2024-05-22
HomeEkintza PolitikoaPalestinarekin elkartasunez larunbatean Donostian deituriko mobilizazioa babesten dugu

Palestinarekin elkartasunez larunbatean Donostian deituriko mobilizazioa babesten dugu

Gazako eta, oro har, Palestinako egoera dramatikoa egunetik egunera okertzen ari da Israelgo armadaren erasoen ondorioz. Atzo Gazan misil batek ospitale bat suntsitu eta ehunkada hildako eragin izanak egoeraren krudeltasuna agerian uzten du. Egoeraren larritasunak iniziatiba hartzea eskatzen du, Palestinarekiko elkartasuna adieraztea eta Israelen gerra krimenak salatzea.

Ez ditugu berriz gatazkaren zifrak errepikatuko, 75 urtez luzatzen den Israelen okupazioaren eta apartheidaren dimentsioa ezagun baitugu denok. Nazio Batuen ebazpenek, giza eskubideen aldeko eragileek, sindikatu, alderdi politiko eta eragile sozialek Palestinan gertatzen zena aspalditik salatu izan dugu, eta orain, zoritxarrez, salatzen genuen biolentzia espirala Palestinarren kontrako garbiketa etniko bilakatu da.

Mundu guztia ari da jarraitzen Gazan gertatzen ari den sarraskia. 3.000 hildakotik gora eta 110.000 pertsona zaurituak. Baztanen tamainako lurralde batean bi milioitik gora pertsona urik, argindarrik, eta janaririk gabe, bonben azpian erabat harrapatuta mundu mailan dagoen zeru zabaleko kontzentrazio eremurik handienean.

Israelen bortizkeria ez da soilik Gazara mugatzen eta bai Zisjordanian, baita Israel barruan ere, palestinar komunitateen kontrako biolentzia etengabea da. Lanera Israelgo estatura joandako langile palestinarren erailketek, palestinar komunitateen desagerpen fisikoak eta kolono nahiz soldaduen aldetik palestinarren kontrako eraso armatuek ez dute etenik.

Azken asteotan esan dugu Palestinak elkartasuna eta konponbidea behar dituela. Palestinako herriak amesteko, bere etorkizuna erabakitzeko, aske izateko eta duintasunez bizitzeko eskubidea du. LABek bide diplomatikoak aktibatzea eskatzen du, Palestinaren okupazioa amaitzeko baldintzapean eta Nazioarteko Komunitatearen babesarekin elkarrizketa eta negoziazio bat egon dadin eta, Nazio Batuen ebazpenak aintzat hartuta, Palestina herri aske eta seguru bat izan dadin.

Aipaturiko guztiagatik, LABek, bere erantzukizunari jarraikiz eta Palestinarekiko elkartasunez, bihar eguerdiko 12:00etan Bilboko Eliptika plazan eta 12:30ean Iruñeko Udaletxe plazan sindikatuek deitu dituzten mobilizazioetan parte hartzeko deia egin du. Aldi berean, LABek larunbat honetan Donostian Gazako sarraskia gelditu! Konponbide politikoa orain! Palestinarekin Elkartasuna lelopean deituta dagoen mobilizazioari bere atxikimendua eta babesa adierazten dio.

AZKEN ALBISTEAK | ÚLTIMAS NOTICIAS

Euskal hitzarmenen lehentasuna bermatuta, esparru propioaren eraikuntzan urrats gehiago eskatu ditugu

Aurreko erredakzioa hobetzeko LABetik egin genituen eskarietako batzuk aintzat hartu dira; ondorioz, Euskal Herriko langileek bertako hitzarmenen lehentasuna bermatu ahal izango dute.

Osakidetzako zuzendaritzak eta Osasun Sailak ikuztegiak publifikatzeari ekin behar diote, LABek lortutako EAEko Justizia Auzitegi Nagusiaren epaiaren ondoren

Eskaera formal bat aurkeztu dugu Osasun Sailean, Osakidetzan ikuztegi lanak publifikatzeko behar diren elkarrizketei ekiteko asmoz.

Gasteizko Francisco Vitoria institutuan lan-osasun arloko prebentzioa bermatzeko exijitu dugu

Ikastetxeko langileek eta sindikatuok elkarretaratzea egin dugu Gasteizko Hezkuntza Ordezkaritzaren aurrean. Hezkuntza Sailak eta ikastetxeko zuzendaritzak uko egin diote arrisku psikosozialen ebaluazioa egiteari.