Gaur, ELA, LAB, ESK eta STEILAS sindikatuek irailaren 23tik 25era Bilbon “Urgentzia ekologikoa eta larrialdi soziala: Erronkak ekosozialen aurrean alternatibak eraikiz” izenburupean egingo diren topaketen berri eman dute. Aurrekaririk gabeko mehatxu baten aurrean gaude gizateriarentzako zein mundu bizi osoarentzako, horregatik alternatibak eraikitzea premiazko bilakatu da.
Krisi ekologiko, sozial, eta zaintzakoa pairatzen ari gara. Krisi honen seinalerik argiena aldaketa klimatikoa da baina ez da bakarra, bestelako adierazleak ere badira, hala nola bioniztasuna, baliabide naturalen agorpena edota basoen suntsiketa. Elkarlotuta eta elkarri eragiten dioten krisiak dira hauek. Katastrofe honen erroak ekoizpen, erreprodukzio, banaketa eta kontsumo sisteman daude, sistema kapitalista eta heteropatriarkalean hain zuzen ere.
Ez diegu oraina lapurtzen utziko. Datozen belaunaldiei etorkizun duina ziurtatzeko gaurdanik jarri behar ditugu oinarriak. Euskal Herrian bada errealitate sozial eta sindikal bat neoliberalismoari alternatiba ekosozialista eraikitzeko eragile izan daitekena. Eskubide Sozialen Kartan adierazi bezala pertsona zein herriei gure bizi baldintzen gain protagonismoa emateko konpromisoa hartu genuen eta horren alde borrokatzen dugu.
Instituzio eta botere ekonomikoaren arteko sinbiosiarekin bukatu behar dugu, bizitza eta pertsonak lehenetsiko dituen eta interes kolektiboak merkatu eta espekulatzaileen interesen aurretik jarriko dituen bestelako eredu instituzional bat eraikiz. Lana nagusitu dakiola kapitalari. Suntsiketaren korrontea txikituko duen emari ekosozialista eta feministraren ordua da.