Hiru urte iragan dira Noaingo (Nafarroa Garaia) Knauf lantegiko plantillak enpresa interpelatzea erabaki zuenetik, Kimikako hitzarmen estatalak ezartzen dizkien lan baldintzak hobetzeko hitzarmen bat adosteko. Hiru urte horietan enpresa luzamendutan aritu da, ez ditu gauzak behar bezala zehaztu eta, are gehiago, LABeko ordezkariarekiko errespetu faltak izan ditu. Hori dela eta, faktoria txiki horretako langileek erabaki dute planto egitea eta urriaren 18an, 19an eta 20an lanuzte partzialak egitea, baldintza duinak ezarriko dituen akordio baten alde.
LAB sindikatuaren iritziz, Espainiako Kimikako hitzarmena ez da nahikoa Nafarroako errealitaterako, eta horregatik hitzarmen propioa lortzearen alde dago. Baina ailegatu bitartean, Knaufen kasuan, LABek eta langileek beren lan baldintzak duinduko dituen akordioa lortu nahi dute enpresarekin. Oraingoz ez da posible izan, enpresak negoziazioa bere interesen arabera luzatu duelako eta ordezkari sindikal bakarrarekiko errespetu falta ere izan duelako.
Testuinguru horretan, Knaufeko langileek erran dute nahikoa dela eta planto egin dute: lanaldi partzialak eginen dituzte urriaren 18, 19 eta 20an, 12:00etatik 13:00etara eta 14:00etatik 15:00etara. Gaurko lanuztea arrakastatsutzat har daiteke, eta garrantzitsua da nabarmentzea bertze enpresa batzuetako langileek eman duten laguntza; bertzeak bertze, BSH enpresakoek, Knaufek ekoizpenaren %90 egiten baitu haiendako. BSHn, Enpresa Batzordeak Knaufen egiten ari den borrokarekiko elkartasun mozioa aurkeztuko du.
Hiru lanuzte egun hauek hasiera bat bertzerik ez dira. Knaufeko langileek argi dute zein den helburua, eta ez dute atzera eginen lortu arte: lan-baldintza duinak eta enpresaren aldetik harreman normalizatua eta errespetuzkoa. Hiru egun horietako lanuzteen ondoren, enpresak bere jarreran segitzen badu, mobilizazio gehiago egonen dira.
