Azken egunotan irakasleak eskoletara joatera behartzen dutelako berriak heltzen ari zaizkigu. Badaude zuzendaritza taldeek klaustro presentzialak egiteko deitu dituzten langileak, edota beren borondatez eskolara joatea erabaki duten irakasleak ere. LABetik salatu nahi dugu horrelako erabakiak osasun publikoaren aurkakoak direla, eta langile guztiei dei egiten diegu zenbaitek erakusten ez duten arduraz jokatzeko: ezinbestekoa denean soilik eskolara joatea, eta beti osasun-neurri guztiak beteta; eta, horiek betetzen ez badira planto egitea, eta beharrezkoa balitz ikuskaritzan zein epaitegietan salatzea ere.

COVID-19aren ondorioz burutzen ditugun ekintzetan ez dago soilik bakoitzaren osasuna kolokan, gure herrietako haur zein nagusien bizia ere dago jokoan. Horregatik, hezkuntza zentroetan lan-osasunerako eta segurtasunerako neurriak betetzen ez diren kasuetan langileei planto egiteko deia egiten die LAB sindikatuak, eta bide penaletara joko duela iragarri ere. 

Etxean gelditzea, zaintza-lanak burutzea eta elkar babestea inoiz baino beharrezkoagoak dira ataka honetatik onik aterako bagara.

LABek azpimarratu nahi du lan presentziala burutu ahal izateko justifikatua egon behar dela ezinezkoa dela etxetik egin. Kasu horretan, beti ere beharreko prebentzio neurriak bete behar dira. Langile guztion eskubidea da beharrezkoak diren osasun-neurri guztiak betez lan egitea. Astakeria hutsa da ondoren zerrendatzen diren puntuak bermatu gabe lanera itzultzea:

1. Distantziak: Eskolara sartzea beharrezkoa bada, langileen artean 2 metroko distantzia bermatu daitekeela exijitu behar dugu.

2. Norbere Babeserako Ekipamenduak (maskarak, eskularruak, gel desinfektantea): Eusko Jaurlaritzaren betebeharra da material hau langileei bermatzea. Ez dugu onartuko langile bakoitzak farmazian erostea izatea aterabidea.

3. Tenperatura: Eskolako sarreran bertaratzen diren langileei tenperatura hartzea exijituko dugu.

4. Frogak: eskolara bertaratzea egunetan luzatuko den neurria izango bada, langileei test-ak burutzea exijituko dugu.

5. Materialaren partekatzea: Ordenagailuak, dokumentuak, materiala orokorrean… langileek partekatu beharko ez dutela exijitzen dugu.

6. Garbitzaileekin koordinazioa eta haien osasunerako bermea: garbitzaileek aurreko puntuetan adierazitako neurriak betetzen direla egiaztatuta, haiekin koordinatuz, erabiltzen den material zein ikutzen den guztia garbitu eta desinfektatua izango dela exijituko dutu.

Aipatutako 6 puntuak betetzen direla bermatzea ezingo da inoiz izan irakasle, hezitzaile, sukaldari edota garbitzaileen ardura. Hauek lanera gerturatzeko gutxieneko baldintzak dira. Horiek betetzen ez badira, edo eskolara bertaratzeko arrazoia justifikatua ez bada (telelanaren bidez burutu ezin bada), eskolako atean planto egingo dugu gure arteko segurtasun neurriak hartuta. Langileok ezin dugu osasuna jokoan jarri Lakuako gobernuaren inprobisazio eta lan egitera behartzeko presioen ondorioz.

Planto dinamikarekin batera, beharrezko neurriak hartu ditzaten, lan ikuskaritzara joko dugu eta alarma egoeran langileak lanera bidaltzeagatik lan osasunerako eta segurtasunerako neurriak hausten diren kasuetan ardura penalak eskatzeko prozedurak abiatuko ditu LABek.