2026-11-18
Blog Page 1025

Benetako industria politika bat martxan jartzeko eskatu diogu Jaurlaritzari, sektorearen egoera larria ikusita

0

Agerraldia egin dugu gaur, euskal industriak bizi duen egoeraren inguruan gure kezka azaltzeko. LABen iritziz, industriaren etorkizuna kolokan dago hartzen ari diren erabakien ondorioz. Azterketa sakon bat egin dugu, eta ateratako ondorio nagusiak prentsaurrekoan azaldu ditugu. "Basque Industry 4.0. kontzeptua asmatu du Euskoa Jaurlaritzak, errealitatea estaltzeko asmoz. Sinestarazi nahi du industriaren eraldaketa ematen ari dela, baina ez da horrela. Industria 4.0. prozesua, enpresen digitalizazio eta eraldaketa eman emango da, hemengo industriak biziraun behar badu, baina ez dira hori bultzatzen ari, ez dira ari industriaren eraldaketa laguntzen ari", adierazi dute LABeko ordezkariek.

"Ez dago benetako industria politikarik. Espainiako eredua da ezartzen dena: lan kosteak murrizten dira balio erantsia dituen produktuen aldeko inbertsioa bultzatu beharrean. Industria, teknologikoki aurreratua izateaz gain, aurreratuak izan behar du jendartearen ikuspegitik, baina baita lan baldintzen ikuspegitik ere. Tamalez, bai patronala bai Eusko Jaurlaritzaren apustua guztiz kontrakoa da", salatu dute LABeko kideek, Bilbon egindako agerraldian (ikus txostena).
 

 

“Bertan lan eta bertan erabaki” aldarrikatu dugu Santurtzi eta Pasaiako portuetan

0

Milaka lanpostu suntsituko ditu Espainiako Gobernuak, kaietako zamaketariei eragingo lieken dekretua aurrera eramanez gero. Santurtzi eta Pasaiako portuetako langileei, zein Ezkerraldeko eta Oarsoaldeko ekonomiei bete-betean eragingo lieke. Honengatik, elkarretaratzeak egin ditugu gaur, aldarri batekin: beharrezkoa deritzagu, Gernikako Estatutua sinatu eta 38 urte igaro diren honetan, euskal portuetako kudeaketa transferentziari, berriki sinatu den sindikatuen arteko itunaren babesean, Euskal Herrian bertan, lan baldintzak ados ditzagun.

PPren gobernuak legeak egin nahi ditu sektore oso bateko iraizpena legeztatzeko: enpleguak erregulatzeko espedienterik gabe. 2008. urtean amaitu zen zamatze lanak pribatizatzeko prozesua, oso emankorra den sektore berria pribatizatu da. Egungo egoera finkatzeko bide osoa egin dute.

 

 

 

Euskal Herrian izan da CETIM, gurekin biltzeko

0

Genevako (Suitza) CETIM erakundea etorri zaigu bisitan Euskal Herrira, LABek gonbidatuta. CETIM (Centro Europa- Tercer Mundo) ikerketa eta argitalpen zentro bat da, 1970. urtean sortua, eta Ipar-Hegoa arteko harremanetan lan egiten du. Nazio Batuen Erakundean (NBE) parte hartze aktiboa du, beti ere eskubide ekonomikoak, sozialak eta kulturalak defendatu eta sustatzeko helburuarekin, baita garapenerako eskubidea ere. Hego eta Iparreko mugimendu sozialen proposamen eta analisiak zabaltzeko zubi-lana egin ohi du. Gaur egun, CETIM zeharo murgilduta dago enpresa transnazionalen inpunitatearen aurkako borrokan. Hain zuzen ere, itun bat bultzatu nahi du Nazio Batuen Erakundean, giza eskubideak eta herrien eskubideak errespeta daitezen, enpresa transnazionalen interes ekonomikoen gainetik. Lan horretan ari dira orain, eta eginbehar hori dela-eta izan dira Euskal Herrian.

CETIMeko zuzendari eta Giza Eskubideen Programako arduradun Melik Özden eta Giza Eskubideen Programako eta Komunikazioko kide Raffaele Morgantini izan dira gurekin, otsailaren 23 eta 24an. Lehen egunean, arlo sozioekonomikoko LABeko ordezkari Bea Martxueta, Urtzi Ostolozaga eta Txomin Lorcarekin bildu dira. CETIM zer den eta zein helburu dituen azaldu dute bileran, eta, batez ere, osatu nahi duten itunari buruzko xehetasunak eman dituzte. Bigarren egunean, LABeko Batzorde Exekutiboarekin bildu dira, eta, lehen eguneko gogoetaren harira, sindikatuen ekarpenaren garrantziaz aritu dira, enpresa transnazionalen aurkako borrokaren baitan.

Bisita hau oso interesgarria izan da hainbat arrazoirengatik. Nazio Batuetan garatu nahi duten itunari buruzko nondik norakoak ezagutu ditugu bertatik bertara, eta, aldi berean, gogoeta egin dugu sindikatuok borroka horretan bete behar dugun paperari buruz. Gure iritziz, sindikatuok paper garrantzitsua dugu, langile klasea baita enpresa transnazionalen botere eta inpunitatearen ondorioak pairatzen dituena.
 

 

 

Vicrilan lortutako akordioa gaitzetsi dugu

0

CCOO, UGT, USO, CUC eta ATVk lortutako akordio sozialaren aurrean, honen kontra dagoela adierazi nahi du Vicrilako LABek. Hona hemen arrazoiak: balizko erosleek ez dute inolako plan industrialik aldatu, ez langileon aurrean, ez Administrazio Konkurtsalaren aurrean, asmoen adierazpen htusak baino ez. Gaur akordio berria dago, lan baldintzak murriztu eta egungo eta etorkizuneko enplegua arriskuan jarriz, baina oraindik ez dakigu zein den Vicrila suspertuko duen plana. Balizko salmenten proiekzioa, gaur egun, ez da batera sinesgarria, duela 7 urte egin zutenaren antzera. Ezaguna da bere emaitza.

LABek, Enpresa-Batzordeak duen ordezkaritzaren bidez eta lantegiko asanbladetako partehartzearen bidez enplegua, lan-baldintzak eta konprometitutako inbertsioen gauzatzearen bermea lortu nahi izan du. Proposamen lorgarriak dira eta herri honetako enpresetan beste ordezkaritza sindikal batekin honezkero esistitzen direnak. Enpresaren ezezkoa Enpresa-Batzordearen gehiengoak proposamen hauei emandako ezezkoak lagundu du.

LABek ez du inolako berritasunik ikusten balizko jabe berriak egindako proposamenaren aldetik. Ez dago konpromisorik ez enpleguarekin ez lan-baldintzekin eta planaren benetako finantzazioa lan-baldintzen egungo eta biharko murrizketan oinarritzen da. Txeke sozial zuriak ezin du Vicrilaren alde benetako apustua egiteko borondatea ordezkatu.

Eusko Jaurlaritza publikoki agertu da erosteko eskaintzaren alde. Cambiumen proposamenak, Enpresa-Batzordeak atzera botatakoak, oinarri berdina zeukan. Akordio bat erdietsi nahi zuen bermerik eskaini gabe, ziugabetasunaren aurrean konpromisorik hartu gabe eta 90 kaleratzetakoa zen aldea, kapital propioa ematerako orduan aportazio askoz apalagoa eta txeke zuri soziala. Horrela edonork kudeatzen ditu enpresak. Egun, kreditura erosten dira enpresak eta hauek bueltatzeko bermea koste sozial apalagoetan oinarritzen da.

Beste behin Eusko Jaurlaritza herritarrekin dituen erantzukizunekiko abstraitu da. Gaur gogor kritikatzen du Vicrilak iraganean egindako kudeaketa balizko jabe berrien aurrean. LABek oroitarazi nahi dio Gobernu honi Luis Fernande ez zela bakarrik egon enpresaren kudeaketan. Eusko Jaurlaritzak beti izan zuen lehen eskuko informazioa Administrazio Kontseiluan kideak izaterakoan. Informazio hau langileei izkutatu zien.

Herri honentzat lan harramanen beste eredu bat ez dagoen bitartean, lan-erreformak indarrean dirauen artean, herri honetara laneko eskubideen espekulatzaileak soilik gerturatuko dira. Ez dira inbertsore industrialak gerturatzen gure ezagutza eta enpresa sarea probestera, espekulatzaileak gerturatzen dira. Euren lan nagusia enplegua eta lan- eskubideak murriztea da dibidenduak bermatzeko, inbertitu gabe eta arriskurik onartu gabe.
 

 

 

Panricoko langile autonomoek lan uzteak egin dituzte euren lanpostuen defentsan

0

150 enplegu daude arriskuan eta langileak lanuzteak egiten daude otsailaren 13tik. Bigarren berregituraketa bat proposatu dute, orain BIMBO taldeak sustatuta. Uko egin diote aurreko planteamenduak aldatzeari negoziazioaren bidez. Horrela, behartuta ikusi dute euren burua lanuzteak egitera jarduera hauengatik protestan eta gure lanpostuen defentsan.

Hauxe da Panricoko langile autonomoen oharra:

Tuterako Mahaia Panrico SAUko langile autonomoak biltzen dituen elkarte bat da eta Gipuzkoa, Araba, Nafarroa (Iruñea eta Tutera), Bizkaia, Errioxa eta Aragoa hartzen ditu bere baitan.

2013an Interes Profesionaleko Akordioa sinatu genuen. LAB sindikatuaren lankidetza izan genuen kontu honekin. Sakrifizio gogorrak egin genituen enpresak EEE desberdinekin eraman gintuen egoera larritik salbatzeko eta ondoren, lanera buletatu ginen. Akordio horrek murrizketa handiak ekarri zituen gure lan baldintzatak, eta lan karga handiagoak onartuz konpondu genuen. Honela, ahalik eta lanpostu gehienei eta enpresak nahi zuena baino maila ekonomiko hobeari eutsi genion. Hori bai, aurrekoa baino askoz handiagoa zen lan-kargarekin. Iraupen mugatua zuen aipatu akordioak, enpresaren egoera ekonomikoa hobetu ahala adostuta zegoen aurreko egoera kontraktualera itzulera.

Hiru urte beranduago ikusten dugu BIMBOk PANRICO SAU erosi duela. Horrela eskuratu zituen BIMBOk merkatuan liderrak diren markak: DONUTS, DONETTES, BOLLYCAO, gama Qe, BELLA EASO… eta PANRICO moldeko ogia. BIMBO enpresa liderra da moldeko ogian, horrela PANRICOko moldeko ogia erosteak Lehiaren Epaimahaiarentzat legez kanpokoa da, monopolioaren kontrako legeak urratzeagatik. Horrela, BIMBOk PANRICO erostea onatzat ematen du baina beste enpresa bati saldu behar dio PANRICO. Orduan agertzen da ADAMS FOOD, honi saldu dio BIMBOk PANRICO eta kontratu bat sinatzen du denbora jakin baterako moldeko ogia banatzeko konpromisoa hartuz. Denbora honetan ADAMS FOODek beharreko alternatibak bilatuko zituen enpresak berak ogiaren banaketa egiteko.

Momentu hori iritsi da eta moldeko ogia gure salmenten %40 baldin bada gutxi gorabehera, BIMBOk planteatzen digu konponbide bezala 34 erruta kentzea Tuterako Mahairen esparruan, eta desagertzen diren erruta guztietako bezeroak banatzea kaleratuak izan ez ziren saltzaile autonomoen artean. Eta guztia egungo soldatarekin, hau da bigarren berregituraketa bat, orain BIMBO taldeak sustatua. Uko egiten diote aurreko planteamenduak aldatzeari negoziazioaren bidez. Horrela, behartuta ikusi dugu gure burua lanuzteak egitera jarduera hauengatik protestan eta gure lanpostuen defentsan.

150 enplegu daude arriskuan eta langileak lanuzteak egiten daude otsailaren 13tik.
 

 

 

Lehen Arretaren hileta egin dugu Errontegiko osasun etxean

0

Lehen Arreta oinarrizkoa dela defendatu dugu Barakaldon. Hain zuzen ere, utzikeriagatik hiltzen uzten ari dira, eta, egoera larri hori irudikatzeko, ekintza gauzatu dugu Errontegin. Bertako osasun zentroak bost urte baino ez ditu, baina, dagoeneko, azpiegitura arazoak ere baditu: teilatua erortzear dago, ur berorik ez dago, aldaketa geletan ez dago komunik, garajea ezin da erabili, hainbat zonaldetan kiratsa jasanezina da… "Hori nahikoa ez balitz, osasun zentroak ez du bizigarritasun baimenik", salatu dugu.

Hauxe da LABek egindako irakurketa:

Inposatutako ESI ereduan (lehen arreta eta espezializatua uztartzen dituena) ikusten ari gara Lehen Arreta nola ari den garrantzia galtzen egunero, kategoria batzuen desagertzea, funtzio zehaztugabetasuna, lan karga handiagoaren aurrean ez dute plantilla indartzen, kontratazioa irregularrak eta nahierara, edozein gatazkaren aurrean babesik eza eta abandonaturik egotearen sentsazioa… ESI hauen lehentasun zerrendetan ez gara agertzen.

LABen Lehen Arreta oinarrizkoa dela defendatu dugu eta indartzeko lan egiten dugu. Hau dela eta, iaz LEHEN ARRETA DEFENDA DEZAGUN kanpaina hasi genuen Osakidetzako osasun zentro eta anbulatorio guztietan. Hasteko, langile guztien iritzia ezagutzea izan genuen helburu eta horretarako emailez bidezko inkesta bidali. Emaitzek arrazoia eman ziguten:

-Langileek ez zuten benetako integraziorik ikusten
-Gero eta zuzendari eta buruzagi gehiago dagoen sentsazioa
-Ez dago irizpide bateraturik. Anbulatorio bakoitza mundu bat da.
-Arreta kalitatea jaitsi da (itxaron zerrendak, adibidez) eta barne gatazkak elikatzen dira.

Kanpainaren bigarren urratsa ESI eredu berria aurkeztea izan zen. Eredu horretan Lehen Arreta sendo baten aldeko apustua egiten dugu, benetan duen inportantzia emanez osasunean, promozioan, prebentzioan, heziketan eta baita dibulgazio lanetan ere. Horretarako herritarren kolaborazioa proposatzen dugu, jendeari eskainitako zerbitzuetako kopurua handitzea, langileen kategoria guztien presentzia bermatzea, aurrekontuak handitzea,…eta ekimen honi babesa emateko, sinadura bilketa antolatu genuen. Emaitzek berriro arrazoia eman digute. Langile kopuru handi batek daukagun ESI eredua aldatu nahi du.

Hau guztia publikoki irudikatzeko hileta egin dugu, utzikeriagatik hiltzen den Lehen Arreta lurperatzeko, hain zuzen ere,  Errontegi Osasun zentroan (Barakaldo-Sestao ESIn) salatzen ari garen adibide argia baita. Osasun zentro horrek oraindik 5 urte ez dituenean bete Lehen Arretako arazo orokorrez gain, azpiegiturakoak ere baditu:

-Teilatua estaltzen duena asfaltozko geruza ALDREBEZ ipini zuten, eta horren emaitza: 3. solairua zurkaiztuta eta teilatua erortze arriskuan.
-Ur berorik ez dago
-Aldaketa geletan ez dago komunik
-Garajea ezin da erabili
-Hainbat zonaldetan kiratsa jasanezina..

Eta hori nahikoa ez balitz osasun zentroak EZ DU BIZIGARRITASUN BAIMENIK.
 

 

 

18 kaleratze Caprabo-Eroskin

0

Atzo, 4 Caprabo denden itxiera eta 18 langileen kaleratzea salatzeko Caprabo-Eroskiko langileek hiru egunetako grebari hasiera eman zioten. Duela aste bete, Eroski taldeak urtez-urte irabaziak izanik, Iruñeko lau denden itxiera komunikatu zuen, horietako bi Errotxapean, bat Olite kalean eta beste bat Arrosadian eta Eroskik 18 langile kaleratu ditu, bestelako konponbiderik planteatu gabe. Argi dago, Eroskik lanpostu nahikoak dituela, eta Nafarroan dituen hamaika dendetan langileak birkolokatzeko aukera duela.

Feminismoaren garaia da! Un paso feminista desde el sindicalismo

0

Atzo Iruñerriko emakume afiliatuon batzarra egin eta egungo Nafarroako emakumeon egoera lan munduan aztertu genuen. Bilkuran aurrera begirako zenbait erronka zehaztu geniteun eta norabide horretan Iruñerriko LAB sindikatuko emakumeok, tresna berri bat aurkeztu genuen: PIKETE FEMINISTA.

Datuek erakusten duten moduan, emakumeak lan merkatura sartu izanak ez du ekarri zaintza lanen banaketa erantzunkidea batetik, ezta lan merkatuan lan baldintzen parekatzea, bestetik. Lan merkatuan emakumeen presentzia handitzeak eta nolabait “normalizatu” izanak, lan merkatua arautzen duten printzipio androzentrikoak eta logika heteropatriarkala ez ditu aldatu. Emakume langileok pairatzen dugun diskriminazioa egiturazkoa baita.

Gure ustez, bada garaia sistema kapitalista hetereopatriarkalaren logikaren baitan kokatzen diren berdintasun lege, politika eta neurrietatik haratago benetako politika feminista ausartetara jauzia emateko.

Norabide horretan, Iruñerriko LAB sindikatuko emakumeok, tresna berri bat sozializatu nahi dugu: PIKETE FEMINISTA.

Emakume langileen egoerak ikustarazteko, protagonismoa emakume langileengan jartzeko, emakume langileak ahalduntzeko eta lan eremuan pairatzen dugun errealitatearen bozgorailu eta motorea izateko, PIKETE FEMINISTA bezalako tresna bat behar dugula uste dugu.

Pikete feminista, praktika feminista ekintza sindikalean txertatu eta emakume langileen arteko aliantza lortzeko tresna bat izatea nahi dugu. Baita mugimendu feministarekin elkarlana burutzeko ere.
 

 

 

EHUn sor daitezkeen ezberdintasun eta iritzi kontrajarriei era elkarrizketatuan konponbidea emateko saiakera egin behar da

0

Euskal Herriko Unibertsitateak eztabaida, ekimen eta pentsamendu kritiko eta autokritikoaren gune izan behar du. Horregatik, Bilboko Ingeniaritza Eskolan identifikaturiko 200 ikasle horiei ezelako oinarri eta babes demokratikorik ez duen Mozal Legea aplikatzeko edozein ekimen bertan behera uztea eskatzen dugu.

Unibertsitate-komunitate osoaren eta horren baitan, sektore ezberdinen eskubide demokratikoak bermatu behar dira. Ekimenak antolatzea, unibertsitatearen instalazioak erabiltzea eta, are, itxialdia egitea eskubide horien adierazle dira.

Arauak, edozein arau, sektore guztiok ditugun eskubideen bermatzaileak izan behar dira. Eskubide horien egikaritzean, baina, elkarren arteko begirunea eta errespetua ezinbestekotzat jotzen dugu.

UPV/EHUren egunerokotasunean sor daitezkeen ezberdintasun, iritzi kontrajarri eta abarri era elkarrizketatu eta adostuaren bidez konponbidea topatzeko benetako saiakerak egiteko deitzen ditugu ikasle eta agintariak.