2026-01-29
Blog Page 1049

Harrigarria da Jaurlaritzak Zumarragako Arcelor Mittalerako bideragarritasun plana aurkeztu izana

admin
-
0

Eusko Jaurlaritzak Arcelor Mittaleko Zumarragako enpresa-batzordeari luzatu dion gaurko bilera deialdiaren aurrean, LAB sindikatuak harrigarritzat jotzen du Jaurlaritzaren jarrera. Eusko Jaurlaritzak enpresari bideragarritasun plana aurkezteko exijitu beharrean, Eusko Jaurlaritza bera da eta, ez ordea enpresa, Zumarragako lantokirako bideragarritasun plana publikoki iragarriko duela dioena. Enpresa Batzordeari jakinaraziko dio enpresa berari baino lehen, honen iritzia ere ezagutu gabe. Hau guztia, gainera, astebeteko epe laburrean. 

Honengatik guztiarengatik, eta proposamenaren xehetasunak ezagutzearen zain gaudenean, LABek enpresarekin batera adostutako plana dela deritzo. Beldur gara Eusko Jaurlaritzak enpresak aipatutako arrazoiak bere egingo ote dituen, hainbat langileren leku-aldatzeak ontzat emanez, Zumarragako altzairutegiaren gainbehera bultzatuz eta langileei sakrifizio gehiago exijituz.

Hau baieztauz gero, erabaki honek Enpresa Batzordeak zein Zumarragako herriak berak erabakitakoaren aurka zuzen-zuzen joko luke.

 

 

 

Prekarietatea borrokatzea eskubideak defendatzea da

admin
-
0
Prekarietatea borrokatzea eskubideak defendatzea da


Aste honetan LAB sindikatuak kanpaina bati ekingo dio Araban, laneko prekarietatearen kontra eta patronalak klase politikarekin duen adostasuna salatzeko, egoera hori ahalbideratu eta indartu egiten duena. Horrela, enpresen markoan hainbat dinamika abiatuko ditugu, milaka langile arabarren egoera gero eta kezkagarriagoa salatzeko eta Araban enplegu duina aldarrikatzeko helburuarekin. 

Hau da baieztatzen duguna: gero eta lan baldintza txiroagoen aurrean topatzen garela, eta langileei mobbing etengabea egiten dien patronala gero eta harroago dagoela, jendartearen beharren gainetik bere egoera ekonomikoa indartzeko gero eta gehiago eskatzen duenean.

Patronalak lanpostuen sorrera deitzen duena kontratu prekarioak eta miseriazko soldatekin dira; enplegua sortzeko politikatzat dutena gizon eta emakumeen arteko soldata aldeak, mugikortasun geografikoa edo kaleratze merkeak dira. SEA oraindik lege ez den lan erreforma bat aplikatzea da, jasaten ari garen krisi ekonomikoarentzako proposatzen duen irtenbide partikularra baino ez.

Jakina, erakundeek ematen dioten babesa eta laguntzarik gabe, SEAk ez lituzke halako proposamenik egingo. Erakundeei egiten dien eskaera zerrenda, eurekiko etxeko lana bailitzan, hile amaierara iristeko komeriak egin behar dituen jendarte honen zati handi bat lotsarazi, iraindu eta baztertu egiten du.

Langabezia jaisteko Lan Publiko gehiago? Babes eta diru-laguntza gehiago? Lan Erreforman sakondu?… Ez da, ez da izan, eta jakina ez da izango LABen ustez egin beharreko bidea. Erakundeak herritarren zerbitzura jartzea ezinbestekoa da; patronalaren abusuei aurre egitea eta men egiteari uztea; euren langileak halaxe, “euren langile” bezala hartzen duten enpresariei domina gutxiago ematea; Administrazioak “zenbat eta ordu gehiago hobe” defendatzen dutenei pulpitua eta mikrofonoa jartzea eta aldi berean Administrazioan bertan 35 orduko lan-astea berreskuratzea planteatzea ez da etikoa inondik ere. Patronalak horrenbeste azpimarratzen duen “bake soziala” ez doa eskubideak deuseztatzeko bidetik, hauek errespetatzetik baizik.

Egin dugun azterketa orokor honek Arabako ekoizpen ehun osoan du isla. Beraz prekarietatea, zalantzazko egoera eta klase politikoaren babesa industria arloan herrialdeko lau enpresa erreferenteetan ere ematen da: MERCEDES, MICHELIN, TUBOS REUNIDOS eta AERNNOVA.

12.000 langiletik gora duten enpresa hauetan, erakundeek hainbeste zaintzen enpresari handiek planteatzen dute era desberdinetako prekarietate ERREALA, eskubideen murrizketa ERREALA, enpleguen suntsiketa ERREALA eta plantilak BENETAN beldurtzen produkzioa lekualdatzearekin, beti ere ahalegin kolektiboaren eufemismoaren mozorroarekin, beraiek izateko onuradun nagusiak. Hori guztia arestian aipatu bezala, EAJren babes instituzional inplizitu edo esplizituarekin ari dira egiten.

Azkenik, sindikatu batzuek patronalarekin duten kolaborazio paregabea salatu nahi dugu. Izan ere neurriok onartuz, langileei bizkar emanda pasteleatuz edota mobilizazioak oztopatuz patronala are indartsuago egin eta lan eskubideei mesede eskasa egiten baitiete.
 

 

 

Ur publikoaren defentsan busti gara

admin
-
0
Ur publikoaren defentsan busti gara


Gaur, martxoak 22, Uraren Munduko Egunean, “Ur publikoaren defentsan” plataformako kideok Bilboko Plaza Biribileko iturriko uretan murgildu gara, txirotutako familiei egiten ari zaizkien ur-mozketak eta Bilbao Bizkaia Ur Partzuergoaren iluntasuna salatzeko eta ura jendartearen ondasuntzat hartua izan dadila eta pertsonen beharrak asetzeko jendarte-ondasun bezala kudea dadila exigitzeko, eta ez kudeaketan sartuta dauden enpresentzako diru-etekin iturri bezala.

NO A LOS CORTES DE SUMINISTRO DE AGUA
Ur publikoaren defentsan plataforma
Ur-pobreziaren aurka: ur horniketa mozketei ez!
2014ko urtarrilaren 1etik 2015eko azaroaren 26ra arte, Bilbao Bizkaia Ur Partzuergoak, berak emandako datuen arabera, 1.838 ur hornidura-mozketa egin ditu, horietatik 1.1.30 etxebizitzei eginiko hornidura-mozketak izan dira. Partzuergoa %60ak dago pribatizatuta, ezinbestekoa den ondasun honen kudeaketarako beharrezko diren zerbitzu asko azpikontratatuta baitaude enpresa pribatuen bidez, besteak beste, horniduraren mozketa eta diru-bilketa betearazlea besteak beste. Horren gain, Ur Partzuergoaren zerbitzu-araudian ez da jasotzen ur edangarria eskuratzeko oinarrizko eskubidearekiko begirunerik. Kudeaketa iluna da, defendatzen dituen benetako interesak estaltzen dituena.

Uraren kudeaketa publikoa
Kudeaketa Publiko Parte-hartzailea exijitzen dugu, irabazi asmorik gabekoa, interes orokorreko zerbitzu gisa, ura ez delako salerosketa gaia, ondasun erkidea baizik eta oinarrizko eskubidea, bizitzarentzako funtsezko gaia izateaz gain. Ur-txirotasunari benetako konponbide eraginkorrak eskaintzeko behar diren lege-aldaketak eta araudi-garapenak ere exijitzen ditugu. Funtsezkoa da ur-horniketa ordaindu ezin duten familiei etxeko ur-horniketa mozketa debekatzea, bai eta, ordaintzen ez den kasuan, pertsonako eta eguneko gutxienez 60 eta 100 litro arteko horniketa ziurtatzea ere, NBEak ur edangarriarekiko ezarri duen eskubidea bermatzeko.

Berta Cáceres Gogoan
Lencatarren líder indegena, feminista eta ingurumenaren aldeko ekintzaile hau erail egin zuten martxoaren 3an, tiroka, Hondurasen, bere borroka nekaezinagatik, 40 proiektu hidroelektrikoren eta meategien dozenaka proiekturen aurka eta lurraldea jende indigenak, lurraldearen jabe legitimoak, berreskuratzearen alde. Halaber, Gustavo Castrori ere gure elkartasun guztia adierazi nahi diogu, gaur egun Hondurasen atxikita dagoelarik. Gustavo Berta Cáceresen erailketaren lekuko izan da, eta baita biktima ere, bera ere erahiltzen saiatu zirelako.
 

 

 

Aburto, bereari eutsi eta Bilbon igande eta jai-egunetan saltokiak zabaltzearekin tematzen da

admin
-
0
Aburto, bereari eutsi eta Bilbon igande eta jai-egunetan saltokiak zabaltzearekin tematzen da


EAJk, Bilboko alkatea buru duela, denbora darama igande eta jai-egunetan saltokiak irekitzearekin tematuta, sektorea erabat liberalizatuz eta prekarietateari bidea zabalduz. Edozein erasoren aurren, langileak prest daude euren lan-baldintzen alde borrokatzeaz. Aitzakiarik ez. Ez Eremurik, ez Errutarik ez plan engaingarririk. Euskal Herrian… 0 irekiera igande eta jai-egunetan.

Gogora dezagun Bilboko Udalak Turista Etorrera Handiko Eremuak zehaztu zituela. Hauetan udako igande eta jai-egunetan zabaltzea ahalbidetzen zen. Jendarte osoaren ezezkoak, merkatari, kontsumitzaile eta sindikatuen plataforma buru zuela, Bilbok “0 irekierarekin” jarraitzea ahalbidetu zuen. Izan ere, EAEn gai honekiko dagoen jendarte-kohesioak erakutsi zuen “hiri atseginak” nahi ditugula, enpleguaren kalitatea eta merkataritza txiki eta ertainari lehentasuna emanez.

Argi dago Aburto jaunaren apostua. Sektore osoak merkataritza iraunkorraren alde eta bertako langileen eskubideak errespetatzearen alde egiten duen apustutik urrun, euskal jendarteak egiten dituen eskariak ez entzutearekin tematzen da, kate handi batzuen eskakizunen aurrean amore emanez. Enpresa handi hauek dira, hain zuzen ere, Madrilgo gobernuak ematen dizkien eta EAJk bere egiten dituen aukerak aprobetxatu nahi dituztenak, merkataritza txikiaren aurrean Bilboko merkataritza monopolizatzeko helburuarekin eta sektoreko langileek lan-maldintzak nahieran malgutzeko.

Berriro, opor sasoi bakoitzaren aurrean egiten duen bezala, Aburto jaunak eta bere taldeak, bere aurrekariak egiten zuen moduan, ekin egiten dio bilbotarren gehiengoaren kontra egiteari, inposiziotik gertu dagoen insistentziarekin.

Azkenik, adierazi nahi dugu merkataritzako langileak nekatuta daudela Bilboko Udala euren lan-baldintzekin jolasten ahalegintzeaz eta euren eskarien aurrean entzungor egiteaz. Edozein erasoren aurren, prest daude euren lan-baldintzen alde borrokatzeaz. Aitzakiarik ez. Ez Eremurik, ez Errutarik ez plan engaingarririk. Euskal Herrian… 0 irekiera igande eta jai-egunetan.

 

 

 

Herrien eta Pertsonen Europa Soziala eraiki behar dugu

admin
-
0
Herrien eta Pertsonen Europa Soziala eraiki behar dugu


Xenofobia non nahi topa dezakegu, hitz politen atzean izkutatuta ere egon liteke. Botere ekonomiko zein politikoak habilak dira horretan, ongi gordetzen dira humanitatea, integrazioa, nazioarteko lankidetza edo kontrolik gabeko migrazioaren aurreko jendartearen babesa bezalako ideien atzean. Baina errealitatean gerra politiko inperialistak eta eskubide eta prestazioen murrizketak bultzatzen dituzte.

Gaur egun milaka pertsona daude behartuta euren herriak, bizilekuak, lanak eta familiak uztera, arrazoi ekonomiko, natural edo gatazka belikoen ondorioz. Milaka pertsona pilatzen dira Europako herrialdeen ateetan, bizitzeko aukera bat eskatuz. Europaren erantzuna, ordea, urrun dago elkartasunezkoa, eskuzabala izatetik. Segurtasunaren izenean Europar Batasunak Turkiar Estatuarekin izenpetu berri duen akordiak oinarrizko giza eskubideak urratzen ditu. Europar instituzioek gaur hartutako politika eta neurriek gurekin zerikusirik ez duten, eta lotsarazten gaituzten interes ekonomiko, finantzario eta belikoei erantzuten diete.

Testuinguru honetan, Euskal Herria ere austeritatearen politika ekonomikoa jasaten ari da. Beste eredu sozial eta politikoa eraikitzeko aukera ukatzen zaigu. Eta horrekin batera, estatu espainiarraren eta frantsesaren inmigrazioaren erabakiak inposatzen zaizkigu, ezinezko bihurtuz pertsona migranteen harrera inklusiboa.

LAB Sindikatuaren ustez, Europako migrazio-politikak aldatzearen beharra ezinbestekoa da. Eredu berri bat behar dugu erabakitzeko gaitasuna ukatzen digun oraingo marko politikoa gainditzeko, atzerritar lege arrazistak alde batera uzteko, eskubideak eta aukeren berdintasuna bermatzeko eta aberastasuna eta lanaren banaketa justua ziurtatzeko. Herrien eta Pertsonen Europa Sozialaren aldeko apustua egin behar da.

Zentzu honetan herri eta eskualde ezberdinetan lantzen ari den Euskal Herriko Eskubide Sozialen Karta oso marko baliotsua da arrazakeria eta xenofobiari aurre egiteko eta oso tresna indartsua eredu ekonomiko eta sozial berriaren alde, elkarrekiko errespetuan eta inklusibitatean oinarriturik. Elkarlanean elkarbizitza, elkartasuna eta aniztasuna sustatzen duen Euskal Herriaren alde egingo dugu.
 

 

 

Osakidetzak garbi utzi du gaurko bileran ez duela benetako negoziaziorik nahi, forma zein edukien aldetik

admin
-
0

Gaurko Mahai Sektorialean, Osakidetzak ez duela benetan negoziatzeko inolako asmorik argi utzi du. Gure ustez, Osakidetzako Zuzendaritzaren helburu bakarra zera da, sasi negoziazioa itxura denboran luzatu hauteskunde autonomikoak pasatu arte. Modu honetan, urte hauetan inposaturiko murrizketak, pribatizazioaren aldeko jarrera sutsua eta egunotan prentsan berriro agertu diren Osakidetzako zein Osasun Saileko goi-kargu ohien ustelkeria kasuak (Margüello auzia) estali nahi dituzte.

Negoziatzeko borondate eskasa begi-bistakoa da,

• Formen aldetik. Ez dago inolako metodologiarik ezta egutegirik ere. Osakidetzak proposatutako puntuak soilik jorratzen dira, bileretarako deialdiak oso berandu egiten dira, gai-ordena eta beharrezko den dokumentaziorik gabe. Seriotasun falta hau izan da, azken batean, LAB mahaitik altxatzera eraman duena, ea hurrengo deialdian behintzat oinarrizko baldintzak betetzen diren.

• Edukien aldetik. Osakidetzak ekarri duen proposamenak aldaketa kosmetikoak baino ez ditu jasotzen. Aurreko bileran aurkeztutako zenbait punturen gaineko zehaztapen txikiak, hobekuntza minimoak eta puntu berriren bat, garapen profesionala kasu, baina modu nahiko erretorikoan (baldintza askorekin).

Ondorioz, hitza hartzea egokitu zaigunean, Mahaitik altxatzeko arrazoiak azaldu ditugu, Osakidetzari guk negoziatzeko planteatzen ditugun bost puntuak helarazi dizkiogu, eta hurrengo bilerarako deialdi serioa egiteko gonbitea luzatu diogu Armentia jaunari.

 

 

 

Santa Marina ospitala ez da zuen KORTIJOA!

admin
-
0
Santa Marina ospitala ez da zuen KORTIJOA!


LAB sindikatuak Santa Marina ospitaleko Zuzendaritza eta hainbat jefaturaren jarrera eta inpunitatea salatu nahi du. Ostiralean ordezkari talde batek, peto gorriak jantzita, eskuorriak banatu zituen lanean zeuden langile guztiei. Langileek oso ondo hartu zuten ekimena, ospitalean sufritu behar duten inpunitate egoeraren adierazle.

MARBELLAren KORTIJOA: INPUNITATEA JAUN ETA JABE SANTA MARINAn
Santa Marina legerik gabeko ospitalea da edo, hobeto esanda, zuzendaritzak euren IRIZPIDEEN arabera mugitzen diren ospitalea dugu, indarrean dauden arau, akordio eta prozedura guztiei jaramonik egin gabe. Esan dezakegu Santa Marina iruzur, irregulartasun eta txapuzen paradisua dela. Hemen entzungor egiten zaie langileon zein ordezkari sindikalon eskari guztiei. Zergatik diogu hau? Adibide faltarik ez:

• “Koderik gabeko” ospitalea. Zuzendaritzak iruzur, presio eta entxufeak ahalbidetzen dituen egoera perfektua sortu egin du, koderik ezean lanpostuak behin-behineko kontratuekin betetzen baitira, eta kontratu hauek zuzendaritzak nahi duen momentuan amaitzen direlako. Honetaz gain, kode faltak sindikatuon kontrola eragoztea, euskara perfilak kontuan ez hartzea eta kanpoko langileei ateak “itxi” (adibidez, leku-aldaketetan) egitea eragiten du. Ez baduzu protestarik egiten, agian luzatuko da zure kontratua, bestela…

• Kontratazio irregularra. Ospitale honetan kontratazio zerrendak hutsaren hurrengoak dira, buruzagiek nahi bezala kontratatzen baita: zerrendetan jauziak, hizkuntza eskakizunak bete gabe, jardunaldi murritzeko kontratuak euren nahierara erabili…

• Lan sindikalerako oztopoak. Zuzendaritzak ez digu inolako erantzunik ematen, ez idatziz, ezta ahoz ere. Ez da gurekin biltzen eta ez digute kontatzen etien ari direna. Gardentasun falta erabatekoa da. Hori bai, Marbella eta bere taldea oso azkar ibili dira LABek okupatzen genuen lokaletik ateratzen, gure gauza guztiak zabor poltsatan sartu eta beste leku batera joanarazteko.

• Langile faltak sortutako gehiegizko lan-zama. Ez da zerbitzu batera mugatzen den arazoa, ia leku guztietan eta kategoria guztietan sufritzen den arazoa baizik. Langile faltak azkar, asko eta baldintza txarretan lan egitera behartzen gaitu. Baina koderik ez dagoenez…erizain, erizain laguntzaileak, zelariak…Gainera, bajak ordezkatzen ez direnez, ba are txarrago…

• Kategorari ez dagozkion funtzioak egin eta arauen kontra dauden jardunaldietan. Adibidez, gaueko txandan bi zelari soilik eta administrari laguntzaileen lanak egin behar; eta igande eta jaiegunetan 12 orduko jardunaldia egiten duten administrari laguntzaileak, goizeko 9etatik gaueko 9ak arte…Honek ez dauka ez buru ez hankarik.

• Irregulartasunen zerrenda amaigabea da: mantentzeko langileei guardiako orduak ez kontatzea (titulurik gabeko jendea ere kontratatu egin da!); RX-etan kontratu prekarioak mantentzen dira (LABek irabazi zuen sententzian hiru txandetan tituludun langileak egon behar zirela ezarri zen, baina oraindik zuzendaritzak ez ditu kode horiek eskatu…),…

Ezin dugu onartu Santa Marina kortijoa izatea. Ezin da onartu isilik egon behar izatea zuzendaritzak luza dezan irregularra den kontratua. Seriotasun eta GARDENTASUNA exijitzen dugu. Iruzurren kontra jotzea ez da, inondik inora, langileen kontra jotzea, kontrakoa baizik. Gaur onuradun zaren bezala, bihar galtzaile atera zaitezke.

EZ KIKILDU, TXANTXULLOAK SALATU ETA ZURE ESKUBIDEAK BORROKATU!!!
LAB EZ DA IXILDUKO!!

 

 

 

6 egun daramatzate greban Elgoibarko Tratamientos Intxaustin

admin
-
0


Tratamientos Intxaustiko (Elgoibar) langileek greba mugagabeari ekin zioten martxoaren 16an, beraien lan baldintzak hobetuko dituen hurrengo bi urteetarako enpresa hitzarmen bat sinatu nahian. Langileek besteak beste soldata igoerak, lan osasun alorrean hobekuntzak eta akordioa eta bere edukiak, lan erreformatik babesteko blindaia klausulak eskatzen dituzte.



Inguruko hedabideetan enpresak eman duen erantzunaren gainean hainbat kontu argitu nahi ditugu:

• 2011 hasieratik eta aurreko urte-arte, Intxaustiko langileek soldata izoztua izan dute, erosteko ahalmena galduz.

• Enpresak irabazirik izan ez zuen urteetan, Intxaustiko langileek, egoera hori pairatu dute hainbat enplegu-erregulazioko espedienteren bitartez, 2009, 2010, 2011, 2012 eta 2013 urteetan hain zuzen.

• Langileek eskatzen dituzten soldata igoerak hauexek dira, 2016rako KPI + %4a eta 2017rako KPI + adosteko kopuru bat. Ez KPI + %8ª, enpresak komunikabideetan lau haizetara zabaldu zuen moduan.

• Azken 3 urteetako egoera ekonomikoaren analisia egin ostean, oso argi daukagu langileek eskatzen dituzten soldata igoerak erabat onargarriak direla enpresarentzat.

• Soldata igoera hauek, ez lukete enpresaren bideragarritasuna zalantzan jarriko epe motzean, eskatzen den kopurua enpresak mugitzen duen diru kopuruarekin aldaratzen badugu, oso txikiak baita.

• Greban, 10 langilek hartzen dute parte, produkzio langileen %100ak.

Gainera, gogorarazi nahi dugu, enpresak, aurreko hitzarmenean Osasun laboralaren gainean adosturikoa ez duela bete. Ez dira bilera guztiak egin eta ez da jarduera egutegi bat proposatu
Langileek eskatzen dutena honakoa da; soldata igoerak, ezintasun iragankorragatiko bajen konplementuak, lan osasun alorrean hobekuntzak… eta guzti hori, aurreko urtean bezala, akordioa eta bere edukia, lan erreformatik babesteko blindaia klausulekin eta Gipuzkoako metagintzakoleko hitzarmenari lotuta.



Aste honetan ere, grebak irauten duen bitartean egunero elkartuko dira 10:00etatik 12:00etara Elgoibarko Arriaga poligonoaren sarreran, Tratamientos Intxausti S.L. aurkitzen den lekuan, hain zuzen.
 

 

 

Bizkaiko Foru Aldundiko langile batzordeak neurriak eskatu ditu liburutegiko egoera konpontzeko

admin
-
0


Bizkaiko Foru Aldundiko langile batzordeak Foru Liburutegiko langile askok aurkeztu duten salaketa-idazkiaren berri eman du, bertan jakitera eman dute Liburutegiko erabiltzaileek espazioa galdu dute Foru Liburutegiko zerbitzu publikoaren bosgarren solairuko zati handi bat Modernizazio, Gobernamendu On eta Gardentasunerako Kabineteak okupatu baitu. Egoera honen aurrean neurriak hartzea eskatu du Langile batzordeak.

Bizkaiko Foru Aldundiko langile batzordearen oharra:

Bizkaiko Foru Aldundiko eta haren erakunde autonomoetako funtzionarioen ordezkaritza-organo bateratua den Langileen Batzorde honek, martxoaren 16an egindako batzarrean, Foru-liburutegiko hainbat langilek Langileen Batzorde honetan aurkeztutako salaketa idazkiaren harira, hurrengoa salatu du:

Ia urte bat pasatu da hauteskundeak izan zirenetik, eta EAJ eta PSOEren arteko itun politikoak oinarri finkorik gabe dauzka oraindik ere zerbitzu publiko foralak. Enplegatu publikoek egunero-egunero ematen diete beren asperduraren eta nekearen berri Langile Batzordeko ordezkariei; aspertuta eta nekatuta daude agintari berriak direla eta, haien jarduteko moduak eta zerbitzu publiko foralak kudeatzeko era direla eta.

Batetik, sailetako egituretako aldaketen kudeaketan izandako opakotasuna dago. Izan ere, aldaketa horiek langileei ezer galdetu gabe egiten ari dira, zerbitzu publikoaren egunerokoa ondoen ezagutzen dutenak izan arren.

Eta enplegatu publiko foralen neke eta asperduraren barruan, Foru Liburutegiko langile askok salaketa-idazki bat aurkeztu dute, non jakitera eman baituten Foru Liburutegiko zerbitzu publikoaren bosgarren solairuko zati handi bat Modernizazio, Gobernamendu On eta Gardentasunerako Kabineteak okupatu duela. Okupazio horren ondorioz, Liburutegiko erabiltzaileek espazioa galdu dute: irakurtzeko leku gutxiago, tailerrak eta kultur jarduerak egiteko leku gutxiago.

Ildo horretan, salatu dute ezin dela behar bezala planifikatutako kalitateko zerbitzu publiko ordenatu bat egon erabakiak zerbitzuarekin zerikusirik ez duten beharrizanen edo interesen arabera hartzen badira. Eta are gutxiago ekintza burutuak badira eta langileak eta haien ordezkariak –sindikatuak– aintzat hartu gabe gauzatu badira.

Beraz, Liburutegiak galdutako espazioa ahalik eta eperik laburrenean berreskuratzeko eta antolaketaren arloko aldaketak planifikatuta eta adostuta egiteko eskatzen dute.

Langileen Batzordeak bat egiten du salaketa horrekin eta bere egiten du. Horregatik, Bizkaiko Foru Aldundiko Langileen Batzordeak hau eskatzen dio Aldundiari:

1- Liburutegian galdutako espazioa ahalik eta eperik laburrenean berreskuratzeko, bizkaitarrei espazio publiko hori erabiltzeko aukera bermatzeko.

2- Antolaketaren arloko aldaketa guztiak plangintza baten arabera eta aldaketen eraginpeko langileekin adostuta egiteko.
 

 

 
1...1,0481,0491,050...1,588Page 1,049 of 1,588

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus