giza-katea egin dute enpresatik Laudioko plazara 12:00etatik aurrera eta kontzentrazioa egin dute 13:00ak arte.
Enpresa-batzordearen oharra
Urteak daramatzagu nominak kobratzerakoan atzerapenak jasotzen. 2011an enpresak egindako inbertsio baten ondoriozkoa da egoera hau. 2011an 2 makina automatiko erostea erabaki zuten. Akats larria izan da hau inbertsioa egoera ekonomiko zailean egiten zelako eta, lana ezagututa, ez dugu uste egiten dugun lanerako (serie laburrak) beharrezkoak izango zirenik. Kudeatzaileek ez dute makina hauentzako lan espezifikorik bilatu.
2006an, legalitatearekin jokoan, tailer bat egin zuten Orozkon (ROKU) gurearen jarduera berdinean ari dena, Imegar SAn dagoen kudeatzaile berdina jarrita.
Denbora honetan zehar, langileok konponbideak eskatu dizkiegu bazkideei. Euren erantzuna izan da “pazientzia izan dezagula”, inolako konponbiderik jarri gabe, inbertsioekin egindako kudeaketa txarra euren erantzukizuna izango ez balitz bezala. Enpresaren ordainketa-lehentasunetan, langileok gara kobratzen azkenak, esan diguten moduan. Nomina bi epetan ordaintzeko aukera ere eman diegu kobratzeko data jar dezatela exijituz, baina hori ere ez dute gustoko ez dakitelako noiz izango dute ordaintzeko dirua.
Langile bezala, daukagun lana egitea baino ezin dugu egin, kudeatzaileak dira eskariak lortzearen arduradunak kontuak ondo atera daitezen eta ematen duenez, ez da gai bere lana egiteko.
Honekin nahikoa ez eta azkena izan da kamarak jartzea balizko lapurreten aitzakiarekin, baina konprobatu dugu ateei begira egoteaz aparte, makinak eta langileak ere kontrolatzen direla.
Correscales: Duintasunaren eta prekarietatearen aurka denok batera ekiteko garaia da
Gaur, otsailaren 18an, egingo ditu Correscalesek Bilbotik Bartzelonarako lehen kilometroak. Korrikarekin egin ohi dugun antzera, gau eta egunez ibilbide bat eginen da helburu batekin: prekaritatearekin amaitzea eta duintasunez bizitzea. Eragile sozial, sindikal eta politiko ugariren babesarekin 800 kilometroko ibilbidean, guztiok batera eginez, gure eskubideak defendatzeko borrokan egon eta egongo garela erakutsiko dugu.
Duela hilabete batzuk Movistarreko milaka langilek abiatutako bidea da hau, muturreko zapalkuntzaren kontra altxatu ziren bi hilabete pasa luzatu zen greba indartsua eginez, gizartean isla nabarmena izan zuena. Movistarreko langileek ekin zioten bide honi, eta gu orain hauekin batera jarraipena ematera gatoz. Borrokarako eta babesereako konplizitate sare bat ehuntzeko garaia da eta hori bilatuko du Correscales ekimenak ibilbide osoan zehar.
Hamaika ekimen eta elkartasun mezu ezberdinak egin dira Euskal Herrian Correscales ekimenari babesa emanez eta parte hartzea bultzatuz. Horietako batzuk hemen ikus ditzakezue:
Ainhoa Etxaide: "Correr para, desde nuestra capacidad de lucha, seguir con el camino que nos va ha permitir construir una nueva realidad"
BILBO
GASTEIZ
DONOSTIAKO ELKARGUNEA
IBILBIDEA
Denok dugu zer esan zerbitzu sozialen defentsan
“ZAINTZA ZAINDU. Langile gehiago, zerbitzu hobea” izenarekin zerbitzu sozialetako ratioak eta arreta hobetzeko kanpaina martxan dugu LABen. Kanpaina honekin adinekoen, adin txikikoen eta aniztasun funtzionala dutenen zentroetan arreta duintasunez eman ahal izateko langile gehiagoren beharra azaleratzen ari gara. Ratioak handitzea ezinbestekoa da, eta instituzioei hori exijituz sinadura bilketa bat jarri dugu martxan. Otsailaren 19a sinadura bilketaren egun handia izango da, eta guztion parte hartzea ezinbestekoa zerbitzu sozialen defentsan. Animatu eta otsailaren 19an SINATU zerbitzu sozialen defentsan.